लुकुंय लेखली हारी गोठ
ईयु चोपळीअ बाबोताम बेन गोठ्या
लुक ईयु चोपळीम ईसुल, ईसरायेल लोकाहांन आने बीहरा बादा लोकाहांन तीयाहांअ पापाहांअ सीक्सामेनेअ वाचावनारा तोरीके ओअखावेह। तो एंहकींअ नोंदेह का, मालीखाअ आत्मांय ईसुल, “गोरीब लोकाहांअहीं हारी गोठ लीअ आवांअ” हादलो। बादी जातीअ हाकळीम रेनारा लोकाहांपेअ लागणी देखावता ए चोपळी लेखाअयीह। ईयु चोपळीअ खुब भागाहांम खुसीअ नोंद नोंदली हाय। खास कीईन, ईसुअ आवांअ बाबोताम जाहेर केअनारा सोरुवाताअ आदयायाहांम आने चोपळीअ सेल्ला भागाम ए नोंद नोंदली हाय।
ईसुअ जोन्माअ वोखत होरगाअ दुताहांअ गीत, भारवाळाहांअ मुलाकात, हानोअ पोयरो ईसु मोंदीराम जाहे तों, सामरी वीस्ताराअ दायालु मांहांअ दाखलो आने कोअ सोळीन जातो रेहला पोयराअ दाखलो, खाली ईयुज चोपळीम लेखलो हाय। पोरमेहेराल ओरुज, पोवीतोर आत्मा, ईसुअ सेवाम बायाहांअ भाग, आने पापाहांअ माफी, ईयु बादी बाबोतीहींपेअ आखी चोपळीम खास भार देदोह।
ईयु चोपळीअ रुपरेखा
आगलीअ गोठ १:१-४
बापतीस्मा केअनारा योहानाअ आने ईसुअ जोन्मो आने तीयाहांअ हानांअपेर्याअ गोठ्या १:५-२:५२
बापतीस्मा केअनारा योहानाअ सेवा ३:१-२०
ईसुअ बापतीस्मा आने सेतान तीयाल पाप केरावांअ कोसीस केअहे ३:२१-४:१३
गालील जील्लाम ईसुअ जाहेर सेवा ४:१४-९:५०
गालील जील्लामेनेअ येरुसालेमाअ वेल ९:५१-१९:२७
येरुसालेमाम आने तीयाअ पाहल्याअ भागाहांम सेल्लों आठवाळ्यों १९:२८-२३:५६
मालीखाअ फाचा जीवता उठुलोंअ, तीयाअ दोरसोन देवुलोंअ, आने होरगाम चोळी जावुलोंअ २४:१-५३