4
मांहांअ नोबला सोरीलाम पोरमेहेरांय थोवलो आत्मीक खोजानो
1 पोरमेहेरांय सोताअ मेरबानीकींअ मांन ए सेवा होपीह तीयाअ लीदे आंय जीव नांह पाळतो। 2 पेन उलटों, जोंबी आंय कीअहुं तींहमें ईमानदार रांअ मांयुं नोक्की केअयोंह। नाज आवे एंहडा कामाहांन, आने ओमुक मांहेंअ जें कामें दोबीन केअतेंह तेंहडा कामाहांन आंय नोफरोत कीअहुं; आने आंय हुच्यारीवाली दोलीलुकींअ केडाल बी ठोगतो नांह; पोरमेहेराअ गोठीहींअ उलटो ओर्थो काडीन आंय बीहराहांन नांह हीकवुअतो। उलटों, पोरमेहेराल माथे राखीन आंय हारी गोठीअ हाचाय दोबाव्या वोगुर उगाळी रीतेज जाहेर कीअहुं, ईयाअ खातुर का, केडों बी मांअपेअ ठोगांअ गुनो नांय थोवी सेके।
3 आंय जे हारी गोठ जाहेर कीअहुं ते, केडाल बी नांय होमजाअती वीअ ता, तींहमें मांअ भुल नांह। जीयाहांअ नास वेअहे तीयाहांनुंज ते गोठ नांय होमजाय एंहडी लागेह। 4 ईयु दुन्याअ खाराब लोकाहांन सोताअ काबाम राखनारा सेतानांय ख्रीस्ताल नांय माननारा मांहांहांअ मोनुंहन बेरजावी देदेंह। तीयाअ लीदे, तें मांहेंअ ख्रीस्तुअ बाबोताअ हारी गोठ होमजी नांह सेकतें। मोंजे, ख्रीस्त कोतोअ मोडायावालो हाय तों तें नांह जांअतें। होकीकोतुम, ख्रीस्त पोरमेहेराअ होचुज हाय तों तें नांह होमजुअतें।
5 तुमनेंह बोद देताह तांहांअ आमां सोताअ मोडायाअ बाबोताअ गोठ नांह जाहेर केअता। पेन आमां ता, ख्रीस्त ईसु जो मालीख हाय तीयाअज बाबोताअ गोठ जाहेर केअताह। आमांअ बाबोताम आमां जों जाहेर केअताह तों ता ईं हाय का, ईसुअ लीदे आमां ता तुमांअ सेवोकुज हाय। 6 जीया पोरमेहेरांय बादों उबजावती वोखत “आंदाराअ जागे उजवोळ वीअ जो!” एंहडो हुकोम केअलो, तीयांयज आमनेंह होमजाव्योंह का, ईसुअ बाबोताअ गोठ आमांअ मोनाहांम उजवोळ केअनारा उजवोळाअ होच हाय। तो एंहडों मागेह का, जांहांअ मांहांहां ईसु ख्रीस्तुअ मुंय देख्यों, तांहांअ तीयाहां पोरमेहेराअ मोडायुज देखी तों आमां जांय लेजी।
7 हारी गोठ जाहेर केरांअ काम कींमती खोजानाअ होच हाय। पेन तो खोजानो काचा कादुअ बासनांहम, मोंजे, आमांअ नोबला सोरीलाम राख्योह। ईयापनेअ बादें जांय सेकतेंह का, हारी गोठीम मांहांहांअ जीवोना ंहन बोदली टाकांअ जे ताकोत हाय, ते आमांअ सोताअ नांह, पेन ते पोरमेहेराअज हाय।
8 आमाहांपेअ चारी-सोमुकनेअ मुसीबोत्या आवत्याह तेबी, आमां तीयुंयकींअ ओताअ बादा दाबाय नांह जाता का, मालीखाअ बाबोताम बोद दांअ आमां बोंद केअजी; घेळी-घेळी आमां गुचवाय जाताह तेबी आमां हींमोत नांह हारता। 9 मांहेंअ आमनेंह सोतावतेंह, पेन पोरमेहेर आमनेंह सोळी नांह देतो; मांहेंअ आमनेंह आसाटी पाळतेंह आने घायोल केअतेंह तेबी, आमां फाचा उठीन कामे लागी जाताह। 10 आमां जींहीं बी जाताह, तींहीं ईसुअ होच आमांअ बी मोत आवे एंहडो ओनुभोव आमनेंह वेअयाज केअहे; पेन आमां तेंहडों जीवांअ चालुज राखताह, ईयाअ खातुर का, तीयाकींअ बीहरें मांहेंअ आमांअ सोरीलाम हीअ सेके का ईसु जीवतोज हाय आने तो आमनेंह दोरवोणी देतो रेहे।
11 आंह, ईसुअ सेवा केअताह तीयाअ लीदे, आमां कायोम आमांअ जीव मुठीमुज राखीन जीवताह। पोरमेहेर तों बादों आमनेंह वेठावेह, ईयाअ खातुर का, ईसु जीवतोज हाय तों बीहरें मांहेंअ आमांअ मोय जानारा सोरीलुंहम हीअ सेके। 12 एंहकींअ कीईन, आमां मालीखाअ खास चेला आमांअ जीव मुठीमुज राखीन जीवताह, आने ईयाअ पोरीणामे तुमनेंह कायोम टीकनारों जीवोन मीलेह।
13 पेन आमां हारी गोठ जाहेर केरांअ चालु राखताह। काहाका, गीत लेखनारांह पोरमेहेराअ वोचोनुपेअ जेंहडो वीसवास राखलो तेंहकींअज वीसवास आमां बी तीया वोचोनुपेअ राखताह। ईयु बाबोताम तीयांय जों आखलों तों पोवीतोर लेखाणाहांम एंहडों लेखलों हाय का, “मांयुं पोरमेहेराअ वोचोनुपेअ वीसवास राख्यो तीयाअ लीदे, आंय गोगतो रीहुं।” 14 आमां एंहकींअ केअताह काहाका, आमां जांअताह का पोरमेहेरांय मालीख ईसुल मोअलामेनेअ जीवतो उठव्योह। आने आमां ईं बी जांअताह का, जेंहकींअ लोकाहीं ईसुल माय टाकलो, तेंहकींअ ते आमनेंह बी माय टाके तेबी, तीयांय ईसुल जेंहकींअ उठव्योह, तेंहकींअ तो आमनेंह बी जीवता उठवीअ आने तो आमनेंह बी तुमांअरी ईसुअ हाजरीम लीअ जाय। 15 आमां जेबी मुसकुल्या आने दुखें वेठताह, तें बादें तुमांअ आत्मीक फायदाअ खातुरुज वेठताह। आने आमां एंहकींअ कीईन तें दुखें वेठताह, ईयाअ खातुर का, जांहांअ वादारे ने वादारे मांहेंअ पोरमेहेराअ मेरबानीकींअ वाचाय जातेंह, तांहांअ वादारे ने वादारे मांहेंअ पोरमेहेराअ आभार मानीन तीयाल मोडाय दीअ।
16 ईयाज कारोणे, आमां कीदीह बी हींमोत नांह हारता आने बोद दांअ बी बोंद नांह केअता। आमांअ सोरीलें दीहु-दीहु नास वेअतें जातेंह तेबी, आमांअ आत्मा दीहु-दीहु नोवी ताकोत मीलवुअता जाताह। 17 आमांअ आमीनेअ दुखें ता वेठी लेवाय आने थोळाक वोखताम पुरें वीअ जाय एंहडें हाय। तीयाअ लीदे, तीयाहांपेअ काय बी धीयान दांअ आमांअ जोरुल नांह। पेन तीयाहांकींअ आमनेंह कायोम टीके एंहडों खुब मोडों कायक मीलनारों हाय, आने तों ता कायोम टीकनारों जीवोन हाय, एंहकींअ जांहांअ आमां वीचारताह, तांहांअ आमनेंह लागेह का, तीयाअ आगलांअ आमांअ आमीर्याअ दुखाहांअ काय बी गोंणती नांह। 18 तीयाअ लीदे, आमां ईया जीवोनाअ दुखुंहपेअ नोजुर नांह राखता पेन उलटों, आजी आमां जों नांह देख्यों तीया कायोम टीकनारा जीवोना पेअ आमां नोजुर राखताह। काहाका, आमां आमी वेठी रीयाह तें दुखें ता माहरीज पुरें वीअ जाय, पेन आमनेंह होरगाम जों मीलनारों हाय तों जीवोन ता कायोम टीकीअ।