14
ईसुल माय टाकांअ कावोतरों
(माथी २६:१-५; लुक २२:१-२; योहान ११:४५-५३)
1 ‘पास्का’ नांवांअ तेहवाराल आने ‘खोमीरा वोगुराअ मांडो’ नांवांअ तेहवाराल बेनुंज दीहाअ वाअ आथी।a तांहांअ मोडा पुंजारा आने नीयोम हीकवुअनारा ईसुल केंहकींअ ठाका-ठाका तीईन माय टाकुलोंअ तीयाअ गोठवोणी केअत्ला। 2 पेन ते एक-बीहराल आखत्ला, “तेहवाराअ वोखत आपुअ तेंहकींअ नांय केरांअ जोजे! काहाका, जो आपुंह तेंहकींअ केअजी ता, लोक धामाल कीअ।”
एक बाय ईसुअ मुनकापेअ आस्तोर रीसवेह
(माथी २६-६-१३; योहान १२:१-८)
3 ईसु बेथानी गांवांम सीमोन नांवांअ मांहांअ कोअ आथो। तो सीमोन पेअलांअ कोड रोगावालो आथो। ते खाहला तांहांअ तींहीं एक बाय आली। तीयुपेअ ढोगळाअ एक बोरनी आथी। तीयु बोरनीम ‘नारडो’ नांवांअ बाटवाअ मुलाहांमेनेअ बोंणावलों खुब मोगों आस्तोर पोअलों आथों। तीयु बायुंय बोरनीअ मुवालों फोळीन आस्तोर ईसुअ मुनकापेअ रीसवी देदों। 4 तांहांअ तींहीं आथा तीयाहांमेर्याअ थोळाक लोकाहीं खीजवायन एक बीहराहांन आख्यों, “तीयुंय ईं आस्तोर काहाल एंहकींअ वेळफी टाक्यों? 5 ईया आस्तोराल आपुंह चांदीअ तीनहोव सीक्काहांअb केअता वादारे कींमोताम वेची सेकता आने ते पोयसा गोरीबाहांन दीअ सेकता!” एंहकींअ तीयाहां तीयु बायुल ठोपको देदो।
6 पेन ईसुंय आख्यों, “ईयुल ठोपको दांअ बोंद केरा! ईयुल हेरान मां केअता! ईयुंय ता मांअ खातुर खुब हारों काम केअयोंह। 7 गोरीब लोक ता कायोम तुमांअरी रेनाराज हाय। जांहांअ बी तुमांअ मोर्जी वीअ तांहांअ तुमां तीयाहांअ मोदोत कीअ सेकताह। पेन आंय लांबो वोखत तुमांअरी रेनारो नांह। 8 तीयुल जों बोंणी सेक्यों तों तीयुंय केअयोंह। मांअ मुरदाल डाटांअ तीयारीम तीयुंय पेअलांअज ईं आस्तोर रीसव्योंह। 9 आंय तुमनेंह नोक्कीज आखुंह: आखी दुन्याम जींहीं-जींहीं लोक मांअ बाबोताम हारी गोठ जाहेर कीअ, तींहीं-तींहीं ते ईयु बायुंय मांअ खातुर जों केअयोंह तों आखीअ आने बीहरा लोक तीयुल ईत कीअ।”
ईसुल तेरावी दांअ येहुदा वोचोन देहे
(माथी २६:१४-१६; लुक २२:३-६)
10 हातींअ केरीयोत गांवांअ येहुदा जो बारा चेलाहांमेर्योअ एक आथो तो ईसुल मोडा पुंजाराहांअ आथाहांम होपी दांअ ईरादो राखीन तीयाहांअहीं गीयो। 11 तीयाअ गोठ उनायन ते खुब खुस वीअ गीया, आने तीयाल पोयसा दांअ तीयाहां वोचोन देदों। तीयाअ लीदे, येहुदा ईसुल तेरावी दांअ लाग होदांअ टेक्यो।
ईसु सोताअ चेलाहांअरी पास्काअ मांडो खाहे
(माथी २६:१७-२५; लुक २२:७-१४, २१-२३)
12 खोमीरा वोगुराअ मांडा खांअ तेहवाराअ पेअला दीह, मोंजे, येहुदी लोक पास्काअ मांडाअ खातुर घेटाहांअ बोचें माअत्ला तीदीह ईसुअ चेलाहां तीयाल फुच्यों, “तुं आमांअरी पास्काअ मांडो खांअ हाय तो आमां कांहीं जायन तीयार केअजी?”
13 तांहांअ ईसुंय तीयाअ चेलाहांमेर्याअ बेन आदमीहींन एंहकींअ आखीन मोकल्या, “येरुसालेम सेहेराम जा! पांअयांअ वेंडों लीईन जातों एक मांहुंअ तुमनेंह मीलीअ। तीयाअ फाचलांअ जाजा! 14 जीया बी कोअमे तो जाय तीया कोअ मालीखाल आखजा, ‘गुरुजी फुचेह, आंय मांअ चेलाहांअरी पास्काअ मांडो खांअ हाय ते खोली काहीं हाय?’ 15 तांहांअ तो मालापेरीअ एक मोडी खोली जे पीळली ने तीयार केअली हाय ते तुमनेंह देखावीअ। तींहीं आपुअ खातुर मांडो तीयार केअजा।”
16 तांहांअ ते चेला तींहींनेअ नींगीन येरुसालेम सेहेराम गीया। ईसुंय तीयाहांन जेंहकींअ आखलों तेंहकींअज तीयाहांन बादों मीललों। तीया खोलीम तीयाहां पास्काअ मांडो तीयार केअयो।
ईसु सोताल तेरावी देनाराअ बाबोताम आखेह
(माथी २६:२०-२५; लुक २२:२१-२३; योहान १३:२१-३०)
17 वाअतों पोळ्यों तांहांअ ईसु बारा चेलाहांअरी तीया कोअमे आवी पोच्यो।
18 ते बादा बोहीन खाहला तांहांअ ईसुंय तीयाहांन आख्यों, “आंय तुमनेंह नोक्कीज आखुंह: तुमाहांमेर्योअ एक जांअ जो ईंहीं मांअरी बोहीन खाहे तो मांन तेरावी दीअ।”
19 तांहांअ चेला खुब दुखी वीया आने वाराफोरथी ईसुल फुचांअ टेक्या, “तुल तेरावनारो आंय ता नांहक्ने?”
20 तांहांअ तीयांय तीयाहांन आख्यों, “मांन तेरावी देनारो ता तुमांअ बारा चेलाहांमेर्योअ ज एक हाय, जो मांअरी वाटकीम मांडो पीजवीन खाहे। 21 पोवीतोर लेखाणाम मांहांअ पोयराअ मोंजे मांअ बाबोताम जों लेखलों हाय तीयाअ पोरमाणे आंय मोअहें। पेन मांन तेरावी देनारों मांहुंअ केंहडों दुखी वीअ! तों मांहुंअ जोनम्योंज नांय वेअतों ता तों तीयाअ खातुर हारों वेअतों!”
मालीखाअ मोताअ ईयादगीरीअ मांडो
(माथी २६:२६-३०; लुक २२:१४-२०; १ कोरींथी ११:२३-२५)
22 ते खाहला तांहांअ ईसुंय मांडो लेदो, पोरमेहेराअ आभार मानीन पाज्यो आने चेलाहांन दीईन आख्यों, “ल्या, ओ मांअ सोरील हाय।”
23 हातींअ तीयांय पीयालो लेदो आने पोरमेहेराअ आभार मानीन तीयाहांन देदो। आने तीयाहां बादाहां पीयालामेनेअ पीदों। 24 तीयांय तीयाहांन आख्यों, “पोरमेहेराअ काराराल मोंजुर केअनारों ईं मांअ रोगुत हाय जों आंय खुब लोकाहांअ खातुर पाळनारो हाय। 25 आंय तुमनेंह नोक्कीज आखुंह: पोरमेहेराअ राज्याम नोवो दाराख्साअ रोह नांय पीम तांव लोगुंअ आंय कीदीह बी दाराख्साअ रोह पीनारो नांह।”
26 एक गीत आखीन हातींअ ते तींहींनेअ जेतुनाअ चाळावाली डोगीअपेअ जांअ नींग्या।
पीतोर ईसुल ओअखांअ ना पाळनारो हाय तीया बाबोताम भोवीसवाणी
(माथी २६:३१-३५; लुक २२:३१-३४; योहान १३:३६-३८)
27 ते वाटे चालत्ला तांहांअ ईसुंय चेलाहांन आख्यों, “तुमां बादा मांन सोळीन नाही पोळाह। काहाका, पोरमेहेर पोवीतोर लेखाणाम मांअ बाबोताम एंहकींअ आखेह,
‘आंय भारवाळाल माय टाकेंह,
आने तीयाअ घेटें फुटकुर पोळी जाय।’
28 पेन पोरमेहेर मांन फाचो जीवतो कीअ हातींअ आंय तुमांअ आगलांअ गालीलाम जाहें।” 29 पीतोरांय ईसुल आख्यों, “बीहरा बादा तुल सोळी दे तेबी, आंय तुल नांय सोळुं!” 30 ईसुंय पीतोराल आख्यों, “आंय तुल नोक्कीज आखुंह, ईयुज रातीं कुकळो बीहरी वोखत वाहे तीयाअ पेअलांअ तुं मांन ओअखांअ तीन वोखत ना पाळोह!” 31 पेन पीतोरांय साती ठोकीन आख्यों, “मांन तोअरी मोरांअ पोळे तेबी, तुल ओअखांअ आंय कीदीह बी ना नांय पाळुं!” आने बीहरा बादा चेलाहां बी तेंहकींअज आख्यों।
ईसु गेथसेमाने वाळीम पोरमेहेराल ओरुज केअहे
(माथी २६:३६-४६; लुक २२:३९-४६)
32 ईसु आने चेला गेथसेमाने आखाअहे तीयु जागे आवी पोच्या। तांहांअ ईसुंय तीयाअ थोळाक चेलाहांन आख्यों, “आंय पोरमेहेराल ओरुज कीअहुं तांव तुमां ईंहीं बोहा!” 33 हातींअ तो पीतोर, याकोब, आने योहानाल सोताअरी हादी गीयो। तो खुब कीदरायांअ आने खुब दुखी वेरांअ टेक्यो। 34 तीयांय तीयाहांन आख्यों, “आंय खुब दुखी वीयोह। मांअ जीव नींगी जाय एंहडों मांन लागेह। तुमां ईंहीं रीईन जागता रेजा!” 35 ईसुंय आजी थोळोक आगलांअ जायन पुंय उबडु पोळीन पोरमेहेराल ओरुज केअयी, बोंणी सेके ता, तीयाअ दुखें वेठांअ नांय पोळे।c 36 तीयांय आख्यों, “मांअ बाहका,d तुं बादोंज कीअ सेकोह। तीयाअ लीदे ईं दुख मांअ वेठांअ नांय पोळे एंहडों केअ।e तेबी मांअ मोर्जी नांह, पेन तोअ मोर्जी पुरी वेअ!”
37 हातींअ ईसु चेलाहांअहीं आलो आने तीयांय तीयाहांन हुवता देख्या। तांहांअ तीयांय पीतोराल आख्यों, “सीमोन! तुं हुवी गेहलो का? एक काल्लाक बी तुल जागतों नांह रेवाअतों का?” 38 हातींअ ईसुंय बादाहांन आख्यों, “जागता रीईन पोरमेहेराल ओरुज केरा का एंहडों कांवींह तुमांअ पारखों केअ तांहांअ मांअपेर्योअ तुमांअ वीसवास तुमां जालवी राखी सेका। काहाका, आंय जों आखुंह तों केरांअ तुमां राजीज हाय, पेन तों केरांअ तुमाहांपेअ पुरती गोती नांह।”f
39 हातींअ तो फाचो गीयो आने पेअलांअ आखला तेज सोब्दा आखीन तीयांय फाचे पोरमेहेराल ओरुज केअयी। 40 तो फाचो आलो तांहांअ तीयांय तीयाहांन हुवताज देख्या। काहाका, ते खुब नींदाम आथा। तीयाल काय आखुलोंअ तों तीयाहांन नांय हुज्यों।
41 हातींअ तो गीयो ने फाचे पोरमेहेराल ओरुज केअयी। तीजी वोखत तो तीयाहांअहीं आलो आने तीयांय तीयाहांन फाचा बी हुवताज देख्या। तांहांअ तीयांय तीयाहांन आख्यों, “फाचा तुमां हुवताह आने आराम केअताह का? आमी हुव्या ओताअज। दुख वेठांअ मांअ सोमोय आवी गीयोह। हेरा! मांहांअ पोयराल मोंजे मांन एंगोंह पापी लोकाहांअ आथाहांम तेरावी दांअ तीयारीम हाय। 42 उठा, आपुंह जाजी! हेरा! मांन तेरावनारो पाही आवी गीयोह।”
ईसुल तीअ लीअ जाताह
(माथी २६:४७-५६; लुक २२:४७-५३; योहान १८:३-१२)
43 आजी ता ईसु गोठ्या केअत्लो तांवज येहुदा जो बारा चेलाहांमेर्योअ एक आथो तो आवी पोच्यो। तीयाअरी मोडा पुंजारा, नीयोम हीकवुअनारा आने वोळीलाहीं मोकलुअला आने तारवाया ने डेंगारा लीईन आलला लोकाहांअ टोलो आथो। 44 ईसुल तेरावनारांय तीया लोकाहांन नीसाणी दीईन आखलों, “जीयाल आंय चुबजेंह तोंज तुमां तेरांअ मागताह तों मांहुंअ हाय। तीयाल तीईन बोराबोर हाचवीन लीअ जाजा।”
45 तीयाअ पोरमाणे येहुदा आलो आने तुरुतुज ईसुअहीं जायन तीयांय आख्यों, “गुरुजी!” हातींअ तीयांय ईसुल चुबज्यो। 46 तांहांअ येहुदाअरी आलला लोकाहीं ईसुल तीअ लेदो। 47 पेन चेलाहांमेर्याअ एकांय जो पाही उबी रेहलो तीयांय सोताअ तारवाअ तांय काडी, मोडांम-मोडा पुंजाराअ चाकोराल चाटकाट्यो, आने तीयाअ कान वाडी टाक्यो। 48 ईसुंय तीया लोकाहांन आख्यों, “आंय लुटारो वीअ तेंहकींअ तुमां तारवाया ने डेंगारा लीईन मांन तेरांअ आलाह का? 49 आंय ता रोददीह मोंदीराम लोकाहांन बोद देता तुमांअरीज आथो। तांहांअ तुमां मांन काहाल नांह तेअयो? पेन एंहकींअ ईयाअ खातुर वेअहे का, पोवीतोर लेखाणाहांम मांअ बाबोताम जों लेखलों हाय तों खेरों पोळे।”
50 तांहांअ बादा चेला ईसुल सोळीन नाही पोळ्या।
51 तीयु वोखत एक जुवान आदमी सोताअ सोरीलापेअ रेसमी पोतळों ओतोंअज फांगीन ईसुअ फाचाळी जाहलो। तीया टोलामेर्याअ लोकाहीं तीयाल तेअयो। 52 पेन तो तीया रेसमी पोतळाल फाचलांअ टाकी दीईन उगाळा सोरीलेज नाही पोळ्यो।
येहुदी पोंचाअ आगलांअ ईसु
(माथी २६:५७-६८; लुक २२:५४-५५, ६३-७१; योहान १८:१३-१४, १९-२४)
53 ईसुल तेअनारा लोक तीयाल मोडांम-मोडा पुंजाराअ कोअ लीअ गीया। तींहीं बादा मोडा पुंजारा, वोळील, आने नीयोम हीकवुअनारा टोलवाअला। 54 पीतोर सेटे रीईन ईसुअ फाचलां-फाचलांअ गीयो आने मोडांम-मोडा पुंजाराअ पोंगाअ चोवठाम आवी पोच्यो। तींहीं तो चोकीदाराहांअरी आगठाअहीं बोहीन हेकाअत्लो। 55 मोडा पुंजाराहां आने येहुदी पोंचाअ बीहरा बादा लोकाहीं ईसुल माय टाकावांअ खातुर तीयाअ वीरुद झुटी साक्सी होदी। पेन ते तींहमें नांय फाव्या। 56 काहाका, खुब लोकाहीं ईसुअ वीरुद झुटी साक्सी पुरी तेबी, तीयाहांअ साक्सी हारकी नांय आवत्ली।
57 सेल्ले, थोळाक लोकाहीं उठीन ईसुअ वीरुद झुटी साक्सी पुरता आख्यों, 58 “ईयाल एंहकींअ आखता आमां उनाअयाह, ‘मांहांहां बांदला ईया मोंदीराअ आंय नास केअहें, आने मांहेंअ नांय बांदे एंहडों बीहरों मोंदीर आंय तीनुंज दीहाहांम बांदेंह’।” 59 पेन तीयाहांअ साक्सी बीहराहांअ साक्सीअ से उल्टीज आवत्ली।
60 तांहांअ मोडांम-मोडा पुंजारांय तीयाहांअ नीसमें उठीन ईसुल फुच्यों, “तुं काय बी जोवाब नांह देनारो का? तोअ वीरुद ईं मांहेंअ जे-जे बाबोत्या आखतेंह तीयुहुंअ बाबोताम तुं काय आखोह?” 61 पेन ईसु ठाकोज रीयो आने तीयांय काय बी जोवाब नांय देदो। तांहांअ मोडांम-मोडा पुंजारांय तीयाल बीहरो सोवाल फुच्यो, “तुं खुब मानावाला पोरमेहेराअ पोयरो ख्रीस्त हाय का?” 62 तांहांअ ईसुंय तीयाल आख्यों, “आंह, आंय तो हायज। आने ‘मांहांअ पोयराल मोंजे मांन तुमां खुब ताकोतावाला पोरमेहेराअ हुदी वेल बोहीन राज केअतो’ आने ‘वादलाहांम रीईन एठाअ आवतो हीअहा।’” 63 तांहांअ मोडांम-मोडा पुंजारांय सोताअ झोब्बो फाळ्यो आने बादाहांन आख्यों, “आमी आपनेंह बीहरी साक्सीअ काय जोरुल हाय? 64 पोरमेहेराअ वीरुद तीयांय जों आख्यों तों तुमां उनाअयाह। तांहांअ तुमांअ काय वीचार हाय?” तांहांअ तीयाहां बादाहां ईसुअ वीरुद एंहकींअ आख्यों, “ईं मांहुंअ मोरांअ लायोक हाय!” 65 हातींअ तीयाहांमेर्याअ थोळाक लोक ईसुपेअ थुपांअ टेक्या, आने तीयाहां तीयाअ मुंय गुंअटावी दीईन तीयाल ठोक्यो आने तीयाल आख्यों, “जो तुं पोरमेहेराअ गोठ जाहेर केअनारो वीअ ता तुल केडांय ठोक्यो तों आमनेंह आखेअ।” आने ईसुअ चोकी केअनाराहां बी तीयाल थापळाट्यो।
पीतोर ईसुल ओअखांअ ना पाळेह
(माथी २६:६९-७५; लुक २२:५६-६२; योहान १८:१५-१८, २५-२७)
66 पीतोर आजी चोवठामुज आथो तांहांअ मोडांम-मोडा पुंजाराअ एक कामावाली पोयरी पीतोराअ पाही आली। 67 तीयुंय पीतोराल आगीअहीं हेकाअतो देख्यो तांहांअ तीयुंय तीयाअहें हीईज रीईन तीयाल आख्यों, “तुं बी नाझारेथावाला ईसुअरी आथो!” 68 पेन तीयांय तीयुअ गोठीअ नाकार कीईन आख्यों, “तुं काय आखोह तों आंय जांअतो का होमजुअतो नांह!” एंहकींअ आखीन तो तींहींनेअ नींगीन बारे चोवठाअ गेटाअहीं गीयो। [[तोताअपुज कुकळो वाहयो।]] 69 तीयु कामावाली पोयरींय पीतोराल तींहीं हेअयो आने पाही उबी रेहला लोकाहांन फाचों आख्यों, “ईं मांहुंअ तीयाहांमेर्योंअज हाय।” 70 पेन पीतोरांय फाचो तीयु गोठीअ नाकार केअयो। थोळीक जेअ वाअ लागी हातींअ तींहीं पाही उबी रेहला लोकाहीं फाचों पीतोराल आख्यों, “नोक्कीज तुं तीयाहांमेर्योअज हाय। काहाका, तोअ बोलीपेनेअ खोबुर पोळेह का तुं गालीलावालो हाय।” 71 पेन पीतोर आखांअ टेक्यो, “तुमां जीया मांहांअ बाबोताम आखतेंह, तीयाल आंय ओअखुअतोज नांह। पोरमेहेर जांअहे का आंय हाचोंज गोगुंह। जो आंय ठोगतो वीअ ता तो मांन सीक्सा केअ!”g 72 तांहांअ तुरुतुज बीहरी वोखत कुकळो वाहयो। तांहांअ ईसुंय पीतोराल पेअलांअ आखली गोठ तीयाल ईत आली, “कुकळो बीहरी वोखत वाहे तीयाअ पेअलांअ तुं मांन ओअखांअ तीन वोखत ना पाळोह।” तांहांअ तो रोळांअ टेक्यो।