लुकुंय लेखली हारी गोठ
1
थीयोफीलाल ओरपोण
1-4 खुब मानुवाला थीयोफील,
खुब लोकाहीं, आपुअ नीसमें ईसुंय केअली बाबोतीहींन हारकींअ गोठवीन ते लेख्याह। पेअलार्याअ चेलाहां आने पोरमेहेरांय सोताअ वोचोनाहांअ पोरमाणे जों केअयोंह तों, ईसुंय तीयाअ जाहेर सेवा चालु केअली तीयु वोखतनेअ सोताअ डोंआं नोजरे हेअनारा बीहराहां आपनेंह तीयुहुंअ बाबोताम जेंहकींअ आखलों, तीयाअ पोरमाणे तीया लोकाहीं लेख्याह। तीयाअ लीदे, ईसु जोनम्यो तीयु वोखतनेअ तीयु बादी बाबोतीहींअ बोराबोर होदणी कीईन, तीयुहुंन तोअ खातुर वीगोतवार लेखांअ मांन बी हारों लाग्यों। आंय ए बाबोत्या ईयाअ खातुर वीगोतवार लेखुंह का, जो बोद तुल मील्योह तो खोरेखोर हाचोज हाय तों तुं जांओं।
बापतीस्मा केअनारा योहानाअ जोन्माअ बाबोताम भोवीसवाणी
5 येहुदीया वीस्ताराअ राजा हेरोदाअ वोखताम झाखारीया नांवांअ एक पुंजारो आथो। तो आबीया नांवांअ पुंजाराअ टुकळीमेर्योअ आथो । झाखारीयाअ कोअवाली एलीसाबेत आरोनाअ वोसुलामेरीअ आथी। 6 झाखारीया आने एलीसाबेत बेनुं मालीखाअ बादा हुकोमाहांअ आने कायदाहांअ पोरमाणे हारकींअ चालीन पोरमेहेराअ नोजराम हाचें आथें। 7 पेन तीयाहांअ पोयरें नांय आथें। काहाका, एलीसाबेत वांयटी आथी आने तें बेनुं खुब डायें वीअ गेहलें।
8 एक दीह, झाखारीयाअ टुकळी येरुसालेमाअ मोंदीराम सोताअ काम केअत्ली आने तो तींहीं पोरमेहेराअ हाजरीम पुंजारा तोरीके सेवा केअत्लो। 9 तांहांअ बीहरा पुंजाराहां सोताअ रीवाजाअ पोरमाणे मालीखाअ मोंदीराम जायन तुणी केरांअ खातुर चीठ्या टाकीन झाखार्याल पोसोंद केअयो।
10 तो माज जायन तुणी केअत्लो तांहांअ बारे येहुदी लोक बादा पोरमेहेराल ओरुज केअत्ला। 11 तांहांअ एक्कायुंअज मालीखाअ एक दुत झाखारीयाल देखाअयो। तो दुत झाखारीया तुणी केअत्लो तीयु वेदीअ हुदी वेल उबी रेहलो। 12 होरगाअ दुताल देखीन झाखारीया चोअकाअयो आने काबराय गीयो। 13 पेन होरगाअ दुतांय तीयाल आख्यों, “बीतो मां झाखारीया! काहाका, पोरमेहेर तोअ ओरुज उनाअयोह। तोअ कोअवाली एलीसाबेत एक पोयराल जोन्मो दीअ। तुं तीयाअ नांव योहान पाळजे! 14 तीयाअ जोन्माअ लीदे तुं खुब खुस वीअहो आने बीहरा खुब लोक बी खुस वीअ! 15 मालीखाअ नोजराम तो मोडो आदमी बोंणीअ। दाराख्साअ रोहa का बीहरो केल्ली बी जातीअ रोहb तीयाअ नांय पीयांअ जोजे। तो सोताअ जोन्माअ पेअलांअज पोवीतोर आत्माअ पुरा काबाम रीअ! 16 तो खुब ईसरायेल लोकाहांन मालीख तीयाहांअ पोरमेहेराअहीं वाली लीअ आवीअ। 17 एलीयापेअ जे ताकोत आथी ते तीयापेअ रीअ आने तो ख्रीस्ताअ आगलांअ लोकाहांअहीं जाय आने तीयाहांन तीयार कीअ। तो याहकी-बाहकाहांन तींयहांअ पोयराहांअरी मेल-मीलाप केरावीअ। आने पोरमेहेराअ आखलों नांय माननाराहांन तीयाअ आखलों माननारा बोंणावीन तीयाहांन हाचा लोक जे गीयानावाल्या गोठ्या आखताह तीयु गोठीहींअ पोरमाणे चालनारा बोंणावीअ आने एंहकींअ कीईन तो मालीखाअ खातुर लोकाहांन तीयार कीअ।”
झाखारीयाअ सोंका
18 तांहांअ झाखारीयांय होरगाअ दुताल आख्यों, “ईं बोंणीअ तों आंय केंहकींअ जांय सेकुं? आंय डायो वीयोह। मांअ कोअवाली बी डायी वीयीह।”
19 तांहांअ होरगाअ दुतांय जोवाब देदो, “आंय पोरमेहेराअ हाजरीम उबी रेनारो गाबरीयेल दुत हाय। तोअरी गोठ्या केरांअ आने तोअ पोयरो जोन्मीअ ए हारी खोबुर तुल दांअ तीयांयज मांन मोकल्योह। 20 आमी उनाअजे! मांयुं आखल्या गोठ्या पोरमेहेरांय नोक्की केअला सोमोये हाच्या पोळीअज। पेन तीयुहुंपेअ तुंयुं वीसवास नांह केअयो तीयाअ लीदे, ईयु गोठीहींअ पोरमाणे वीअ तीदीह लोगुंअ तोअ जाबान बोंद वीअ जाय आने तुं गोगी नांय सेको।”
21 तांव मोंदीराअ बारे उबी रेहला ते लोक झाखारीया मोंदीराअ एकदोम माजर्याअ भागामेनेअ बारे नींगे तीयाअ वाट जोवत्ला। तींहीं तो ओतोअ बादो वोखत काहाल रीयो तीयाअ तीयाहांन नोवाय लागी। 22 झाखारीया बारे नींग्यो तांहांअ, तो तीयाहांअरी गोगी नांय सेक्यो। तांहांअ तीयाहांन एंहकींअ लाग्यों का तीयाल मोंदीराअ माजर्याअ भागाम दोरसोन वीयों वीअ। तीयाल गोगाअत्लों नांय तीयाअ लीदे तो तीयाहांन सोताअ आथाहांकींअ ईसारा केअया केअत्लो।
23 मोंदीराम सेवा केरांअ झाखारीयाअ सोमोय पुरो वीयो हातींअ, तो सोताअ कोअ गीयो। 24 थोळाक वोखत हातींअ तीयाअ कोअवाली एलीसाबेत बेन-जीवाअ वीयी, आने ते पांच मोयना लोगुंअ बीहरा लोकाहींअ नोजरे नांय पोळी। 25 ते आखत्ली, “मांअ लोकाहांअ आगलांअ मांअ वांयटीअ जों मेणों आथों तों पाजांअ खातुर पोरमेहेरांय मांअपेअ एंहकींअ दाया केअयीह।”
ईसुअ जोन्माअ बाबोताम भोवीसवाणी
26 एलीसाबेत बेन-जीवाअ वीयी तीयाअ सोठ्ठे मोयने, पोरमेहेरांय गाबरीयेल दुताल गालील जील्लाअ नाझारेथ गांवांअ एक कुवारी पोयरीअहीं मोकल्यो। 27 तीयु पोयरीअ नांव मारीयोम आथों। तीयुअ साकुरपुळो दावीदाअ वोसुलामेर्याअ योसेफ नांवांअ आदमीअरी वेअलो। 28 होरगाअ दुतांय तीयुअहीं जायन आख्यों, “मेरबानी मीलवुअली पोयरी, सालाम! मालीख तोअरी हाय।”
29 पेन होरगाअ दुताअ गोठ उनायन मारीयोम एकदोम गुचवोणाम पोळी गीयी, आने तीयु सालामाअ ओर्थो काय वीअ तीयाअ वीचार केरांअ टेकी। 30 तांहांअ दुतांय तीयुल आख्यों, “मारीयोम, काबराअती मा। काहाका, पोरमेहेरांय तोअपेअ मेरबानी केअयीह। 31 तुं बेन-जीवाअ वीईन एक पोयराल जोन्मो दीहो, आने तुं तीयाअ नांव ईसु पाळजे। 32 तो मोडो आदमी बोंणीअ आने उचाम-उचा जागे रेनारा पोरमेहेराअ पोयरो आखाय। आने मालीख पोरमेहेर तीयाल तीयाअ आगलाअ डाया दावीदाअ होच राजा बोंणावीअ।c 33 आने तो कायोमाअ खातुर ईसरायेल लोकाहांपेअ राज कीअ, आने तीयाअ राज्याअ ओंत नांय आवे।”
34 तांहांअ मारीयोमांय होरगाअ दुताल फुच्यों, “ईं केंहकींअ वीअ सेके? काहाका, आंय कुवारीज हाय!”
35 तांहांअ होरगाअ दुतांय जोवाब देदो, “पोवीतोर आत्मा तोअपेअ उतीअ, आने उचाम-उचा जागे रेनारा पोरमेहेराअ ताकोताकींअ तुं बेन-जीवाअ वीअहो। तीयाअ लीदे, जो पोवीतोर पोयरो जोन्मीअ तो ‘पोरमेहेराअ पोयरो’ आखाय। 36 आने आजी उनाअ! तोअ जातुली लागेह ते एलीसाबेत डायी उंमोरुम बी बेन-जीवाअ वीयीह। जे वांयटी आखाअत्ली तीयुअ आमी सोठ्ठो मोयनो चालेह। 37 काहाका, पोरमेहेराल नांय बोंणे एंहडी एक बी बाबोत नांह।”
38 तांहांअ मारीयोमांय आख्यों, “आंय मालीखाअ सेवीका हाय। तुं आखोह तेंहकींअ मांन वेअ।” हातींअ होरगाअ दुत तीयुअहींनेअ गीयो।
मारीयोम एलीसाबेताअ मुलाकात लेहे
39 थोळाक दीह हातींअ, मारीयोम येहुदीया जील्लाअ डोगाअवाला वीस्तारामेर्याअ एक गांवांम माहरी-माहरी गीयी, 40 आने तीयुंय झाखारीयाअ कोअमें जायन तीयाअ कोअवाली एलीसाबेताल सालाम केअयी। 41 एलीसाबेतांय मारीयोमाअ सालाम उनाअयी तांहांअ तीयुअ डेडीमेर्योंअ पोयरों कुदयों। आने एलीसाबेत पोवीतोर आत्माअ पुरा काबाम आवीन 42 मारीयोमाल जोरपेअ आखी उठी का, “बायाहांम तुं वादारे बोरखोतावाली हाय। आने तोअ डेडीअ पोयरों बी बोरखोतावालों हाय। 43 तुं मांअ मालीखाअ याहकी मांअ मुलाकात लांअ आलीह, ते कोतीअ मोडी गोठ हाय! 44 काहाका, आंय जेंहडी तोअ सालामाअ गोठ उनाअयी का तुरुतुज मांअ डेडीमेर्योंअ पोयरों खुसीम आवीन कुदयों। 45 मालीखांय तुल देदलों वोचोन तो पुरों कीअ एंहडो तुंयुं वीसवास केअयोह तीयाअ लीदे, तीयांय तुल ओ आसीरवाद देदोह।”
मारीयोमाअ गीत
46 तांहांअ मारीयोमांय ईं गीत आख्यों, “आंय मांअ पुरा मोनाकींअ पोरमेहेराअ गुणगान कीअहुं।
47 मांअ जीव मांन वाचावनारा पोरमेहेराअ लीदे खुसीम हाय।
48 काहाका, तीयांय सोताअ गोरीबळी सेवीकाल ईत केअयीह। आमीनेअ पीळाअ-पीळीअ बादें मांहेंअ आखीअ का आंय बोरखोतावाली हाय।
49 काहाका, खुब ताकोतावाला पोरमेहेरांय मांअ खातुर मोडें कामें केअयेंह। तो पोवीतोर हाय।
50 तीयाअ बीख राखीन जीवनारा पीळाअ-पीळीअ लोकाहांपेअ तो दाया केअहे।
51 तो सोताअ आथाकींअ ताकोतावालें कामें केअहे! आने सोतेज काय हाय एंहकींअ सोताअ मोनाहांम वीचारनारा ओभीमानावालाहांन तो वेरगावी टाकेह!
52 आने तो ताकोतावाला राजाहांन राज-गादीहींपेनेअ उठवी थोवेह। पेन गोरीबळा सोबावावालाहांन तो उचा होददापेअ लावेह।
53 पुखा लोकाहांन तो हारी-हारी वोस्ताहांकींअ तारवी देहे। पेन मालदाराहांन तो खाली आथेज मोकली देहे।
54-55 आपुअ आगलाअ डायाहांपेअ, मोंजे का, आबराहाम आने तीयाअ वोसुलामेर्याहांपेअ कायोमाअ खातुर दाया केरांअ तीयांय तीयाहांन देदलों वोचोन ईत कीईन तीयाअ पोरमाणे तीयांय तीयाअ सेवा केअनारा ईसरायेल लोकाहांन मोदोत केअयीह।”
56 मारीयोम लोग-भोग तीनेक मोयना एलीसाबेताअरी रीयी आने हातींअ ते फाची सोताअ कोअ गीयी।
बापतीस्मा केअनारा योहानाअ जोन्मो
57 एलीसाबेताअ मोयना पुरा वीया तांहांअ तीयुंय एक पोयराल जोन्मो देदों।
58 मालीखांय तीयुपेअ मोडी दाया केअयीह एंहकींअ तीयुअ आहल्यें-पाहल्यें आने जातुलें उनाअयें तांहांअ तें बी तीयुअरी खुस वीयें।
59 पोयरो आंठ दीहाअ वीयो तांहांअ तें तीयाअ सुन्नोत केरावांअ आलें। तें तीयाअ बाहकाअ नांवांपेनेअ तीयाअ नांव झाखारीया पाळांअ मागत्लें। 60 पेन तीयाअ याहकींय आख्यों, “नांह, तीयाअ नांव योहान पाळांअ जोजे।”
61 तांहांअ तीयाहां तीयुल आख्यों, “तोअ जातुलाहांमेर्याअ केडाअ बी एंहडों नांव नांह।” 62 हातींअ तीयाहां ईसारो कीईन पोयराअ बाहकाल फुच्यों का तीयाअ पोयराअ काय नांव पाळांअ तीयाअ मोर्जी हाय। 63 तांहांअ ईसारो कीईन झाखारीयांय एक पाटी मागीन तीयुपेअ लेख्यों, “तीयाअ नांव योहान हाय।” तांहांअ तीयाहांन बादाहांन नोवाय लागी। 64 तुरुतुज झाखारीया फाचो गोगतो वीअ गीयो आने तीयांय पोरमेहेराअ गुणगान केअया। 65 तांहांअ तीयाहांअ आहल्या-पाहल्याहांन बादाहांन खुब नोवाय लागी आने ईया बोनावाअ गोठ येहुदीया वीस्ताराअ डोगाअवाला भागाम बादी जागे फेलाय गीयी। 66 आने जें-जें ते गोठ उनाअयें तीयाहां तीयुअ बाबोताम वीचार केअयो आने फुच्यों, “ओ पोयरो मोडो वीईन पोरमेहेराअ खातुर काय कीअ?” काहाका, मालीखाअ ताकोत खोरेखोर तीयाअरी आथी।
झाखारीया पोरमेहेराअ गोठ जाहेर केअहे
67 तांहांअ योहानाअ बाहका झाखारीयांय पोवीतोर आत्माअ पुरी दोरवुणी कींअ पोरमेहेराअ ए गोठ जाहेर केअयी,
68 “ईसरायेल लोकाहांअ पोरमेहेर मालीखाअ गुणगान केअजी! काहाका, तो सोताअ लोकाहांन सोळवांअ तीयाहांअहीं आलोह।
69 तो तीयाअ सेवोक दावीदाअ वोसुलामेनेअ आपुअ खातुर ताकोतावालो वाचावनारो पुरो पाळेह।
70 एंहकींअ केरांअ खुब वोखत पेअलांअ पोरमेहेर तीयाअ गोठ जाहेर केअनाराहांअ मारफोते गोग्यो।
71 तो आपनेंह आपुअ दुसमोनाहांअ आथाहांमेनेअ सोळवीअ आने आपनेंह नोफरोत केअनारा बादाहांअ आथाहांमेनेअ आपनेंह वाचावीअ।
72 आपुअ आगलाअ डायाहांन तीयांय देदला वोचोनाअ पोरमाणे तीयांय तीयाहांपेअ दाया केअयीह आने तीयाहांअरी तीयांय केअलो पोवीतोर कारार तीयांय ईत केअयोह।
73 पोरमेहेरांय आपुअ आगलाअ डाया आबराहामाअ आगलांअ होम खादो का,
74 तो आपनेंह आपुअ दुसमोनाहांअ आथाहांमेनेअ वाचावीअ आने बीखु वोगुर तीयाअ सेवा केरांअ आपनेंह मोदोद कीअ,
75 आने आखी जीनगी तीयाल पुरी रीते ओरपोण वीईन तीयाअ आगलांअ हाचें रांअ आपनेंह मोदोत कीअ।
76 “ओ मांअ हानांअ पोयरा! तुं उचाम-उचा जागे रेनारा पोरमेहेराअ गोठ जाहेर केअनारो आखाअहो! काहाका, मालीख आवे तीयाअ पेअलांअ तुं सोताअ सेवा चालु कीअहो आने तीयाअ आवांअ खातुर लोकाहांन तीयार कीअहो।
77 आने पोरमेहेर सोताअ लोकाहांअ पाप केंहकींअ माफ कीअ आने तीयाहांअ पापाहांअ सीक्सामेनेअ तीयाहांन केंहकींअ वाचावीअ तों तुं तीयाहांन आखोह।
78 आपुअ पोरमेहेर खुब दायावालो हाय। जेंहकींअ दीह उगताअरी नोवो दीह चालु वेअहे तेंहकींअ होरगामेनेअ ख्रीस्त आपुअहीं आवीअ,
79 ईयाअ खातुर का, आत्मीक रीते आंदाराम रेनारा आने मोताअ बीख राखनारा लोकाहांन जीवोना रुपी उजवोळ मीले, आने तो उजवोळ आपनेंह सांतीअ वाटे दोरी जाय।”
80 हानोअ पोयरो योहान मोडो वेअतो गीयो, आने आत्माम बी गोतीवालो बोंणतो गीयो। हातींअ तो ईसरायेल लोकाहांम सोताअ जाहेर सेवा चालु केरांअ दीह लोगुंअ उजाळाम रेहलो।