24
ईसु फाचो जीवतो उठेह
(माथी २८:१-१०; मार्क १६:१-८; योहान २०:१-१०)
1 आठवाळ्याअ पेअला दीह मोंजे रोवीवाराअ दीह बोळे वेगर्याअ, ते बाया ईसुअ मुरदाल चोपळांअ तीयुहुं तीयार केअल्या हारी गुंदीवाल्या वोस्तु लीईन कोबीरे गीया। 2 आने कोबीराअ मुवालापेअ जो ढोगळो थोवलो, तो तीयुहुं उंडलावी थोवलो देख्यो। 3 ते कोबीराम वीठ्या, पेन मालीख ईसुअ मुरदों तींहीं नांय आथों। 4 ते तीया बाबोताम कांहवांयज रेहल्या तांहांअ, चोमकुअतें पोतळें पोवलें बेन आदमी एक्कायुंअज तीयुहुंअ पाही आवीन उबी रीया। 5 तांहांअ ते बाया खुब काबराय गीया आने एठा हेअत्या उबी रीया। तांहांअ तीया आदमीहीं तीयुहुंन आख्यों, “जो जीवतो हाय तीयाल तुमां कोबीरे काहा होदत्याह। 6 तो ईंहीं नांह पेन जीवतो उठ्योह। तो गालीलाम आथो तांहांअ, तीयांय तुमनेंह जों आखलों तों ईत केरा। 7 तीयांय आखलों, ‘मांहांअ पोयराल, मोंजे मांन, पापी लोकाहांअ आथाहांम होपी दांअ जोजे आने कुरुसापेअ जोळीन माय टाकांअ जोजे। आने तीजे दीह मांअ फाचो जीवतो उठांअ जोजे।’”
8 तांहांअ तीयुहुंन ईसुंय आखली गोठ ईत आली, 9 आने कोबीरेनेअ सेहेराम फाच्या आवीन तीयुहुं ईसुअ ओग्यार चेलाहांन आने बीहराहांन ए बादया गोठ्या आखी देदया। 10 ए बादया गोठ्या मालीखाअ खास चेलाहांन आखनार्या बाया ता, मागदाला गांवांअ मारीयोम, योहान्ना, आने याकोबाअ याहकी मारीयोम, आने तीयुहुंअ आर्याअ बीज्या बी बाया आथ्या। 11 पेन मालीखाअ खास चेलाहांन ता तीयुहुंअ गोठ्या ओकली वोगुराअ लाग्या आने ते ता ते गोठ्या नांय मान्या। 12 [पेन पीतोर उठीन कोबीरे दोवळी गीयो। आने टोंगो वोलीन कोबीराम हेअयों ता, रेसमी पोतळाहांअ सीवाय तीयांय काय बी नांय देख्यों। जों बोंणलों तों देखीन तो, काय वीयों वीअ एंहकींअ कांहवांयज रेहलो आने कोअ गीयो] *
एम्मावु गांवांम जानारा चेलाहांन ईसु दोरसोन देहे
(मार्क १६:१२-१३)
13 तीदीहज ईसुअ बेन चेला “एम्मावु” नांवांअ एक गांव जाहला। तों गांव येरुसालेमेनेअ लोग-भोग सांतेक मायल सेटे हाय। 14 ते बेनुं चेला येरुसालेमाम बोंणला तीया बादा बोनावुंअ बाबोताम गोठ्या केअता जाहला। 15 ते एक-बीहराअरी गोठ्या केअत्ला आने चारचा केअत्ला तांहांअ, ईसु सोते तीयाहांअहीं आवीन तीयाहांअरी चालांअ टेक्यो। 16 तीयाहां ईसुल देख्यो खेरो पेन पोरमेहेरांय एंहडों केअलों का ते तीयाल ओअखी नांय सेक्या। 17 तांहांअ ईसुंय तीयाहांन फुच्यों, “चालता-चालता तुमां एक-बीहराअरी केंहडाअ गोठ्या केअताह रा?”
तांहांअ ते बेनुं दुखी वीईन उबी रीअ पोळ्या। 18 तीयाहांमेनेअ कीलेयोपा नांवांअ जांअ आथो तीयांय ईसुल जोवाब देदो, “येरुसालेमाम रेनाराहांम तुं एखलोज एंहडो हाय का जीयाल ईंहीं ईया पास्का तेहवाराअ दीहाहांम बोंणला बोनावुंअ खोबुर नांह?”
19 तांहांअ ईसुंय फुच्यों, “केल्ला बोनाव?” तांहांअ तीयाहां आख्यों का, “नाझारेथावाला ईसुल जों वीयोंह तोंज का! तो पोरमेहेराअ नोजराम आने बादा लोकाहांअ आगलांअ खुब ताकोतावालो आने पोरमेहेराअ गोठ जाहेर केअनारो आने मोडें-मोडें कामें केअनारो आथो। 20-21 आमनेंह ता एंहडी आस्या आथी का तोज ईसरायेल लोकाहांन रोम राज्याअ आथामनेअ सोळवुअनारो हाय। पेन तीयाल आपुअ मोडा पुंजाराहां आने बीहरा वोळीलाहीं मोताअ साज्या देवावांअ पीलाताल होपी देदो आने कुरुसापेअ जोळीन माय टाकाव्यो। ए बादा बोनाव बोंण्या आने आज तीजो दीह वीयो। 22 आने एक वेल आमांअ टोलीमेर्याअ थोळीक बायुहुं नोवाय लागे एंहड्या गोठ्या आमनेंह आखल्या। ते बोळे वेगर्याअ ईसुअ कोबीरे गेहल्या। 23 पेन तीयाअ मुरदों तीयुहुंन नांह झुळ्यों। आने तीयुहुं आवीन आमनेंह आख्यों, ‘आमनेंह होरगाअ दुताहीं दोरसोन दीईन आख्यों, ईसु जीवतो हाय!’ 24 आने बीहरी वेल आमांअ आर्यांहमनेअ बी थोळाक आदमी कोबीरे गेहला, आने बायुहुं जेंहकींअ आखलों तेंहकींअज तीयाहां देखलों। पेन ईसुल तीयाहां नांह देख्यो।”
25 तांहांअ ईसुंय तीयाहांन आख्यों, “तुमां काची बुददीवाला हाय! पोरमेहेराअ गोठ जाहेर केअनाराहां ख्रीस्ताअ बाबोताम जों आख्योंह, तों बादों तुमां बागे-बागेज मानताह! 26 ख्रीस्ताअ ईं बादें दुखें भोगवीन होरगाम सोताअ मोडाय मीलवांअ जोरुल नांय आथी का?” 27 हातींअ ईसुंय तीयाहांन मोसेंय लेखली चोपळींहमनेअ पोरमेहेराअ गोठ जाहेर केअनाराहां लेखल्या चोपळींअ लोगुंअ बादा पोवीतोर लेखाणाहांम सोताअ बाबोताम जोंबी लेखलों तीया बादाअ खुलासो कीअ देखाव्यो।
28 आने ते बेनुं चेला जीया गांवांम जांअ आथा तीयाअ पाही आवी पोच्या तांहांअ, ईसुंय तीयाहांन टाकीन तीयु वाटे आगलांअ जातो वीअ तेंहडो देखाव केअयो। 29 पेन तीयाहां बेनुहुं कालावाला कीईन तीयाल आख्यों, “आमांअरीज रीअ जो! काहाका, वाअतों वेरांअ आलोंह आने दीह बी आमी बुडी गीयोह।” मोंजे तो तीयाहांअरी रांअ कोअमें गीयो। 30 तीयाहांअरी खांअ बोठो तांहांअ, ईसुंय मांडो लेदो आने पोरमेहेराअ आभार मानीन तीयाल पाज्यो आने तीयाहांन देदो। 31 तांहांअ ओचींतोंज पोरमेहेरांय तो खोरेखोर ईसुज हाय एंहकींअ ते ओअखी जाय एंहडों केअयों। पेन ईसु ता तांव उलुप वीअ गीयो। 32 तांहांअ तीयाहां एक-बीहराल आख्यों, “आपुंह वाटे चालत्ला तांहांअ तो आपुअरी गोठ्या कीईन पोवीतोर लेखाणाहांअ खुलासो कीअ देखावत्लो तांहांअ, आपुअ मोनाहांम केंहडो आनोंद वेअत्लो?”
33 ते बेनुं चेला तीयुज घेळी उठीन येरुसालेमाम फाचा जांअ नींग्या। तींहीं तीयाहां ओग्यार खास चेलाहांन आने तीयाहांअ आर्याअ बीहराहांन एक जागे टोलवाअलें देख्यें। 34 ते चेला आखत्ला, “मालीख ईसुल पोरमेहेरांय हुदींअज जीवतो उठव्योह आने तीयांय सीमोनाल दोरसोन देदोंह!”
35 तांहांअ तीया बेनुहुं बी, ते जाहला तांहांअ वाटे जो बोनाव बोंणलो तो आने मांडो पाजतीअ वोखत तीयाहां मालीखाल केंहकींअ ओअखी काडलो तों आखी देखाव्यों।
ईसु तीयाअ ओग्यार खास चेलाहांन आने बीहरा चेलाहांन दोरसोन देहे
(माथी २८:१६-२०; मार्क १६:१४-१८; योहान २०:१९-२३; मा। खा। खो। का। १:६-८)
36 ते बेनुं एंहकींअ गोठ्या केअत्ला तांवज, मालीख ईसु सोतेज तीयाहांअ नीसमें एक्कायुंअज पोरगोट वीयो आने तीयाहांन आख्यों, “पोरमेहेराअ सांती तुमांअरी रे!”
37 तांहांअ ते बादा खुब बोगलाय गीया आने काबराय बी गीया। काहाका, ते धारत्ला का ते एगाह मोअला मांहांअ आत्माल हेअताह। 38 तांहांअ ईसुंय तीयाहांन फुच्यों, “तुमां काहाकाबराय गीयाह? आने आंय जीवतो उठ्योह तीया बाबोताम तुमांअ मोनाहांम सोंका काहा जागीह?” 39 हातींअ तीयांय तीयाहांन आख्यों, “मांअ आथ-पाग हेरा का, आंय सोतेज हाय। मांन आथलीन हेरा। काहाका, मोअला मांहांअ आत्माअ आटकें आने मांह नांह रेतों, पेन मांअ ता आटकें आने मांह हायज।”
40 एंहकींअ आखीन ईसुंय सोताअ आथ-पाग तीयाहांन देखाव्या। 41 तांहांअ तीयाहांन खुब आनोंद वीयो। तेबी ते आजी बी मानी नांय सेक्या का तो ईसुज हाय आने ते कांहवांयज रीया। तांहांअ ईसुंय तीयाहांन फुच्यों, “तुमाहांपेअ ईंहीं कांवींह खावुलोंअ-मावुलोंअ हाय का?” 42 तांहांअ तीयाहां तीयाल पुजला मासाअ एक कुटको देदो। 43 ईसुंय तो लेदो आने तीयाहांअ देखताज खाय गीयो।
44 तांहांअ ईसुंय तीयाहांन आख्यों, “आंय तुमांअरी पेअलांअ आथो तांहांअज मांयुं तुमनेंह आखलों, नीयोम ाहांअ चोपळींहम आने पोरमेहेराअ गोठ जाहेर केअनारा सेवोकुहुं लेखली चोपळींहम आने पोवीतोर गीतुंअ चोपळीम मांअ बाबोताम जों-जों लेखलों हाय तों बादों खेरों पोळांअज जोजे।”
45 तांहांअ पोवीतोर लेखाण होमजांअ ईसुंय तीयाहांन मोदोत केअयी, 46 आने तीयाहांन आख्यों, “पोवीतोर लेखाणाहांम एंहकींअ लेखलों हाय का, ख्रीस्ताल दुखें भोगवांअ आने मोरांअ जोजे, आने तीजे दीह तीयाअ मोअलामेनेअ फाचो जीवतो उठांअ जोजे, 47 आने तीयाअ आदीकाराकींअ येरुसालेमामनेअ चालु कीईन बादी जातीअ लोकाहांन, ते सोताअ पाप सोळीन पोरमेहेराअ वाटे आवे तांहांअ पोरमेहेर तीया पापाहांअ माफी दीअ तीया बाबोताम गोठ जाहेर केरांअ जोजे। 48 आने ईयु बादी बाबोतीहींअ तुमां साक्सी हाय। 49 ईत राखजा का, जो पोवीतोर आत्मा मोकली दांअ मांअ पोरमेहेर बाहकांय तुमनेंह वोचोन देदलों, तो पोवीतोर आत्मा आंय तुमांअहीं मोकली देहें। पेन पोरमेहेर तुमनेंह तीया आत्माअ मारफोते ताकोत दे तांव लोगुंअ, तुमां येरुसालेमामुज रेजा!”
पोरमेहेर ईसुल होरगाम लीअ लेहे
(मार्क १६:१९-२०; मा। खा। खो। का। १:९-११)
50 हातींअ ईसु तीयाहांन सेहेराअ बारे बेथानी गांवांअ लोगुंअ हादी गीयो, आने सोताअ आथ उचा कीईन तीयांय तीयाहांन आसीरवाद देदो। 51 ईसु आजी तीयाहांन आसीरवाद देहलो तांवज तो तीयाहांअहींनेअ नींग्यो आने पोरमेहेरांय तीयाल होरगाम लीअ लेदो। 52 हातींअ तीयाहां बादाहां ईसुअ भोकती केअयी, आने खुब खुस वीईन येरुसालेम वोल्या। 53 आने तींहीं ते मोंदीराम खुब सोमोय रीईन पोरमेहेराअ गुणगान केअया केअत्ला।