मार्क 13

येरुसालेमाअ मोंदीराअ नासाअ बाबोताम भोवीसवाणी

(माथी २४:१-२; लुक २१:५-६)

¹ ईसु मोंदीरामेनेअ नींगत्‍लो तांहांअ, तीयाअ चेलाहांमेर्याअ एकांय तीयाल आख्यों, “गुरुजी, हेअ ता! केंहडा मोडा ढोगळाहांकींअ ईं मोंदीर बांदयोंह आने ए बोंगला कोताअ हारा हाय!” ² तांहांअ ईसुंय तीयाल जोवाब देदो, “ईया बोंगलाहांन तुमां हेअताहकने? बीहरा देसाअ लोसकोर ईयाहांन एंहडा तोळी पाळीअ का ईंहीं एक बी ढोगळो बीहरा ढोगळापेअ नांय रीअ।”

दुन्याअ ओंताअ नीसाणीअ बाबोताम भोवीसवाणी

(माथी २४:३-१४; लुक २१:७-१९)

³ ते मोंदीराअ हुंबुर जेतुन चाळावाली डोगीअपेअ आवी पोच्या हातींअ ईसु बोठो। पीतोर, याकोब, योहान, आने आंदरीया तीयाअरी एखला पोळ्या तांहांअ तीयाहां तीयाल फुच्यों, ⁴ “तुं आमी आखत्‍लो ते बाबोत्या केंहडीवेल बोंणीअ? ए बादया बाबोत्या पुर्या वीअ तीयाअ केल्‍ली नीसाणी हाय? तों आमनेंह आखेअ।”

⁵ तांहांअ ईसुंय तीयाहांन जोवाब देदो, “केडों बी तुमनेंह ठोगी नांय जाय तीयाअ कालजी राखजा! ⁶ खुब लोक आवीन आखीअ का तीयाहांन मांयुंज मोकल्याह।तीयाहांमेर्योअ दोरेक आखीअ, ‘आंयज ख्रीस्त हाय।’ एंहकींअ ते खुब मांहांहांन ठोगीअ। ⁷ जांहांअ बी तुमां पाही वेअनार्या लोळायाहांअ बाबोताम का सेटे वेअनार्या लोळायाहांअ बाबोताम उनाया तांहांअ कीदराय मां जाता। ईं बादों ता बोंणांअज जोजे। पेन तांहांअ एंहकींअ मां धारता का दुन्याअ ओंत अवीज गीयोह। ⁸ एक जातीअ लोक बीहरा जातीअ लोकाहांअरी लोळीअ आने एक देसाअ लोक बीहरा देसाअ लोकाहांअरी लोळीअ। खुब जागे तोरतीकोंप वीअ आने काल पोळीअ। तें दुखें पोयराल जोन्मो देनारी बायाल पेअलांअ वेनारा दुखाहांअ होच वीअ।

⁹ तांहांअ लोक तुमनेंह काय बी केअ तों वेठांअ तीयारुज रेजा! काहाका, तुमां मांअपेअ वीसवास केअताह तीयाअ लीदे ते तुमनेंह तीईन येहुदी धोर्माअ पोंचाअ आगलांअ तुमाहांपेअ केस चालवीअ, आने येहुदीहींअ भोकती मोंडोळाअ पोंगाहांम ओमुक लोक तुमनेंह ठोकीअ, आने राजपालाहांअ आने राजाहांअ आगलांअ लोक तुमाहांपेअ केस चालवीअ। तीयाअ पोरीणामे, तुमां तीयाहांन मांअ बाबोताम साक्सी दी सेकाह। ¹⁰ पोरमेहेर सोताअ बादी योज्ना पुरी केअ तीयाअ पेअलांअ, बादी जातीअ लोकाहांम मांअ बाबोतीअ हारी गोठ जाहेर वेरांअ जोजे! ¹¹ तुमनेंह साज्याअ चुकादो दांअ खातुर लोक तुमनेंह कोरोटाम तीअ लीअ जाय तांहांअ तुमांअ काय आखुलोंअ तीयाअ बाबोताम पेअलांअनेअ चींता मां राखता! पेन तीयु वोखत पोरमेहेर तुमनेंह जों आखावे तोंज आखजा! काहाका, तीयु वोखत गोगनारा तुमां नांय वीअहा, पेन तुमांअ मुंयें गोगनारो ता पोवीतोर आत्माज वीअ। ¹² तीयु वोखत मांअपेअ वीसवास नांय केअनारा लोक मांअपेअ वीसवास केअनारा तीयाहांअ पावुह-बोंअयांहांन तेरावीन माय टाकावीअ, याहकी-बाहको सोताअ पोयराहांन तेरावी दीअ आने पोयरें सोताअ याहकी-बाहकान तेरावीन तीयाहांन माय टाकावीअ। ¹³ तुमां मांअपेअ वीसवास केअताह तीयाअ लीदे खुब भागाअ लोक तुमनेंह नोफरोत कीअ। पेन सेवोट लोगुंअ मांअपेअ वीसवास राखनाराहांन पोरमेहेर वाचावीअ।

आवनारों हाय तों खुब दुख

(माथी २४:१५-२८; लुक २१:२०-२४)

¹⁴ “फुंअची कीअ आवे एंहडी आने मोंदीराल उजाळ बोंणावी देनारी वोस्ताल मोंदीराम जीयु जागे ते नांय वेरांअ जोजे तीयु जागे उबी रेहली तुमां हेरा तांहांअ (वाचनारों ईयाअ ओर्थो होमजे!), येहुदीया जील्लाम वेनारा लोकाहांअ डोगाहांम नाही जांअ जोजे! ¹⁵ सोताअ पोंगाअ धाबापेअ वेनारा मांहांअ एठा उतांअ का काय बी लांअ पोंगाअ माज जांअ नांय जोजे! ¹⁶ खेताम वेनारा मांहांअ पोतळों लांअ सोताअ कोअ फाचों वोलांअ नांय जोजे! ¹⁷ तीया सोमोयाम जे बाया बेन-जीवाअ वीअ तीयुहुंअ बाबोताम आने जे बाया आडुंण्या पोयरावाल्या वीअ तीयुहुंअ बाबोताम वीचारता मांन खुब दुख वेअहे। ¹⁸ पोरमेहेराल एंहडी ओरुज केरा का, तें दुखें हीयालाम नांय पोळे। ¹⁹ काहाका, तीया दीहाहांम एंहडें दुखें पोळीअ का तेंहडें दुखें पोरमेहेरांय जुग-तोरती होरजुअली तीयु वोखतनेअ आमी लोगुंअ कीदीह बी नांह पोळ्यें, आने फाचें कीदीह बी नांय पोळे। ²⁰ मालीख तीया दुखाहांअ दीह ओसा नांय केअतो ता, बादें मांहेंअ मोय जातें। पेन तीयांय पोसोंद केअला लोकाहांअ लीदे तीयांय ते दीह ओसा केअयाह।

²¹ “तीयु वोखत जो केडों तुमनेंह एंहकींअ आखे का, ‘हेरा, ख्रीस्त ईंहीं हाय!’ का ‘हेरा, तो तींहीं हाय!’ ता, ते गोठ मां मानता! ²² सोताल खोटी रीते ख्रीस्त आखावनारा आने सोताल पोरमेहेराअ गोठ जाहेर केअनारा एंहकींअ खोटी रीते आखावनारा पेदा वीअ। आने बोंणी सेके ता, ते पोरमेहेरांय पोसोंत केअला लोकाहांन बी ठोगांअ खातुर खुब जातीअ चोमोत्कार कीअ देखावीअ। ²³ तीयाअ लीदे, खोबुरदार रेजा। मांयुं ईं बादों तुमनेंह पेअलांअज आखी देदोंह।

मांहांअ पोयराअ फाचों आवुलोंअ दीह

(माथी २४:२९-३१; लुक २१:२५-२८)

²⁴ “मांहेंअ एंहकींअ दुखें वेठीअ हातींअ, दीह कालो पोळी जाय, चांद जोनी नांय दीअ, ²⁵ जुगामेनेअ तारा टुटी पोळीअ, आने जुगामेरीअ बीहरी बादी वोस्तु आलवी टाकाय। ²⁶ तांहांअ मांहांअ पोयराल, मोंजे मांन मांहेंअ ताकोतावालो आने मोडायावालो बोंणीन वादलाहांम आवतो देखीअ। ²⁷ हातींअ आंय तोरतीअ एक खुणा नेअ बीहरा खुणा लोगुंअ रेनारा पोरमेहेरांय पोसोंद केअला लोकाहांन टोलवांअ खातुर मांअ दुताहांन मोकलेंह।

ओंजीराअ चाळापेनेअ हीका!

(माथी २४:३२-३५; लुक २१:२९-३३)

²⁸ “आमी ओंजीराअ चाळापेनेअ कायक हीका! जांहांअ तीयाहांअ डालख्या कोवल्या वीईन तीयाहांअ पानें फुटांअ टेकतेंह, तांहांअ तुमां जांय जाताह का उनालो पाही हाय। ²⁹ तेंहकींअज कीईन, मांयुं आमी जों आख्यों तों बादों बोंणता हेरा तांहांअ तुमां जांय जाहा का मांअ फाचों आवुलोंअ वोखत एकदोम पाहीज हाय। तों जाणेका आंय एगुहवार्योअ बांअणाअहीं लोगुंअ आवीज पोच्योह एंहडों वीअ। ³⁰ आंय तुमनेंह नोक्कीज आखुंह: ए बादा बोनाव बोंणे तांव लोगुंअ ईया पीळीअ लोक मोअनारा नांह। ³¹ जुग आने तोरती जातें रीअ, पेन मांअ गोठ्या कीदीह बी खोट्या नांय पोळे।

ख्रीस्त फाचो आवीअ तो दीह का सोमोय केडों बी नांह जांअतों

(माथी २४:३६-४४)

³² पेन आंय फाचो केल्लो दीह का सोमोय आवेंह तो केडों बी नांह जांअतों। होरगामेर्याअ दुत बी नांह जांअता, पोयरो आंय बी नांह जांअतो, पेन पोरमेहेर बाहको एखलोज जांअहे। ³³ तीयाअ लीदे, तुमां पुरी तीयारीम रेजा! काहाका, ए बादा बोनाव बोंणीअ तो सोमोय केल्लो दीह आवीअ तों तुमां नांह जांअता। ³⁴ मांअ फाचों आवुलोंअ दीह, सेटरीअ जागे जानारा एक मांहांअ होच हाय। कोअनेअ नींगे तांहांअ, तों तीयाअ चाकोराहांन कोअ चालवांअ आखेह, दोरेक चाकोराल तीयाअ काय-काय केरुलोंअ तों आखेह, हातींअ तों चोकीदाराल तीयाअ फाचे आवांअ वाट जोवीन तीयारीम रांअ हुकोम केअहे। ³⁵ तीयाअ लीदे, तीया चोकीदाराअ तीयारीमुज रांअ जोजे। काहाका, तीयाअ मालीख फाचो वाअतीवेल आवे, का पोरा-पोर रातींअ आवे, का कुकळा वाहताअरी आवे, नेता उजालों वेअता आवे, तों तो नांह जांअतो। तेंहकींअज कीईन, आंय फाचो केंहडीवेल आवेंह तों तुमां नांह जांअता तीयाअ लीदे तुमांअ बी तीयारीमुज रांअ जोजे। ³⁶ नेता आंय ओचानोक आवुं तांहांअ आंय तुमनेंह तीयारी वोगुराअ हेअहुं। ³⁷ ए गोठ्या जे आंय तुमनेंह आखुंह ते, आंय बीहरा बादाहांन बी आखुंह: तीयारीम रेजा!”