मालीखाअ खास चेलाहांअ कामें
ईयु चोपळीअ बाबोताम बेन गोठ्या
“लुकुंह लेखली हारी गोठ” नांवांअ चोपळीअ सेल्ला भागाम जे बाबोत्या लेखल्या हाय तीयाअ हातींअ येरुसालेमाम आने दुन्याअ बीहरा भागाहांम बोंणला बोनावुंअ बाबोताम “मालीखाअ खास चेलाहांअ कामें” नांवांअ ईयु चोपळीम लेखलों हाय। “येरुसालेम सेहेराम, आने येहुदीया जील्लाअ बीहरा बादा भागाहांम आने सामारीया जील्लाअ बादी जागे आने दुन्याअ खुणे-खाचरे” (१:८) ईसुअ खास चेलाहां पोवीतोर आत्माअ दोरवोणीकींअ ईसुअ बाबोताअ हारी गोठ केंहकींअ फेलावी, तों जाणावांअज ए चोपळी लेखांअ खास कारोण हाय। येहुदी लोकाहांम ख्रीस्ताअ मोंडोळाअ सोरुवात केंहकींअ वीयी ते गोठ आने आखी दुन्याअ लोकाहांम तों केंहकींअ वादतों गीयों ते गोठ ईयु चोपळीम लेखली हाय। लुक ए चोपळी वाचनारांहन ए बी खातरी केरावांअ मागेह का, ख्रीस्ती लोक रोमुअ बादसाअ राज पाळावी लांअ सुपी रीते काम केअनारी टुकळीमेर्याअ नांय आथा, आने येहुदी धोरमाअ चोपळीम लेखल्या आगाह्या ख्रीस्तुल मानीनुंज पुर्या वेअत्याह।
ईयु चोपळीअ तीन भाग पाळी सेकाय: (१) ईसु होरगाम चोळी गीयो हातींअ येरुसालेमाम ख्रीस्ती मोंडोळाअ सोरुवात; (२) पालेस्तीन देसाअ बीहरा भागाहांम तों मोंडोळ वादेह ते गोठ; (३) तोरतीअ पोअल्याअ दोरीयाअ वीस्ताराम रोम सेहेरु लोगुंअ ख्रीस्ती मोंडोळ वादेह ते गोठ।
मालीखाअ खास चेलाहांअ मारफोते पोवीतोर आत्मांय जें गोजोब कामें केअलें, तें ईयु चोपळीअ खास बाबोत हाय। पास्का तेहवार हातींअ पाचासमो दीह येरुसालेमाम टोलवाअला वीसवास्यांहपेअ ओ पोवीतोर आत्मा खुब ताकोतुअ रीते उतेह आने ईयु चोपळीम नोंदला बोनावुंहम बोंणेह तेंहकींअ तो मोंडोळाअ लोकाहांन आने आगेवानाहांन वाट देखावतो जाहे आने आत्मीक गोती पुरी पाळतो जाहे। ख्रीस्ती वीसवासाअ गोठ मालीखाअ खास चेलाहां देदला खुब बोदा ंहम टुकमें देदली हाय। ईयु गोठीअ ताकोत ईयु चोपळीम नोंदला बोनावुंहम बोंणेह तेंहकींअ वीसवास्यांअ जीवोनाहांम आने मोंडोळाअ लोकाहांअ एक-बीहराअरीअ भाय-बोंदीम देखाय आवेह।
ईयु चोपळीमेरीअ बाबोतीहींअ रुपरेखा
ईसुअ बाबोताम साक्सी दांअ खातुर वीसवास्यांअ तीयारी १:१-२६ (क) ईसुंय सोताअ चेलाहांन देदलो सेल्लो हुकोम आने तीयाहांन देदलों वोचोन १:१-१४ (ख) केरीयोत गांवांअ येहुदाअ जागापेअ बीहरो जांअ नीमाअहे १:१५-२६
येरुसालेमाम वीसवास्यांअ साक्सी २:१-८:३
येहुदीया आने सामारीया वीस्तारुंहम वीसवास्यांअ साक्सी ८:४-१२:२५
पावुलाअ सेवा १३:१-२८:३१ (क) हारी गोठ जाहेर केअनारा तोरीके पावुलाअ पेअली मुसाफोरी १३:१-१४:२८ (ख) येरुसालेम सेहेराम मोंडोळाअ पोंचाअ पेअलांम पेअलीअ मीटींग १५:१-३५ (ग) हारी गोठ जाहेर केअनारा तोरीके पावुलाअ बीहरी मुसाफोरी १५:३६-१८:२२ (घ) हारी गोठ जाहेर केअनारा तोरीके पावुलाअ तीजी मुसाफोरी १८:२३-२१:१६ (च) येरुसालेम, कायसारीया, आने रोम सेहेराहांम केदी तोरीके पावुल २१:१७-२८:३१