माथींय लेखली हारी गोठ
ईयु चोपळीअ बाबोताम बेन गोठ्या
ईसुज ‘ख्रीस्त’ मोंजे ‘पोरमेहेरांय नीमलो खास राजा’ हाय ए हारी गोठ, माथी ईयु चोपळीम लेखेह। तो एंहकींअ लेखेह का, पोरमेहेरांय जुना काराराअ सोमायाम सोताअ लोकाहांन जें वोचोनें देदलें, तें वोचोनें तीयांय ईया ख्रीस्ताअ मारफोतेज पुरें केअयेंह। जीया येहुदी लोकाहांम ईसु जोन्मीन रेहलो, एखला तीया लोकाहांअ खातुर ए हारी गोठ नांह, पेन ते आखी दुन्याअ लोकाहांअ खातुर बी हाय।
माथींय ए चोपळी हारकींअ गोठवीह। पेअलांअ तीयांय ईसुअ जोन्माअ बाबोताम लेख्योंह। हातींअ तीयांय ईसुअ बापतीस्मा , आने सेतान तीयाल पाप केरावांअ कोसीस केअहे तीया बाबोताम लेख्योंह। हातींअ तीयांय गालील जील्लाम ईसुंय लोकाहांन देदला बोदाअ बाबोताम, आने तींहीं आजार्याहांन तीयांय हारें केअलें तीया बाबोताम लेख्योंह। ईयाअ हातींअ तीयांय गालील जील्लामेनेअ ईसु येरुसालेम गीयो तीया बाबोताम, आने ईसुअ जीवोनाअ सेल्ला आठवाळ्याम जे-जे बोनाव बोंण्या तीयाहांअ बाबोताम, मोंजे का, तो कुरुसापेअ जोळायन मोअयो आने मोअलामेनेअ फाचो जीवतो वीयो तीया बाबोताम नोंदयोंह।
पोरमेहेराअ नीयोमाहांअ ओर्थो काडांअ जीयाल आदीकार हाय एंहडा, आने पोरमेहेराअ राज्याअ बाबोताम बोद देनारा मोडा गुरु तोरीके ईसुल माथी ईयु चोपळीम ओअखावेह। ईसुअ बोदाहांन तीयांय पांच मुददाहांम टोलव्याह: (१) डोगाअपेअ बोहीन देदलो बोद। ईंहमें होरगाअ राज्याअ लोकाहांअ गुण, फोरोज्या, होक, आने तीयाहांन सेल्ला मीलनारा आसीरवाद नोंदयाह (आदयाय ५-७); (२) बारा चेलाहांन तीयाहांअ सेवाअ खातुर हीकामोण्या (आदयाय १०); (३) होरगाअ राज्याअ बाबोताम दाखला (आदयाय १३); (४) चेलो बोंणनाराअ गुण केंहडा वेरांअ जोजे तीया बाबोताम बोद (आदयाय १८); आने (५) आमीर्याअ जोमानाअ ओंताअ बाबोताम, आने आवनारा होरगाअ राज्याअ बाबोताम बोद (आदयाय २४-२५)।
ईयु चोपळीअ रुपरेखा
ईसुअ आगलाअ डायाहांअ ईयादी, आने तीयाअ जोन्मो १:१-२:२३
बापतीस्मा केअनारा योहानाअ सेवा ३:१-१२
ईसुअ बापतीस्मा आने सेतान तीयाल पाप केरावांअ कोसीस केअहे ते गोठ ३:१३-४:११
गालील जील्लाम ईसुअ जाहेर सेवा ४:१२-१८:३
गालील जील्लामेनेअ येरुसालेमाअ वेल जाता बोंणनार्या बीना १९:१-२०:३४
येरुसालेमाम आने तीयाअ पाहल्याअ भागाम ईसुअ सेल्लों आठवाळ्यों २१:१-२७:६६
ईसुअ मोअलामेनेअ फाचा जीवता उठुलोंअ आने लोकाहांन दोरसोन देवुलोंअ २८:१-२०