4
सेतान ईसुअ पारखों केअहे
(मार्क १:१२-१३; लुक ४:१-१३)
1 हातींअ पोवीतोर आत्मा ईसुल उजाळाम लीअ गीयो, ईयाअ खातुर का सेतान तीयाअ पारखों केअ। 2 तींहीं ईसुंय चालीह दीह लोगुंअ रात-दीह उपास राख्यो। हातींअ तीयाल पुख लागी। 3 तांहांअ लोकाहांन पाप केरावनारा सेतानांय aतीयाअहीं आवीन तीयाल आख्यों, “तुं पोरमेहेराअ पोयरो वीअ ता, ईया ढोगळाहांन मांडा बोंणांअ हुकोम केअ!”
4 पेन ईसुंय तीयाल जोवाब देदो, “लेखलों हाय का,
‘मांहुंअ एखला मांडाकींअ नांह जीवी सेकतों,
पेन पोरमेहेरांय आखली दोरेक गोठीकींअb जीवी सेकेह।’”
5 हातींअ सेतान ईसुल पोवीतोर सेहेर येरुसालेमाम लीअ गीयो, तीयाल मोंदीराअ उचाम-उचा जागे उबी राख्यो, 6 आने तीयाल आख्यों, “तुं पोरमेहेराअ पोयरो वीअ ता, ईंहींनेअ एठा कुदी पोळ। c काहाका, लेखलों हाय का,
‘तुल हाचवांअ पोरमेहेर सोताअ दुताहांन हुकोम कीअ’,
आने ‘ते तुल तीयाहांअ आथाहांम चेली लीअ,
ईयाअ खातुर का तोअ पाग ढोगळाअरी नांय ठोकाय।’”
7 तांहांअ ईसुंय तीयाल जोवाब देदो, “एंहकींअ बी लेखलों हाय का,
'मालीख तोअ पोरमेहेराअ पारखों कीअहो मां!’”
8 हातींअ सेतान ईसुल एक खुब उचा डोगापेअ लीअ गीयो। आने तींहींनेअ तीयांय दुन्याअ बादें राजें आने तींहमेरीअ बादी माल-मीलकोत देखावीन तीयाल आख्यों, 9 “जो तुं पागे पोळीन मांअ भोकती क्योव ता, ईं बादों आंय तुल दीअ देहें।”
10 तांहांअ ईसुंय तीयाल जोवाब देदो, “सेतान। मांअहींनेअ जातो रे! काहाका, लेखलों हाय का,
‘मालीख तोअ पोरमेहेराअ भोकती केअ,
आने एखला तीयाअज सेवा केअ!’”
11 हातींअ सेतान ईसुल सोळीन जातो रीयो, आने पोरमेहेराअ दुताहीं आवीन ईसुअ सेवा-चाकरी केअयी।
ईसु गालील जील्लाम सोताअ सेवा चालु केअहे
(मार्क १:१४-१५; लुक ४:१४-१५)
12 ईसु येहुदीया जील्लाम आथो तांहांअ, योहानाअ चेलाहां तीयाल आख्यों, “हेरोद आंतीपांय बापतीस्मा केअनारा योहानाल जेलाम कोंडाव्योह।” तीयाअ लीदे, ईसु गालील जील्लाम वोली आलो। तो गालीलाम आथो तांहांअ, पेअलांअ तो नाझारेथ गांवांम गीयो। 13 नाझारेथ गांवांम तो लांबो सोमोय नांय रीयो, पेन रांअ खातुर कापेरनाहुम गांव गीयो। कापेरनाहुम गांव गालील तालावाअ पाही वोहलों हाय। जीया वीस्ताराम तों गांव वोहलों हाय तों, पेअलांअ झेबुलोन आने नाफतालीअ कुळाहांअ लोकाहांअ वीस्तार आथो। 14 पोरमेहेराअ गोठ जाहेर केअनारा येसायांय जे भोवीसवाणी केअली ते, तीया गांवांम ईसु जे सेवा केरांअ आथो तीयाकींअ हाची पोळे तीयाअ खातुर, ईसु तींहीं रीयो। येसायांय एंहकींअ भोवीसवाणी केअली का,
15 “झेबुलोन वीस्तार आने नाफताली वीस्तार जे गालील तालावाअ पाहलीअ वाटीअ जागे हाय
आने योरदान खाडीअ दीह उगताअ वेलीअ तोळीपेअ हाय,
ते वीस्तार गालील जील्लाम हाय; तींहीं येहुदी सीवायाअ खुब मांहेंअ रीअ।
16 तींहीं रेनारा मांहांहां पाप केअयाह तीयाअ लीदे, तें आंदारी जागे बोहनारा लोकाहांअ होच वीअ।
सोतापेअ पोळनारो मोडो उजवोळ हेअनारा लोक जेंहकींअ आंदाराम बी चोख्खी रीते हेअताह,
तेंहकींअ तें मांहेंअ, पोरमेहेर तीयाहांन जों हीकवेह तों एक्कायुंअज चोख्खी रीते होमजीअ।
तें आंदारा आने जोखोमुवाला वीस्ताराम वोहती केअनारा लोकाहांअ होच वीअ।
जीया लोकाहांपेअ उजवोळ पोळे ते लोक जेंहकींअ चोख्खी रीते हेअताह,
तेंहकींअ तें मांहेंअ, पोरमेहेर तीयाहांन जों हीकवेह तों एक्कायुंअज चोख्खी रीते होमजीअ।”
17 तीयु वोखतनेअ, ईसुंय पोरमेहेराअ गोठ जाहेर केरांअ चालु केअयों। आने तो लोकाहांन एंहकींअ आखत्लो का, “पोरमेहेर तुमांअ जीवोनाहांम राज केरांअ वोखत आलोह। तीयाअ लीदे, तुमांअ पापाहांअ खातुर दुखी वीईन ते सोळी दा!”
ईसु चार मासमार्याहांन तीयाअ चेला बोंणांअ हादेह
(मार्क १:१६-२०; लुक ५:१-११)
18 एक दीह, ईसु गालील तालावाअd तोळीपेनेअ जाहलो तांहांअ, तीयांय बेन पावुह, मोंजे, सीमोनाल (जो पीतोर आखाअहे तीयाल) आने आंदरीयाल तालावाम तांगळें टाकीन मासें तेअता देख्या। ते बेनुं मासमार्या आथा। 19 तांहांअ ईसुंय तीयाहांन आख्यों, “मांअरी आवा।e आंय तुमनेंह मांहांहांन पोरमेहेराअ राज्याम केंहकींअ लीअ आवुलोंअ तों हीकवेंह।” 20 तांहांअ तुरुतुज तीयाहां मासें तेरांअ सोताअ धोंदो सोळी थोव्यो, आने ईसुअ चेला बोंणीन तीयाअरीf गीया। 21 तींहींनेअ आगलांअ जाता, ईसुंय बीहरा बेन पावाहांन, मोंजे, झेब्दीअ पोयरा याकोबाल आने योहानाल देख्या। ते बेनुं तीयाहांअ बाहका झेब्दीअरी एक उळीम सोताअ तांगळें हांदत्ला। तांहांअ ईसुंय तीयाहांन बी तीयाअ चेला बोंणांअ हादया। 22 तांहांअ तुरुतुज, तीयाहां तांगळें हांदांअ बोंद केअयों, आने सोताअ बाहकाल उळीम रांअ देदो आने ईसुअ चेला बोंणीन तीयाअरीg गीया।
ईसु लोकाहांन बोद देहे आने आजार्याहांन हारें बी केअहे
(लुक ६:१७-१९)
23 ईसु सोताअ चेलाहांअरी आखा गालील जील्लाम फीरीन येहुदीहींअ भोकती केरांअ पोंगाहांम बोद देहलो, आने पोरमेहेराअ राज्याअ बाबोताअ हारी गोठ जाहेर केअत्लो, आने लोकाहांन बादी जातीअ रोगाहांमेनेअ आने सोरीलाअ दुखाहांमेनेअ हारा केअत्लो। 24 ईसुंय केअला चोमोत्काराहांअ बाबोताअ गोठ, आखा सीरीया वीस्ताराम फेलाय गीयी। तीयाअ लीदे, मांहेंअ तीयाअहीं, जें जुदी-जुदी जातीअ आजारीहींकींअ ने रोगाहांकींअ आजार्यें आथें तीयाहांन बादाहांन लालें। पुतळें लागला मांहांहांन आने मीरगीवाला मांहांहांन आने लोखवावाला मांहांहांन बी तें तीयाअहीं लालें। आने ईसुंय तीयाहांन बादाहांन हारें केअयें। 25 गालील जील्लामेनेअ आने दोह सेहेराहांअ भागाहांमेनेअ, आने येरुसालेमामेनेअ , आने येहुदीया जील्लाअ बीहरा भागाहांमेनेअ, आने योरदान खाडीअ दीह उगताअ वेल्याअ तोळीपेर्याअ वीस्तारामेनेअ आलला मांहांहांअ टोला ईसुअरी जांअ टेक्या।