16
ईसु फाचो जीवतो उठेह
(माथी २८:१-८; लुक २४:१-१२; योहान २०:१-१०)
1 आरामाअ दीह पुरो वीयोa तांहांअ मागदाला गांवांअ मारीयोम, याकोबाअ याहकी मारीयोम, आने सालोमी आस्तोर वेचाअतों लाल्या, ईयाअ खातुर का ते जायन ईसुअ लासील लागवे। 2 आठवाळ्याअ पेअला दीह, मोंजे रोवीवारे वेगीअ दीह उगताज ते बाया तों आस्तोर लीईन कोबीरे जांअ नींग्या। 3 वाटे ते एक-बीहराल आख्त्ल्या, “कोबीराअ मुवालापेर्याअ ढोगळो आपुअ खातुर केडों होरकावीअ?” 4 कोबीरे आवी पोच्या तांहांअ तीयुहुं उची नोजुर कीईन हेअयों ता, तो ढोगळो होरकावी टाकाअलो। तो खुब मोडो ढोगळो आथो। 5 ते कोबीराम वीठ्या आने तींहीं तीयुहुं पांअडो झोब्बो पोवला होरगाअ दुताल कोबीराअ हुदी वेल बोठलो देख्यो का जो जुवान मांहांअ होच देखाअत्लो। तीयाल देखीन ते एकदोम से चोअकाअया।
6 तांहांअ तीया दुतांय तीयुहुंन आख्यों, “चोअकाअत्या मां! आंय जांअहुं का कुरुसापेअ जोळाअला नाझारेथावाला ईसुल तुमां होदत्याह। तो ता फाचो जीवतो वीयोह। तो ईंहीं नांह। तीयाल थोवलो तो जागो हेरा। 7 पेन जायन पीतोराल आने ईसुअ बीहरा चेलाहांन ए गोठ आखा: ‘तो तुमांअ आगलांअ गालीलाम जाहे। तीयांय तुमनेंह आखलों तेंहकींअ तुमां तीयाल तींहीं मीलाह।’”
8 तांहांअ ते बाया काबरायन आने चोअकायन कोबीरामेनेअ बारे नींग्या आने नाठया। तीयुहुं केडाल काय बी नांय आख्यों। काहाका ते काबराय गेहल्या।
ईसु मागदाला गांवांअ मारीयोमाल दोरसोन देहे
(माथी २८:९-१०; योहान २०:११-१८)
9 [[आठवाळ्याअ पेअला दीह, मोंजे रोवीवाराअ वेगीअ फाचो जीवतो वीयो हातींअ ईसु मागदाला गांवांअ मारीयोमाल पेअलोअ देखाअयो का जीयामेनेअ तीयांय सांत पुतळाहांन काडला। 10 जों तीयुंय देखलों तों तीयुंय जायन ईसुअरी आथा तीयाहांन आख्यों। ते दुखी वीईन रोळत्ला। 11 पेन ईसु फाचो जीवतो उठ्योह आने तीयुंय तीयाल देख्यो एंहकींअ तीयुंय तीयाहांन आख्यों तांहांअ तीयाहां ते गोठ नांय मानी।
बेन चेलाहांन दोरसोन
(लुक २४:१३-३५)
12 हातींअ ईसुअ बेन चेला चालता-चालता गांवांम जाहला। तीयाहांन ईसुंय जुदी रीते दोरसोन देदों। 13 ते बेनुं फाचा येरुसालेम गीया आने जों बोंण्यों तों तीयाहां बीहरा चेलाहांन आख्यों। पेन तीया चेलाहां तीयु गोठीपेअ वीसवास नांह केअयो।
ओग्यार चेलाहांन दोरसोन
(माथी २८:१६-२०; लुक २४:३६-४९; योहान २०:१९-२३; खास चेलाहांअ कामें १:६-८)
14 हातींअ ओग्यार चेला खाहला तांहांअ ईसुंय तीयाहांन दोरसोन देदों। तीयाहां वीसवास नांह केअयो तीयाअ लीदे आने जीयाहां तीयाल फाचो जीवतो वेअलो देखलो तीयाहांअ गोठ्या तीयाहां नांह मानी तीयाअ लीदे तीयांय तीयाहांन ठोपको देदो। 15 ईसुंय तीयाहांन आख्यों, “आखी दुन्याम जा आने बादा लोकाहांन हारी गोठ जाहेर केरा। 16 जो वीसवास कीईन बापतीस्मा लीअ, तीयाल पोरमेहेर वाचावीअ। पेन जो वीसवास नांय केअ, तीयाल पोरमेहेर गुनालो जाहेर कीअ। 17 वीसवास केअनारा लोक मोडा चोमोत्कार कीअ, मांअ ताकोताकींअ पुतळाहांन काडीअ, आने ओजाण्या बोल्या गोगीअ। 18 जो ते पोलमे हापळाहांन तेअ का झेरी पीणो पी जाय, तेबी तीयाहांन काय नुकसान नांय वीअ। ते आजार्या लोकाहांपेअ सोताअ आथ थोवीअ, तांहांअ ते आजार्या लोक हारा वीअ जाय।”
ईसु होरगाम लीअ लेवाअहे
(लुक २४:५०-५३; खास चेलाहांअ कामें १:९-११)