3
बापतीस्मा केअनारो योहान पोरमेहेराअ गोठ पोरगोट केअहे
(माथी ३:१-१२; मार्क १:१-८; योहान १:१९-२८)
1 तो रोम देसाअ बादसा तीबेरीयु राज्याअ पोंदोरमो वोरसों आथों। तांहांअ पोंतीयु पीलात येहुदीया जील्लाअ राजपाल आथो। हेरोद आंतीपा गालील जील्लापेअ राज केअनारो आथो। तीयाअ पावुह फीलीप ईतुरीया आने तीराखोनी जील्लांहपेअ राज केअनारो आथो। लुसानीया आबीलेने जील्लापेअ राज केअनारो आथो। 2 आने आन्ना आने कायफा येरुसालेम मोंदीराअ मोडांम-मोडा पुंजारा आथा। तीयु वोखत झाखारीयाअ पोयरा योहानाल, जो उजाळाम रेहलो तीयाल, पोरमेहेराअ गोठ मीली। 3 तीयाअ लीदे योहान योरदान खाडीअ पाहल्याअ आखा वीस्ताराम फीरीन लोकाहांन एंहकींअ बोद देहलो का, “पोरमेहेर तुमांअ पाप माफ केअ तीयाअ खातुर तुमां सोताअ पापाहांअ लीदे दुखी वीईन ते केरांअ सोळी दा, आने पोरमेहेराअहीं वोली आवा, आने तों देखावांअ खातुर बापतीस्मा ला!” 4-5 एंहकींअ लोकाहांन बोद दीईन योहानांय पोरमेहेराअ गोठ जाहेर केअनारा येसायांय तीयाअ चोपळीम जों लेख्योंह तों पुरों केअयों। येसायांय एंहकींअ कीईन लेख्योंह,
“उजाळाम एगोंह बोंबलीअ का,
‘एक राजा आवे तीयाअ खातुर जेंहकींअ मांहेंअ मारोग तीयार केअतेंह आने वाट्या सीदया केअतेंह,
आने बादया चाहाया पुरी देतेंह आने बादा डोगुअ आने बादया टेंबा-टेकर्या हारक्या केअतेंह,
आने वाकळा मारोग पादरा बोंणावतेंह आने खाडा-खाबडावाल्या वाट्या सापाट बोंणावतेंह,
तेंहकींअ मालीख तुमांअ जीवोनाहांम आवे तीयाअ खातुर तुमां सोताल बोराबोर तीयार केरा!
6 आने तांहांअज बादें मांहेंअ होमजी लीअ का,
पोरमेहेर लोकाहांन तीयाहांअ पापाहांअ सीक्सामेनेअ केंहकींअ वाचावेह!’”
7 योहानुपेअ बापतीस्मा लांअ मांहांहांअ मोडा-मोडा टोला आवत्ला, पेन तो जांअत्लो का, तीयाहांमेनेअ खुब मांहेंअ ता, सोताअ पापाहांअ लीदे दुखी वीईन ते सोळांअ ढोंग केअत्लें। मोंजे, तो तीयाहांन एंहकींअ आख्या केअत्लो, “ओ चालाक ने झेरी हापळाहांअ होच वोरतुअनारा लोकुंह! तुमांअ पापाहांअ लीदे तुमां खेरा मोने दुखी वीईन ते पाप नांय सोळा तेबी नीयायाअ दीह मीलनारी नोरकाअ सीक्सामेनेअ तुमां वाचाय जाहा एंहकींअ मा धारता! 8 तुमांअ पापाहांअ लीदे तुमां खोरेखोर दुखी वीया वीअ ता, तों देखावांअ तेंहडा लोकाहांन सोबे एंहडें कामें केरा! ‘आमां ता आबराहामाअ वोसुलामेर्याअ हाय तीयाअ लीदे, पोरमेहेर आमनेंह आसीरवाद दीअ आने आमनेंह नोरकाअ सीक्सा नांय दीअ’ एंहकींअ मा धारता! आंय तुमनेंह आखुंह, खुब पोयरें दांअ पोरमेहेरांय आबराहामाल देदलों वोचोन पुरों केरांअ तो ईया ढोगळाहांमेनेअ बी आबराहामाअ खातुर पोयरें पेदा कीअ सेकेह। 9 जीया चाळाअ हारें फोलवें नांह आवतें तीयाल वाडीन आगीम बाली टाकांअ खातुर तीया चाळाअ थुंबुपेअ एक मांहुंअ कुवाळों उमावी रेहे तेंहकींअ, पोरमेहेर दोरेक खाराब मांहांअ नीयाय कीईन तीयाल सीक्सा दांअ खातुर आमी तीयारुज हाय।”
10 तांहांअ टोलामेर्येंअ मांहेंअ योहानाल फुच्या केअत्लें, “एंहडों वीअ ता, पोरमेहेर दीअ तीयु सीक्सामेनेअ वाचायांअ खातुर आमांअ काय केरांअ जोजे?”
11 तांहांअ योहानांय जोवाब देदो, “तुमाहांपेअ बेन डोगलें वीअ ता, जीयापेअ एक बी नांह तीयाल एक डोगलो दीअ दा! आने एंहकींअज कीईन, तुमाहांपेअ वादाराअ मांडो वीअ ता, जीयापेअ काय बी खावुलोंअ नांह तीयाल तों वाटी दा!”
12 वेरो उगरावनारा खाराब लोक बी बापतीस्मा लांअ योहानाअहीं आला, आने तीयाल फुच्यों, “गुरुजी, आमांअ काय केरुलोंअ?”
13 तांहांअ तीयांय तीयाहांन आख्यों, “सारकाराअ कायदा पोरमाणे जो वेरो वीअ, तीयाअ केअता वादारे उगरावुलोअ नांय।”
14 थोळाक सोयनीकाहां तीयाल फुच्यों, “आमनेंह तुं काय आखोह? आमांअ काय केरांअ जोजे?”
तांहांअ तीयांय तीयाहांन आख्यों, “केडाल बी धोमकावीन तीयापेनेअ पोयसा मा पाळावता! आने लोकाहांपेअ खोटी रीते गुनो मा थोवता! आने तुमांअ पागारुज पुरतो हाय एंहकींअ मानीन रा।”
15 मांहेंअ ख्रीस्त माहरी आवे तीयाअ वाट जोवत्लें, मोंजे तीयाहांमेनेअ खुब सोताअ मोनाहांम योहानाअ बाबोताम वीचारांअ टेक्यें का, योहानुंज ख्रीस्त वीअ। 16 तांहांअ योहानांय तीयाहांन बादाहांन आख्यों, “आंय ता एखला पांअयांकींअज तुमनेंह बापतीस्मा कीअहुं। पेन एक जांअ एंहडो आवनारो हाय। तो मांअ केअता मोडो हाय। तो ओतोअ बादो मोडो हाय का, तीयाअ खातुर तीयाअ सेंडोलुंअ वादर्या सोळांअ जेंहडों नीचाम-नीचों काम केरांअ बी आंय लायोक नांह। जेंहकींअ आगीकींअ धातु चोख्खी केराअहे, तेंहकींअ तो तुमनेंह पोवीतोर आत्माअ मारफोते आत्मीक रीते चोख्खें कीअ। 17 सोताअ आथाम हुपळों लीईन तीयाकींअ खोलों उडवुअनारा आने ओनाजुल पुपठामनेअ जुदों केअनारा आने ओनाजुल हाटळाहांम पोईन पुपठाल कीदीह बी नांय उलवाय एंहडी आगीम टाकी देनारा खेळुतुअ होच, पोरमेहेर खाराब लोकाहांअ नीयाय कीईन तीयाहांन कीदीह बी नांय उलवाय एंहडी आगीम टाकी दीअ।”
18 एंहड्या बीजया खुब चेतवोण्या देता योहानांय लोकाहांन हारी गोठ जाहेर केअयी। 19 पेन गालील जील्लापेअ राज केअनारा हेरोद आंतीपाल ता तीयांय ठोपको देदो। काहाका, हेरोदांय तीयाअ पावुअ कोअवाली हेरोदीयाल राखली, आने एंहडें बीहरें बी खुब खोटें कामें केअलें। 20 आने ईयाहांअ केअता बीहरों वादारे खोटों काम हेरोदांय योहानाल जेलाम कोंडावीन केअयों।
ईसु योहानुपेअ बापतीस्मा लेहे
(माथी ३:१३-१७; मार्क १:९-११)
21 योहान जेलाम कोंडाअयो तीयाअ पेअलांअ एक दीह, खुब लोकाहीं योहानुपेअ बापतीस्मा लेदों तांहांअ, ईसुंय बी तीयापेअ बापतीस्मा लेदों। हातींअ ईसु पोरमेहेराल ओरुज केअत्लो तेंहडामुज, जुग उगळी गीयी, 22 आने पोवीतोर आत्मा तीयापेअ कोबुतोराअ रुपाम उत्यो। आने जुगुमेनेअ पोरमेहेर ईसुअ बाबोताम गोग्यो, “तुं मांअ मेरालो पोयरो हाय। आंय तोअपेअ खुब राजी हाय!”
ईसुअ आगलाअ डायाहांअ ईयादी
(माथी १:१-१७)
23 ईसुंय लोकाहांम सोताअ जाहेर सेवा चालु केअयी तांहांअ, तो लोगभोग तीसेक वोरसांअ आथो।
तो योसेफाअ पोयरो गोंणाअयो। योसेफ हेलीअ पोयरो आथो। 24 हेली मातथातुअ पोयरो आथो। मातथात लेवीअ पोयरो आथो। लेवी मेलखीअ पोयरो आथो। मेलखी येन्नायुअ पोयरो आथो। येन्नाय योसेफाअ पोयरो आथो। 25 योसेफ माताथीयाअ पोयरो आथो। माताथीयु आमोसुअ पोयरो आथो। आमोस नाहुमुअ पोयरो आथो। नाहुम एसलीअ पोयरो आथो। एसली नागायुअ पोयरो आथो। 26 नागाय माथुअ पोयरो आथो। माथ माताथीयाअ पोयरो आथो। माताथीयु सेमेयीनुअ पोयरो आथो। सेमेयीन योसेखुअ पोयरो आथो। योसेख योदाअ पोयरो आथो। 27 योदा योहानानुअ पोयरो आथो। योहानान रेसाअ पोयरो आथो। रेसा झेरुबाबेलुअ पोयरो आथो। झेरुबाबेल सेयेलतीयेलुअ पोयरो आथो। सेयेलतीयेल नेरीअ पोयरो आथो। 28 नेरी मेलखीअ पोयरो आथो। मेलखी आददयुअ पोयरो आथो। आने आददी कोसामुअ पोयरो आथो। कोसाम एलमादामुअ पोयरो आथो। एलमादाम एरुअ पोयरो आथो। 29 एर योसुवाअ पोयरो आथो। योसुवा एलीयेझेरुअ पोयरो आथो। आने एलीयेझेर योरीमुअ पोयरो आथो। योरीम माताथुअ पोयरो आथो। आने माताथ लेवीअ पोयरो आथो। 30 लेवी सीमीयोनुअ पोयरो आने सीमीयोन येहुदाअ पोयरो आथो। येहुदा योसेफाअ पोयरो आथो। योसेफ योनामुअ पोयरो आथो। योनाम एलीयाकीमुअ पोयरो आथो। 31 एलीयाकीम मेलेयाअ पोयरो आथो। मेलेया मेन्नाअ पोयरो आथो। मेन्ना माताथुअ पोयरो आथो। माताथ नाथानुअ पोयरो आथो। नाथान दावीदाअ पोयरो आथो। 32 दावीद ईसायाअ पोयरो आथो। ईसाय ओबेदाअ पोयरो आथो। ओबेद बोवासाअ पोयरो आथो। बोवास सालमोनाअ पोयरो आथो। सालमोन नाहसोनाअ पोयरो आथो। 33 नाहसोन आमीनादाबाअ पोयरो आथो। आमीनादाब आदमीनुअ पोयरो आथो। आदमीन आरनीअ पोयरो आथो। आरनी हेझरोनुअ पोयरो आथो आने हेझरोन पेरेसाअ पोयरो आथो आने पेरेस येहुदाअ पोयरो आथो। 34 येहुदा याकोबाअ पोयरो आथो। याकोब ईसाकाअ पोयरो आथो। ईसाक आबराहामाअ पोयरो आथो। आबराहाम तेराहुअ पोयरो आथो। तेराह नाहोरुअ पोयरो आथो। 35 नाहोर सेरुगुअ पोयरो आथो। सेरुग रेयुअ पोयरो आथो। रेयु पेलेगुअ पोयरो आथो। पेलेग एबेरुअ पोयरो आथो। एबेर सेलाहुअ पोयरो आथो। 36 सेलाह केनानुअ पोयरो आथो। कायीनान आरफाकसादुअ पोयरो आथो। आरफाकसाद सेमुअ पोयरो आथो। सेम नोवाअ पोयरो आथो। नोवा लामेखुअ पोयरो आथो। 37 लामेख मेथुसेलाअ पोयरो आथो, ने मेथुसेला हेनोखुअ पोयरो आथो। हेनोख यारेदुअ पोयरो आथो। यारेद माहालालेयेलुअ पोयरो आथो। माहालालेयेल केनानुअ पोयरो आथो। 38 केनान एनोसुअ पोयरो आथो। एनोस सेथुअ पोयरो आथो। सेथ आदामाअ पोयरो आथो। आदामुल पोरमेहेरांय बीहरा बादाहांअ केअता जुदी रीते बोंणावलो। *