12
दाराख्साअ वाळीअ खेळुताहांअ दाखलो
(माथी २१:३३-४६; लुक २०:९-१९)
1 हातींअ ईसु येहुदी आगेवानाहांअरी दाखलाहांकींअ गोगो टेक्यो। तीयांय आख्यों, “एक मांअहांय दाराख्साअ वाळी बोंणावी, तीयुअ चारु वेल ढोगळाहांअ दीवाल बांदी, दाराखसाहांन सुंदीन काडलो रोह टोलवांअ खातुर ढोगळाअ कुंडी बोंणावी, आने हाचवुअनारो बोहीन वाळील हाचवी सेके तीयाअ खातुर एक मालो बी बांदयो। हातींअ वाळीअ देखरेख राखांअ खातुर तीयांय थोळाक मांहांहांअरी गोठवोणी केअयी। दाराखसें पाके तांहांअ, तीयाअ ओमुक भाग वाळीअ मालीखाल देवुलोंअ एंहकींअ नोक्की वीयों। हातींअ तों मांहुंअ एक सेटरीअ जागे गीयों। 2 दाराखसें बेळांअ सीजोन आली तांहांअ, वाळीअ मालीखांय वाळीअ देखरेख राखनारा मांहांहांपेनेअ दाराखसाहांअ सोताअ भाग लांअ एक चाकोराल तीयाहांअहीं मोकल्यो। 3 पेन तो चाकोर तीयाहांअहीं गीयो तांहांअ, तीयाहां तीयाल तीईन मार ठोक्यो आने एक बी दाराखसों देया वोगुर तीयाल फाचो मोकली देदो। 4 थोळाक वोखत हातींअ, वाळीअ मालीखांय बीहरा चाकोराल तीयाहांअहीं मोकल्यो। पेन तीयाहां तीयाल मुनकाम देदो आने तीयाअ ओपमान कीईन तीयाल मोकली देदो। 5 थोळाक वोखत हातींअ, तीया मालीखांय बीहरा एक चाकोराल तीयाहांअहीं मोकल्यो। तीयाल तीयाहां माय टाक्यो। एंहकींअ कीईन, वाळीअ मालीखांय मोकलुअला बीहरा खुब चाकोराहांअरी ते खाराब रीते वोरत्या। थोळाकाहांन तीयाहां ठोकया आने थोळाकाहांन माय टाक्या। 6 आमी, तीया मालीखापेअ आजी एक जांअ आथो। मोंजे तीयाअ खुब मेरालो पोयरो आथो। सेल्ले तीयांय सोताअ पोयरालुज तीयाहांअहीं मोकल्यो। तीयांय वीचार्यों का तें मांहेंअ तीयाअ पोयराअ मान राखीअ। 7 पेन वाळीअ देखरेख राखनारा तीया मांहांहां एक-बीहराल आख्यों, ‘हेरा! वाळीअ वारोसदार ईंहीं आवेह! चाला, आपुंह तीयाल माय टाकजी! तांहांअ ए दाराख्साअ वाळी आपुअ वीअ जाय!’ 8 एंहकींअ आखीन तीयाहां तीयाल तीईन माय टाक्यो आने तीयाअ मुरदों दाराख्साअ वाळीअ बारे फेकी देदों।
9 तांहांअ दाराख्साअ वाळीअ मालीख काय कीअ? तो आवीन वाळीअ देखरेख राखनाराहांन माय टाकीअ आने दाराख्साअ वाळी बीहरा मांहांहांन होपी दीअ। 10
‘बोंगलो बांदनाराहां जीया ढोगळाल नोक्कामो गोंअलो,
तोज ढोगळो बोंगलाल मोजबुत राखनारो ढोगळो बोंण्योह।
11 ईं काम मालीखांयज केअयोंह,
आने तों आपुअ नोजराम नोवायाअ हाय!’ एंहकींअ पोवीतोर लेखाणाम जों लेखलों हाय तों तुमां नांह वाच्यों का?”
12 तांहांअ ते येहुदी आगेवान होमज्या का, ईसुंय तो दाखलो तीयाहांपेअज गुनो थोवता आखलो। तीयाअ लीदे, ते तीयाल तेरांअ मागत्ला। पेन ते लोकाहांअ टोलाल बीहला। तीयाअ लीदे, तीयाल सोळीन ते तींहींनेअ जाता रीया।
वेरो पोरांअ बाबोताम
(माथी २२:१५-२२; लुक २०:२०-२६)
13 तीया आगेवानाहीं थोळाक फोरीसीहींन आने हेरोद राजाल टेको देनारा थोळाकाहांन ईसुअहीं मोकल्या। ईसु कांवींह खोटों आखे ता तीयाल तेरावांअज तीया आगेवानाहांअ ईरादो आथो। 14 तीयाहां ईसुअहीं आवीन तीयाल आख्यों, “गुरुजी, आमां जांअताह का तुं खेरोंज हीकवोह आने मांहेंअ तोअ बाबोताम कांवींह आखीअ तीयाअ तुं पारवाअ नांह केअतो। काहाका, तुं केडाअ बी होद्दाअ पारवाअ नांह केअतो। पेन पोरमेहेर आपाहांपेअ जों केरावांअ मागेह तों तुं हाची रीतेज हीकवोह। तांहांअ आमनेंह आखेअ: रोम सारकाराल वेरा पोअजी तों बोराबोर हाय का नांह? ते वेरा आपुअ पोरांअ जोजे का नांय?” 15 पेन ईसु जांय गीयो का पोरमेहेर तीयाहांपेअ जों केरावांअ मागेह तों जांणांअ ते खोरेखोर नांह मागता। तीयाअ लीदे तीयांय तीयाहांन आख्यों, “सारकाराअ ओमोलदार मांन तीअ जाय एंहडों मांन कांवींह खोटों आखावांअ तुमां काहा मागताह?सारकारी चोलोणाअ चांदीअ सीक्को लावीन मांन देखावा!” 16 तांहांअ ते चांदीअ एक सीक्को लाला। ईसुंय तीयाहांन फुच्यों, “ईयापेअ साप आने नांव केडाअ सापलों हाय?” तांहांअ तीयाहां तीयाल जोवाब देदो, “बादसाअ साप आने नांव तीयापेअ सापलों हाय।” 17 तांहांअ ईसुंय तीयाहांन आख्यों, “जों बादसाअ लागे तों बादसाल दा, आने जों पोरमेहेराअ लागे तों पोरमेहेराल दा।” ईसुअ जोवाब उनायन ते ता कांहवांयज रीया।
मोअलें मांहेंअ फाचें जीवतें वीअ तीया बाबोताम
(माथी २२:२३-३३; लुक २०:२७-४०)
18 सादुकी पोंथाअ लोक आखताह का मोअलें मांहेंअ फाचें जीवतें नांय उठीअ। तींयहांमेर्याअ थोळाकाहीं ईसुअहीं आवीन तीयाल फुच्यों, 19 “गुरुजी, मोसेंय आपुअ खातुर नीयोम लेखी देदोह का, ‘जो एक आदमी वोराळ कीईन पोयरा वोगुर मोय जाय ता, तीयाअ थेअयुल तीयाअ पावुह राखे! तीयाहांअ पोयरें वीअ ता, तें मोअनाराअ पोयरें गोंणाय। एंहकींअ कीईन तीया मोअनाराअ वोसुलो चालु रीअ।’ 20 आमी एक कोअमें सांत पावुह आथा। मोडांम-मोडा पावुंह वोराळ केअयों, पेन तो पोयराहांअ वोगुर मोय गीयो। 21 तांहांअ बीहरा पावुंह तीयु बायुल राखी आने तो बी पोयराहांअ वोगुर मोय गीयो। तांहांअ तीजा पावुंह तीयु बायुल राखी, पेन तो बी पोयराहांअ वोगुर मोय गीयो। 22 एंहकींअ कीईन तीया सांतु पावुहुं तीयु बायुल राखी, पेन ते बादा पोयराहांअ वोगुर मोय गीया। आखरीप ते बाय बी मोय गीयी। 23 तांहांअ मोअलें मांहेंअ फाचें जीवतें वीअ तीदीह ते बाय केल्ला पावुअ कोअवाली बोंणीअ? काहाका, तीयुल ता सांतु पावुहुं राखली!”
24 तांहांअ ईसुंय तीयाहांन जोवाब देदो, “तुमनेंह खोबुर नांह का तुमांअ आखुलोंअ खोटों हाय? काहाका, मोअलें मांहेंअ जीवतें वीअ ईयु बाबोताम पोवीतोर लेखाणाहांम जों लेखलों हाय तों तुमां नांह जांअता आने मोअला मांहांहांन फाचें जीवतें केरांअ पोरमेहेर ताकोतावालो हाय तों बी तुमां नांह होमजुअता।a 25 मोअलें मांहेंअ फाचें जीवतें उठीअ तांहांअ, आदमी कोअवाली नांय राखीअ आने बाय कोअवालो नांय राखीअ। पेन उलटों, तें होरगामेर्याअ दुताहांअ होच वीअ। 26 पेन मोअलें मांहेंअ फाचें जीवतें उठीअ तीया बाबोताम मोसेंय लेखली चोपळीम जों लेखलों हाय तों तुमां नांह वाच्यों का? जांहांअ मोसे उजाळाम एक सीलगुअता चेखराल हेअत्लो तांहांअ, पोरमेहेरांय तीयाल आख्यों, ‘आंय आबराहाम, ईसाक, आने याकोब भोक्ती केअताह तो पोरमेहेर हाय’।b 27 एंहडों नांह का मोअला लोक पोरमेहेराअ भोकती केअताह। पेन एंहडों हाय का जीवता लोकुज तीयाअ भोक्ती केअताह। तीयाअ लीदे, जांय लेजा का ‘मोअलें मांहेंअ फाचें जीवतें नांय उठीअ’ एंहकींअ तुमांअ आखुलोंअ पुरी रीते खोटों हाय।”
पेअलांम पेअलोअ हुकोम
(माथी २२:३४-४०; लुक १०:२५-२८)
28 येहुदी नीयोम हीकवुअनारो एक जांअ तींहीं आथो। ईसु आने सादुकी लोक जे चारचा केअत्ला ते तो उनाअत्लो। ईसुंय तीयाहांन खेरो जोवाब देदोह तों तीयांय जांअयों। तीयाअ लीदे, तीयांय आगलांअ चाली आवीन ईसुल फुच्यों, “पोरमेहेराअ हुकोमाहांमेनेअ एकदोम खास हुकोम केल्लो हाय?”
29 तांहांअ ईसुंय तीयाल जोवाब देदो, “एकदोम खास हुकोम ओ हाय: ‘ओ ईसरायेल लोकाहीं, उनाया।c मालीख आपुअ पोरमेहेर एखलोज मालीख हाय। 30 मालीख तुमांअ पोरमेहेरापेअ तुमांअ बादी मोरजीहींकींअ आने तुमांअ बादी लागणीहींकींअ आने तुमांअ बादा वीचाराहांकींअ आने तुमांअ बादा कामाहांकींअ माया राखा।’d 31 बीहरो एकदोम खास हुकोम ओ हाय: ‘तुमां सोतापेअ जेंहकींअ माया राखताह, तेंहकींअ बीहराहांपेअ बी माया राखा!’e ईया बेन हुकोमाहांअ केअता बीहरो केल्लो बी हुकोम एकदोम खास नांह।”
32 तांहांअ येहुदी नीयोम हीकवुअनारांय ईसुल आख्यों, “गुरुजी, ‘एखलो तोज पोरमेहेर हाय आने बीहरो पोरमेहेर हायज नांह’, 33 आने ‘तीयापेअ बादी मोरजीहींकींअ आने बादी ओकलीहींकींअ आने बादा कामाहांकींअ माया राखुलोंअ’, आने ‘जेंहकींअ सोतापेअ तेंहकींअ बीहराहांपेअ बी माया राखुलोंअ’ एंहकींअ तुंयुं खेरोंज आख्योंह। ए हुकोम पालुलोंअ तों आगीम बालीन चोळवुअला जोनावोराहांअ भोगाहांअ केअता आने बीहरा भोगाहांअ केअता बी चोळीयातों हाय।”
34 तीया मांहांय ओकलीवालो जोवाब देदोह एंहकींअ होमज्यो तांहांअ ईसुंय तीयाल आख्यों, “तुं पोरमेहेराल तोअ जीवोनाम माहरीज राज केरांअ दीहो।”f तीयाअ हातींअ ईसुल काय बी सावाल फुचांअ केडाअ बी हींमोत नांय चाली।
दावीद राजाअ वोसुलामेर्याअ ख्रीस्ताअ बाबोताम खुलासो
(माथी २२:४१-४६; लुक २०:४१-४४)
35 हातींअ ईसु मोंदीराम बोद देहलो तांहांअ तीयांय लोकाहांन फुच्यों, “येहुदी नीयोम हीकवुअनारा केंहकींअ आखी सेकताह का, ख्रीस्त ता खाली दावीदाअ वोसुलामेर्योअ हाय? 36 पोवीतोर आत्मा दोरवोणीकींअ दावीदांय सोतेज आख्योंह,
‘मालीख पोरमेहेरांय मांअ मालीखाल आख्यों,
जांव लोगुंअ आंय तोअ दुसमोनाहांन पुरी रीते नांय हारवुं,
तांव लोगुंअ मांअ हुदी वेल बोह।’ 37 दावीद सोतेज ख्रीस्ताल ‘मांअ मालीख’ एंहकींअ आखेह। तांहांअ ख्रीस्त केंहकींअ खाली दावीदाअ वोसुलामेर्योंअ वीअ सेके?” लोकाहांअ मोडो टोलो ईसुअ ए बादया गोठ्या खुस वीईन उनाअत्लो।
येहुदी नीयोम हीकवुअनाराहांअ आने फोरीसीहींअ बाबोताम चेतवोंणी
(माथी २३:१-३६; लुक २०:४५-४७)
38 लोकाहांन हीकवुअता ईसुंय आख्यों, “येहुदी नीयोम हीकवुअनाराहांअ होच तुमां नांय वोरता तीयाअ कालजी राखजा! मोडा-मोडा झोब्बा पोवीन फीरांअ, आने बाजाराहांम लोक तीयाहांन मान दीईन सालाम केअ तों, 39 आने येहुदीहींअ भोकती मोंडोळाअ पोंगाहांम एकदोम खास सीटाहांपेअ बोंहांअ, आने जेवोंणाहांम मानावाली सीटाहांपेअ बोंहांअ तीयाहांन गोंवेंह। 40 ते रोंडेअ बायाहांन ठोगीन तीयुहुंअ मीलकोत्याg पाळावी लेताह, आने सोताल हारा देखावांअ खातुर ते पोरमेहेराल लांब्या-लांब्या ओरुजया केअताह। तीयाहांन पोरमेहेरापेनेअ नोक्कीज कोळोक सीक्सा मीलीअ!”
रोंडेअ बायाअ ना जेंहडों दान
(लुक २१:१-४)
41 हातींअ ईसु मोंदीराम मांहेंअ पोरमेहेराल दांअ खातुर पोयसा टाकत्लें तीयु पेटीहींअ हुंबुर बोहीन मांहेंअ पेटीम पोयसा टाकत्लें तों तो हेअयाज केअत्लो। खुब मालदार मांहेंअ पेटीहींम खुब पोयसा टाकत्लें। 42 हातींअ एक गोरीब रोंडेअ बाय तींहीं आली आने पेटीम तीयुंय बेन होवायाh टाक्या। तीयाहांअ कींमोत एकदोम ओसी आथी। 43 तांहांअ ईसुंय सोताअ चेलाहांन तीयाअ सोमकींअ टोलव्या आने तीयाहांन आख्यों, “आंय तुमनेंह नोक्कीज आखुंह: ईयु गोरीब रोंडेअ बायुंय पेटीहींम पोयसा टाकनारा बीहरा बादा लोकाहांअ केअता वादारे पोयसा टाक्याह। 44 काहाका, तीया बीहरा लोकाहीं ता तीयाहांपेअ जे खुब पोयसा आथा तींहमेंनेअज टाक्याह। पेन ईयु एकदोम गोरीब बायुंय ता, खावुलोंअ लांअ खातुर तीयुपेअ जे पोयसा आथा ते बादा टाकी देदाह।”