5
नोवें आत्मीक सोरीलें
1 मोरांअ बाबोताम आपनेंह काय पोळली नांह। काहाका, आपनेंह खोबुर हाय का, जांहांअ आपुंह ईं सोरीलें सोळी दीहुं, मोंजे का आपुंह मोय जाहुं, a तांहांअ आपनेंह होरगाम कोअ रुपी सोरीलें मीलीअ! तें सोरीलें कायोम टीकनारें वीअ आने तें मांहांय नांय, bपेन पोरमेहेरांय सोतेज बोंणाव्येंह। 2 ईया तोंबु रुपी सोरीलुंहम आपुंह ईंहीं तोरतीपेअ रेतेंह तांहांअ आपुंह हाय-हाय केअया केअतेंह। काहाका, आपुंह होरगामेनेअ बीहरें सोरीलें पोरमेहेर दांअ हाय तें मीलवांअ खुब मोर्जी राखतेंह। 3 तें सोरीलें आपुंह मीलवुंह तांहांअ आपुंह सोरीलाहांअ वोगुराअ आत्मा नांय वीअहुं, पेन उलटों आपुअ ता, नोवें आत्मीक सोरीलें वीअ। 4 ईयु दुन्यामेर्येंअ आपुअ सोरीलें एगु दीह मोय जाय। आमी आपनेंह जें दुखें वेठांअ पोळतेंह तीयाअ लीदे, आपुंह हाय-हाय केअया केअतेंह। आपुंह ईं सोरीलें सोळी दांअ मागतेंह एंहकींअ ता नांह, पेन आपुंह नोवें सोरीलें मीलवांअ मागतेंह का जें पोरमेहेरांय आपुअ खातुर तीयार केअयेंह। काहाका, मोय जानारा ईया सोरीलुंहन पोरमेहेर कायोम रेनारा सोरीलुंहम पोलटावी दीअ। 5 एंहडा बोदलाणुअ खातुर आपनेंह तीयार केअनारो ता पोरमेहेर सोतेज हाय, आने आपुअ खातुर तीयांय जोंबी राखी थोव्योंह तों बादों आपनेंह तो देनारोज हाय तीयाअ बीयाना तोरीके तीयांय आपनेंह सोताअ पोवीतोर आत्मा देदोह।
6 तीयाअ लीदे, आमां कीदीह बी हींमोत नांह हारता। आपनेंह खातरी हाय का, पोरमेहेर आपनेंह नोवें सोरीलें दीअज। आने आपुंह जांअतेंह का, जांव लोगुंअ आपुंह ईया सोरीलुंहम रीहुं, तांव लोगुंअ आपुंह मालीखांय तीयार केअली वोहतीअ से सेटेज हाय। 7 काहाका, आपुंह हुद-मुद ईसुल हीईन नांह जीवतें पेन तो होकीकोतुम हायज तेंहडों मानीन जीवतेंह। 8 नोक्कीज आपुंह हींमोत नांह हारतें, आने ईया सोरीलुंहमनेअ सुटीन आपुंह मालीखाअरी वोहती केअजी एंहडीज आपुंह खुब मोर्जी राखतेंह। 9 तीयाअ लीदे, ईया सोरीलुंहम रेजी, का ईयांहन सोळीन होरगाम नोवा कोअमें रेजी, आपुंह ता तीयालुज राजी राखांअ मागतेंह। 10 काहाका, आपुअ नीयाय केअनारा जोज ख्रीस्तुअ आगलांअ आपुअ बादाहांअ हाजोर वेरांअ पोळीअ। तो आपुअ बादाहांअ नीयाय कीअ, आने ईया सोरीलुंहम रीईन दोरेकुंह जें हारें का खोटें कामें केअयेंह तीयाअ पोरमाणे ख्रीस्त तीयाल बोदलो दीअ।
ख्रीस्तुअ मारफोते पोरमेहेर लोकाहांन सोताअ दोस्दार बोंणावेह
11 आमांअ बादाहांअ बी, मोंजे मालीखाअ खास चेलाहांअ बी, मालीख ईसु ख्रीस्त नीयाय कीअ। ईं जांयन आमां तीयाअ बीख राखांअ बाबोताम आमनेंह जोंबी बोंणेह तों बादों केअताह। तीयाअ लीदे, मांहेंअ आमांअ गोठ माने तीयाअ खातुर आमां तीयाहांन होमजावांअ कोसीस केअताह। मांअ बाबोताम पोरमेहेराल बादोंज खोबुर हाय, आने आंय आस्या राखुंह का तुमां बी मांअ बाबोताम बादोंज जांअतेंह। 12 आंय फाचो तुमांअ आगलांअ सोताल हारो आखावुंह एंहकींअ मां धारतें। पेन मांअ बाबोताम तुमां ओभीमान राखी सेका एंहडों एक हारों कारोणाज दीहुं, ईयाअ खातुर का सोताअ माजर्याअ गुणगान देखीन नांय, पेन उलटों ते जों केअताह तों देखावीन ओभीमान राखनारा खोटों हीकवुअनाराहांन तुमां जोवाब दीअ सेका। 13 आमांअ ओकुल ठीकाणे नांह एंहकींअ लागे ता, तों पोरमेहेराअ मोडायाअ खातुर हाय। आने आमांअ ओकुल ठीकाणे हाय एंहकींअ लागे ता, तों तुमांअ फायदाअ खातुर हाय। 14 आंय जों काय कीअहुं तों आंय ईयाअ लीदे कीअहुं का, ख्रीस्तुंह मांअपेअ राखली मायाअ हारी ओसोर मांअ जीवोनाम पोळे। ख्रीस्त बादाहांअ खातुर मोअयो, आने बादाहांअ खातुर एक जांअ मोअयो ता, तीयाअ मोतुम आपुअ बादाहांअ गोंवांदी बोंणांअ जोजे। 15 ख्रीस्त बादा लोकाहांअ खातुर मोअयो। तीयाअ लीदे, आत्मीक रीते नोवों जीवोन जीवनारें मांहेंअ सोताअ खातुर नांय, पेन ख्रीस्तुअ खातुर तों जीवोन जीवे! काहाका, तीयाहांअ खातुरुज ख्रीस्त मोअयो, आने पोरमेहेरांय तीयाल तीयाहांअ खातुरुज जीवतो उठव्यो। 16 तीयाअ लीदे, ख्रीस्तुपेअ वीसवास नांय राखनारें दुन्याअ मांहेंअ जेंहकींअ मांहांहांअ कींमोत केअतेंह, तेंहकींअ आंय आमीनेअ केडाअ बी कींमोत नांह केअतो। तीया मांहांहांअ होचुज आंय बी एक वोखत ता खोटी रीते ख्रीस्तुअ कींमोत केअत्लो खेरो, पेन आमी आंय तीयाअ तेंहकींअ कीईन कींमोत नांह केअतो। 17 ईयाअ ओर्थो ओ हाय का, जें मांहेंअ ख्रीस्ती बोंणतेंह, तें नोवें मांहेंअ बोंणी जातेंह। तीयाहांअ जुनो जीवोन पुरों वीअ गीयोंह, आने नोवों जीवोन चालु वीअ गीयोंह।
18 ईं नोवों बादों ता, पोरमेहेरांय सोतेज केअयोंह। तीयांय ख्रीस्तुअ मोताअ रुपी भोगुकींअ सोताअरी आपुंअ मेल-मीलाप केराव्योह। आने आमी तीयांय आमनेंह बीहरा बादा मांहांहांन पोरमेहेराअरी तें केंहकींअ मेल-मीलाप कीअ सेके तों आखांअ काम होप्योंह। 19 तीयाअ ओर्थो ओ हाय का, ख्रीस्तुंह आपुअ खातुर जों केअयोंह तीयाअ मारफोते पोरमेहेर दुन्याअ बादा लोकाहांअ सोताअरी मेल-मीलाप केरावेह। आने तो तीयाहांअ पापाहांअ हीसाब राख्या वोगुर बादा माफ कीअ देहे। आने तो तीयाहांअ ख्रीस्तुअरी केंहकींअ मेल-मीलाप केअहे तीयु बाबोताअ गोठ बीहराहांन जाहेर केरांअ तीयांय आमनेंह तीयाअ खास चेलाहांन होपीह। 20 आमां ख्रीस्ताअ खास चेला हाय, आने पोरमेहेर आमांअ मुंयें तुमनेंह कालावाला केअतो वीअ तेंहकींअ, आमां ख्रीस्तुअ तोरफयाअ गोगताह। आमां ख्रीस्तुअ मांहांहांअ तोरीके, तुमनेंह खुब कालावाला केअताह: पोरमेहेराल सोताअरी तुमांअ मेल-मीलाप केरावांअ दा! 21 ख्रीस्तुंह कीदीह बी पाप नांह केअयो, तेबी आपुअ बादाहांअ पापाहांअ वोजो पोरमेहेरांय तीयापेअ थोव्यो, ईयाअ खातुर का, ख्रीस्तुअ आर्याअ आपुअ सोबोंदुअ लीदे पोरमेहेर आपनेंह माफ केअ, आने आपुअ बादा पापाहांअ ईयादी नुसी टाके, आने तो जेंहडो हाचो हाय तेंहडेंज हाचें आपनेंह बी गोंएं।