मालीखाअ खास चेलाहांअ कामें
1
पोवीतोर आत्मा दांअ वोचोन
1-2 ओ थीयोफील,
ईसुंय सोताअ सेवा चालु केअयी तेहेअनेअ पोरमेहेरांय तीयाल होरगाम लीअ लेदो तांव लोगुंअ तीयांय जें-जें कामें केअलें आने जो-जो बोद देदलो तीया बाबोताम बादया गोठ्या तोअ खातुर मांयुं मांअ पेअली चोपळीम लेख्याह। पोरमेहेरांय तीयाल होरगाम लीअ लेदो तीयाअ पेअलांअ ईसुंय सोताअ बाबोताअ गोठ्या जाहेर केरांअ खातुर पोसोंद केअला खास चेलाहांन तीयांय पोवीतोर आत्माअ मारफोते बोद देदला। 3 ईसु कुरुसापेअ मोयन फाचो जीवतो वीयो हातींअ चालीह दीह लोगुंअ तीयांय तीयाहांन ओवार-नोवार दोरसोन देदलों, आने तो होकीकोतुमुज जीवतो हाय तीयाअ तीयाहांन तीयांय खुब रीते साबीती देदली। तीया दीहाहांम तीयांय तीयाहांन पोरमेहेराअ राज्याअ बाबोताअ गोठ्या केअया।
4 तो तीयाहांअरी आथो तांहांअ तीयांय तीयाहांन हुकोम केअयो, “येरुसालेम सेहेर सोळीन मां जाता! पेन मांअ पोरमेहेर बाहकांय जों दांअ वोचोन देदलों तीया पोवीतोर आत्माअ वाट जोवजा! ईयुज भेटुअ बाबोताम मांयुं बी तुमनेंह आखलों। 5 योहानांय ता खाली पांअयांकींअ ओतोंअज लोकाहांन बापतीस्मा केअलों, पेन थोळाकुज दीहाहांम पोरमेहेर पोवीतोर आत्माल तुमांअ माज वोसावीअ।”
पोरमेहेर ईसुल होरगाम लीअ लेहे
6 एक दीह ते खास चेला ईसुअरी टोलवाअला तांहांअ तीयाहां तीयाल फुच्यों, “मालीख, ईसरायेल लोकाहांअ राज फाचों आवे एंहडों तुं आमीज केअनारो हाय का?”
7 तांहांअ ईसुंय तीयाहांन जोवाब देदो, “तों केंहडीवेल बोंणांअ जोजे तों नोक्की केअनारो ता एखलो मांअ पोरमेहेर बाहकोज हाय। तो सोमोय तुमांअ जांणांअ जोरुल नांह। 8 पेन तुमांअ जों जांणांअ जोरुल हाय तों ता ईं हाय का, पोवीतोर आत्मा तुमाहांपेअ उती आवीअ तांहांअ तुमनेंह आत्मीक ताकोत मीलीअ, आने तुमां येरुसालेम सेहेराम, आने येहुदीया जील्लाअ बीहरा बादा भागाहांम, आने सामारीया जील्लाअ बादी जागे, आने दुन्याअ खुणे-खाचरे, लोकाहांन मांअ बाबोताम साक्सी दीहा।”
9 ए गोठ्या आख्या हातींअ, तीयाहांअ देखताज पोरमेहेरांय ईसुल होरगाम लीअ लेदो, आने वादलों तीयाअ आडवांअ आवी गीयों, आने तो देखाअतो बोंद वीअ गीयो। 10 ईसु जुगाम चोळी जाहलो तांहांअ तीयाअ ते खास चेला तीयाल एक धारा हीईज रेहला तांवज, पांडेंअ-फोट पोतळें पोवला बेन जांअ जे खोरेखोर होरगाअ दुत आथा ते हुदमुदुज तीयाहांअहीं आवीन उबी रीया। 11 तीयाहां तीया चेलाहांन आख्यों, “ओ गालील जील्लाअ लोकुंह! तुमां जुगीअ वेल हेअता काहाल उबी रीयाह? जीया ईसुल पोरमेहेरांय तुमांअ नीसमेंनेअ होरगाम लीअ लेदोह, तो ता आमीज फाचो आवनारो नांह। पेन जेंहकींअ कीईन तुमां तीयाल जाता देख्योह, तेंहकींअज कीईन तो एगु दीह फाचो आवीअ।”
केरीयोत गांवांअ येहुदाअ जागापेअ माथीया नीमाअहे
12 हातींअ मालीखाअ ते खास चेला जेतुनाअ चाळाहांअ डोगीअपनेअ फाचा येरुसालेम सेहेर गीया। जेतुनाअ चाळाहांअ डोगीअ येरुसालेम सेहेरनेअ लोग-भोग आरदो मायल सेटे हाय। 13 येरुसालेमाम ते जीया कोअ मालापेअ रेहला तींहीं ते गीया। तीयाहांम पीतोर, योहान, याकोब, आंदरीया फीलीप, थोमा बारथोलोमी, माथी, आलफीअ पोयरो याकोब, रोम सारकाराअ वीरुद केअनारी टुकळीमेनेअ सीमोन, आने याकोबाअ पोयरो येहुदा आथा। 14 ते बादा एक जागे टोलवायन पोरमेहेराल ओरुज केअया केअत्ला। तीयाहांअरी ईसुअ याहकी मारीयोम, आने पेअलांअ ईसुअरी सेवा केअत्ल्या ते बीजया बाया बी आथ्या, आने ईसुअ पावुह बी आथा।
15 थोळाक दीह हातींअ बादें वीसवासी मांहेंअ टोलवाअयें। तें लोग-भोग एकहोव ने वीह आथें। तांहांअ पीतोर उठीन आखांअ टेक्यो का,
16 “मांअ पावुह-बोंअयुंहुं, ईसुल तेअनारांहन वाट देखावनारा येहुदाअ बाबोताम पोवीतोर आत्मांय जे भोवीसवाणी केअली, ते पुरी वेरांअ जोरुल आथी। 17 तो येहुदा आपुअ आर्योअज आथो, काहाका ईसुंय तीयाल आपुअरी काम केरांअ पोसोंद केअलो।”
18 (ईसुल तेराव्यो तीया खाराब कामुअ बोदलांम येहुदाल मीलला पोयसाहांकींअ येहुदीहींअ मोडा पुंजाराहां एक खेत वेचाअतों लेदों, आने तीया खेतामेर्याअ एक चाळाअरी येहुदांय होरफाचो खादो आने एठाअ टुटी पोळीन मोय गीयो। तीयाअ डेड फुटी गीयी आने तीयाअ आतें नींगी पोळ्यें। 19 आने येरुसालेमाअ बादा लोकाहांन तीयाअ खोबुर पोळी। आने तीयाअ लीदे तीया खेताअ नांव तीयांय सोताअ बोलीम ‘आकेलदामा’ पाळ्यों। तीयाअ ओर्थो ‘रोगुताअ खेत’ हाय।)
20 फाचों पीतोरांय आख्यों, “दावीदाअ गुणगानुअ गीतुंअ चोपळीम जों लेख्योंह तों ईत केरा! तीयांय एंहकींअ लेख्योंह का, ‘तीयाअ कोअ उजाळ वीअ जाय! तींहमें केडों बी नांय रे!’ तीयु चोपळीम बीहरी जागे तीयांय एंहकींअ बी लेख्योंह का, ‘जे सेवा तो केअत्लो, ते बीहरों एक मांहुंअ केअ!’
21 मांअ धार्या पोरमाणे, ईं बादों येहुदाअ बाबोतामुज लेखाअयोंह। तीयाअ लीदे, येहुदाअ जागापेअ बीहरा एगाह मांहांअल आपुअ पोसोंद केरांअ जोजे। तों मांहुंअ आपुअ मालीख ईसुअरी रेहला तो बादो वोखत आपुअरी रेनारों वेरांअ जोजे। 22 मोंजे का, ईसुंय योहानुपेअ बापतीस्मा केरावलों तेहेअनेअ पोरमेहेरांय तीयाल आपुअरीनेअ होरगाम लीअ लेदो तांव लोगुंअ आपुअरी जे-जे आथा, तीयाहांमेर्योअ तो वेरांअ जोजे। आने जीयाल बी आपुंह पोसोंद कीअहुं तो, ईसु फाचो जीवतो वीयो तीयाअ साक्सी तोरीके आपुअरी जोळाय जाय।”
23 तांहांअ मालीखाअ बीहरा खास चेलाहां बेन जांअहांअ नांवें देदें: एकाअ नांव योसेफ आथों (जीयाल बारसाबा बी आखत्लें), आने बीहराअ नांव माथीया।
24-25 हातींअ तीयांय पोरमेहेराल ओरुज केअयी, “ओ मालीख, तुं दोरेक मांहांअ वीचार जांअहो। तीयाअ लीदे, मालीखाअ खास चेला तोरीके सेवा केरांअ खातुर येहुदाअ जागापेअ ईया बेनाहांमेनेअ तुंयुं केडाल पोसोंद केअयोह, तों आमनेंह देखाव। काहाका, येहुदा ता तीयाअ केअला खाराब कामाहांअ लीदे तो जीया जागाअ लायोक आथो तीया जागे गीयोह।” 26 हातींअ तीया बेन नांवुंहमनेअ एक पोसोंद केरांअ खातुर तीयाहां चीठ्या टाक्या, आने माथीअ नांवांअ चीठठी नींगी। मोंजे, तो मालीखाअ ओग्यार खास चेलाहांअरी जोळाय गीयो।