11
ईसु येरुसालेम सेहेराम आवेह
(माथी २१:१-११; लुक १९:२८-४०; योहान १२:१२-१९)
1 ईसु ने तीयाअ चेला येरुसालेमाअ पाही आला तांहांअ ते जेतुन डोगीअ पाही बेथफागे आने बेथानी गांवांहांम आवी पोच्या। तींहींनेअ ईसुंय तीयाअ चेलाहांमेर्याअ बेन चेलाहांन मोकल्या 2 आने तीयाहांन आख्यों, “आगलार्याअ गांवांम जा। गांवांम वीहताज तुमनेंह एक फुरक्यों बांदलों मीलीअ का जीयापेअ केडों कीदीह बी नांह बोठों। तीयाल सोळीन मांअहीं लीअ आवा। 3 जो एगोंह तुमनेंह फुचे का, ‘तुमां तीयाल काहाल सोळी लीअ जाताह?’, ता तीयाल आखजा का, मालीखाल तीयाअ जोरुल हाय। तो तीयाल तुरुतुज ईंहीं फाचों मोकलावी दीअ।”
4 मोंजे ते गीया आने तीयाहां हेरीअ बाजुम एक पोंगाअ बांअणाअरी बांदलों फुरक्याल देख्यों। ते तीयाल सोळत्ला 5 तांहांअ तींहींर्याअ थोळाक लोकाहीं तीयाहांन फुच्यों, “तुमां फुरक्याल काहाल सोळताह?” 6 तीया चेलाहां तीयाहांन ईसुंय जों आखलों तों तीया लोकाहांन आख्यों। मोंजे तीया लोकाहीं तीयाहांन फुरक्यों लीअ जांअ देदों। 7 तीयाहां फुरक्याल ईसुअहीं लावीन तीयापेअ सोताअ पोतळें टाक्यें आने ईसु तीयापेअ बोहीन चाल्यो। 8 खुब लोकाहीं वाटीपेअ सोताअ पोतळें फात्यें; बीहराहां खेताहांमेनेअ डालख्या वाडी लावीन वाटीपेअ फात्या। 9 ईसुअ आगलांअ आने फाचलांअ चालनारा लोक बोंबलीन आखत्ला, “होसान्ना! मालीखाअ तोरफयाअ आवनाराल पोरमेहेर आसीरवाद दे! 10 आपुअ आगलाअ डाया दावीदाअ आवनारा राज्याल पोरमेहेर आसीरवाद दे! उचाम-उचा होरगामेर्याअ पोरमेहेर, होसान्ना!”
11 ईसु येरुसालेम सेहेराम वीठो आने मोंदीराम गीयो। तींहीं चारु वेलीअ बादी वोस्ताहांपेअ नोजुर टाकीन सेहेरामेनेअ नींग्यो। काहाका, वाअतों पोळी गेहलों। तो तीयाअ बारा चेलाहांअरी बेथानी गांव गीयो।
ईसु ओंजीराअ चाळाल हाराप देहे
(माथी २१:१८-१९)
12 बीहरे दीह ईसु आने तीयाअ चेला बेथानी गांवांमेनेअ नींगत्ला तांहांअ, ईसुल पुख लागी। 13 थोळेक सेटे तीयांय ओंजीराअ एक चाळ पानाहांअरी देख्यों। तीयाअ लीदे, सोताल तीया चाळापेअ ओंजीरें झुळीअ का नांह तों हेरांअ ईसु तीयाअ पाही गीयो। पेन तीयांय पाही जायन हेअयों ता, चाळापेअ पानाहांअ सीवाय काय बी नांय आथों। काहाका, ते ओजीराहांअ सीजोन नांय आथी। 14 ईसुंय तीया चाळाल आख्यों, “आमीनेअ केडों बी फाचों कीदीह बी तोअपेनेअ फोल नांय खाय!” ईसुअ ए गोठ चेला उनाअया।
मोंदीराम वेपार केअनाराहांन ईसु ओळी काडेह
(माथी २१:१२-१७; लुक १९:४५-४८; योहान २:१३-२२)
15 ईसु आने तीयाअ चेला फाचा येरुसालेम गीया। ईसु मोंदीराम गीयो। तींहीं तो भोगाहांअ खातुर जोनावरें वेचनाराहांन आने तें वेचाअतें लेनाराहांन मोंदीरामेनेअ ओळी काडांअ टेक्यो। आने तीयांय पोयसा बोदली देनाराहांअ टेबोलें बी उबडु वाली देदें आने कोबुतोरें वेचनाराहांअ खुरस्या बी उबडावी देदया। 16 आने तीयांय केडाल बी काय बी मोंदीराम रीईन लीअ जांअ नांय देदों। 17 हातींअ तीयांय तीया लोकाहांन हीकवुअता आख्यों, “पोवीतोर लेखाणाहांम एंहकींअ लेखलों हाय, ‘मांअ कोअ बादी जातीअ लोकाहांअ खातुर मांन ओरुज केरांअ कोअ आखाय’। पेन तुमां ता तीयाल लुटाराहांअ दोबांअ जागो बोंणावी देदोह!” 18 ईसुंय मोंदीराम जों केअलों तीया बाबोताम मोडा पुंजारा आने नीयोम हीकवुअनारा उनाअया तांहांअ ते तीयाल माय टाकांअ तोक होदांअ टेक्या। पेन लोकाहांअ टोलो तीयाअ बोदाअ लीदे बोगलाय गीयोह तीयाअ लीदे तीयाहांन तीयाअ बीख आथी। 19 वाअतों पोळ्यों तांहांअ, ईसु आने तीयाअ चेला येरुसालेमेनेअ नींगी गीया।
हुकाय गेहला ओंजीराअ चाळापेनेअ हीकामोण
(माथी २१:२०-२२)
20 बीहरे दीह वेगीअ ईसु आने तीयाअ चेला येरुसालेमाअ वाटे जाहला तांहांअ चेलाहां देख्यों का, तों ओंजीराअ चाळ एकदोम हुकाय गेहलों। 21 तांहांअ ईसुंय तीया चाळाल जों आखलों तों ईत कीईन पीतोरांय तीयाल आख्यों, “गुरुजी, हेअ! तुंयुं हाराप देदलो तों ओंजीराअ चाळ हुकाय गीयोंह!”
22 तांहांअ ईसुंय तीयाहांन जोवाब देता आख्यों, “तुमां पोरमेहेरापेअ जों केरांअ कालावाला कीअहा तों पोरमेहेर कीअ एंहडो वीसवास राखा।a 23 आंय तुमनेंह नोक्कीज आखुंह: तुमां ईया डोगाअल आखी सेकाह, ‘ईंहींनेअ उपटायन तालावाम पोळ!’, आने तेंहकींअ वीअ एंहडो जो तुमां सोंका राख्या वोगोर वीसवास राखाह ता, पोरमेहेर तुमांअ खातुर तेंहकींअ कीअ। 24 तीयाअ लीदे आंय तुमनेंह आखुंह, पोरमेहेराल ओरुज केअता तुमां तीयापेअ कांवींह मागा तांहांअ तों तुमनेंह मीली गीयोंह एंहडो वीसवास राखा, आने तों तुमनेंह मीलीअ। 25 जांहांअ बी तुमां पोरमेहेराल ओरुज केरा तांहांअ, केडांय बी तुमांअ खोटों केअयों वीअ तीयाअ लीदे तीयापेअ तुमनेंह रोग वीअ ता, तीयाल माफ केरा! तांहांअ होरगामेर्योअ तुमांअ बाहको बी तुमांअ पाप माफ कीअ। 26 ((पेन जो तुमां माफ नांय केरा ता, होरगामेर्योअ तुमांअ बाहको बी तुमांअ पाप माफ नांय केअ।”))
येहुदी वोळील ईसुल तीयाअ आदीकाराअ बाबोताम सोवाल फुचताह
(माथी २१:२३-२७; लुक २०:१-८)
27 ईसु आने तीयाअ चेला फाचा येरुसालेमाअ मोंदीराम आला। ईसु तींहीं फीरत्लो तांहांअ, मोडा पुंजारा, नीयोम हीकवुअनारा, आने वोळील तीयाअहीं आला। 28 तीयाहां तीयाल फुच्यों, “तुंयुं हाकाल ईंहीं केअलों तेंहडें कामें केरांअ तोअपेअ केल्लो आदीकार हाय? केडांय तुल ओ आदीकार देदोह?”
29 तांहांअ ईसुंय तीयाहांन आख्यों, “आंय तुमनेंह एक सावाल फुचेंह। जो तुमां मांन तीयाअ जोवाब दा ता, तें कामें केरांअ मांन केडांय आदीकार देदोह तों आंय तुमनेंह आखेंह। 30 बापतीस्मा केरांअ आदीकार योहानाल पोरमेहेरांय देदलो का लोकाहीं? मांन जोवाब दा!”
31 तांहांअ तीयाहां माजाअ-माज चारचा केअयी। तीयाहां एक-बीहराल आख्यों, “‘पोरमेहेरांय देदलो’ एंहकींअ जो आपुंह आखजी ता, तो आपनेंह फुचीअ, ‘तांहांअ योहान जों आखत्लो तीयापेअ तुमां वीसवास काहा नांह केअयो?’ 32 ‘लोकाहीं देदलो’ एंहकींअ जो आपुंह आखजी ता…?” तेंहकींअ आखांअ तीयाहांन बीख लागी। काहाका, योहान खरेखोर पोरमेहेराअ गोठ जाहेर केअनारो आथो एंहकींअ बादा लोक मानत्ला। 33 तीयाअ लीदे, तीयाहां ईसुल जोवाब देदो, “आमनेंह खोबुर नांह।” तांहांअ ईसुंय तीयाहांन आख्यों, “आंय बी तुमनेंह आखनारो नांह का, केडाअ आदीकाराकींअ आंय तें कामें कीअहुं।”