मार्क 15

पीलाताअ आगलांअ ईसु

(माथी २७:१-२, ११-१४; लुक २३:१-५; योहान १८:२८-३८)

¹ राजपालाअ आगलांअ ईसुपेअ केंहकींअ गुनो थोवुलोंअ तों नोक्की केरांअ खातुर बीहरे दीह उजालों वेअताज मोडा पुंजारा, वोळील, नीयोम हीकवुअनारा, आने येहुदी पोंचाअ बीहरा बादा लोक टोलवाअया। ते ईसुल बांदावीन लीअ गीया आने तीयाहां तीयाल राजपाल पीलाताअ आथाहांम होपी देदो। ² पीलातांय ईसुल फुच्यों, “तुं येहुदीहींअ राजा हाय का?” तांहांअ ईसुंय तीयाल जोवाब देदो, “तुंज तेंहकींअ आखोह।” ³ हातींअ मोडा पुंजाराहां ईसुपेअ खुब जातीअ गुना थोव्या। ⁴ तांहांअ पीलातांय फाचों ईसुल फुच्यों, “तुं काय बी जोवाब नांह देतो का? हेअ, तोअपेअ ते कोतीअ जातीअ गुना थोवताह!” ⁵ पेन ईसुंय ता बीहरो काय बी जोवाब नांय देदो। तीयाअ लीदे, पीलाताल खुब नोवाय लागी।

ईसुल मोताअ सीक्सा वेअहे

(माथी २७:१५-२६; लुक २३:१३-२५; योहान १८:३९-१९:१६)

⁶ दोर वोरसे पास्काअ तेहवाराअ वोखत लोक जीया केदील सोळी थोवांअ कालावाला केअ तीयाल पीलात सोळी थोवत्‍लो। ⁷ तीया वोखत बाराबास नांवांअ एक आदमी एंहडा आदमीहींअरी जेलाम आथो का जीयाहां धामालाअ सोमोयाम खुन केअलों। ⁸ लोकाहांअ एक टोलो पीलाताअहीं आलो आने एंहडा सोमोयाम तो सोताअ रीवाजाअ पोरमाणे तीयाहांअ खातुर जों केअत्लो तों केरांअ तीयाहां तीयाल ओरुज केअयी। ⁹ तांहांअ पीलातांय तीयाहांन जोवाब देता आख्यों, “तुमांअ खातुर आंय येहुदीहींअ राजाल सोळी थोवुं एंहडी तुमांअ मोर्जी हाय का?” ¹⁰ पीलाताल बोराबोर खोबुर आथी का आदरायाअ लीदेज मोडा पुंजारा ईसुल तीयाअ आथाहांम होपी देदलो।

¹¹ पेन मोडा पुंजाराहां टोलामेर्याअ लोकाहांन चोळव्या का, ते सोताअ खातुर ईसुअ बोदले बाराबासाल सोळी थोवांअ पीलाताल ओरुज केअ। ¹² तांहांअ पीलातांय लोकाहांन फाचों फुच्यों, “ता हातींअ तुमां जीयाल येहुदीहींअ राजा आखताह तीयाल आंय काय क्युंव?” ¹³ तांहांअ ते फाचा बोंबली उठया, “ईयाल कुरुसापेअ जोळी दे!” ¹⁴ तांहांअ पीलातांय तीयाहांन आख्यों, “काहाल? तीयांय काय गुनो केअयोह?” पेन ते वादारे जोरपेअ बोंबल्या, “ईयाल कुरुसापेअ जोळी दे!” ¹⁵ पीलात टोलामेर्याअ लोकाहांन राजी राखांअ मागत्‍लो तीयाअ लीदे, तीयांय तीयाहांअ खातुर बाराबासाल सोळी थोव्यो। हातींअ तीयांय ईसुल चापकाहांअ मार ठोकावीन तीयाल कुरुसापेअ जोळी दांअ सोयनीकाहांन आख्यों।

सोयनीक ईसुअ मोस्कुरी केअताह

(माथी २७:२७-३१; योहान १९:२-३)

¹⁶ तांहांअ सोयनीक ईसुल राजपाल पीलात रेहलो तीया मेहेलाअ चोवठाम लीअ गीया। हातींअ तीयाहां सोयनीकाहांअ टुकळीमेर्याअ बीहरा बादाहांन तींहीं टोलव्या। ¹⁷ हातींअ तीयाहां ईसुल जांबा रोंगाअ झोब्‍बो पोवाव्यो आने तीयाअ मुनकापेअ काटाली होटीहींअ मुंगोट थोव्यो। ¹⁸ हातींअ तीयाहां, “येहुदीहींअ राजा, खुब जीवजे!” एंहकींअ मोस्कुरीम आखीन तीयाल सालाम केअयी। ¹⁹ तीयाहां तीयाअ मुनकाम होटीकींअ ठोक्यों, तीयापेअ थुप्या, आने मोस्कुरीम गुठोणे पोळीन तीयाल नोमोन केअयों। ²⁰ तीयाअ मोस्कुरी कीईन हातींअ तीयाहां जांबा रोंगाअ झोब्‍बो तांय काडयो आने तीयाअ सोताअ पोतळें पोवावी देदें। हातींअ ते तीयाल कुरुसापेअ जोळांअ खातुर सेहेराअ बारे लीअ गीया।

सोयनीक ईसुल कुरुसापेअ जोळताह

(माथी २७:३२-४४; लुक २३:२६-४३; योहान १९:१७-२७)

²¹ वाटे तीयाहांन कुरेने सेहेराअ रेवासी सीमोन नांवांअ आदमी मील्यो। (तो आलेक्सांदेर आने रुफुसाअ बाहको आथो।) सीमोन गांवांमेनेअ येरुसालेम सेहेराम आवत्‍लो। सोयनीकाहां तीयाल ईसुअ कुरुस जोबोरजोस्ती उसलाव्यो। ²² सोयनीक ईसुल ‘गोलगोथा’ नांवांअ जागे लीअ आला। ‘गोलगोथा’ मोंजे ‘खोपरीवालो जागो’। ²³ तींहीं तीयाहां ईसुल ‘बोळ’ नांवांअ दावा बेळलो दाराख्साअ रोह पीयांअ देदो। पेन तीयांय तो नांय पीदो। ²⁴ तीयाहां तीयाअ पोतळें काडी लीईन तीयाल कुरुसापेअ जोळी देदो। हातींअ तीयाहां पोतळाअ केल्लो भाग केडाल मीले तों नोक्की केरांअ चीठ्या टाकीन तीयाअ पोतळें वाटी लेदें।

²⁵ तीयाहां तीयाल कुरुसापेअ जोळ्यो तांहांअ वेगीअ नोव वाजलें। ²⁶ ईसुल कुरुसापेअ जोळांअ कारोण देखावता तीयाहां एक पाट्याम “येहुदीहींअ राजा” एंहकींअ लेखीन तों ईसुअ मुनकाअ उपेअ ठोक्यों। ²⁷ तीयाहां ईसुअरी बेन लुटाराहांन बी कुरुसाहांपेअ जोळ्या। एकाल तीयाअ हुदी वेल आने बीहराल तीयाअ उल्टी वेल। ²⁸ [[“तो गुनेगाराहांअ आर्योअ गोंणाअयो” एंहडों लेखलों पोवीतोर लेखाण एंहकींअ कीईन खेरों पोळ्यों।]]

²⁹ कुरुसाअहीं रीईन जानारा लोक सोताअ मुनकें टुडावी-टुडावीन ईसुअ नींदा केअत्ला, “वाह! तुं ता मोंदीराल तोळी टाकीन तों फाचों तीनुंज दीहाहांम बांदांअ आखत्‍लोक्ने? ³⁰ आमी कुरुसापेनेअ उती आवीन सोताल वाचावी ले ता!” ³¹ एंहकींअज कीईन मोडा पुंजाराहां आने नीयोम हीकवुअनाराहां बी ईसुअ मोस्कुरीज केअता एक-बीहराल आख्यों, “तीयांय बीहराहांन वाचाव्या, पेन तो सोताल वाचावी सेकतो नांह! ³² ईसरायेलाअ राजा ख्रीस्ताल आपुंह आमी कुरुसापेनेअ उतरी आवतो हेअजी! तांहांअ आपुंह तीयापेअ वीसवास कीअहुं!”

ईसुअ बेनुं वेल कुरुसाहांपेअ जोळाअला गुनेगाराहां बी तीयाअ नींदा केअयी।

ईसुअ मोत

(माथी २७:४५-५६; लुक २३:४४-४९; योहान १९:२८-३०)

³³ पारगापेअ बार वाजेनेअ तीन वाजे लोगुंअ आखा देसाम आंदारों वीअ गीयों। ³⁴ तीन वाजे ईसु जोरपेअ बोंबली उठ्यो, “एलोय, एलोय, लामा साबाख्थानी?” तीयाअ ओर्थो, “मांअ पोरमेहेर, मांअ पोरमेहेर, तुंयुं मांन काहा सोळी देदोह?” एंहकींअ हाय।

³⁵ तों उनायन तींहीं पाही उबी रेहला लोकाहांमेर्याअ थोळाकाहीं आख्यों, “उनाया! तो एलीयाल हात केअहे।” ³⁶ तांहांअ एक जांअ दोवळी गीयो, तीयांय पोचा लोब्बोळाल राही दाराख्साअ रोहाम पीजव्यो, तीयाल होटीम फेर्व्यो, आने तो ईसु चुहे तीयाअ खातुर तीयाअ मुंयांअरी तीईन आख्यों, “उबी रा! एलीया ईयाल कुरुसापेनेअ उतावांअ आवेह का नांह तों आपुंह हेअजी!”

³⁷ हातींअ ईसु जोरपेअ बोंबलीन मोय गीयो।

³⁸ तीयुज घेळी मोंदीराअ पोळदो उपेअनेअ एठाअ लोगुंअ चीराय गीयो। ³⁹ कुरुसाअ पाहीं उबी रेहला सुबेदारांय ईसुल एंहकींअ कीईन मोअतो देखीन आख्यों, “खोरेखोर ओ आदमी पोरमेहेराअ पोयरो आथो!” ⁴⁰ तींहीं थोळ्याक बाया बी आथ्या। तीयुहुंम मागदाला गांवांअ मारीयोम, हानांअ याकोब आने योसेअ याहकी मारीयोम, आने सालोमी आथ्या। ⁴¹ ईसु गालीलाम आथो तांहांअ ते तीयाअरी आथ्या आने तीयाअ सेवा केअत्ल्या। तीयाअरी येरुसालेम आलल्या बीहर्या खुब बाया बी तींहीं आथ्या।

ईसुअ लास ओजाअहे

(माथी २७:५७-६१; लुक २३:५०-५६; योहान १९:३८-४२)

⁴² तो तीयारीअ दीह, मोंजे, आरामाअ दीहाअ पेअलो दीह आथो आने वाअतों पोळलों। ⁴³ तीयाअ लीदे आरीमाथेया गांवांअ योसेफ तींहीं आलो। तो येहुदी पोंचाअ मानावालो आदमी आथो आने तो पोरमेहेराअ राज्या आवांअ वाट जोवत्लो। तो हींमोत राखीन पीलाताअहीं गीयो आने तीयांय पीलातापेअ ईसुअ लास मागी। ⁴⁴ ईसु मोय गीयो तों उनायन पीलाताल नोवाय लागी। तीयाअ लीदे तीयांय सुबेदाराल हादीन फुच्यों, “ईसुल मोईन खुब सोमोय वीअ गीयोह का?” ⁴⁵ सुबेदाराअ हेवाल उनायन हातींअ पीलातांय योसेफाल ईसुअ लास लीअ जांअ राज्या देदी। ⁴⁶ योसेफांय रेसमी पोतळों वेचाअतों लीदों, ईसुअ लासील कुरुसापेनेअ उतावी, आने तीयुल रेसमी पोतळाम चोंअडावीन खोळकाम खोरवी काडली कोबीराम ओजी। हातींअ तीयांय कोबीराअ मुवालापेअ मोडो ढोगळो उंडलावी थोव्यो। ⁴⁷ मागदाला गांवांअ मारीयोम आने योसेअ याहकी मारीयोमांय ईसुअ लासील योसेफांय कांहीं ओजली तों हेअयों।