2
ईसुअ जोन्मो
(माथी १:१८-२५)
1 तीयु वोखत, रोम देसाअ बादसा ओगोस्तुंय तीयाअ राज्यामेर्याअ बादी जागे वोहतीअ गोंणती केरांअ हुकोम केअयो। 2 (सीरीया राज्याअ राजपाल कुरेनीयु आथो तांहांअ ईयु वोहतीअ पेअली गोंणती वेअली।) 3 तांहांअ तीया देसाअ बाठा लोक सोत-सोताअ नांवें नोंदावांअ सोत-सोताअ गांवांहांम गीया।
4 योसेफ बी गालील जील्लाअ नाझारेथ गांवांमेनेअ येहुदीया जील्लाअ बेथलेहेम गांवांम गीयो। काहाका, तो दावीदाअ वोसुलामेर्योअ आथो। ईयाज गांवांम दावीद जोन्मुअलो। 5 योसेफ सोताअ साकुरपुळो वेअलो तीयु मारीयोमाअरी नांवें नोंदावांअ तींहीं गीयो। तांहांअ मारीयोम बेन-जीवाअ आथी।
6 तें तींहीं आथें तांहांअ मारीयोमाअ सुटी वेरांअ वोखत आलो। 7 तांहांअ तीयुंय सोताअ पेअला पोयराल जोन्मो देदों। तीयुंय तीयाल सीतराहांम चोंअडावीन डोगराहांन चारो टाकांअ चारीहींम हुवाव्यो। काहाका, दोरोमसालाम तीयाहांन जागो नांह मील्यो।
भारवाळ आने होरगाअ दुत
8 तीयुज रातीं, थोळाक भारवाळ बेथलेहेमाअ पाहल्याअ हीवाहांम रीईन सोताअ घेटाहांन हाचवुअत्ला। 9 तांहांअ एक्कायुंअज मालीखाअ एक दुत तीयाहांअ आगलांअ पोरगोट वीयो। पोरमेहेराअ मोडायावाली हाजरीअ उजवोळ तीयाहांअ चारुवेल देखाअयो। तीयाअ लीदे ते खुब बीया। 10 पेन होरगाअ दुतांय तीयाहांन आख्यों, “बीता मा! तुमांअ खातुर आंय एक हारी खोबुर लालोह। ते उनायन बादा लोक खुब खुस वीअ। 11 आज दावीदाअ गांवांम तुमांअ खातुर वाचावनारो जोनम्योह। तो मालीख ख्रीस्त हाय। 12 तुमां एक पोयराल सीतराहांम चोंअडावीन चारीहींम हुवावलो हीअहा। एज तीयाल ओअखी काडांअ नीसाणी हाय।”
13 तांहांअ एक्कायुंअज, बीहरा होरगाअ दुताहांअ मोडो टोलो तीया दुताअरी तींहीं पोरगोट वीयो। ते दुत पोरमेहेराअ गुणगान केअता आखत्ला, 14 “उचाम-उचा होरगाम बादें पोरमेहेराअ जोय-जोयकार केअ! आने तोरतीपेअ तीयांय पोसोंद केअला लोक पोरमेहेराअरी बीगळुअलो तीयाहांअ सोबोंद हुदारी ले!”
15 होरगाअ दुत तीयाहांअहींनेअ फाचा होरगाम गीया तांहांअ भारवाळुहुं एक-बीहराल आख्यों, “चाला, आपुंह बेथलेहेम जाजी, आने मालीखांय आपनेंह आखावली खोबुर पोरमाणे ओ जो बोनाव बोंण्योह तो हेअजी!”
16 हातींअ ते माहरी-माहरी बेथलेहेम गीया, आने जेंहकींअ होरगाअ दुतांय तीयाहांन आखलों, तेंहकींअज तींहीं तीयाहां मारीयोमाल, योसेफाल, आने चारीहींम हुवावला पोयराल देख्यों। 17 पोयराल हीईन हातींअ भारवाळुहुं, जे गोठ होरगाअ दुतांय तीया पोयराअ बाबोताम तीयाहांन आखली, ते मारीयोमाल आने योसेफाल, आने तीयाहांअ आर्याअ बीहरा बादाहांन जाहेर केअयी। 18 भारवाळुहुं आखल्या गोठ्या उनाअनारें बादें कांहवांयज रीयें। 19 पेन मारीयोमांय ते बादया गोठ्या मोनामुज राख्या, आने तीयुपेअ उंडो वीचार केअयो। 20 होरगाअ दुतांय तीयाहांन जों आखलों तीयाअ लीदे, आने तीयांय जेंहडों आखलों तेंहडोंज तीयाहां तीया पोयराल हेअलों तीयाअ लीदे, पोरमेहेराअ खुब गुणगान केअता ते भारवाळ सोताअ खेतुंअहीं आने घेटाहांअहीं फाचा गीया।
ईसुअ नांव पाळतेंह
21 पोयराअ जोन्मो वीईन आंठ दीह पुरा वीया तांहांअ, तो पोरमेहेराअ हाय तीयाअ नीसाणी तोरीके, येहुदी रीवाजा पोरमाणे मारीयोमांय आने योसेफांय तीयाअ सुन्नोत केरावी, आने तीयाअ नांव ईसु पाळ्यों। ईं नांव, तो याहकीअ डेडीम पेदा वीयो तीयाअ पेअलांअ, होरगाअ दुतांय पाळांअ आखलों।
ईसुअ याहकी-बाहको मोंदीराम तीयाअ ओरपोण केअतेंह
22-23 मालीखांय देदला नीयोमाम एंहकींअ लेखलों हाय का, “केल्ली बी बायाअ पेअलांम-पेअलोअ पोयरो जोन्मे ता, तीयाल मालीखाअ खातुर जुदो कीईन तीयाअ खातुर तीयाल ओरपोण केरांअ जोजे।” तीयाअ लीदे, मोसेंय देदला नीयोमा पोरमाणे तीयाहांअ चोख्खें वेरांअ वोखत आलो तांहांअ, योसेफ आने मारीयोम मालीखाल ईसुअ ओरपोण केरांअ खातुर ईसुल येरुसालेमाअ मोंदीराम लीअ गीयें। 24 मालीखांय देदला नीयोमा पोरमाणे एक जोळ ओलगीअ, नेता कोबुतोराअ बेन बोचांअ भोग तीयाहां चोळव्यो।
ईसुअ बाबोताम सीमीयोन भोवीसवाणी केअहे
25 तीयु वोखत, सीमीयोन नांवांअ एक मांहुंअ येरुसालेमाम आथों। तों खेरों आने धोरमी मांहुंअ आथों। आने तों ईसरायेल लोकाहांन आत्मीक उफ देनारा ख्रीस्ताल * पोरमेहेर मोकले तीयाअ वाट जोवत्लों। पोवीतोर आत्मा तीयाअरी आथो, 26 आने तीया पोवीतोर आत्मांय तीयाल जाहेर केअलों का, “मालीख मोकलीअ तीया ख्रीस्ताल हेअता पेअलांअ तुं मोअहो नांय।” 27 पोवीतोर आत्माअ दोरवोणी पोरमाणे सीमीयोन मोंदीराम आलो। आने तेंहडामुज, नीयोमाअ रीवाजा पोरमाणे मालीखाल हानांअ पोयरा ईसुअ ओरपोण केरांअ खातुर तीयाअ याहकी-बाहको मोंदीराम लालें। 28 तांहांअ सीमीयोनुंह ईसुल सोताअ आथाहांम लीईन पोरमेहेराअ गुणगान केअता आख्यों,
29 “ओ मालीख, आमी आंय तोअ सेवोक सांतीम मोय सेकुंह। 30-31 काहाका, बादा देसाहांअ लोकाहांअ आगलांअ तुंयुं तीयार केअला वाचावनाराल, तोअ वोचोनु पोरमाणे, मांयुं मांअ सोताअ डोंआं नोजरे देख्योह। 32 येहुदी जातीअ नांह तेंहडी बीहरी जातीअ लोकाहांन तोअ बाबोताअ हाचाय जाहेर केरांअ खातुर आने तोअ ईसरायेल लोकाहांअ बाबोताम बीहरें मांहेंअ हारों आखे तीयाअ खातुर, तो वाचावनारो उजवोळाअ होच हाय।”
33 सीमीयोनुंह ईसुअ बाबोताम एंहड्या जे गोठ्या आख्या ते उनायन ईसुअ याहकी-बाहकाल नोवाय लागी। 34 तीयाहांन आसीरवाद दीईन हातींअ सीमीयोनुंह ईसुअ याहकी मारीयोमाल आख्यों, “हेअ! ईसरायेल लोकाहांमेर्याअ खुब लोक आत्मीक रीते वाचाय जाय आने बीहरा घोणांअ आत्मीक रीते नास वेअ तीयाअ खातुर पोरमेहेरांय ईया पोयराल नीम्योह। तो चेतवुअनारी नीसाणीअ होच बोंणीअ का, जीयुअ वीरुद खुब मांहेंअ गोगीअ। 35 आने आजी उनाअजे! तो तीयाहांअ मोनाहांअ उंडाम-उंडा वीचारुंहन बी उगाळा पाळीअ। तीयाल तें मांहेंअ जों केअनारें हाय तों देखीन, तुं, जाणेका, केडांय तोअ काअज्याल एक तारवायुकींअ वाडी टाक्यो वीअ तेंहकींअ खुब दुखी वीअहो!”
ईसुअ बाबोताम हान्ना भोवीसवाणी केअहे
36 पोरमेहेराअ गोठ जाहेर केअनारी हान्ना नांवांअ एक बाय बी तींहीं मोंदीराम आथी। ते आसेराअ वोसुलामेर्याअ फानुवेलाअ पोयरी आथी। ते खुब डायी वीअ गेहली। ते रोंडेअ आथी। तीयुअ वोराळ वेअलों हातींअ सांतुज वोरसें ते तीयुअ कोअवालाअरी रेहली। 37 आमी ते चोवर्यांसी वोरसांअ वेअली। ते कायोम मोंदीरामुज रीईन उपास राखत्ली, आने रात-दीह पोरमेहेराअ भोकती केअया केअत्ली आने तीयाल ओरुज केअया केअत्ली। 38 ते बाय, योसेफ आने मारीयोमाअरी सीमीयोन आथो तीयुज घेळी तींहीं आली, आने तीयुंय ईसु पोयराअ खातुर पोरमेहेराअ आभार मान्यो। आने योसेफ आने मारीयोम मोंदीरामेनेअ नींगी गीयें हातींअ बी तीयुंय, येरुसालेम सेहेराल आने बीहरा बादा ईसरायेल लोकाहांन सोळवुअनाराअ वाट जोवनारांहन ईसुअ बाबोताम गोठ आखी।
ईसुअ याहकी-बाहको तीयाल लीईन फाचें नाझारेथ वोली आवतेंह
39 मालीखाअ नीयोमाहांअ चोपळीम लेख्या पोरमाणे सोताअ पोयराअ जोन्माअ बाबोताअ बादया वीदया केअया हातींअ, योसेफ, मारीयोम आने ईसु गालील जील्लामेर्याअ सोताअ गांव नाझारेथ फाचें गीयें। 40 पोयरो ईसु मोडो वेअतो गीयो, आने तीयाल गोती ने गीयान मील्यों, आने पोरमेहेर तीयापेअ खुब राजी आथो।
येरुसालेमाअ मोंदीराम पोयरो ईसु
41 ईसुअ याहकी-बाहको येरुसालेमामेर्याअ बीहरा येहुदीहींअरी पास्का तेहवार वालांअ दोर वोरसे तींहीं जाहलें। 42 मोंजे ईसु बार वोरसांअ वीयो तांहांअ बी तें तीयाहांअ रीता पोरमाणे पास्का तेहवार वालांअ येरुसालेम गीयें। 43 तेहवार पुरो वीयो तांहांअ तें फाचें कोअ जांअ नींग्यें। पेन हानोअ ईसु येरुसालेमामुज रीअ गीयो। तीयाअ याहकी-बाहकाल तीयाअ खोबुर नांय पोळी। 44 तो येरुसालेमेनेअ सोत-सोताअ कोअ वोलनारा मांहांहांअ टोलाम वीअ एंहकींअ धारीन तीयाहां तीया वोगुर एखलांहज एक आखो दीह चाली टाक्यो। हातींअ तीयाहां येरुसालेमेनेअ वोलनारा जातुलांहम आने ओअखात्यांहम तीयाअ होदणी केअयी। 45 तींहीं तो तीयाहांन नांय झुळ्यो तीयाअ लीदे तें तीयाल होदतें-होदतें येरुसालेम फाचें गीयें। 46 आखरीप तीजे दीह तीयाहां मोंदीराअ चोवठाम ईसुल होदी काडयो। तो नीयोम हीकवुअनाराहांअरी बोहीन तीयाहांअ गोठ्या उनाअत्लो आने तीयाहांन सोवाल फुचत्लो। 47 आने तीयाअ गोठ्या उनाअनारें बादें तीयाअ ओकुल देखीन आने हारा जोवाब देतो देखीन कांहवांयज रीयें। 48 तीयाल देखीन तीयाअ याहकी-बाहको बी कांहवांयज रीयें। आने तीयाअ याहकींह तीयाल आख्यों, “बेटा, आमनेंह आख्या वोगुर येरुसालेमाम रीअ जायन तुंयुं आमांअरी एंहडो वेहवार काहा केअयोह? तोअ बाहको आने आंय ता खुब चींता कीईन तुल होदत्लें!”
49 तांहांअ तीयांय तीयाहांन आख्यों, “तुमां मांन बीहरी जागे काहा होदत्लें? तुमनेंह खोबुर वेरांअ जोजत्लों का मांअ ता मांअ बाहकाअ कोअमें रांअ जोजे।” 50 पेन जे गोठ ईसुंय तीयाहांन आखी ते तें नांय होमज्यें।