गालातीया वीस्ताराअ मोंडोळुंहन पावुलाअ कागलों
ईया कागलाअ बाबोताम बेन गोठ्या
हारी गोठ जाहेर केरांअ पावुल सोताअ पेअली मुसाफोरीम नींगलो तांहांअ तीयांय रोम राज्याअ गालातीया वीस्ताराम रेनारा लोकाहांन हारी गोठ जाहेर केअली। “मालीख ईसुज लोकाहांन तीयाहांअ पापाहांअ सीक्सामेनेअ वाचावनारो हाय” एंहकींअ माननारें पोरमेहेराअ मेरबानीअ लीदे तीयाअ नोजराम गुना वोगुराअ गोंणाअतेंह एज ते हारी गोठ आथी। पेन थोळाक वोखत हातींअ एंहडों बोंण्यों का, येहुदी लोकाहांमेनेअ ख्रीस्ती बोंणला ने पावुलाअ बोदाअ वीरुद केअनारा थोळाक लोक गालातीया वीस्ताराअ मोंडोळुंहम गीया आने तींहींर्याअ वीसवास्यांहन हीकवांअ टेक्या का, “पोरमेहेराअ नोजराम गुना वोगुराअ गोंणायांअ खातुर ईसुल बी मानांअ जोजे, पेन आरी-आरी मोसेंय देदला नीयोम बी पालांअ जोजे।”
एंहडा खोटा सीक्सोणुअ पोरमाणे चालनारा गालातीया वीस्ताराअ वीसवास्यांहन फाचें हाचा सीकसोणुअ पोरमाणे चालनारें बोंणावांअ खातुर पावुलुंह ईं कागलों लेख्योंह। ईया कागलाम पावुल, मोसेंय देदला नीयोमाहांअ बांदाणुम रांअ एंहडा खोटा सीकसोणुअ वीरुद केअहे। आने तो एंहकींअ होमजावेह का, मोसेंय देदला नीयोमाहांअ केअता पोरमेहेराअ मेरबानीज चोळीयाती हाय, आने तीया नीयोमाहांअ बांदाणुम रेवुलोंअ तीयाअ केअता पोरमेहेर जों सोतोंतोर जीवोन देहे तों जीवुलोंअज चोळीयातों हाय।
मालीखाअ खास चेलो बोंणांअ तेळों ईसु ख्रीस्तुंह सोतेज तीयाल देदलों एंहकींअ आखीन पावुल कागलाअ सोरुवातुमुज लेखेह का, मालीखाअ खास चेलाअ होददो तीयाल मील्योह तो बोराबोरुज हाय। आने पावुल चोख्खा सोब्दांहम आखी देहे का, मालीखाअ खास चेला तोरीके तीयाल केल्ला बी मांहांय नांय, पेन पोरमेहेरांय सोतेज नीम्योह। तो आखेह का, पोरमेहेरांय तीयाल येहुदी जातीअ नांह तेंहडा लोकाहांम खास कीईन सेवा केरांअ नीम्योह। एंहकींअ आखीन हातींअ, तो खुब दोलील्या कीईन ए गोठ आगलांअ चालवेह: खाली ईसु ख्रीस्तुल मानीनुंज मांहुंअ पोरमेहेराअ नोजराम गुना वोगुराअ गोंणाअहे। “ख्रीस्तज मांहांअल तीयाअ पापाहांअ सीक्सामेनेअ वाचावी सेकेह” एंहकींअ माननारा लोकाहांम कुदरोती रीते पेदा वेनारी मायाकींअज तीयाहांअ जीवोनाहांम ख्रीस्ती चाल-चोलगोत्या नींगी आवत्याह ए गोठ, पावुल कागलाअ सेल्ला आदयायाहांम देखावेह।
ईया कागलामेरीअ बाबोतीहींअ रुपरेखा
आगली गोठ १:१-१०
मालीखाअ खास चेला तोरीके पावुलाअ आदीकार १:११-२:२१
पोरमेहेराअ मेरबानीअ बाबोताअ हारी गोठ ३:१-४:३१
ख्रीस्ती तोरीके मीलनारों सोतोंतोर जीवोन आने ख्रीस्तीअ फोरोज ५:१-६:१०
सेल्या गोठ्या ६:११-१८