योहानांय लेखली हारी गोठ
1
हाची जीनगी देनारो
1 पोरमेहेरुअ गुण जाहेर केअनारोa काय बी हायाताम आलों तीयाअ पेअलांअनेअजb हायाताम हाय। तो पोरमेहेराअरी आथो। आने तो सोते पोरमेहेर आथो। 2 काय बी हायाताम आलों तीयाअ पेअलांअनेअजc तो पोरमेहेराअरी आथो। 3 तीयाअ मारफोतेज पोरमेहेरांय बादों होरजाव्यों। खोरेखोर, बादों होरजुअनारो तोज आथो।d 4 बादाल जीवावनारो बी तोज हाय।e आपनेंह लोकाहांन जीवावनारा तीयांय पोरमेहेराअ बाबोताअ हाचाय आपनेंह जाहेर केअयीह।f 5 तो मांहांहांअ खाराब कामाहांन उगाळें पाळेह।g पेन तीया खाराब मांहांहां तीयाल पोरमेहेराअ हाचाय जाहेर केअता कीदीह बी नांह रोक्यो।h
बापतीस्मा केअनारो योहान
6 पोरमेहेरांय एक मांहांअल मोकल्यों। तीयाअ नांव योहान आथों। 7 तो साक्सी तोरीके मोंजे पोरमेहेराअ बाबोताअ हाचाय जाहेर केअनाराअ बाबोताम आखांअ आलो, ईयाअ खातुर का, तीयाअ मारफोते बादा लोक पोरमेहेरुअ बाबोताअ हाचाय जाहेर केअनारापेअ वीसवास केए।i 8 योहान पोरमेहराअ बाबोताअ हाचाय जाहेर केअनारो नांय आथो। पेन पोरमेहेराअ बाबोताअ हाचाय जाहेर केअनाराअ बाबोताम खाली आखनारो आथो।j 9 योहान तेंहकींअ आखत्लो तांहांअ, जो पोरमेहेराअ बाबोताअ हाचाय खोरेखोर जाहेर केअनारो आथो तो दुन्याम आवांअ तीयारीम आथो। पोरमेहेराअ बाबोताअ हाचाय जांणांअ लोकाहांन मोदोत केअनारो तोज आथो।k
10 तो दुन्याम आथो। पोरमेहेरांय तीयाअ मारफोतेज दुन्या होरजावी। तेबी, दुन्याअ लोकाहीं तीयाल नांह ओअख्यो।l 11 तो तीयांय सोताअ बोंणावली दुन्यामुज आलो तेबी, तीयाअ सोताअ येहुदी जातीअ लोकाहांमेनेअ खुब लोकाहीं तीयाल नांय मान्यो। 12 पेन जीयाहां-जीयाहां तीयापेअ वीसवास राखीन तीयाल मान्यो, तीयाहांन पोरमेरुंह सोताअ पोयरें बोंणांअ होक देदो। 13 तीयाहांअ आगलेंअ डायें पोरमेहेराअ आथें तीया कारोणे तें पोरमेहेराअ पोयरें नांह बोंण्यें, का तीयाहांअ याहकी-बाहकाअ सोबोंदुअ कारोणे तें तेंहकींअ नांह बोंण्यें, का केल्ला बी मांहांय मोर्जी राखली तीया कारोणे बी तें तेंहकींअ नांह बोंण्यें। पेन उलटों, पोरमेहेरांय सोतेज एंहडों केअयों का तें तीयाअ पोयरें बोंणे।
14 पोरमेहेराअ गुण जाहेर केअनारोm मांहुंअ बोंण्यो, आने तो आमांअरी रीयो। तो केंहडो गोजोब हाय तों आमां देख्यों। पोरमेहेर बाहकाअ एका-एक पोयरा तोरीके तो एंहडो गोजोब आथो। तो गोजोब आथो काहाका, तो आमांअरी कायोम मेरबानीअ रीते वोरत्यो, आने पोरमेहेराअ बाबोताम तीयांय कायोम आमनेंह खेरोंज आख्यों।
बापतीस्मा केअनारो योहान ईसु ख्रीस्तुअ बाबोताम साक्सी देहे
15 एक दीह योहान ईसुअ बाबोताम लोकाहांन आखत्लो तांहांअ तीयांय ईसुल देख्यो। तांहांअ योहानांय लोकाहांन बोंबलीन आख्यों, “मांयुं तुमनेंह पेअलांअ आखलों, थोळाक वोखत हातींअ एक जांअ आवीअ। तो मांअ केअता मोडो हाय। काहाका, मांअ पेअलांअ बी तो हायाताम आथोज। हेरा, आंय तुमनेंह आखत्लो तो जांअ ओज हाय!”
16 ईसुंय जों केअयोंह तीयाकींअ आपनेंह बादाहांन खुबुज आसीरवाद मील्याह। आने तो फाचो-फाचो आपुअरी मेरबानीअ रीते वोरत्योह।n 17 पोरमेहेरांय मोसेअ मारफोते नीयोम जाहेर केअला। पेन ईसु ख्रीस्तुंह आपुअ खातुर जों केअयोंह तों, तीया नीयोमाहांअ केअता वादारे हारों हाय। तो आपुअरी मेरबानीअ रीते वोरते आने आपनेंह पोरमेहेराअ बाबोताअ हाचाय आखे एंहडों पोरमेहेरांय गोठव्योंह 18 पोरमेहेराल कोय वोखत बी केडांय बी नांह देख्यो। पेन तीयाअ एकना-एक पोयरा ईसुंयज आपनेंह पोरमेहेराअ बाबोताम आख्योंह। पोरमेहेराअरी तीयाअ खास सोबोंद हाय।
बापतीस्मा केअनारो योहान ईसु ख्रीस्तुअ बाबोताम बीहरी वोखत साक्सी देहे
(माथी ३:१-१२; मार्क १:१-८; लुक ३:१-१८)
19 येरुसालेम सेहरुमेर्याअ वोळीलाहीं थोळाक येहुदी पुंजाराहांन आने पुंजाराहांअ मोदोत केअनाराहांन योहानाअहीं तीयाल थोळाक सोवाल फुचांअ मोकल्या। तीयाहां योहानाल फुच्यों, “तुं केडो हाय?” 20 तांहांअ योहानांय तीयाहांन खेरोंज आख्यों आने तीयांय तीयाहांन चोख्खा सोब्दांहम आखी देदों का, “आंय मेसीयाo नांह!” 21 तांहांअ तीयाहां तीयाल फुच्यों, “तांहांअ तुं बीहरो केडो हाय? तुं पोरमेहेराअ गोठ जाहेर केअनारो एलीया हाय का?” तांहांअ योहानांय जोवाब देदो, “आंय तो बी नांह।” तांहांअ तीयाहां तीयाल फाचों फुच्यों, “तांहांअ तुं आवनारो आथो तो पोरमेहेराअ गोठ जाहेर केअनारो हाय का?” तांहांअ योहानांय आख्यों, “आंय तो बी नांह।” 22 तांहांअ तीयाहां तीयाल फुच्यों, “तांहांअ तुं केडो हाय तों आमनेंह आखेअ, ईयाअ खातुर का, आमां फाचा जायन आमनेंह फुचांअ मोकलुअनारांहन आखजी। तुं सोताअ बाबोताम काय आखोह?” 23 तांहांअ योहानांय तीयाहांन जोवाब देदो, “पोरमेहेराअ गोठ जाहेर केअनारा येसायांय भोवीसवाणी केअयीह तीयाअ पोरमाणे,
‘मोडा ओमोलदाराअ आवांअ खातुर जेंहकींअ मांहेंअ वाट तीयार केअतेंह तेंहकींअ
मालीख आवीअ तांहांअ तीयाअ आवकार केरांअ सोताल तीयार केरा!’
ए गोठ ईया उजाळाम रीईन जानारा लोकाहांन जोरपेअ बोंबलीन जाहेर केअनारो आंयज हाय।” 24 योहानाल सावाल फुचनारा लोकाहांमेर्याअ थोळाक ता फोरीसी पोंथाअ लोकाहीं मोकलुअला आथा। 25 तीयाहां योहानाल फुच्यों, “तुं आखोह का, तुं मेसीया नांह, आने पोरमेहेराअ गोठ आखनारो एलीया बी नांह, ने नांह ता तुं आवनारो आथो तो पोरमेहेराअ गोठ जाहेर केअनारो। तांहांअ लोकाहांन बापतीस्माp केरांअ तुल केडांय आदीकार देदोह?” 26 तांहांअ योहानांय जोवाब देदो, “आंय ता ख्रीस्तुल आवकारांअ लोकाहांन तीयार केरांअ खातुर तीयाहांन खाली पांअयांकींअज बापतीस्मा कीअहुं। पेन आमी तुमांअ नीसमें एक जांअ उबो हाय। तीयाल तुमां ओअखुअता नांह। आंय जाहें हातींअ तो तुमनेंह बोद दीअ। 27 तीयाअ सेंडोलुंअ वादर्या सोळांअ बी आंय लायोक नांह।”
28 ईं बादों योरदान खाडीअ दीह उगताअ वेल बेथानी नांवांअ जागे बोंण्यों। तींहींज योहान लोकाहांअ बापतीस्मा केअत्लो।
बापतीस्मा केअनारो योहान ईसु ख्रीस्तुअ बाबोताम तीजी वोखत साक्सी देहे
29 बीहरे दीह, योहानांय ईसुल सोताअ वेल आवता देख्यो। तांहांअ तीयांय लोकाहांन आख्यों, “वेरा! घेटाअ बोचाअ होच भोगुअ खातुर पोरमेहेरांय नीम्योह तो जांअ ओ फेलो!q तो सोताल भोगु तोरीके दीईन दुन्याअ बादा लोकाहांन तीयाहांअ पापाहांअ सीक्सामेनेअ सोळवीअ। 30 ईयाअज बाबोताम मांयुं पेअलांअ तुमनेंह आखलों, ‘थोळाक वोखत हातींअ एक जांअ आवीअ, का जो मांअ केअता मोडो हाय। काहाका, मांअ पेअलांअ बी तो हायाताम आथो।’ 31 मांयुं बी पेअलांअ तीयाल नांह ओअख्यो। आने आंय लोकाहांन पांअयांकींअ बापतीस्मा ईयाअ खातुर केअतो आलोह का, तो केडो हाय तों तुमनेंह ईसरायेल लोकाहांन ओअखावुं।”
32 पोरमेहेरांय ईसुअ बाबोताम तीयाल जों जाणावलों तों योहानांय चोख्खा सोब्दांहम आख्यों, “मांयुं पोवीतोर आत्माल कोबुतोराअ रुपाम जुगामेनेअ उतुअता देख्यो। तो आत्मा ईसुपेअ रीयो। 33 तो ख्रीस्त हाय एंहकींअ आंय सोते बी नांय जांअत्लो। पेन लोकाहांन पांअयांकींअ बापतीस्मा केरांअ खातुर मांन मोकलुअनारा पोरमेहेरांय मांन आखलों, ‘जीयापेअ मांअ आत्माल उतुअतो आने रेतो तुं देखो, तोज जांअ लोकाहांअ मोनाहांम पोवीतोर आत्मा थोवनारो हायr एंहकींअ जांअजे!’ 34 तीयाअ पोरमाणे मांयुं पोवीतोर आत्माल तीयापेअ उतुअतो देख्यो, आने आंय तुमनेंह चोख्खा सोब्दांहम आखुंह, ‘ओज पोरमेहेराअ पोयरो हाय।’”
थोळाक आदमी ईसुअ चेला बोंणताह
35 बीहरे दीह फाचो योहान आमां तीयाअ चेलाहांमेर्याअ बेन जांअहांअरी तीयुज जागे उबी रेहलो। 36 तीयांय ईसुल तींहींनेअ जाता देख्यो तांहांअ तीयांय आख्यों, “वेरा! घेटाअ बोचाअ होच भोगुअ खातुर पोरमेहेरांय नीम्योह तो जांअ ओ फेलो!” * 37 योहानाल तेंहकींअ आखता उनाअया तांहांअ आमां ते बेनुं चेला ईसुअरी गीया। 38 ईसु फाचलांअ फीर्यो आने आमनेंह तीयाअ फाचाळी जाता देखीन तीयांय आमनेंह फुच्यों, “तुमनेंह काय जोजेह रा?” तांहांअ आमां तीयाल आख्यों, “गुरुजी, तुं कांहीं रीहो तों आमनेंह आखेअ!” 39 तांहांअ तीयांय आमनेंह आख्यों, “मांअरी आवा, आने आंय कांहीं रीहुं तों तुमनेंह देखावुंह!”s तीयाअ लीदे, आमां तीयाअरी गीया आने तो कांहीं रेहलो तो जागो हेअयो। आमां तीदीह तीयाअरी रीया। तांहांअ वाअतीवेल लोगभोग चार वाजलें।
40 योहानांय जों आखलों तों उनायन ईसुअरी जानारा आमांहम बेन जांअहांमनेअ एक सीमोन पीतोराअ पावुह आंदरीया आथो। 41 ईसुअहींनेअ नींगीन हातींअ आंदरीयांह पेअलों काम ईं केअयों का, तीयाअ सोताअ पावुह सीमोन पीतोराल मील्यो आने तीयाल आख्यों, “आमनेंह मेसीया मील्योह” (“मेसीया” सोब्दु गीरीक भासाम, “ख्रीस्त” हाय; बेनुं सोब्दांअ ओर्थो: ‘ख्रीस्त’)। 42 हातींअ आंदरीया सीमोनाल ईसुअहीं हादी लालो। ईसु सीमोनाल हीईज रीयो। हातींअ तीयांय तीयाल आख्यों, “तुं योहानाअ पोयरो सीमोन हाय। आंय तोअ नांव ‘पीतोर’t पाळेंह।” तीया सोब्दाअ ओर्थो, ‘खोळकों’ एंहकींअ हाय।
फीलीपुल आने नाथानीयेलुल ईसु तीयाअ चेला बोंणांअ हादेह
43 बीहरे दीह ईसुंय तींहींनेअ गालील जील्लाम जांअ नोक्की केअयों। आने तींहीं तीयाल फीलीप नांवांअ आदमी मील्यो। ईसुंय तीयाल आख्यों, “मांअरी आव!” 44 फीलीप आने आंदरीया आने पीतोर तीनुं बेथसायदा सेहेराअज आथा। 45 हातींअ फीलीपुंह नाथानीयेलुल मीलीन तीयाल आख्यों, “जीयाअ बाबोताम मोसेंय आने पोरमेहेराअ गोठ जाहेर केअनाराहां तो आवीअ एंहडया आगाह्या केअयाह तीयाल आमां मील्याह। तो ता नाझारेथ गांवांअ योसेफाअ पोयरो ईसु हाय।” 46 तांहांअ नाथानीयेलुंह तीयाल जोवाब देदो, “नाझारेथामेनेअ काय हारों पेदा वीअ का?” तांहांअ फीलीपुंह तीयाल आख्यों, “आवीन हेअ!” 47 नाथानीयेलुल सोताअ वेल आवता देखीन ईसुंय नाथानीयेलुअ बाबोताम आख्यों, “ईं आवेह ईं, हारों ईसरायेल मांहुंअ केंहडों वेरांअ जोजे तीयाअ एक नोमुनो हाय! तों केल्ला बी मांहांअल नांह ठोगतों!” 48 तांहांअ नाथानीयेलुंह ईसुल फुच्यों, “आंय केंहडो हाय तों तुं केंहकींअ जांओं?” तांहांअ ईसुंय तीयाल जोवाब देदो, “फीलीपुंह तुल हादयो तीयाअ पेअलांअ तुं ओंजीराअ चाळाअ थुले उबी रेहलो तांहांअ मांयुं तुल देख्यो।” 49 तांहांअ नाथानीयेलुंह जाहेर केअयों का, “गुरुजी,u तुं नोक्कीज पोरमेहेराअ पोयरो हाय! आने ईसरायेल लोकाहांअ राजा बी तुंज हाय।” 50 तांहांअ ईसुंय तीयाल जोवाब देदो, “तुल मांयुं ओंजीराअ चाळाअ थुले देखलो एंहकींअ मांयुं आख्यों तोताअमुज तुं मांअ बाबोताम ते बादया गोठ्या मानी गीयो। पेन तीयाअ केअता वादारे नोवाय लागे एंहडें कामें केअता तुं मांन हीअहो!” 51 हातींअ ईसुंय तीयाल आने तींहींर्याअ बीहराहांन आख्यों, “ए गोठ उनाया! एगु दीह तुमां जुग उगळुअली हीअहा, आने होरगाअ दुताहांन, होरगामेनेअ आलला मांहांपेनेअ, मोंजे मांअपेनेअ चोळता आने मांअपेअ उतुअता हीअहा।”