माथी 5

डोगीपेअ बोहीन ईसु सोताअ चेलाहांन बोद देहे

¹ मांहांहांअ टोलो देख्यो तांहांअ, ईसु डोगीपेअ चोळ्यो, आने तीयाहांन बोद दांअ बोठो। तीयाअ चेला तीयाअ पाही टोलवाअया। ² तांहांअ तो तीयाहांन एंहकींअ आखीन बोद दांअ टेक्यो,

खेरों सुख

(लुक ६:२०-२३)

³ “सोताअ आत्मीक जोरुल्या जांअनारा नोसीबदार हाय। काहाका, पोरमेहेराअ राज तीयाहांअज हाय।

⁴ सोताअ पापाहांअ लीदे दुखी वीअनारा नोसीबदार हाय। काहाका, ते दीलासो मीलवीअ।

⁵ गोरीबळा सोबावावाला नोसीबदार हाय। काहाका, ते तोरतीअ वारसाय मीलवीअ।

⁶ हाची रीते जीवांअ खुब मोर्जी राखनारा नोसीबदार हाय। काहाका, तेंहकींअ जीवांअ पोरमेहेर तींयहांअ मोदोत कीअ।

⁷ दायालु रीते वोरतुअनारा नोसीबदार हाय। काहाका, ते दाया मीलवीअ।

⁸ सोक्का मोनावाला नोसीबदार हाय। काहाका, ते पोरमेहेराल हीअ।

⁹ सांतीम रांअ मोदोत केअनारा नोसीबदार हाय। काहाका, ते पोरमेहेराअ पोयरा आखाय।

¹⁰ हाचा वोरतोनाअ लीदे जीयाहांन बीहरा लोक दुखें पाळताह, ते नोसीबदार हाय। काहाका, पोरमेहेराअ राज तीयाहांअज हाय।

¹¹ “मांअ लीदे मांहेंअ तुमांअ नींदा केअ, तुमनेंह दुखें पाळे, आने तुमांअ वीरुद झुटी रीते बादी जातीअ खोटों आखे तांहांअ पोरमेहेर तुमाहांपेअ राजी हाय। ¹² तेंहडों बोंणे तांहांअ आनोंद केरा आने खुस वेरा! काहाका, होरगाम तुमनेंह मोडों ईनाम मीलीअ। पोरमेहेराअ गोठ जाहेर केअनाराहांन बी खुब वोखत पेअलांअ तुमांअ आगलाअ डायाहां एंहकींअज दुखें पाळलें।

खाराअ ने उजवोळाअ दाखलो

(मार्क ९:५०; लुक १४:३४-३५)

¹³ तुमां तोरतीमेर्याअ बादा लोकाहांअ खातुर खाराअ होच हाय। पेन जो खारों सोताअ गुण गोमावी दे ता, तीया खाराम फाचा ते गुण तुमां केंहडाकींअ लावी सेकता? हातींअ तों खारों काय बी कामाम नांय आवे। आने तीयाल बारे फेकी दांअ पोळीअ, आने तों मांहांहांअ पागाहांअ थुले सुंदाय जाय।

¹⁴ तुमां दुन्याअ उजवोळ हाय। डोगापेअ वोसावला सेहेराल मांहेंअ हारकींअज हीअ सेकतेंह। ¹⁵ चीमनी सीलगावीन तीयुल केडों बी सीबलाअ थुले नांह थोवतों। पेन कोअमे रेनारा बादाहांन उजवोळ दे एंहकींअ तीयुल चीमनी थोवुलोंअ गोखलाम थोवेह। ¹⁶ तेंहकींअज कीईन, उजवोळा रुपी तुमांअ हारें कामें बीहरा लोकाहांन देखावा। तांहांअ तीया कामाहांन देखीन ते लोक होरगामेर्याअ तुमांअ पोरमेहेर बाहकाअ गुणगान कीअ।

पोरमेहेराअ नीयोमाहांअ बाबोताम

¹⁷ पोरमेहेराअ नीयोमाहांन आने पोरमेहेराअ गोठ जाहेर केअनाराहांअ लेखाणाहांन रोद केरांअ आंय दुन्याम आलोह एंहकींअ मा धारतें! आंय तीयाहांन रोद केरांअ नांह, पेन तीयाहांमेर्याअ बादया बाबोत्या हाच्या पोळे तीयाअ खातुरुज आलोह। ¹⁸ आंय तुमनेंह नोक्कीज आखुंह: तीयाहांम लेखलों बादों पुरों वीअ तांव लोगुंअ ने जुग-तोरती रे तांव लोगुंअ तीयाहांअ हानांम हानो भाग बी ओमोलाम रीअ। ¹⁹ तीयाअ लीदे, जोबी तीया हुकोमाहांमेर्या हानांम हानो हुकोम बी तोळीअ आने तेंहकींअ तोळता बीहराहांन हीकवीअ, तो पोरमेहेराअ राज्याम हानांम हानो आखाय। पेन जोबी तीया हुकोमाहांअ पोरमाणे चालीअ ने तेंहकींअ चालांअ बीहराहांन हीकवीअ, तो पोरमेहेराअ राज्याम मोडो आखाय। ²⁰ आंय तुमनेंह आखुंह, नीयोम हीकवुअनारा ने फोरीसी जेंहकींअ ते हुकोम पालताह तीयाअ केअता तुमां वादारे हारी रीते ते हुकोम नांय पालाह ता तुमां पोरमेहेराअ राज्याम वीहनाराज नांह।

²¹ ‘खुन कीअहो मा!’ आने ‘जोबी खुन केअहे, तीयाल साज्या दांअ जोजे।’ एंहकींअ मोसेंय आपुअ आगलाअ डायाहांन देदलो हुकोम तुमां वाचता उनाअयाह। ²² पेन आंय तुमनेंह आखुंह, जो तुमां केडाल खीजवाअहा ता पोरमेहेर तुमांअ नीयाय कीअ। जो तुमां केडाल ‘ओकुल वोगुरा’ एंहकींअ आखाह ता उची कोरुट तुमांअ नीयाय कीअ। जो तुमां केडाल ‘गांडा’ एंहकींअ आखाह ता तुमनेंह आगीवाला नोरकाअ सीक्सा मीलीअ। ²³ तीयाअ लीदे, तुं तोअ ओरपोण लीईन वेदीअहीं जाहो तांहांअ, तुंयुं केडाअ वीरुद खोटों केअयोंह एंहकींअ जो तुल ईत आवे ता, ²⁴ तों ओरपोण वेदीअहीं रांअ दीईन जो आने तीया मांहांअरी होमुजवाद काड, आने हातींअ वेदीअहीं आवीन तोअ ओरपोण केअजे।

²⁵ तोअपेअ एगाअ कोरजों वीअ तीयाअ लीदे तो तुल कोरुटाम लीअ जातो वीअ ता, वाटेज तीयाअरी होमजी जाजे। नेता तो तुल जोजाअ आथाम होपी दीअ, आने जोज तुल जेलाअ चोकीदाराअ आथाम होपी दीअ, आने जेलाअ चोकीदार तुल जेलाम कोंडी दीअ। ²⁶ आंय तुल नोक्कीज आखुंह, तुं एक बी पोयसो बाकी राख्या वोगुर तों कोरजों नांय चुकवो तांव लोगुंअ तुं जेलामेनेअ सुटनारोज नांह।

सीनालाअ बाबोताम

²⁷ ‘सीनालों कीअहो मा’ एंहकींअ मोसेंय जों आखलों, तों तुमां उनाअयाह। ²⁸ पेन आंय तुमनेंह आखुंह, जो एक आदमी पारकी बायाअरी सोरीलाअ सोबोंद राखांअ मोर्ज्ये तीयुल हेअहे ता, तीयांय सोताअ मोनाम तीयुअरी सीनालों केअयोंहज। ²⁹ जो तोअ हुदा डोंआंअ लीदे तुल पाप केरांअ मोन वीअ ता, तुंयुं तो डोंओंज काडीन फेकी देदोह एंहकींअ होमजीन पाप मा केअतो। पोरमेहेर तोअ आखा सोरीलाल नोरकाम टाकी दे तीयाअ केअता, तोअ सोरीलाअ एक भाग खुटी जाय तों, तोअ खातुर वादारे हारों हाय। ³⁰ जो तोअ हुदा आथाअ लीदे तुल पाप केरांअ मोन वीअ ता, तुंयुं तो आथुज वाडीन फेकी देदोह एंहकींअ होमजीन पाप मा केअतो। तोअ आखो सोरील नोरकाम जाय तीयाअ केअता, तोअ सोरीलाअ एक भाग खुटी जाय तों, तोअ खातुर वादारे हारों हाय।

फारगुतीअ बाबोताम

(माथी १९:९; मार्क १०:११-१२; लुक १६:१८)

³¹ “मोसेंय एंहकींअ बी आखलों, ‘जोबी आदमी सोताअ कोअवालील फारगुती दे, तो तीयुल फारगुती लेखी दे।’ ³² पेन आंय तुमनेंह आखुंह, सीनालाअ कारोणा सीवाय बीहरा केल्‍ला बी कारोणे जोबी आदमी सोताअ कोअवालील फारगुती दे आने ते बाय बीहरा आदमील रे ता, तो आदमी तीयुल सीनालों केरावेह, आने तीयुल राखनारो आदमी बी सीनालों केअहे।

होम खांअ बाबोताम

³³ “‘मालीखाअ आगलांअ तुंयुं खादला होम तोळोह मा, पेन ते पुरा केअ!’, एंहकींअ खुब वोखुत पेअलांअ आपुअ आगला डायाहांन मोसेंय जों आखलों तों बी तुमां उनाअयाह। ³⁴ पेन आंय तुमनेंह आखुंह, होमुज खाहा मा! जुगाल साक्सी राखीन होम खाहा मा! काहाका, ते पोरमेहेराअ राज-गादी हाय। ³⁵ का तोरतील साक्सी राखीन बी नांय! काहाका, ते पोरमेहेराअ पाग थोवांअ पाट्ली हाय! का येरुसालेमाल साक्सी राखीन बी नांय! काहाका, तों पोरमेहेर जो राजा हाय तीयाअ सेहेर हाय। ³⁶ आने तुमांअ मुंनकाहांन साक्सी राखीन बी होम खाहा मा! काहाका, तुमांअ मुंनकाहांमेर्योंअ एक कालों केंह बी पांडोंअ केरांअ का एक पांडोंअ केंह बी कालों केरांअ तुमाहांपेअ ताकोत नांह। ³⁷ तीयाअ लीदे, तुमां जोंबी वोचोन दा तों जो तुमनेंह बोंणे एंहडों वीअ ता, ‘हा’ आखा, ने नांय बोंणे एंहडों वीअ ता, ‘नांय’ आखा! ईयाअ केअता वादारे तुमां जोंबी आखा तों, सेतान जो खाराब हाय तीयाअ तोरफ्योंअ हाय!

वेर वालांअ बाबोताम

(लुक ६:२९-३०)

³⁸ “‘जो एक मांहुंअ बीहरा मांहांअ एक डोंओं फोळी टाके ता, तेंहकींअ केअनाराअ एक डोंओं बी फोळी टाकुलोंअ आने जो एक मांहुंअ बीहरा मांहांअ एक दात तोळी टाके ता, तेंहकींअ केअनाराअ एक दात तोळी टाकुलोंअ’ एंहकींअ जों लेखलों हाय तों बी तुमां उनाअयाह। ³⁹ पेन आंय तुमनेंह आखुंह, तोअ खोटों केअनाराअ खोटों मा केअतो! जो एक मांहुंअ तोअ हुदा गालापेअ थापुळ ठोके ता, तीयाल तोअ उल्टा गालापेअ बी ठोकांअ दे! ⁴⁰ आने जो एक मांहुंअ तोअ डोगलो मागांअ खातुर कोरुटाम फीराद केअ ता, तीयाल तोअ उपर्योअ कोट बी दीअ दे। ⁴¹ आने जोबी ओमोलदार तुल तीयाअ गाहळो एक गांव लोगुंअ उसली जांअ फोरुज पाळे ता, तो बेन गांव लोगुंअ उसली जो। ⁴² आने तोअपेअ मागनाराल दे, आने तोअपेअ उसनों मागांअ मोर्जी राखनाराल उसनों दे।

तुमांअ दुसमोनाहांपेअ बी माया राखा!

(लुक ६:२७-२८, ३२-३६)

⁴³ “‘तोअ दोस्दारापेअ माया राख ने तोअ दुसमोनाल नोफरोत केअ!’ एंहकींअ जों लेखलों हाय तों तुमां उनाअयाह। ⁴⁴ पेन आंय तुमनेंह आखुंह, तुमांअ दुसमोनाहांपेअ माया राखा, आने तुमनेंह दुखें पाळनाराहांअ खातुर पोरमेहेराल ओरुज केरा, ⁴⁵ ईयाअ खातुर का तुमां होरगामेर्याअ तुमांअ पोरमेहेर बाहकाअ होच वोरता। तो ता खाराब आने हारा लोकाहांपेअ दीहाअ उजवोळ हारकोज पाळेह, आने हाचा ने जे हाचा नांह तीयाहांपेअ हारकोज वोरहात मोकलेह। ⁴⁶ तुमाहांपेअ माया राखनाराहांपेअज तुमां माया राखा ता, तुमनेंह केल्लो बोदलो मीलीअ? वेरो उगरावनारा बी ता तीयाहांपेअ माया राखनाराहांपेअ एंहकींअज माया राखताह। ⁴⁷ तुमांअ दोस्दाराहांअरीज तुमां दोस्ती राखा ता, बीहराहांअ केअता तुमां काय वादारे केअयोंह? पोरमेहेराल नांय ओअखुअनारा बी ता सोताअ दोस्दाराहांअरी एंहकींअज दोस्ती राखताह। ⁴⁸ तीयाअ लीदे, होरगामेर्योअ तुमांअ पोरमेहेर बाहको जेंहकींअ खामी वोगुराअ हाय, तेंहकींअज तुमां बी खामी वोगुराअ रा!