2
1 तीयाअ लीदे, मांयुं सोताअ खातुर aएंहडों नोक्की केअलों का, “आंय फाचो तुमांअहीं आवीन तुमनेंह दुखी नांय क्युंव।” 2 काहाका, जो आंय तुमांअहीं फाचो आवीन तुमनेंह दुखी केअतो ता, जीयाल मांयुं दुखी केअयों तीयाअ सीवाय मांन केडों खुस कीअ? 3 तीयाअ लीदे, तुमांअहीं आवांअ बोदले मांयुं तुमाहांपेअ आगलांअ कागलों लेखलों, ईयाअ खातुर का, तुमां जों खोटों केअयोंह तीयाअ खातुर तुमनेंह दुख वेअ, आने हातींअ आंय आवुं तांहांअ जीयांयपनेअ मांन खुसी मीलांअ जोजे, तीयाहांपेनेअ, मोंजे का, तुमांहपनेअ मांन दुख नांय मीले। मांन खातरी आथी का, मांयुं तुमनेंह जों केरांअ तीया कागलाम लेखलों, तेंहकींअज तुमां कीअहा आने तांहांअ आंय बी खुस वेअहें आने तुमां बी खुस वीअहा। 4 मांयुं खुब दुखी वीईन ने तोतलुअता जीवुअ आने रोळता-रोळता तुमनेंह तों कागलों लेखलों। तों कागलों मांयुं तुमनेंह दुखी केरांअ खातुर नांह लेख्यों, पेन आंय तुमांअ बादाहां पेअ कोतीअ बादी माया राखुंह तों तुमां जांणा तीयाअ खातुरुज लेखलों।
पावुलाअ वीरुद खोटों केअनाराल माफी दांअ बाबोताम
5 तुमांअमेर्याअ जीयांय दुख पाळ्योंह, तीयांय मांन एखलाल नांय पेन तुमनेंह बादाहांन बी दुख पाळ्योंह आने तुमांअ बादाहां पेअ तीयाअ थोळी-घोणी ओसोर पोळीह। (आंय थोळी-घोणी ईयाअ खातुर आखुंह, तीयु गोठील आंय वादावांअ नांह मागतो।) 6 तीयाल तुमांअमेर्याअ खुब लोकाहीं मीलीन जे सीक्सा केअयीह, तोतीअ पुरती हाय। 7 तेबी, आमी ता तुमांअ तीयाल माफी दीईन, आरी-आरी तीयाल उफ बी दांअ जोजे। नेता, तो खुब दुखी वीअ आने एंहकींअ वीचारीअ का, तुमां तीयाल कीदीह बी माफ नांह केअनारें। 8 तीयाअ लीदे, आंय तुमनेंह कालावाला कीअहुं का, तुमां तीयाल फाची खातरी केरावी दा का, तुमां खोरेखोर तीयापेअ माया राखतेंह।
9 तुमां बादी बाबोतींहम मांअ आखल्या पोरमाणे चालतेंह का नांह तों पारखांअज मांयुं तों कागलों लेखलों। 10 जांहांअ तुमां ईया आदमील माफी देतेंह, तांहांअ आंय बी तीयाल माफी दीहुं। जो माफ केरांअ जेंहडों वीअ ता, ख्रीस्तंह देदला आदीकाराकींअ मांयुं तीयाल तुमांअ भोलायाअ खातुर माफ कीअ देदोंह, 11 ईयाअ खातुर का, सेतान आपुंहपेअ जीत नांय मीलवे। काहाका, तीयाअ खोटा ईरादा ता आपनेंह खोबुरुज हाय।
तुरोवा सेहेराम पावुलाअ टुकी मुलाकात
12 ख्रीस्तुअ बाबोताअ हारी गोठ जाहेर केरांअ खातुर आंय तुरोवा सेहेर पोच्यो तांहांअ मांन खोबुर पोळी का, तींहीं तों काम केरांअ खातुर मालीखांय मांन हारी तोक पुरी पाळीह। 13 पेन मांअ मोनुंम खुब उचाट आथो। काहाका, मांअ मेरालो पावुह तीतु तुमांअ खोबुर लीईन तींहीं नांह आलो। तीयाअ लीदे, तींहींर्याअ वीसवासी लोकाहांपेअ राज्या मागीन आंय तीयाल होदांअ माकेदोनीया राज्याम गीयो।
खोटायुअ ताकोतुपेअ ख्रीस्तुंह मीलवुअली जीतुम ख्रीस्ताअ खास चेलाहांअ भाग
14 ख्रीस्तुंह मीलवुअली जीतुम ख्रीस्तुअरी जोळाअला रेनारा आमनेंह पोरमेहेर गोंवांदी बोंणावेह। जेंहकींअ आस्तोरुअ गुंद बादी जागे फेलाय जाहे, तेंहकींअ ख्रीस्तुअ बाबोताअ हारी गोठ bबादी जागे फेलावांअ खातुर पोरमेहेर आमनेंह वापरेह। 15 काहाका, आमां ता, जें वाचाय जातेंह तीयाहांम आने जें नास वेतेंह तीयाहांम फेलाय जानारा धुपुअ हारी गुंदीवाला तुअराअ होच हाय का जो ख्रीस्त पोरमेहेराल चोळवेह। 16 जें नास वेतेंह तीयाहांअ खातुर धुपुअ तों तुअरों मोत आवावे एंहडों हाय; पेन जें वाचाय जातेंह तीयाहांअ खातुर ता धुपुअ तों तुअरों ओमोर जीवोन देवावे एंहडों हाय। एंहकींअ वीअ ता, हारी गोठ जाहेर केरांअ केडो लायोक हाय? 17 खुब मांहेंअ पोरमेहेरापेनेअ आवनारी हारी गोठ जाहेर केरांअ कामुल एक धोंदाअ होच गोंअतेंह। आमां ता तीयाहांअ होच नांह। आमां ते गोठ चोख्खा मोने आने ख्रीस्तुंह आमनेंह देदला आदीकाराकींअ जाहेर केअताह। आमां जांअताह का, आमनेंह मोकलुअनारो पोरमेहेर आमाहांपेअ नोजुर राखेह।