16
पावुलाअ सेल्ली सालाम
1 ईया कागलाकींअ आंय तुमनेंह आपुअ आरीअ वीसवासी फेफील तुमनेंह ओअखावुंह आने तीयुअ खातुर भोलामोण कीअहुं। ते केंखरीया सेहेराअ मोंडोळाअ मोदोत केरांअ नीमली सेवीका हाय। 2 पोरमेहेराअ लोकाहांन सोबे एंहकींअ तीयुल मालीखाअ लोकाहांमेरीअ बोंअहीं तोरीके आवकारजा! आने तीयुल केल्ली बी मोदोताअ जोरुल पोळे ते तुमां पुरी पाळजा! काहाका तीयुंय खुब लोकाहांन मोदोत केअयीह आने मांन बी मोदोत केअयीह।
3 पीरीस्कीलाल आने तीयुअ कोअवाला आकवीलाल मांअ सालाम देजा। तीयाहां ख्रीस्त ईसुअ खातुर मांअरी काम केअयोंह। 4 मांअ जीव वाचावांअ खातुर तीयाहां सोताअ जीवुअ बी पारवाअ नांह केअयी। तीयाअ खातुर आंय बी तीयाहांअ आभार मानुंह। 5 पीरीस्कीला आने आकवीलाअ कोअ चालनारा ख्रीस्ती मोंडोळाअ लोकाहांन बी मांअ सालाम देजा। मांअ मेराला दोस्दार एपेनेतुल मांअ सालाम आखजा। तो आसीया वीस्तारामेनेअ पेअलांम-पेअलोअ ख्रीस्ती बोंणलो। 6 तुमांअ खातुर खुब मेहनोत केअनारी मारीयोमाल बी मांअ सालाम देजा। 7 मांअ जात-भाय आंदारोनीकुल आने जुनीयाल बी मांअ सालाम देजा। ते मांअरी जेलाम आथा। मालीखाअ खास चेलाहां म ते आगलांअ पोळता हाय। आने मांअ केअता पेअलांअ ते ख्रीस्ती बोंणला।
8 मालीखाअ खातुर मांअ मेरालो दोस्दार आंपलीतुल बी मांअ सालाम देजा। 9 ख्रीस्तुअ खातुर मांअरी काम केअनारो उरबानुल, आने मांअ मेराला दोस्दार स्ताखुल बी मांअ सालाम देजा। 10 ख्रीस्तुपेर्याअ वीसवासाअ कोसोटीम पार उत्ला आपेल्लेल बी मांअ सालाम देजा। आने आरीस्तोबुलुअ कोर्याअ वीसवास्यांहन बी सालाम देजा। 11 मांअ जात-भाय हेरोदीयानुल बी मांअ सालाम देजा। नारकीस्सुअ कोर्यांहमनेअ मालीखापेअ वीसवास राखनाराहांन मांअ सालाम देजा!
12 मालीखाअ खातुर खुब मेहनोत केअनारी तीरीफेनाल, आने तीयुअ बोंअहीं तीरीफोसाल मांअ सालाम देजा। आने मांअ मेराली दोस्दार पेरसील बी मांअ सालाम देजा। तीयुंय मालीखाअ खातुर खुब मेहनोत केअयीह। 13 आगलांअ पोळता ख्रीस्ती रुफुल बी मांअ सालाम देजा, आने मांन सोताअ पोयराअ होच राखनारी तीयाअ याहकील बी मांअ सालाम देजा। 14 आसीनकीरीतुल, फीलेगोनुल, हेरमेल, पातरोबाल, हेर्मान आने तीयाहांअरी टोलवाअनारा वीसवास्यांहन बी मांअ सालाम देजा। 15 फीलोलोगुल, आने जुलीयाल आने नेरीयुल आने तीयाअ बोंअयुंहन, आने आलीपाल आने तीयाहांअरी टोलवाअनारा पोरमेहेराअ बादा लोकाहांन मांअ सालाम देजा।
16 ख्रीस्ती पावु बोंअयुंअ तोरीके तुमां एक-बीहराल मायालु सालाम देजा। ईया वीस्ताराअ ख्रीस्ती मोंडोळाअ बादा लोक तुमनेंह सालाम देताह।
सेल्या हीकामोण्या
17 मांअ मेराला पावु-बोंअयुहुं, आंय तुमनेंह हीकामोण दीहुं का, ख्रीस्तुअ बाबोताअ बोदाअ वीरुद उलटो बोद दीईन जे लोक तुमांहम फाट-फुट पेदा केअताह आने मांअ पोरमेहेराल सोळी दे तेंहडों केअताह, तीयाहांअ से चेतीन रेजा आने तीयाहांअ से सेटेज रेजा। 18 काहाका, एंहडा लोक ता आपुअ मालीख ख्रीस्तुअ सेवा नांह केअता, पेन उलटों, सोताअ मोरजया पुर्या केरांअ कामुज केअताह। आने ते ता गोगांअ चालाकीकींअ आने मीठया-मीठया गोठ्या कीईन सीदा-सादा मांहांहांन ठोगताह। 19 पेन तुमां हारी गोठी पोरमाणे चालनारें हाय। तुमांअ बाबोताअ ए गोठ बादी जागे फेलाय गीयीह। तीयाअ लीदे, तुमांअ बाबोताम मांन खुसी हाय। तेबी, एक गोठ आंय तुमनेंह आखांअ मागुंह। तुमां गीयानुवालें बोंणीन, जों काय हारों हाय तों केरा आने जों खोटों हाय तों सोळा एंहडी मांअ मोर्जी हाय। 20 एंहडा लोकाहांअ से तुमां सेटे रीहा तांहांअ ए बाबोत उत्वालीज बोंणीअ। आपनेंह सुख-सांती देनारो पोरमेहेर सेतानाल तुमांअ पागाहांअ थुले सुंदावी टाकीअ। आपुअ मालीख ईसु ख्रीस्तुअ मेरबानी तुमांअरी रे!
21 मांअरी सेवा केअनारो तीमोथी बी तुमनेंह सालाम देहे। आने मांअ येहुदी पावुह लुकीयु, आने यासोन आने ओसीपातेर बी तुमनेंह सालाम देताह। 22 आंय तेरतीयु बी मालीखापेअ वीसवास केअनारा तोरीके तुमनेंह सालाम दीहुं। पावुलुंह लेखाव्या पोरमाणे ईं कागलों लेखनारो आंय सोतेज हाय। 23 जीयाअ कोअमें आंय पावुल गोवारा तोरीके रीहुं आने जीयाअ कोअमें मोंडोळाअ मांहेंअ टोलवाअतेंह, तो गायु तुमनेंह सालाम देहे। आने ईया सेहेराअ पोयसाहांअ कारभारी एरास्तु तुमनेंह सालाम देहे। आने आपुअ आर्योअ वीसवासी कुवारतु बी तुमनेंह सालाम देहे। 24 [मालीख ईसु ख्रीस्तुअ मेरबानी तुमाहांपेअ रे! आमेन!] *
पोरमेहेराअ गुणगान केरुलोंअ!
25 पोरमेहेराअ मोडाय केअजी! तों तुमनेंह तुमांअ वीसवासाम मोजबुत कीअ सेकेह। ईसु ख्रीस्तुअ बाबोताअ हारी गोठ आंय जाहेर कीअहुं, आने जीयुल पोरमेहेरांय जुना जोमानांहम दोबावी राखली तीयु हाचायुल आंय जाहेर कीअहुं। 26 पेन आमी तीयांय ते हाचाय जाहेर केअयीह। ईयु हाचायुपेअ बादा देसाहांम ेर्येंअ येहुदी जातीअ नांह तेंहडें मांहेंअ वीसवास राखीन पोरमेहेराअ आखलों माने तीयाअ खातुर पोरमेहेराअ गोठ जाहेर केअनाराहां ख्रीस्तुअ बाबोताम जों लेख्योंह तों, कायोम रेनारा पोरमेहेरांय आमनेंह हुकोम केअया पोरमाणे जाहेर केअयोंह। 27 एकुज पोरमेहेर जो एखलोज हाची रीते गीयानुवालो हाय, तीयाअज आपुंह ईसु ख्रीस्तुअ मारफोते होर-होमीसा गुणगान केअतें रेजी!