कोरींथ सेहेराअ मोंडोळाल पावुलाअ बीहरों कागलों
1
सालामाअ गोठ
1 ख्रीस्त ईसुअ खास चेलो बोंणांअ पोरमीहेरुंह पोसोंद केअलो आंय पावुल, कोरींथ सेहरुमेर्याअ पोरमेहेराअ मोंडोळाअ लोकाहांन आने आखाया वीस्ताराम रेनारा बादा ख्रीस्ती लोकाहांन ईं कागलों लेखुंह। आंय ईं कागलों लेखुंह तांहांअ, आपुअ मेरालो ख्रीस्ती पावुह तीमोथी बी ईंहीं मांअरी हाय। 2 पोरमेहेर आपुअ बाहको, आने मालीख ईसु ख्रीस्त तुमाहांपेअ मेरबानी केअ आने तुमनेंह सुख-सांती दे!
पोरमेहेर आपनेंह दीलासो देहे
3 आपुअ मालीख ईसु ख्रीस्तुअ पोरमेहेर आने बाहकाअ आपुंह गुणगान केअजी! तो खुब दायालु बाहको आने पुरे-पुरो दीलासो देनारो पोरमेहेर हाय। 4 जांहांअ बी आमाहांपेअ दुखें पोळे तांहांअ आमनेंह दीलासो देनारो ता ओज हाय। तीयाअ लीदे, तो आमनेंह देहे तीया दीलासाकींअ आमां गोंवें तीया दुखुम पोळला बीहरा लोकाहांन दीलासो दीअ सेकताह। 5 ख्रीस्तुंह खुब दुखें वेठयें आने तेंहकींअज मालीखाअ खास चेला आमां बी खुब दुखें वेठताह; आने जेंहकींअ पोरमेहेरांय ख्रीस्तुल खुब दीलासो देदो, तेंहकींअ तो ख्रीस्तुअ आर्याअ आमांअ सोबोंदुअ लीदे आमनेंह बी खुब दीलासो देहे। 6 जांहांअ बी आमां दुखें वेठताह, तांहांअ तुमनेंह केंहकींअ दीलासो देवुलोंअ तों आमां हीकी लेताह, आने तुमां आत्मीक रीते मोजबुत बोंणतेंह; आने जांहांअ बी पोरमेहेर आमनेंह दीलासो देहे, तांहांअ तों देखीन तुमां बी तो दीलासो केंहकींअ मीलवुलोंअ तों हीकी लेतेंह; आने तीया दीलासाकींअ तुमां जीया दुखाहांअ आमां ओनुभोव केअताह, तेंहडें दुखें धीरोज राखीन वेठी सेक्तेंह। 7 तीयाअ लीदे, आमनेंह एंहडी पाकी खातरी हाय का, जेंहकींअ आमांअ होच तुमां दुखें वेठयेंह, तेंहकींअ आमांअ होच तुमनेंह पोरमेहेर दीलासो बी दीअ।
8 मेराला पावु-बोंअयुहुं, आसीया वीस्ताराम आमाहांपेअ पोळला दुखाहांअ बाबोताम तुमां जांणां एंहडी मांअ मोर्जी हाय। तींहीं आमाहांपेअ होदबार दुखें पोळलें, आने आमां ता जीवांअ आस्या बी सोळी देदली। 9 आमनेंह नोक्कीज लागलों का आमां मोय जानारा हाय। पेन तीयाअ पोरीणामे, आमां सोताअ गोतीपेअ भोरुचो राखांअ सोळी देदों आने मोअला मांहांहांन जीवतें केअनारा पोरमेहेरापेअ भोरुचो राखांअ हीक्यों। 10 गीया दीहाहांम तीयांय आमनेंह मोताअ मुंयांमेनेअ वाचावी लेदला, आने आमनेंह पाकी खातरी हाय का तो आमनेंह भोवीस्यांम बी एंहकींअज वाचावी लीअ। 11 मेरबानी कीईन आमांअ खातुर पोरमेहेराल ओरुज केरा आने एंहकींअ कीईन तुमां आमांअ मोदोत केरा। तांहांअ आमांअ सोलामोतीअ खातुर तुमांअ जेंहडा खुब लोकाहीं केअली ओरुज उनायन पोरमेहेर आमनेंह वाचावीअ आने तों देखीन खुब लोक तीयाअ आभार मानीअ।
पावुलाअ गोठवोणीम वेअलो फेरफार
12 बीहरा लोकाहीं अरी, खास कीईन तुमांअरी मांयुं aईमानदारीकींअ आने जीवुम पाप राख्या वोगुर वेहवार राख्योह। काहाका, ईंज पोरमेहेराल गोंवेंह। एंहडो वेहवार राखता मांयुं, जीयाल ख्रीस्तुपेअ वीसवास नांय केअनारा लोक ओकुल आखताह, तीयापेअ भोरुचो नांह राख्यो, पेन उलटों, मांयुं पोरमेहेराअ मेरबानीपेअ भोरुचो राख्योह। मांअ जीव बी ईयाअ साक्सी देहे आने ईयाअ मांन ओभीमान बी हाय। 13-14 काहाका, मांयुं तुमनेंह लेखलें कागलें ता वाचांअ आने होमजांअ हेल्लेंज हाय। तुमांअरी आंय कायोम ईमानदार आने हाचायुवालोज रीहुं तों तुमां पेअलांअ नांह होमज्यें। पेन मांन खातरी हाय का, भोवीस्यांम तुमां तों होमजी जाहा। हातींअ आपुअ मालीख ईसु ख्रीस्त फाचो आवीअ तीदीह, जेंहकींअ आंय तुमांअ बाबोताम ओभीमान राखेंह, तेंहकींअ तुमां बी मांअ बाबोताम ओभीमान राखाह। 15 तुमां मांअ ईरादो पुरी रीते होमजी जाहा एंहडी मांन पुरी खातरी आथी। तीयाअ लीदे, मांअपेनेअ बेन वोखत तुमनेंह आत्मीक फायदो मीले एंहडी मांअ मोर्जी आथी। मोंजे का, पेअलांअ एक वोखत तुमांअहीं आंय आवुं, 16 आने हातींअ माकेदोनीया राज्याम जायन तींहींनेअ फाचो बीहरी वोखत तुमांअहीं आवुं आने तुमनेंह फाचो मोदोत क्युंव, आने हातींअ येहुदीया जील्लाम जांअ वाट खोरचाअ खातुर तुमांहपनेअ मोदोत मीलवुं, एंहडी मांयुं गोठवोणी केअली।
17 एंहडी गोठवोणी कीईन बी मांयुं खास कारोणा वोगुर तीयाअ फेरफार कीअ टाक्यो एंहडों तुमनेंह लागेह का? ख्रीस्तुल नांय माननारा लोकाहांअ होच आंय बी सोताअज वीचार कीईन गोठवोणी कीअहुं एंहडों तुमनेंह लागेह का? तुमांअहीं आवांअ ‘हां’ पाळीन फाचो आंय आचकाअया वोगुर फीरी गीयो एंहकींअ तुमनेंह लागेह का? 18 नांह! ‘ओमुक बाबोत आंय केअहें’ एंहकींअ आखीन खास कारोणा वोगुर तीयाअ फेरफार कीअ टाकनारों मांहुंअ आंय नांह। जेंहकींअ पोरमेहेर सोते देदला वोचोनुमनेअ फीरी नांह जातो, तेंहकींअ तुमांअहीं आवांअ मांयुं जों वोचोन देदलों तों उपर्याअ दीले ‘हां’ आने होकीकोतुम ‘ना’ एंहडों बेन ओरथावालों नांय आथों। 19 आने एंहकींअज कीईन, पोरमेहेराअ पोयरो ईसु ख्रीस्त बी ‘ओमुक बाबोत आंय केअहें’ एंहकींअ आखीन तों नांय कीईन ठोगनारो नांह। ईया ईसु ख्रीस्तुअ बाबोताअज हारी गोठ आमां मोंजे, मांयुं, सीलांह, आने तीमोथींह तुमनेंह जाहेर केअली। तो ता जोंबी केरांअ आखेह तों पुरोंज केअहे। 20 काहाका, जोंबी वोचोन पोरमेहेर देहे तों ईसु ख्रीस्तुअ मारफोतेज पुरों वेअहे तीयाअ लीदे आने ख्रीस्तुंह आपुअ खातुर जों केअयोंह तीयाअ लीदे आपुंह आखतेंह का, “आंह, पोरमेहेरांय जों वोचोन देदलों तीयाअ पोरमाणे तीयांय केअयोंह।” आने आपुंह पोरमेहेराअ गुणगान केअतेंह। 21 तुमां आने आमां ख्रीस्तुअरी पाका पाये जोळाअलें हाय। तीयाअ आपनेंह खातरी केरावीन आपनेंह ख्रीस्तुअ लोकाहांअ तोरीके नीमनारो ओज पोरमेहेर हाय। 22 आपुंह तीयाअज लोक हाय तों देखावांअ तीयांय आपुंहपेअ नीसाणी केअयी वीअ तेंहकींअ, आपुअ मोनाहांम पोवीतोर आत्मा देनारो बी ओज हाय। तो पोवीतोर आत्मा पोरमेहेरांय आपुअ खातुर होरगाम जे आसीरवाद राखी थोव्याह ते आपनेंह नोक्कीज मीलीअ तीयाअ बीयानो हाय।
23 ता, मांयुं देदला वोचोनु पोरमाणे मांयुं तुमांअ मुलाकात काहाल नांह लेदी तों आमी आंय तुमनेंह आखुंह। पोरमेहेराल साक्सी राखीन आने मांअ सोताअ होम खायन आंय आखुंह, तुमां जों खोटों केअयोंह तीया बाबोताम कोळोक रीते आखीन तुमनेंह आजी वादारे दुखी नांय क्युंव तीयाअ खातुरुज आंय कोरींथ सेहेराम फाचो नांह आलो। 24 तुमांअ काय मानांअ जोजे तीया बाबोताम आमां तुमनेंह काय हुकोम नांह केअता। काहाका, आमां जांअताह का मालीखुपेर्याअ तुमांअ वीसवासाम तुमां मोजबुतुज हाय। उलटों, तुमां खुस वेरा तीयाअ खातुरुज आमां तुमांअरी मीलीन मेहनोत केअताह।