फीलीप्पी सेहेराअ मोंडोळाल पावुलाअ कागलों
1
पावुलाअ सालाम
1 फीलीप्पी सेहेराअ ख्रीस्ती मोंडोळाअ वोळीलाहीं, आने मोंडोळाअ कामाम तीयाहांन मोदोत केअनाराहां, आने पोरमेहेराअ बीहरा बादा लोकुंह! आंय ख्रीस्तुअ सेवोक पावुल तुमनेंह मांअ सालाम देता ईं कागलों लेखुंह। मांअ आर्योअ सेवोक तीमोथी बी तुमनेंह तीयाअ सालाम देहे।
2 आपुअ पोरमेहेर बाहको आने मालीख ईसु ख्रीस्त तुमाहांपेअ मेरबानी केअ आने तुमनेंह सुख-सांती दे!
फीलीप्पी मोंडोळाअ लोकाहांअ खातुर पावुल पोरमेहेराल ओरुज केअहे
3 जीयु बी वोखत तुमां मांन ईत आवतेंह, तांहांअ आंय तुमांअ लीदे मांअ पोरमेहेराअ आभार मानुंह। 4 आने जीयु बी वोखत आंय तुमांअ बादाहांअ खातुर पोरमेहेराल ओरुज कीअहुं, तीयु वोखत खुस वीईन आंय तेंहकींअ कीअहुं। 5 काहाका, जीदीहनेअ तुमां ख्रीस्त ईसुपेअ वीसवास थोव्यो, तीदीहनेअ आमी लोगुंअ बीहरा लोकाहांन हारी गोठ जाहेर केरांअ कामाम तुमां मांन मोदोत केअयीह, आने एंहकींअ कीईन तुमां बी तीया कामाम गोंवांदी बोंण्येंह। 6 आने तीयाअ लीदे मांन खातरी हाय का, जीया पोरमेहेरांय तुमांअ जीनगींहम ईं हारों काम चालु केअयोंह, तो ईं काम चालु राखीअ आने ख्रीस्त फाचो आवीअ तीदीह तों पुरों कीअ। 7 तुमांअ खातुर मांअ मोनाम खुब लागणी हाय तीयाअ लीदे, तुमांअ बादाहांअ बाबोताम आंय एंहडी धारणा राखुं तों मांन बोराबोरुज लागेह। काहाका, आमी बी, मोंजे का, आंय जेलाम कोंडाअयोह एंहडाम बी, आने हारी गोठीपेअ मांहेंअ पाको वीसवास केअ तीयाअ खातुर ते गोठ खोरेखोर पोरमेहेराअज गोठ हाय तों तीयु गोठीअ वीरुद गोगनारांअ आगलांअ साबीत केरांअ फीरत्लो तांहांअ बी तुमां पोरमेहेराअ मेरबानीकींअ मांन मीलला ईया कामाम मोदोत केअयी आने एंहकींअ कीईन बी ईंहमें भाग लेदोह। 8 जेंहकींअ ख्रीस्त ईसु तुमाहांपेअ खुब माया राखेह, तेंहकींअज आंय बी तुमाहांपेअ खुब माया राखुंह। आने आंय तों खेरोंज आखुंह तीयाअ पोरमेहेर साक्सी हाय।
9 तुमांअ खातुर मांअ एंहडी ओरुज हाय का, तुमां पोरमेहेराअ बाबोताअ हाचाय जांयन आने खेरों आने झुटों पारखीन एक-बीहरापेअ वादारे ने वादारे माया राखतें रा, 10 ईयाअ खातुर का, जों हाराम-हारों काम हाय, तों तुमां पारखी सेका, आने ख्रीस्त फाचो आवीअ तीदीह डागु वोगुराअ आने गुना वोगुराअ वेरा, 11 आने जें हाचें कामें ईसु ख्रीस्त तुमनेंह केरावेह, तें केअतें रा। तीया कामाहांअ लीदे बीहरें मांहेंअ पोरमेहेराल खुब मान दे आने तीयाअ गुणगान केअ।
केदी तोरीके पावुल आने हारी गोठीअ फेलावो
12 मांअ पावु-बोंअयुहुं, ईं तुमां जांय ला एंहडी मांअ मोर्जी हाय: आंय जेलाम कोंडाअयोह तेबी, हारी गोठ फेलावांअ काय ओळचोण नांह आली। पेन उलटों, तीयाकींअ वादारे ने वादारे लोक ते गोठ उनाअयाह। 13 तीयाअ लीदे आखा मेहेलाअ चोकीदार आने ईंहींर्याअ बीहरा बादा लोक जांय गीयाह का, आंय ख्रीस्तुअ सेवा कीअहुं तीयाअ लीदेज जेलाम कोंडाअयोह। 14 आने आंय जेलाम कोंडाअयोह तेबी, मांअ खुब ख्रीस्ती पावुह वादारे ने वादारे हींमोत राखीन बीहराहांन पोरमेहेराअ गोठ जाहेर केअताह।
15 होकीकोतुम ता थोळाक ख्रीस्ती पावुह मांअपेअ आदराय राखीन आने होरीफायुवालों मोन राखीन ख्रीस्तुअ बाबोताअ हारी गोठ जाहेर केअताह। पेन बीहरा ता खेरा मोनाकींअ ते गोठ जाहेर केअताह। 16 खेरा मोने हारी गोठ जाहेर केअनारा पावुह मांअपेरीअ तीयाहांअ मायाअ लीदे एंहकींअ केअताह। काहाका, ते जांअताह का हारी गोठ खोरेखोर पोरमेहेराअज गोठ हाय। तीयु गोठीअ वीरुद गोगनारांअ आगलांअ तों साबीत केरांअ पोरमेहेरांय मांन नीम्योह। 17 पेन आदराय राखीन हारी गोठ जाहेर केअनारा ता, हारा ईरादाकींअ नांय, पेन सोताअ लाबुअ खातुर ते गोठ जाहेर केअताह। एंहकींअ कीईन, आंय जेलाम कोंडाअलो हाय तांहांअ मांन वादारे दुखी केरांअ तीयाहांअ वीचार हाय।
18 ईंहमें काय नांय। हारा ईरादाकींअ का खोटा ईरादाकींअ, गोंवें तीयु रीते ते बादा ता ख्रीस्तुअ बाबोताअ हारी गोठुज जाहेर केअताहकने? ईयाअ मांन आनोंद हाय आने आजी बी मांन आनोंद वीअ। 19 काहाका, आंय जांअहुं का तुमांअ ओरुजुंहकींअ आने ईसु ख्रीस्तुअ आत्माअ मोदोताकींअ आंय जेलाम नेअ सुटी जाहें। 20 मांअ एंहडी खुब मोर्जी ने आस्या हाय का मांन ने ख्रीस्तुल नाजवावे एंहडों केल्लों बी काम आंय कीदीह बी नांय क्युंव। पेन जेंहकींअ आंय कायोम हींमोत राखुंह, तेंहकींअ आमी बी हींमोत राखुं, ईयाअ लीदे का, आंय जीवुं का मोंव, मांअ जीवोनाअ बादा ओनुभोव देखीन लोक ख्रीस्तुल मान दे। 21 काहाका, आंय जीवुं तों ख्रीस्तुअ मोडाय केरांअ खातुरुज हाय, आने आंय मोय जांव तेबी मांन वादारे लाबुज हाय। 22 जो आंय आजी जीवुं ता, हारी गोठ जाहेर केरांअ काम आंय आजी वादारे कीअ सेकेंह। तीयाअ लीदे, आजी वादारे जीवुं का मोय जांव, ईया बेनाहांमेनेअ केल्लों पोसोंद केरुलोंअ तों मांन नांह हुजतों। 23 ईया बेनाहांमेनेअ केल्लों पोसोंद केरुलोंअ तों आंय नोक्की नांह कीअ सेकतो। मांअ एंहडी मोर्जी हाय का, ईं सोरील सोळीन आंय ख्रीस्तुअ हाजरीम र्युंव तोंज मांअ खातुर वादाराम-वादारे लाब हाय। 24 पेन तुमांअ फायदाअ खातुर आंय आजी जीवतो र्युंव तीयाअ वादारे जोरुल हाय। 25 मांन ईयु गोठीअ खातरी हाय। आने तीयाअ लीदे आंय जांअहुं का, तुमां खुसीम रीईन वीसवासाम वादतें जा तींहमें तुमांअ मोदोत केरांअ खातुर आंय तुमांअ बादाहांअ होच आजी जीवतो रेहें। 26 तीयाअ लीदे, आंय फाचो तुमांअहीं आवुं तांहांअ ख्रीस्त ईसुअरी जोळाअली तुमांअ जीनगींहम मांअ लीदे खुस वेरांअ तुमनेंह आजी वादारे कारोण मीलीअ।
27 आमी खास गोठ ता ए हाय का, ख्रीस्तुअ हारी गोठी पोरमाणे चालनारांहन सोबे तेंहकींअ तुमां जीवा, ईयाअ खातुर का, आंय आवीन तुमनेंह उरु-बुरु ह्युंव का सेटे रीईन तुमांअ बाबोताम उनांव तांहांअ मांन एंहडी खोबुर पोळे का, तुमां बादें होप कीईन वीसवासाम मोजबुत रेतेंह आने तीयु गोठीअ वीरुद केअनारांयपेअ एक मोनुअ बोंणीन आत्मीक रीते जीत मीलवांअ कोसीस केअतेंह। 28 तुमांअ वीरुद केअनाराहांन तुमां जाराक बी मां बीतें। एंहकींअ कीईन तीयाहांन साबीती देखावी सेकाह का, आत्मीक रीते ते हाराय जाय आने तुमां नोरकाअ सीक्सामेनेअ वाचाय जाहा। आने ए साबीती पोरमेहेरुज दीअ। 29 काहाका, तुमां ख्रीस्तुपेअ वीसवास केरा ओतोंअज नांय, पेन तीयाअ मोडाय वादावांअ खातुर दुखें बी वेठा तीयाअ लीदे पोरमेहेरांय तुमनेंह राज्या देदीह। 30 आंय हारी गोठ जाहेर केरांअ तुमांअ सेहेराम पेअलीअ वोखत आललो तांहांअ, हारी गोठीअ लीदे जें दुखें वेठता तुमां मांन देखलो, आने आमी जें दुखें आंय वेठुंह एंहकींअ तुमां उनाअताह, तेंहडें दुखें तुमां बी आमी वेठतेंह।