3
पोरमेहेर मांहांहांअरी केअहे तो नोवो कारार
1 आंय फाचो तुमांअ आगलांअ हारो आखावांअ कोसीस कीअहुं एंहडों तुमनेंह लागेह का? मांअ खातुर भोलामोणुअ कागलें एगोंह तुमाहांपेअ लेखी दे तीयाअ मांन जोरुल नांह; आने जांहांअ आंय बीहरा मोंडोळुंहम जांव तांहांअ मांअ खातुर तुमां भोलामोणुअ कागलें लेखी दा, तीयाअ बी जोरुल नांह। 2 मांन जीया भोलामोणुअ कागलाअ जोरुल हाय ते ता, तुमां एखलेंज हाय। मांअ बोद उनाअया तीयाअ पोरीणामे, तुमांअ जीवोनाहांअ बोदलाण वीयोंह। तोंज मांअ मोनाम लेखाअला कागलाअ होच हाय। आने तों कागलों बादें मांहेंअ वाची सेकतेंह आने तुमांहम मांयुं केअला हारा कामुअ बाबोताम जांय सेकतेंह। 3 ईं चोख्खी रीते देखाय आवेह का, ख्रीस्तुंह सोतेज ईं कागलों लेख्योंह आने मांअ मारफोते तों मोकल्योंह। तों कागलों सोयुकींअ नांह लेखाअयों, पेन कायोम जीवता रेनारा पोरमेहेराअ आत्मा तुमांअ मोनाहांम काम केअहे तीयाअ पोरीणामे तों लेखाअयोंह। आने जेंहकींअ पोरमेहेरांय मोसेल ढोगळाअ पाटयांहपेअ नीयोम लेखी देदला, तेंहकींअ ईं कागलों ढोगळाअ पाटयांहपेअ नांह लेखाअयों। पेन उलटों तों ता, तुमांअ मोनाहांम लेखाअयोंह।
4 तुमांहम आमां केअला कामुअ बाबोताम आमनेंह खुब मोडी खातरी हाय। तीयाअ लीदे, आने तों खेरों हाय तों पोरमेहेर जांअहे तीयाअ लीदे, आंय ए बादया गोठ्या आखुंह। आने ख्रीस्तुंह आमांअ खातुर जों केअयोंह तीयाअज लीदे आमां पोरमेहेराअ काम केअताह। 5 आमां नांह धारता का, ईं काम केरांअ आमाहांपेअ ताकोत हाय। आमनेंह तों काम केरांअ ताकोत देनारो ता पोरमेहेरुज हाय। 6 तीयांय सोते मांहांहांअरी केअला नोवा कारारुअ बाबोताम जाहेरात केअनारा सेवोक बोंणांअ तीयांयज आमनेंह लायोक बोंणाव्याह। तो कारार, तीयांय पाटयांहपेअ लेखाअला नीयोमाहांअ पालनीअ आदारे नांह केअयो, पेन पोरमेहेरांय आपनेंह पोवीतोर आत्मा देदोह तीयाअ आदारे केअयोह। पाटयांहपेअ लेखला नीयोम जे पोरमेहेरांय मोसेअ मारफोते देदला, तीयाहांअ पोरमाणे मांहेंअ चाली नांह सेकतें तीयाअ पोरीणामे, तीयाहांन जों मीलेह, तों ता आत्मीक रीते पोरमेहेराअ से कायोमाअ खातुर जुदें पोळी जावुलोंअ तोंज हाय। पेन पोरमेहेराअ नोवा कारारु पोरमाणे पोवीतोर आत्मा मांहांहांन जों देहे, तों ता कायोम टीकनारों आत्मीक जीवोन हाय।
जुना कारारुअ आने नोवा कारारुअ हारकामोण्या
7 ढोगळांहपेअ खोरवीन लेखाअला तीया नीयोमाहांअ पालनीपेअ आदार राखनारा तीया कारारुकींअ ता मांहेंअ कायोमाअ खातुर पोरमेहेराअ से जुदें पोळी जाहलें। तेबी, तीयाअ सोरुवात खुब तेजुवाली आथी। जांहांअ मोसे सीनाय डोगापेअनेअ एठा उत्यो, तांहांअ पोरमेहेरांय मोसेअ मुंयुंल खुब झोजलुअतों केअलों। मोसेअ मुंयुंपेअ देखाअनारा पोरमेहेराअ मोडायाअ खुब तेजुअ लीदे ईसरायेल मांहेंअ मोसेअ मुंयुंल हीअ नांय सेक्यें। पेन तों तेज थोळाकुज वोखताम मोसेअ मुंयुंपनेअ उडी जाहलों। 8 एंहडों वीअ ता, पोवीतोर आत्माअ मारफोते पोरमेहेरांय लोकाहांअरी केअला नोवा कारारुअ सोरुवात वीयीह तांहांअ ते तीया नीयोमाहांअ सोरुवातु केअता नोक्कीज वादारे मोडायुवालीज वीअक्ने? 9 पोरमेहेरांय मोसेल देदला नीयोमुंपनेअ मांहेंअ जांय सेकत्लें का, ते नीयोम तोळनारांहन सीक्साअ चुकादो मीलीअ। ते नीयोम दांअ काम मोडायावालो ं आथों ता, पोरमेहेर मांहांहांअ पाप तुवी टाकीअ ईयु बाबोताअ हारी गोठ नोक्कीज तीया कामुअ केअता वादारे मोडायुवाली वेअनारीजक्ने? 10 एंहडी वादारे मोडायुवाली हारी गोठीअ आगलांअ, पापाहांअ सीक्सामेनेअ वाचायांअ खातुर पोरमेहेराअ नीयोमाहांअ पालनीअ बाबोताअ ते पेअली गोठ कींमोतु वोगुराअ हाय। 11 जेंहकींअ मोसेअ मुंयुंपेर्योंअ तेज थोळाकुज वोखताअ खातुर आथों, तेंहकींअज जुनो कारार खाली थोळाक वोखताअ खातुरुज आथो। तीयाअ लीदे, कायोमाअ खातुर रेनारो हाय तो नोवो कारार तीयाअ केअता बी वादारे मोडायावालो वीअक्ने?
12 ओ नोवो कारार आमनेंह ओतीअ बादी आस्या देहे तीयाअ लीदे, आमां तीयु बाबोताअ हारी गोठ हींमोत राखीन जाहेर केअताह। 13 सोताअ मुंयुंपेर्योंअ पोरमेहेराअ मोडायाअ तेज उडी जाता आने उलुप वीअ जाता ईसरायेल मांहेंअ नांय हेअ तीयाअ खातुर मोसे पोळदाकींअ सोताअ मुंय गुंअटावी राखत्लो। पेन आमां ता, ए हारी गोठ हीकवुअती वोखत तीयाअ होच आमांअ मुंय गुंअटावी नांह राखता। 14 ईसरायेल मांहेंअ जुनो कारार पुरो वीअ जाय तों नांय मानांअ टीणी तीअ रेहलें। आने जांहांअ तीयाहांअ भोकती मोंडोळाअ कोअमें जुना कारारुअ चोपळ्या वाचाअत्याह, तांहांअ आज लोगुंअ तें ईं नांह जांअतें का, तो जुनो कारार पुरो वीअ गीयोह। मोसे सोताअ मुंय गुंअटुअत्लो तो पोळदो तीयाहांअ मोनुंहपेअ बुजाय रीयो वीअ तेंहकींअ, तें मांहेंअ तीयु चोपळींहम लेखल्या गोठ्या होमजी नांह सेकतें। केल्लों बी मांहुंअ जों ख्रीस्तुपेअ वीसवास राखेह तोंज ते गोठ्या होमजी सेकेह। आने तांहांअज ख्रीस्तुअ मारफोते तो पोळदो होरकी जाहे। 15 आंह, आज बी जांहांअ-जांहांअ ते मोसेंय लेखली चोपळींहन तीयाहांअ भोकती मोंडोळाअ कोअमें वाचतेंह तांहांअ-तांहांअ, तीया पोळदाकींअ तीयाहांअ मोनें बुजाय जातें वीअ तेंहकींअ तें तीयु चोपळीमेर्याअ गोठ्या नांह होमजुअतें।
16 पेन जांहांअ केल्लों बी मांहुंअ मालीखापेअ वीसवास राखीन तीयाहांअहीं आवे तांहांअज तो पोळदो होरकी जातो वीअ तेंहकींअ तों ते गोठ्या होमजी सेकेह। 17 ईंहीं मालीख ता पोवीतोर आत्माज हाय। जांहांअ बी तो आत्मा हाय तांहांअ सुटकारो देहे। 18 मोंजे, दीहाअ चेंण पाळनारा आरसाअ होच आपुंह बादें मुंयुंपेअ पोळदो राख्या वोगुर मालीखाअ मोडायुल बीहराहांन देखावतेंह। तों ता, आपुअ मुंयुंपेअ केल्लो बी पोळदो नांह तीयाअ होच हाय। आने आपुंह बादें वादारे ने वादारे ईसुअ होच बोंणांअ खातुर बोदलाअतेंह। मोंजे, ईसु कोतोअ मोडायावालो हाय तों, मांहेंअ हीअ सेकतेंह। ईं बादों ता मालीखाअ आत्माअज काम हाय।