2
काना गांवांअ वोराळाम ईसु
1 बेन दीह हातींअ, गालील जील्लाअ काना गांवांम वोराळ आथों। ईसुअ याहकी बी तींहीं तीया वोराळाम आथी। 2 ईसुल ने आमनेंह तीयाअ चेलाहांन बी तीया वोराळाम नोतरुअला। 3 वोराळ्याहां बादो दाराख्साअ रोह पीन घोटवी टाक्यो तांहांअ, ईसुअ याहकींह तीयाल आख्यों, “आमी वोराळुवालांहपेअ दाराख्साअ रोह घोटी गीयोह; तीयाअ खातुर तुं कांवींह कीअ सेकोह का?” 4 तांहांअ ईसुंय तीयुल आख्यों, “या, ईयु बाबोताम आपुंह काय कीअ सेकजी? * आंय केडो हाय तों देखावांअ मांअ वोखत आजी नांह आलो।” 5 तांहांअ ईसुअ याहकींह चाकोराहांन आख्यों, “तो तुमनेंह जोंबी केरांअ आखे तों केअजा!” 6 ढोगळाअ बोंणावलें सोव गोलें तीया कोअमे आथें। वोस्ताहांन धार्मीक रीते चोखलावांअ खातुर येहुदी मांहेंअ तीया गोलांहम पांय पोय थोवत्लें। एकेक गोलाम चार से सोव मोण लोगुंअ पांय होमाअत्लों। 7 ईसुंय चाकोराहांन आख्यों, “ईया गोलांहम पांय पोय दा!” तांहांअ तीयाहां तें गोलें पांअयांकींअ आखें पोय देदें। 8 हातींअ ईसुंय तीयाहांन आख्यों, “आमी ईंहमेंनेअ थोळोक रोह काडीन जेवोंणाअ कारभारील दीअ आवा!” तांहांअ तीया चाकोराहां तेंहकींअ केअयों। 9 तीया कारभारींह तों साकी हेअयों। ईसुंय तीयाल दाराख्साअ रोह बोंणावी देदलो। चाकोर तो दाराख्साअ रोह कांहींनेअ लाला तीयाअ तीया कारभारील खोबुर नांय आथी, पेन गोलांहमनेअ तो काडी लावनारा चाकोराहांन ता तीयाअ खोबुर आथी। तो दाराख्साअ रोह खुब हारो आथो। तीयाअ लीदे कारभारींह वोल्लाल हादयो, 10 आने तीयाल आख्यों, “बादें मांहेंअ गोवाराहांन पेअलांअ हारो दाराख्साअ रोह वाटतेंह। आने गोवारें बोराबोर पीये हातींअज तें तीयाहांन राही दाराख्साअ रोह वाटतेंह। पेन तुंयुं ता आमी लोगुंअ हाराम हारो दाराख्साअ रोह थोवी राख्योह!” 11 ईसुंय केअलो ओ पेअलो चोमोत्कार आथो। तीयांय तो गालील जील्लाअ काना गांवांम केअलो। तो चोमोत्कार कीईन तो कोतोअ मोडो हाय तों तीयांय लोकाहांन देखाव्यों। आने तीयाअ चेलाहां तोज खोरेखोर ख्रीस्त हाय एंहडो वीसवास केअयो।
12 ओ बोनाव हातींअ, ईसु, तीयाअ याहकी, तीयाअ पावुह, आने आमां तीयाअ चेला बादें कापेरनाहुम सेहेराम गीयें। तींहीं आमां खुब दीह रीयें।
येरुसालामाअ मोंदीराम ईसु
(माथी २१:१२-१३; मार्क ११:१५-१७; लुक १९:४५-४६)
13 थोळाक दीह हातींअ, येहुदी लोकाहांअ पास्का तेहवार* पाही आथो तांहांअ, ईसु आने आमां तीयाअ चेला येरुसालेम गीया। 14 तींहीं मोंदीराअ चोवठाम ईसुंय थोळाक लोकाहांन टानगें, घेटें, ने कोबुतोरें वेचता देख्या। आने तीयांय रोम सारकाराअ चोलोणाअ सीक्कांअ बोदलाम मोंदीराअ सीक्का बोदली देनाराहांन * बी तीयाहांअ टेबुलुअहीं बोठला देख्या। 15 तांहांअ ईसुंय दोअळांअ चापको बोंणाव्यो, आने तीयाकींअ तीयांय तीया बादा लोकाहांन ने घेटाहांन ने टानगांहन मोंदीराअ चोवठामनेअ बारे ओळी काडयें। आने सीक्का बोदली देनाराहांअ टेबोलें उबडावी टाकीन तीयांय तीयाहांअ बादा सीक्का बी वेरी टाक्या। 16 आने तीयांय कोबुतोरें वेचनारांहन आख्यों, “ईं बादें कोबुतोरें ईंहींनेअ लीईन जाता रा! मांअ पोरमेहेर बाहकाअ मोंदीराल बाजार मां बोंणावता!” 17 तांहांअ आमनेंह तीयाअ चेलाहांन पोवीतोर लेखाणाहांम जों लेखलों हाय तों ईत आलों। तींहमे एंहकींअ लेखलों हाय का, “ओ पोरमेहेर! लोक तोअ मोंदीराल मान दे एंहडी आंय खुबुज मोर्जी राखुंह।” *
18 मोंदीराअ चोवठाम ईसुंय जों केअयों तीयाअ लीदे वोळीलाहीं तीयापेअ मागणी केअयी, “ईं बादें कामें केरांअ तुल आदीकार हाय तों आमनेंह देखावांअ तुं केल्लो चोमोत्कार कीअहो?” 19 तांहांअ ईसुंय तीयाहांन जोवाब देदो, “जो तुमां ईया मोंदीराअ नास कीअहा ता, आंय तों तीनुंज दीहाहांम फाचों बांदी देहें।” 20 तांहांअ तीया वोळीलाहीं तीयाल आख्यों, “ईया मोंदीराल बांदांअ ता सेतालीह वोरसें वीयें! तांहांअ तीनुंज दीहाहांम तों तुं केंहकींअ बांदोह?” 21 पेन ईसु जीया मोंदीराअ बाबोताम आखत्लो तों ता होकीकोतुम तीयाअ सोताअ सोरीलुज आथों। 22 मोंजे तीयांय तीया येहुदी आगेवानाहांन जों आखलों तों, खुब वोरसें हातींअ ईसु मोयन फाचो जीवतो वीयो तांहांअ आमनेंह तीयाअ चेलाहांन ईत आलों। तीयाअ पोरीणामे, ख्रीस्तुअ बाबोताम पोवीतोर लेखाणाहांम जे भोवीसवाणी केअली तीयुपेअ आने ईसुंय जों आखलों तीयापेअ आमनेंह वीसवास बोठो।
लोकाहांअ मोनुंहन पारखुअनारो ईसु
23 पास्का तेहवारुपेअ ईसु येरुसालेमाम आथो तांहांअ, खुब लोक तो ख्रीस्त हाय एंहकींअ मानता वीअ गीया। काहाका, तो जे चोमोत्कार केअत्लो ते तीयाहां देखला। 24 पेन ख्रीस्त तोरीके तीयाअ काय-काय केरांअ जोजे तीया बाबोताम तीयाल आखांअ तीयांय तीयाहांन सुट नांय देदी। काहाका, तीयाहांअ जो वीचार आथो तो तो सोतेज जांअत्लो। 25 बीहरें जों वीचारतेंह तीया बाबोताम तीयाल केडाअ बी आखांअ नांय पोळ्यों। काहाका, तें काय वीचारतेंह ने काय केरांअ मागतेंह तीयाअ तीयाल पेअलांअनेअज खोबुर आथी।