माथी 3

बापतीस्मा केअनारो योहान पोरमेहेराअ गोठ जाहेर केअहे

(मार्क १:१-८; लुक ३:१-१८; योहान १:१९-२८)

¹ ईसु आजी नाझारेथामुज आथो तांहांअ, बापतीस्मा केअनारो योहान येहुदीया जील्लाअ उजाळाम आवीन लोकाहांन पोरमेहेराअ गोठ एंहकींअ कीईन जाहेर केअत्‍लो: ² “तुमां सोताअ पापाहांअ लीदे दुखी वीईन ते सोळी दा! काहाका, पोरमेहेर लोकाहांअ जीवोनाहांम राज केरांअ वोखत पाही आलोह।” ³ पोरमेहेराअ गोठ जाहेर केअनारा येसायांय योहानाअ बाबोताम भोवीसवाणी केअली का,

“उजाळाम एगोंह बोंबलीअ का,

‘मालीखाअ खातुर मारोग तीयार केरा!

तीयाअ खातुर वाक्ळ्या वाट्या सीदया केरा।’”

⁴ योहानाअ पोतळें उटाअ रुंगाहांअ बोंणावलें आथें, आने तो सोताअ कोंबराअरी चांबळाअ पोट्टो बांदत्‍लो। आने तो टीडें ने उजाळाम झुळत्‍लों तों मोद खाहलो। ⁵ येरुसालेमामेनेअ, येहुदीया जील्लाअ बीहरा बादा जागाहांमेनेअ, आने योरदान खाडीअ दीह उगताअ वेल्याअ ने दीह बुडताअ वेल्याअ वीस्ताराहांमेनेअ, खुब मांहेंअ तीयाअ गोठ उनायांअ तीयाअहीं आवतें रेहलें। ⁶ तें सोताअ पाप कोबुल केअत्‍लें, आने योहान योरदान खाडीम तीयाहांअ बापतीस्मा केअत्‍लो।

⁷ योहानांय फोरीसी पोंथाअ आने सादुकी पोंथाअ खुब लोकाहांन सोताअहीं बापतीस्मा केरावांअ आवता देख्या तांहांअ, तीयांय तीयाहांन आख्यों, “तुमां झेरी हापळाहांअ होच हाय! पोरमेहेर पापी लोकाहांअ नीयाय कीईन तीयाहांन सीक्सा कीअ तीदीह तीयु सीक्सामेनेअ वाचायांअ तुमनेंह केडांय चेत्व्याह? ⁸ जो तुमां तुमांअ पापाहांअ लीदे दुखी वीईन ते सोळी देदा वीअ ता तों सोताअ हारा कामाहांकींअ देखावा! ⁹ ‘आमां आबराहामाअ वोसुलामेर्याअ हाय तीयाअ लीदे पोरमेहेर आमनेंह सीक्सा नांह केअनारो’ एंहकींअ तुमांअ मोनाहांम मा धारता! आंय तुमनेंह आखुंह, पोरमेहेरांय आबराहामाल तीयाअ वोसुलाम खुब मांहेंअ दांअ जों वोचोन देदलों तों, ईया ढोगळाहांमेनेअ मांहेंअ पेदा कीईन बी पोरमेहेर पुरों कीअ सेकेह। ¹⁰ हारें फोलवें नांय देनारा चाळाहांअ मुलांअ-मुलें वाडी टाकांअ खातुर तीया चाळाहांअ थुंबाहांपेअ जेंहकींअ कुवाळों उमावलों रेहे तेंहकींअ, हारें कामें नांय केअनारा लोकाहांन सीक्सा केरांअ खातुर पोरमेहेर एगुह वार्योअज तीयार हाय। ¹¹ आंय ता, तुमाहीं सोताअ पापाहांअ खातुर दुखी वीईन ते सोळी देदाह तों देखावांअ, तुमनेंह पांअयांकींअ बापतीस्मा कीअहुं। पेन मांअ फाचलांअ जो आवनारो हाय, तो तुमाहांमेनेअ जें सोताअ पापाहांअ खातुर दुखी वीईन ते सोळी देतेंह, तीयाहांन पोवीतोर आत्मा दीअ, आने तुमाहांमेनेअ जें सोताअ पापाहांअ खातुर दुखी नांह वेअतें, तीयाहांन तो नोरकाअ आगीम टाकीन सीक्सा कीअ। तो मांअ केअता खुब मोडो हाय। आंय ता तीयाअ चापलें उसलांअ एंहडों नीचाम-नीचों काम केरांअ बी लायोक नांह। ¹² जेंहकींअ एक खेळुत सोताअ आथाम हुपळों लीईन, खोलामेनेअ बादा गोंवांहांन उडवीन गोंव आने पुपठों जुदों पाळेह, आने गोंवांहांन तीयाअ हाटळाहांम पोअहे आने पुपठाल बाली टाकेह, तेंहकींअ मांअ फाचलांअ जो आवनारो हाय तो हाचा आने खाराब लोकाहांन जुदा पाळीअ, आने हाचा लोकाहांन होरगाम लीअ, आने खाराब लोकाहांन कीदीह बी नांय उलवाय एंहडी आगीवाला नोरकाम टाकी दीअ”।

ईसुअ बापतीस्मा वेअहे

(मार्क १:९-११; लुक ३:२१-२२)

¹³ एंहकींअ कीईन योहान लोकाहांन पोरमेहेराअ गोठ जाहेर केअत्लो आने तीयाहांअ बापतीस्मा केअत्‍लो। तीयु वोखत एक दीह, ईसु बी तीयापेअ बापतीस्मा केरावांअ गालील जील्लामेनेअ तीयाअहीं योरदान खाडी गीयो। ¹⁴ पेन योहान तीयाअ बापतीस्मा केरांअ ना पाळ्या केअत्लो। तीयांय ईसुल आख्यों, “बापतीस्मा ता मांअ तोअपेअ केरावांअ जोजे। तीयाअ बोदले, तुं मांअपेअ बापतीस्मा केरावांअ काहा आलोह?”

¹⁵ पेन ईसुंय तीयाल जोवाब देदो, “आमी मांन बापतीस्मा केअ! काहाका, पोरमेहेर हाचें गोंअहें तें बादें काम आपुंह पुरें केअजी तोंज बोराबोर हाय।” तांहांअ योहानांय ईसुअ बापतीस्मा केरांअ हां पाळी। ¹⁶ ईसुंय बापतीस्मा केराव्यों का तुरुतुज, तो पांअयांमेनेअ बारे नींग्यो। तीयु वोखत जुग तीयाअ खातुर उगळी गीयों, आने तीयांय पोवीतोर आत्माल कोबुतोर उतेह तेंहकींअ उतुअतो आने तीयापेअ आवतो देख्यो। ¹⁷ आने हातींअ जुगामेनेअ पोरमेहेर बाहको गोग्यो का, “ओ मांअ मेरालो पोयरो हाय। ईयापेअ आंय खुब राजी हाय।”