माथींय लेखली हारी गोठ
1
ईसु जो ख्रीस्त हाय तीयाअ आगलाअ डायाहांअ ईयादी
(लुक ३:२३-२८)
1 ईसु जो ख्रीस्त a हाय तीयाअ आगलाअ डायाहांअ ईयादी एंहकींअ हाय: तो दावीद राजाअ वोसुलामेर्योअ b आथो; दावीद आबराहामाअ वोसुलामेर्योअ c आथो।
2 आबराहाम ईसाकाअ बाहको आथो; ईसाक याकोबाअ बाहको आथो; याकोब येहुदा आने तीयाअ पावुहांअ बाहको आथो। 3 येहुदा पेरेस आने झेराअ बाहको आथो; तीयाहांअ याहकी तामार आथी। पेरेस हेसरोनाअ बाहको आथो; हेसरोन आरामाअ बाहको आथो। 4 आराम आमीनादाबाअ बाहको आथो; आमीनादाब नाहसोनाअ बाहको आथो; नाहसोन सालमोनाअ बाहको आथो। 5 सालमोन बोवासाअ बाहको आथो; बोवासाअ याहकी राहाबd आथी। बोवास ओबेदाअ बाहको आथो; ओबेदाअ याहकी रुथe आथी। ओबेद ईसायाअ बाहको आथो। 6 ईसाय दावीद राजाअ बाहको आथो। दावीद सालोमोनाअ बाहको आथो; सालोमोनाअ याहकी पेअलांअ उरीयाअ कोअवाली आथी। 7 सालोमोन रेहोबेयामाअ बाहको आथो; रेहोबेयाम आबीयाअ बाहको आथो; आबीया आसाअ f बाहको आथो। 8 आसा येहोसाफाटाअ बाहको आथो; येहोसाफाट योरामाअ बाहको आथो; योराम उझीयाअ आगलोअ डायो g आथो। 9 उझीया योथामाअ बाहको आथो; योथाम आहाझाअ बाहको आथो; आहाझ हेझेकीयाअ बाहको आथो। 10 हेझेकीया मानासेहाअ बाहको आथो; मानासेह आमोनाअ बाहको आथो; आमोन योसीयाअ बाहको आथो। 11 योसीया येखोनीया आने तीयाअ पावुहाअ बाहको आथो। ते बाबीलोन देसाअ राजा ईसरायेल लोकाहांन केदीहींअ तोरीके बाबीलोनाम तीअ लीअ गेहलो तांहांअ रेहला।
12 बाबीलोन देसाअ राजा ईसरायेल लोकाहांन तीअ लीअ गेहलो तीयाअ फाचलांअ वेअल्या पीळ्या: येखोनीया सेयालथीयेलाअ बाहको आथो; सेयालथीयेल झेरुबाबेलाअ आजलो बाहको h आथो। 13 झेरुबाबेल आबीयुदाअ बाहको आथो; आबीयुद एलीयाकीमाअ बाहको आथो; एलीयाकीम आझोराअ बाहको आथो। 14 आझोर सादोकाअ बाहको आथो; सादोक आकीमाअ बाहको आथो; आकीम एलीयुदाअ बाहको आथो। 15 एलीयुद एलेयाझाराअ बाहको आथो; एलेयाझार माथानाअ बाहको आथो; माथान याकोबाअ बाहको आथो।
16 याकोब योसेफाअ बाहको आथो; योसेफ मारीयोमाअ कोअवालो आथो; मारीयोम ‘ख्रीस्त’ आखाअनारा ईसुअ याहकी आथी।
17 एंहकींअ कीईन, आबराहामाअ वोखतनेअ दावीदाअ वोखत लोगुंअ बादया मीलीन चोवदा पीळ्या वीया; दावीदाअ वोखतनेअ बाबीलोन देसाअ राजा ईसरायेल लोकाहांन केदी तोरीके बाबीलोनाम तीअ लीअ गीयो तीया वोखत लोगुंअ, चोवदा पीळ्या वीया; तेहेअनेअ ख्रीस्त जोन्मुअलो तीया वोखत लोगुंअ, चोवदा पीळ्या वीया।
ईसुअ जोन्मो
(लुक २:१-७)
18 ईसु ख्रीस्ताअ जोन्मो एंहकींअ कीईन वीयों: ईसुअ याहकी मारीयोमाअ साकुरपुळो योसेफाअरी वेअलो। तीयाअ फाचलांअ, कोअवालो ने कोअवाली तोरीके तीयाहांअ मीलाप वेअ तीयाअ पेअलांअ, मारीयोमाल खोबुर पोळी का, ते पोवीतोर आत्माअ ताकोताकींअ बेन-जीवाअ वीयीह। 19 तांहांअ तीयुअ कोअवालो योसेफ खेरों मांहुंअ आथों तीयाअ लीदे तीयांय जाहेर रीते तीयुअ ओपमान केरांअ मोर्जी नांय राखी, पेन तीयुअरी सोते केअलो साकुरपुळो सुपी रीते तोळी टाकांअ वीचार केअयो। 20 आने तो ईया बाबोताम वीचारत्लो तांहांअज, मालीखाअ एक दुतांय तीयाल होपनाम देखायन आख्यों, “दावीदाअ वोसुलामेर्याअ योसेफ, मारीयोमाल तोअ कोअवाली तोरीके कोअ हादी लावांअ बीतो मां। काहाका, ते पोवीतोर आत्माअ ताकोताकींअज बेन-जीवाअ वीयीह। 21 ते एक पोयराल जोन्मो दीअ, आने तुं तीयाअ नांव ‘ईसु’ पाळजे। काहाका, तो सोताअ लोकाहांन तीयाहांअ पापाहांअ सीक्सामेनेअ वाचावीअ।”
22 ख्रीस्ताअ जोन्माअ बाबोताम मालीखांय तीयाअ गोठ जाहेर केअनाराअ मारफोते जों आखलों तों खेरों पोळे तीयाअ खातुर, ईं बादों बोंण्यों। तीयांय एंहकींअ आखलों,
23 “वेरा! कुवारी पोयरी बेन-जीवाअ वीअ!
आने ते एक पोयराल जोन्मो दीअ,
आने तो पोयरो ‘ईम्मानुयेल’ आखाय।”
(‘ईम्मानुयेल’ मोंजे ‘पोरमेहेर आपुअरी हाय’।)
24 तीयाअ लीदे, योसेफ नींदीमेनेअ जाग्यो तांहांअ तीयांय, मालीखांय मोकलुअला दुतांय तीयाल जेंहकींअ हुकोम केअलो तेंहकींअ केअयों। तो मारीयोमाल सोताअ कोअवाली तोरीके कोअ हादी लालो। 25 पेन तीयुअ पोयरो जोनम्यो तांव लोगुंअ, योसेफांय तीयुअरी मीलाप नांय केअयो। आने पोयरो जोनम्यो तांहांअ, योसेफांय तीयाअ नांव ‘ईसु’ पाळ्यों।