23
राजपाल पीलाताअ आगलांअ ईसु
(माथी २७:१-२, ११-१४; मार्क १५:१-५; योहान १८:२८-३८)
1 हातींअ तींहीं टोलवाअला बादा लोक तींहींनेअ उठीन ईसुल राजपाल पीलाताअ आगलांअ लीअ गीया। 2 तींहीं ते ईसुपेअ गुनो थोवांअ टेक्या का, “ओ आदमी सारकाराअ वीरुद हुल्लोळ केरावांअ मागेह। आने ओ आमांअ जातीअ मांहांहांन खोटों हीकवुअत्लो, ‘रोमुअ बादसाल वेरो नांय पोरुलोंअ।’ आने तो सोताल ख्रीस्त आखावत्लो तांहांअ आमां तीयाल तेअयो।”
3 तांहांअ पीलातांय ईसुल फुच्यों, “तुं येहुदीहींअ राजा हाय का?”
तांहांअ ईसुंय तीयाल जोवाब देदो, “एंहकींअ तुं आखोह।”
4 तांहांअ पीलातांय मोडा पुंजाराहांन आने लोकाहांअ टोलाल आख्यों, “ईयाअ काय बी गुनो मांन नांह झुळतो।” 5 पेन ते ईसुअ वीरुद आखताज रेहला का, “ओ आदमी आखा पालेस्तीन देसाम हीकवुअतो-हीकवुअतो लोकाहांन चोळवेह। गालील वीस्ताराम तीयांय ईं चालु केअलों आने आमी ईंहीं आलोह।”
पीलात ईसुल हेरोदाअहीं मोकली देहे
6 तीयाहांअ गोठ उनायन पीलातांय तीयाहांन फुच्यों, “ओ आदमी गालील वीस्तारुअ हाय का?” 7 ईसु हेरोदाअ वीस्तारामेर्योअ हाय एंहकींअ खोबुर पोळी तांहांअ, पीलातांय ईसुल हेरोदाअहीं लीअ जांअ आख्यों। तीयु वोखत हेरोद येरुसालेमामुज आथो। 8 ईसुल देखीन हेरोद खुब खुस वीयो। काहाका, तीया बाबोताम तो गोठ्या उनाअलो तीयाअ लीदे खुब वोखतुर्योअ तो तीयाल हेरांअ मागत्लो, आने ईसु काय चोमोत्कार कीअ देखावे एंहडी तो आस्या बी राखत्लो। 9 तीयाअ लीदे, तीयांय ईसुल खुब सावाल फुच्या। पेन ईसुंय तीयाल काय बी जोवाब नांय देदो। 10 तांहांअ मोडा पुंजारांय आने नीयोम हीकवुअनारा उबी रीईन जोरपेअ-जोरपेअ ईसुपेअ गुनो थोव्या केअत्ला। 11 आने हेरोदांय तीयाअ सोयनीकाहांअरी मीलीन ईसुअ नींदा केअयी आने मोस्कुरी केअयी। हातींअ तीयांय ईसुल चोमकुअतों पोतळों पोवावीन फाचो पीलाताअहीं मोकली देदो। 12 पेअलांअ हेरोद आने पीलात एक-बीहराअ दुसमोन आथा। पेन तीदीह ते दोस्दार बोंणी गीया।
ईसुल मोताअ साज्या देवाअहे
(माथी २७:१५-२६; मार्क १५:६-१५; योहान १८:३९-१९:१६)
13 हातींअ पीलातांय मोडा पुंजाराहांन, आने येहुदी धोरमाअ बीहरा आगेवानाहांन आने जाहेर लोकाहांन टोलव्या, 14 आने तीयाहांन आख्यों, “तुमां ‘ओ आदमी सारकाराअ वीरुद हुल्लोळ केरावांअ मागेह आने ओ आमांअ जातीअ मांहांहांन खोटों हीकवुअत्लो का रोमुअ बादसाल वेरो नांय पोरुलोंअ’ एंहकींअ आखीन तीयाल मांअहीं तीअ लालाह। पेन तुमांअ उरु-बुरुज तीयाल मांयुं तापास्यो ता तुमां तीयाअ वीरुद फोरीयाद केअताह एंहडो एक बी गुनो तीयाम मांन नांह झुळ्यो। 15 तेंहकींअज हेरोदाल बी तीयाम काय गुनो नांह झुळ्यो। तीयाअ लीदे तीयांय तीयाल फाचो आपुअहीं मोकली देदोह। तीयाल मोताअ साज्या देवाय एंहडो एक बी गुनो तीयांय नांह केअयो। 16 तीयाअ लीदे, आंय तीयाल मार ठोकावीन सोळी थोवेंह।” 17 [पीलाताल दोर वोरसे पास्का तेहवाराअ वोखत येहुदीहींअ खातुर एक केदील सोळी थोवांअ पोळत्लों।]
18 पेन ते बादा एकुळ्याज बोंबली उठया, “तीयाल माय टाक आने आमांअ खातुर बाराबासाल सोळी थोव!” 19 बाराबासुंह येरुसालेम सेहेराम लोकाहांन सारकाराअ वीरुद हुल्लोळ केरावलो आने खुन बी केअलों। तीयाअ लीदे, तीयाल कुरुसापेअ जोळीन माय टाकांअ खातुर जेलाम कोंडलो।
20 पेन पीलाताअ मोर्जी ता ईसुल सोळी थोवांअ आथी। तीयाअ लीदे तीयांय लोकाहांअरी फाची गोठ केरांअ चालु राख्यों। 21 पेन ते फाचा बोंबली उठया, “तीयाल कुरुसापेअ जोळीन माय टाक! कुरुसापेअ जोळीन माय टाक!”
22 तांहांअ तीजी वोखत बी पीलातांय लोकाहांन फुच्यों, “पेन तीयांय काय गुनो केअयोह? तीयाल मोताअ साज्या देवाय एंहडो एक बी गुनो मांयुं नांह देख्यो। तीयाअ लीदे, आंय तीयाल मार ठोकावीन सोळी थोवेंह।”
23 पेन तीयाहां ता टीणी तीईन बोंबलांअ चालुज राख्यों का, “तीयाल कुरुसापेअ जोळीन माय टाक!” सेल्ले, पीलाताल तीयाहांअ मागणी पोरमाणेज केरांअ पोळ्यों। 24 तीयाअ लीदे, तीयाहांअ मागणी पोरमाणे पीलातांय ईसुल मोताअ साज्या देदी। 25 हुल्लोळुअ गुनाम आने खुनाअ गुनाम जेलाम कोंडाअलो आथो तीया बाराबासाल तीयाहांअ मागणी पोरमाणे पीलातांय सोळी थोव्यो।
रोमुअ सोयनीक ईसुल कुरुसापेअ जोळीन माय टाकताह
(माथी २७:३२-४४; मार्क १५:२१-३२; योहान १९:१७-२७)
26 ईसुल कुरुसापेअ जोळांअ खातुर सोयनीक तीयाल पीलाताअ मेहेलामनेअ लीअ जाहला तांहांअ, कुरेन सेहेराअ सीमोन नांवांअ आदमी तीयाहांन वाटे हुंबुर मील्यो। तो हीमुमनेअ येरुसालेम सेहेराम जाहलो। सोयनीकाहां तीयाल तेअयो आने ईसु जो कुरुस उसलुअत्लो तो तीयाल उसलावीन ईसुअ फाचलांअ जांअ हुकोम केअयो।
27 ईसुअ फाचलांअ लोकाहांअ मोडो टोलो जाहलो। तीयाहांम ईसुअ लीदे साती कुटीन रोळनार्या आने रोळा-रोळ केअनार्या खुब बाया बी आथ्या। 28 तांहांअ ईसुंय रोळनारी बायाहांअ वेल फीरीन तीयुहुंन आख्यों, “येरुसालेमाअ बायुहुं, तुमां मांअ लीदे मा रोळत्या। पेन उलटों, तुमनेंह आने तुमांअ पोयराहांन जों वेअनारों हाय तीयाअ लीदे रोळा। 29 काहाका, एंहडा दीह आवनारा हाय का, जांहांअ मांहेंअ एंहकींअ आखीअ, ‘जे बाया वांयटया हाय ने जीयुंह कीदीह बी पोयराहांन जोन्मो नांह देदों आने तीयाहांन बुजलो नांह खावाव्यो, ते बाया खुब नोसीबदार हाय!’ 30 आने तांहांअ मांहेंअ डोगुंहन एंहकींअ आखीअ, ‘आमाहांपेअ पोळा’, ने डोगुंहन आखीअ, ‘आमनेंह दोबावा’। 31 काहाका, आंय ता वोगुर गुना हाय तेबी तीयाहां मांन मोताअ साज्या देदीह। तांहांअ, तुमां ता गुनालें हाय तीयाअ लीदे ते तुमनेंह नोक्कीज मोडी साज्या दीअ।” *
32 पीलाताअ सोयनीक बीहरा गुनेगारुंहन बी ईसुअरी माय टाकांअ लीअ जाहला। 33 ‘खोपरी’ नांवांअ जागे ते आला आने तींहीं तीयाहां ईसुअ पोतळें काडी लीईन तीयाल कुरुसापेअ जोळ्यो। 34 तांहांअ [ईसुंय आख्यों, “ओ पोरमेहेर बाहका, ईयांहन माफ केअ! काहाका, ते काय केअताह तीयाअ तीयाहांन खोबुर नांह।”] *
सोयनीकाहां चीठ्या टाकीन ईसुअ पोतळें वाटी लेदें। 35 ईं बादों हेअतें मांहेंअ तींहीं उबी रेहलें। पेन येहुदी धोरमाअ आगेवान ईसुअ नींदा कीईन आखत्ला, “तीयांय बीहराहांन वाचाव्येंह। जो तो ख्रीस्त वीअ ता तो सोतालुज वाचावे!”
36 सोयनीकाहां बी तीयाअ मोस्कुरी केअयी। तीयाहां ईसुअहीं आवीन तीयाल राही दाराख्साअ रोह देदो, 37 आने आख्यों, “जो तुं येहुदीहींअ राजा हाय ता सोतालुज वाचाव!”
38 कुरुसाअ चुटके एक पाट्याम तीयाहां लेख्यों, “ओ येहुदीहींअ राजा हाय।”
39 तींहीं कुरुसापेअ जोळाअला गुनेगारुंहमनेअ एकांय ईसुअ नींदा कीईन आख्यों, “तुं ता ख्रीस्त हायकने? तांहांअ तुं सोताल ने आमनेंह बी वाचावत्रा!”
40 पेन बीहरा गुनेगारुंह तीया गुनेगाराल खीजवायन आख्यों, “तुं पोरमेहेराल नांह बीतो का? ओ जे साज्या भोगवेह तेज साज्या तुं बी भोगवोह। 41 आपुंह ता खोरेखोर गुनो केअयोह तीयाअ लीदे आपुंह साज्या भोगवुअताह। पेन ईया मांहांय ता, काय बी गुनो नांह केअयो।” 42 हातींअ तीयांय ईसुल आख्यों, “ओ ईसु, तुं राजा बोंणीन आवो तांहांअ, मेरबानी कीईन मांअ भोलों केअजे!”*
43 तांहांअ ईसुंय तीयाल आख्यों, “आंय तुल नोक्कीज आखुंह, आजुज तुं मांअरी पारादेसाम रीहो।”
ईसुअ मोत
(माथी २७:४५-५६; मार्क १५:३३-४१; योहान १९:२८-३०)
44 पारगाप लोग-भोग बारेक वाजे, दीह उजवोळ देतो बोंद वीअ गीयो। मोंजे, तीन वाजे लोगुंअ आखा देसाम आंदारों फेलाय गीयों। 45 तीयुज घेळी, येरुसालेमामेर्योअ मोंदीराअ पोळदो उपेअनेअ एठा लोगुंअ चीरायन बेन कुटका वीअ गीयो। 46 तांहांअ ईसुंय जोरपेअ बोंबलीन आख्यों, “ओ पोरमेहेर बाहका, आंय मांअ आत्माल तोअ आथाम होपी दीहुं।” एंहकींअ आखीन ईसुंय जीव सोळ्यो।
47 जों बोंण्यों तों देखीन सोयनीकाहांअ सुबेदारुंह पोरमेहेराअ गुणगान कीईन आख्यों, “हुदींअज ईं मांहुंअ खेरों आथों!”
48 तो बोनाव हेरांअ टोलवाअलें तें मांहेंअ, जों बोंण्यों तों देखीन साती कुटतें-कुटतें सोत-सोताअ कोअ गीयें। 49 पेन गालीलामेनेअ ईसुअ चेल्या बोंणीन तीयाअरी आलल्या ते बाया आने ईसुल ओअखुअनारें बीहरें बादें मांहेंअ सेटे उबी रीईन ईं बादों हेअया केअत्लें।
ईसुअ मुरदों कोबीराम ओजाअहे
(माथी २७:५७-६१; मार्क १५:४२-४७; योहान १९:३८-४२)
50-51 येहुदीया जील्लाअरीमाथेया सेहेराम योसेफ नांवांअ एक आदमी आथो। तीयाल बादाज लोक मान देहला। आने तो हाचो आदमी आथो। तो ख्रीस्ताल हेरांअ वाट जोवत्लो। येहुदी धोरमाअ पोंचाअ लोकाहीं ईसुअ वीरुद जों वीचारलों आने केअलों, तींहमें तो भागीदार नांय आथो। 52 तीयांय पीलाताअहीं जायन ईसुअ मुरदाअ मागणी केअयी। 53 पीलातापेअ राज्या मीलवीन हातींअ तीयांय ईसुअ मुरदाल कुरुसापेनेअ उतावीन तीयाल रेसमी पोतळाम चोंअडाव्यों आने खोळकाम खोरवीन बोंणावली कोबीराम तों मुरदों ओजी देदों। तीयु कोबीराम केडाअ बी मुरदों कीदीह बी नांह ओज्यों। 54 तीदीह सुकरुवार आथो, आने आरामाअ दीह चालु वेरांअ तीयारीम आथो।
55 गालीलामेनेअ ईसुअरी आलल्या तीयु बायुहुं बी योसेफाअ फाचलांअ आवीन कोबीराल आने तींहमें ईसुअ मुरदों केंहकींअ ओज्यों तों देख्यों। 56 हातींअ ते कोअ गीया आने मुरदाल चोपळांअ आस्तोर आने हारी गुंदीवाल्या वोस्तु तीयार केअया।
पेन नीयोमाअ पोरमाणे आरामाअ दीह तीयुहुं आराम केअयो।