कोरींथ सेहेराअ मोंडोळाल पावुलाअ बीहरों कागलों
ईया कागलाअ बाबोताम बेन गोठ्या
मालीखाअ खास चेला पावुलुंह कोरींथ सेहेराअ मोंडोळाअ लोकाहांन जों पेअलोंअ कागलों लेखलों, तीयाकींअ तीया मोंडोळाम सांती वीअ गेहली, आने तींहीं बादों बोराबोर चालत्लों। पेन थोळाक वोखत हातींअ, पावुलाअ वीरोदी लोकाहीं तींहीं तीयाअ वीरुदुअ वातावोरोण उबों कीअ देदलों। पावुलुल तीयाअ खोबुर पोळी तांहांअ, तीयांय मोंडोळाअ लोकाहांपेअ एक कोळोक कागलों लेख्यों, जों आमी आपुंहपेअ नांह। तीया कागलाकींअ मोंडोळाम पावुलुंह धारली ओसोर वेअली। तीयाअ खोबुर पावुलुल तीतुंह देदली। मोंजे, सोताल वेअली खुसी जाणावांअ पावुलुंह ईं कागलों लेखी मोकलुअलों।
कागलाअ पेअलाअ भागाम पावुल कोरींथ मोंडोळाअ आर्याअ सोताअ सोबोंदुअ बाबोताम आखेह। मोंडोळाम तीयाअ ओपमान वेअ एंहडों वातावोरोण उबों वेअलों आने वीरुद पेदा वेअलो तीयाअ जोवाबुम सोते काहाल कोळोक कागलों लेखलों, तों पावुल होमजावेह। आने तीया कोळोक कागलाअ कारोणे, मोंडोळाअ लोकाहांन सोताअ भुल होमजाअली, आने बादा एक होप कीईन रेता वीअ गेहला। तीयाअ खातुर पावुल सोताअ खुसी देखावेह। हातींअ तो, हाकळी वेठनारा येहुदीया वीस्तारुअ ख्रीस्ती लोकाहांअ मोदोताअ खातुर दान टोलवांअ उफ दे एंहडा सोब्दांहम लेखेह। सेल्ला आदयायाहांम पावुल सोते मालीखाअ खास चेलो आखावांअ काहाल लायोक हाय तों जाणावेह। काहाका, मोंडोळाम थोळाक एंहडा लोक पेदा वेअला का, जे सोताल मालीखाअ खेरा खास चेला आखावत्ला आने पावुलुल ते नोकली आखत्ला।
ईया कागलामेरीअ बाबोतीहींअ रुपरेखा
आगली गोठ १:१-११
पावुल आने कोरींथ सेहेराअ ख्रीस्ती मोंडोळ १:१२-७:१६
येहुदीया जील्लाअ गोरीब ख्रीस्तींअ मोदोताअ खातुर दान उगरावांअ बाबोत ८:१-९:१५
मालीखाअ खास चेला तोरीके पावुल सोताअ वाचावुम आखेह १०:१-१३:१०
सेल्या गोठ्या १३:११-१३