2
गीयानी लोक ईसुअ मुलाकाते आवताह
1 “मोडो हेरोद” आखाअत्लो तो राजा राज केअत्लो तांहांअ, येहुदीया जील्लाअ बेथलेहेम गांवांम ईसु जोनम्यो। तांहांअ थोळाक गीयानी लोकa दीह उगताअ वेलेनेअ येरुसालेम सेहेराम आला, 2 आने तीयाहां तींहींमेर्याअ लोकाहांन फुच्यों, “येहुदीहींअ राजा वेरांअ जोनम्योह तो पोयरो कांहीं हाय? तीयाअ जोन्माअ नीसाणीअ ताराल bआमां दीह उगताअ वेल उगतो देख्यो, आने तीयाअ खातुर तीया पोयराअ भोकती केरांअ आमां आलाह।”
3 ते गोठ उनायन, हेरोद आने तीयाअरी येरुसालेम सेहेराअ खुब लोक गुचवोणाम पोळी गीया। 4 हातींअ हेरोदांय येहुदीहींअ बादा मोडा पुंजाराहांन आने नीयोम हीकवुअनाराहांन टोलवीन तीयाहांन फुच्यों, “ख्रीस्त कांहीं जोन्मीअ?”
5 तांहांअ तीयाहां जोवाब देदो, “येहुदीया जील्लाअ बेथलेहेमाम तो जोन्मीअ। काहाका, पोरमेहेराअ गोठ जाहेर केअनारांय एंहकींअ लेख्योंह का,
6 पोरमेहेरांय आख्यों, ‘ओ येहुदीया जील्लाअ बेथलेहेम गांवांअ लोकाहीं!
येहुदीया जील्लाअ बीहरा बादा गांवांहांअ केअता तुमांअ गांव केल्ली बी बाबोताम उतुअतों नांह;
काहाका, तुमांअ गांवांमेनेअ राज केअनारो एंहडो एक आदमी पेदा वीअ
का जो मांअ ईसरायेल लोकाहांपेअ राज कीअ।’”
7 तांहांअ हेरोद, तीया गीयानी लोकाहांन खानगीम मील्यो। आने तारो केंहडीवेल देखाअलो तो सोमोय तीयाहांपेनेअ तीयांय बोराबोर जांय लेदो। 8 हातींअ तीयांय तीयाहांन एंहकींअ आखीन बेथलेहेम मोकल्या का: “जायन पोयराअ बोराबोर होदणी केरा, आने तो तुमनेंह झुळे तांहांअ, मांन बी खोबुर देजा, ईयाअ खातुर का, आंय बी जायन तीयाअ भोकती क्युंव।”
9 राजाअ गोठ उनायन हातींअ, ते लोक तींहींनेअ सोताअ वाटे चाली नींग्या। आने हेरा! जो तारो तीयाहां पेअलांअ देखलो, तोज तीयाहां फाचो देख्यो। आने तो तारो तीयाहांअ आगाळी-आगाळी चालत्लो, आने पोयरो आथो तीया जागाअ उपेअ आवीन उबी रीयो। 10 तारो देखीन ते एकदोम खुस वीया। 11 आने ते कोअमें गीया। आने पोयराल तीयाअ याहकीअहीं देख्यों। तांहांअ ते तीयाअ पागे पोळ्या, आने तीयाल सालाम केअयी; हातींअ तीयाहां सोताअ पेटया खोल्या, आने तीहमेंनेअ होनो, लोबान आने बोळ नांवांअ चीकाअ भेट देदी।
12 हातींअ ते बीहरी वाटे सोताअ देसाम फाचा गीया। काहाका, पोरमेहेरांय तीयाहांन होपनाम चेतवी देदला का, “हेरोदाअहीं फाचा मां जाता।”
योसेफ सोताअ कुटुंबाअरी मीसोर देसाम नाही जाहे
13 ते गीयानी लोक गीया हातींअ, मालीखाअ एक दुतांय योसेफाल होपनाम दोरसोन दीईन आख्यों, “हेरोद ईया पोयराल माय टाकांअ तीयाअ होदणी केरावनारो हाय। तीयाअ खातुर, तुं उठ ने पोयराल ने तीयाअ याहकील लीईन मीसोर देसाम नाही जो, आने तींहींनेअ फाचो आवांअ आंय तुल नांय आखुं तांव लोगुंअ तींहींज रेजे।”
14 तांहांअ योसेफ उठ्यो, आने पोयराल आने तीयाअ याहकील लीईन तीयु रातींज मीसोर देसाम जातो रीयो, 15 आने हेरोद मोअयो तांव लोगुंअ तो तींहींज रीयो। फाचलांअ नेअ योसोफ, पोयरो आने मारीयोमाअरी मीसोर देसामेनेअ ईसरायेल देसाम फाचो गीयो तांहांअ, मालीखांय तीयाअ गोठ जाहेर केअनाराअ मारफोते जों आखलों तों खेरों पोळ्यों। मालीखांय एंहकींअ आखलों, “मांयुं मांअ पोयराल मीसोर देसामेनेअ हादयो।”
हेरोद हानांअ पोयराहांन माय टाकावेह
16 हेरोदांय जांअयों का, ते गीयानी लोक, तीयाअ धार्या पोरमाणे तीयाअहीं फाचा नांय आला। तांहांअ तीयाल खुब रोग चोळी। आने तारो केंहडीवेल देखाअलो तो सोमोय तीया लोकाहांपेनेअ जांय लेदलो तीयाअ पोरमाणे तीयांय सोताअ सोयनीकाहांन हुकोम केअयो, “बेथलेहेमाम आने तीयाअ पाहल्या-पाहल्या गांवांहांम जेबी पोयरा बेन वोरसांअ आने तीयाअ से हानांअ वीअ तीयाहांन बादाहांन माय टाका!”
17 जांहांअ सोयनीकाहां हेरोदाअ हुकोमा पोरमाणे केअयों तांहांअ, पोरमेहेराअ गोठ जाहेर केअनारा येरेमीयांय जे भोवीसवाणी केअली ते एंहकींअ कीईन हाची पोळी। 18 तीयांय एंहकींअ भोवीसवाणी केअली का,
“रामाम रोळनाराहांअ खुब आवाज उनावाअहे।
राहेलाअ वोसुलामेर्येंअ सोताअ पोयराहांअ खातुर रोळतेंह। c
तीयाहांन d पाटावी सेकाअतों नांह।
काहाका, तीयाहांअ बादें पोयरें मोय गीयेंह।”
मीसोर देसामेनेअ योसेफ सोताअ कुटुंबाअरी फाचो आवेह
19 हेरोद मोय गीयो हातींअ, मालीखाअ दुतांय मीसोर देसाम योसेफाल होपनाम दोरसोन देदों, 20 आने आख्यों, “उठ आने पोयराल आने तीयाअ याहकील लीईन ईसरायेल देसाम फाचो जो! काहाका, पोयराल माय टाकांअ कोसीस केअत्ला ते लोक मोय गीयाह।” 21 तांहांअ योसेफ उठ्यो, आने पोयराल आने तीयाअ याहकील लीईन ईसरायेल देसाम फाचो गीयो।
22 पेन हेरोदाअ पोयरो आरखेलास येहुदीया जील्लाअ राजा तोरीके तीयाअ बाहकाअ गादीपेअ बोठोह एंहकींअ योसेफ उनाअयो तांहांअ, तीयाल तींहीं जांअ बीख लागी। आने बीहरा होपनाम पोरमेहेरांय तीयाल चेतवोंणी देदी तीयाअ लीदे तो गालील जील्लाम गीयो, 23 आने तींहीं नाझारेथ नांवांअ गांवांम जायन रीयो। आने पोरमेहेराअ गोठ जाहेर केअनारांय e ख्रीस्ताअ बाबोताम जे भोवीसवाणी केअली, ते एंहकींअ कीईन हाची पोळी। तीयांय एंहकींअ भोवीसवाणी केअली का, “तो नाझारेथावालो आखाय।”