योहानांय लेखली हारी गोठ
ईयु चोपळीअ बाबोताम बेन गोठ्या
योहान ईयु चोपळीम ईसुल, पोरमेहेर केंहडो हाय तों जाणावनारा तोरीके ओअखावेह। ओ ईसु “मांहुंअ बोंण्यो, आने आमांअरी रीयो।” (१:१४) योहानांय हारी गोठीअ ए चोपळी ईयाअ खातुर लेखीह का ते वाचनारें, “ईसुज ख्रीस्त आने पोरमेहेराअ पोयरो हाय” एंहकींअ माने आने तें “कायोम जीवे।” (२०:३१)
हातींअ ईयु चोपळीअ पेअलाअ भागाम योहानांय, ईसुंय केअला खुब चोमोत्कार नोंदयाह। ते चोमोत्कार ईं देखावताह का, ‘ख्रीस्त’ ईसुज हाय। आने ते चोमोत्कार ईं बी देखावताह का, तो ईसुज पोरमेहेराअ पोयरो बी हाय। ईयु चोपळीअ बीहरा भागाम योहानांय, ईसुंय देदला बोद नोंदयाह। ईसुंय केअला चोमोत्काराहांअ आत्मीक ओर्थो ईया बोदा ंहम होमाअलो हाय। थोळाक लोकाहीं ईसुल ‘ख्रीस्त’ तोरीके मानीन केंहकींअ तीयाअ चेला बोंण्या तीया बाबोताम, आने बीहरा लोकाहीं केंहकींअ तीयाअ वीरुद कीईन तीयाल मानांअ ना पाळी तीया बाबोताम, चोपळीअ ईया भागाम लेखलों हाय। ईसुल तीयाअ दुसमोनुहुं तेअयो तीयु रातीं, तीयांय सोताअ चेलाहांअरी जे एकदोम खुब भाय-बोंदी राखी तीया बाबोताम, आने तीयाल सोयनीकाहां कुरुसापेअ जोळ्यो तीयाअ आगला दीहाअ वाअते, तीयांय चेलाहांन उफ देता जे गोठ्या आख्या ते, आदयाय १३ नेअ १७ लोगुंअ लेखल्या हाय। ईसुल तीयाअ दुसमोनुहुं तीईन तीयाअ तापासणी केअयी ते गोठ, आने सोयनीकाहां तीयाल कुरुसापेअ जोळीन माय टाक्यो ते गोठ, आने ईसु मोअलामेनेअ फाचो जीवतो वीयो ते गोठ, आने तीयाअ हातींअ तीयांय सोताअ चेलाहांन दोरसोन देदों ते गोठ, ए बादया गोठ्या योहान ए चोपळी पुरी केअता सेल्ला आदयायाहांम लेखेह।
ईसुंय जों केअयोंह तीयाकींअ तो लोकाहांन आत्मीक रीते कायोमाअ खातुर जीवावेह तीया बाबोताम योहान खास लेखेह। तो लेखेह का, ‘पोरमेहेर बाहको रेहे तींहीं जांअ वाट’, आने ‘लोकाहांन पोरमेहेराअ बाबोताअ हाचाय जाहेर केअनारो’, आने ‘तीयाहांन आत्मीक रीते कायोमाअ खातुर जीवावनारो’ ईसुज हाय एंहकींअ माननारा लोकाहांन, आत्मीक रीते कायोमाअ खातुर जीवांअ ओनुभोव ईया जीवोनामुज मीलेह। पांय, मांडो, उजवोळ, भारवाळ आने तीयाअ घेटें, आने दाराख्साअ वेलो आने तीयाअ फोलवों एंहडया रोजर्याअ जीवोनाम देखाअनार्या सीदया-सादया वोस्ताहांअ दाखला दीईन ईसु आत्मीक हाचाय होमजावेह, तो ईयु चोपळीअ खास गुण हाय।
ईयु चोपळीमेरीअ बाबोतीहींअ रुपरेखा
सोरुवाताअ गोठ १:१-१८
बापतीस्मा केअनारो योहान आने ईसुअ पेअलाअ चेला १:१९-५१
लोकाहांम ईसुअ जाहेर सेवा २:१-१२:५०
येरुसालेमाम आने तीयाअ पाहल्याअ भागाहांम ईसुअ जीवोनाअ सेल्ला दीह १३:१-१९:४२
मालीखाअ फाचा जीवता उठुलोंअ आने लोकाहांन तीयाअ दोरसोन देवुलोंअ २०:१-३१
सेल्ली गोठ: गालील जील्लाम मालीखांय देदलों बीहरों दोरसोन २१:१-२५