एफेसु सेहेराअ मोंडोळाल पावुलाअ कागलों
ईया कागलाअ बाबोताम बेन गोठ्या
एफेसु सेहेर का मोंडोळ आमी हायाताम नांह। पेन पावुलाअ जोमानाम तों खुब मोडा-मोडा बाजारुंहवालों खुब मालदार सेहेर आथों। आज जीयाल आपुंह तुरकीस्तान देस आखतेंह, तींहीं तों सेहेर वोसलों आथों।
एफेसु सेहेराअ वीसवास्यांहन पावुलुंह लेखला ईया कागलाअ खास गोठ ए हाय: “पोरमेहेरांय बोंणावला बादाल ख्रीस्तुअ मारफोते एक-बीहराअरी गोठवुलोंअ आने ख्रीस्तुल बादाहांअ उपरी थोवुलोंअज, नोक्की केअला सोमोयाम पोरमेहेर पुरी केरांअ हाय ते योज्ना हाय” (१:१०)। ईया कागलाम पावुलुंह पोरमेहेराअ लोकाहांन एंहडो हुकोम केअयोह का, ख्रीस्तुअ आर्याअ तीयाहांअ जोळाणुअ लीदे ते एक बोंणी जाय आने दुन्याअ बादें मांहेंअ पोरमेहेराअ मारफोते एकताम आवी जाय एंहडी पोरमेहेराअ जे योज्ना हाय, ते ख्रीस्ती मांहेंअ सोताअ हारा कामाहांकींअ पार पाळे। कागलाअ पेअलाअ भागाम पावुल ईयु एकताअ बाबोताम वादारे आखांअ एक-एक कीईन मुददा लेखेह। ते मुददा एंहकींअ हाय: पोरमेहेर बाहकांय सोताअ लोकाहांन पोसोंद केअया; तीयाअ पोयरा ईसु ख्रीस्तुंह तीयाहांन तीयाहांअ पापाहांअ सीक्सामेनेअ आने पापी सोबावाअ बांदाणुमनेअ सोळव्याह; आने सोते जों वोचोन देदलों तों तीयांय पोवीतोर आत्माअ मारफोते पुरों केअयोंह। कागलाअ बीहरा भागाम पावुल वाचनारांहन आखेह का, तें बादें एंहकींअ जीवे का, जीयाकींअ ख्रीस्तुअरीअ तीयाहांअ एकता मोंडोळु तोरीके तीयाहांअ एक-बीहराअ आर्याअ जीवोनाम होकीकोतुम देखाय आवे।
ख्रीस्तुपेर्याअ वीसवासाअ आदारे उबी वेअली ख्रीस्तींअ एकता केंहडाअ होच हाय तों देखावांअ खातुर, पावुल जुदी-जुदी वोस्ताहांअ दाखला देहे। दाखला तोरीके, मोंडोळ ता मांहांअ सोरीलाअ होच हाय, आने ख्रीस्त तीया सोरीलाअ मुंनकाअ होच हाय; आने मोंडोळ ता बांदाअता बोंगलाअ होच हाय, आने ख्रीस्त तीया बोंगलाल आदार देनारा ढोगळाअ होच हाय; आने ख्रीस्त वोल्लाअ होच हाय ने मोंडोळ वोल्लीअ होच हाय। ख्रीस्तुअ मारफोते पोरमेहेर लोकाहांपेअ जे मेरबानी केअहे ते आखता ईं कागलों लेखनारो पावुल एंहडो उहराय जाहे का, तीया बाबोताम आखता-आखता तो खुब वीचार जाणावेह। ख्रीस्तुअ तीयाअ लोकुंहपेरीअ माया, तीयांय देदलो सोताअ भोग, पापाहांअ माफी, पोरमेहेराअ मेरबानी जेंहडा मुददाहांम पावुल ईया कागलाअ बादया बाबोत्या होमावी देहे।
ईया कागलामेरीअ बाबोतीहींअ रुपरेखा
आगली गोठ १:१-२
ख्रीस्त आने तीयाअ मोंडोळ १:३-३:२१
ख्रीस्तुअ आर्याअ जोळाणुअ लीदे मीलनारों नोवों जीवोन ४:१-६:२०
सेल्या गोठ्या ६:२१-२४