कोरींथ सेहेराअ मोंडोळाल पावुलाअ पेअलोंअ कागलों
ईया कागलाअ बाबोताम बेन गोठ्या
मालीखाअ खास चेला पावुलुंह कोरींथ सेहेराम ख्रीस्ती मोंडोळ उबो केअलों। ईया मोंडोळाम ख्रीस्ती जीवोनाअ बाबोताम आने ख्रीस्ती वीसवासाअ बाबोताम ओमुक सोवाल उबा वेअला। तीया सोवालुंअ उकेल लावांअ खातुर पावुलुंह ईं पेअलोंअ कागलों लेख्यों। तीयु वोखत, कोरींथ सेहेराम जुदी-जुदी जागर्याअ जाती-जातीअ लोक रेहला। आने तों सेहेर रोम राज्याअ आखाया वीस्ताराअ राजधानीअ सेहेर आथों। तीया सेहेराम खुब वेपार चालत्लो। आने तींहींर्याअ रीत-रीवाज उचा गोंणाअत्ला। आने तीया सेहेराअ मांहेंअ जुदा-जुदा धोरमांहन मानत्लें।
कोरींथ मोंडोळाअ लोकाहांम फाट-फुट पोळल्या। मोंडोळाअ ओमुक लोक खाराब रीते जीवत्ला। तींहीं वोराळ ने आदमी-थेअयुअ सांवसारुअ बाबोताम सोवाल उबो वेअलो। आने तीया मोंडोळाम जाहेर आरादना मीटींग्या रीतोसोर नांय चालतल्या। खेरों-खोटों जाणावनारा जीवुअ बाबोताम, आने पोवीतोर आत्मा देहे तीया खास वोरदानुंअ बाबोताम, आने मोअलें मांहेंअ फाचें जीवतें उठीअ तीया बाबोताम बी मोंडोळाम सोवाल उबा वेअला। ईया बादा सोवालुंअ उकेल हारी गोठीम देदलाज हाय एंहकींअ पावुल खुब ओकुल वापरीन ईया कागलाम चारचा केअहे।
पोवीतोर आत्मा देहे तों मोडाम-मोडों खास वोरदान ता माया हाय ते गोठ, पावुल ईया कागलाअ तेरमा आदयायुम होमजावेह।
ईया कागलामेरीअ बाबोतीहींअ रुपरेखा
आगली गोठ १:१-९
मोंडोळाम फाट-फुट १:१०-४:२१
खाराब रीते सांवसार आने थेअ-आदमीअ जीवणो ५:१-७:४०
ख्रीस्ती लोक आने ख्रीस्ती नांह तेंहडा लोक ८:१-११:१
मोंडोळाअ लोकाहांअ जीवोन आने आरादना ११:२-१४:४०
ख्रीस्तुअ आने वीसवास्यांअ फाचा जीवता उठुलोंअ १५:१-५८
येहुदीया जील्लाअ ख्रीस्तींअ खातुर पोयसाहांअ मोदोत १६:१-४
खानगी बाबोत्या ने सेल्ली गोठ १६:५-२४