3
ईसु नीकोदेमुअरी गोठ्या केअहे
1 नीकोदेमु नांवांअ एक आदमी आथो। तो येहुदी धोरमाअ पोंचाअ जांअ आथो। आने तो फोरीसी पोंथाअ बी आथो। 2 एक रातीं नीकोदेमुंह ईसुअहीं आवीन तीयाल आख्यों, “गुरुजी, * आमां जांअतेंह का तुं पोरमेहेराअहींनेअ आललो गुरु हाय। आमनेंह खोबुर हाय का, तुं कीअहो एंहडा चोमोत्कार केडो बी जो पोरमेहेर तीयाअरी रे तोज कीअ सेके।” 3 तांहांअ ईसुंय तीयाल जोवाब देदो, “आंय जों आखुंह तों तुं बोराबोर उनाय ले! जांव लोगुंअ केडो बी फाचो जोन्मीन पोरमेहेरापेनेअ नोवों जीवोन नांय मीलवे तांव लोगुंअ, * तो सोताअ जीवोनाम पोरमेहेराअ राज्याअ ओनुभोव कीअ नांह सेकतो।” 4 तांहांअ नीकोदेमुंह तीयाल आख्यों, “केल्लों बी मांहुंअ मोडों वीईन केंहकींअ जोन्मी सेके? तों बीहरी वोखत तीयाअ याहकीअ डेडीम वीहीन फाचों जोन्मीज नांय सेके।” 5 तांहांअ ईसुंय जोवाब देदो, “आंय जों आखुंह तों तुं बोराबोर उनाय ले! कुदरोती रीते जोन्मुलोंअ तोतोंअज पुरतों नांह। पोरमेहेराअ आत्माअ मारफोते आत्मीक रीते जोन्मुलोंअ तों बी मांहांअ खातुर जोरुल्योंअ हाय। जो तों एंहकींअ कीईन नांय जोन्मे ता, तों सोताअ जीवोनाम पोरमेहेराअ राज्याअ ओनुभोव कीअ नांय सेके। * 6 जों याहकी-बाहकाअ सोबोंदुअ पोरीणामे जोन्मेह, तीयाल ता मांहांअ सोबावुज मीलेह। पेन जों पोरमेहेराअ आत्माअ कामुअ पोरीणामे फाचों जोन्मेह तीयाल पोवीतोर आत्माअ सोबाव मीलेह। 7 तुमांअ फाचों जोन्मांअ जोजे एंहकींअ मांयुं तुल आख्यों तीयाअ लीदे तुल नोवाय नांय लागांअ जोजे! 8 दाखला तोरीके, वारों तीयाल फावे तींहीं लागेह। तीयाअ आवाज ओतोअज तुं उनाअहो, पेन तों कांहींनेअ आवेह ने कांहीं जाहे, तों तुं नांह जांअतो। पोवीतोर आत्माअ कामुअ पोरीणामे जोन्मुअनारांहन बादाहांन ए होकीगोत लागु पोळीअ।” 9 तांहांअ नीकोदेमुंह ईसुल जोवाब देदो, “एंहकींअ ता केंहकींअ बोंणी सेके?” 10 तांहांअ ईसुंय तीयाल जोवाब देदो, “तुं ईसरायेल लोकाहांअ नांवांअतो गुरु हाय तेबी ए बाबोत तुं नांह होमजुअतो, मोंजे मांन नोवाय लागेह! 11 आंय तुल जों आखुंह तों तुं बोराबोर उनाय ले! जे वोस्तु मांयुं ने मांअ चेलाहां देख्याह, ते हाच्या हाय तों आमां जांअताह। तीयुहुंअज बाबोताम आमां तुमनेंह आखताह बी। पेन आमां जों आखताह तों खेरों हाय एंहकींअ तुमां नांह मानता। 12 ईयु दुन्याम बोंणनार्या जे बाबोत्या हाय तीयुहुंअ बाबोतामुज मांयुं तुमनेंह जों आख्योंह, तों तुमां नांह मानता। तांहांअ होरगाम बोंणनार्या जे बाबोत्या हाय तीयुहुंअ बाबोताम जो आंय तुमनेंह आखुं ता, तुमां तों नोक्कीज नांय मानाह। 13 होरगाम ता, मांहांअ पोयरो मोंजे आंय ओतोअज गीयोह। बीहरों केडों बी तींहीं नांह गीयों। आने होरगामेनेअ उती आवनारो बी आंय ओतोअज हाय। 14 जेंहकींअ उजाळाम मोसेंय पीतलीअ बोंणावली हापळाअ मुरतील लाकळाअरी बांदीन उचे केअली, तेंहकींअज कीईन, आंय मांहांअ पोयरो हाय तेबी लोक मांन कुरुसापेअ चोळवे तों जोरुल्यों हाय। 15 तांहांअ जेंबी मांअपेअ वीसवास कीअ तें कायोमाअ खातुर जीवीअ।”
16 पोरमेहेरांय दुन्यामेर्याअ लोकाहांपेअ ओतीअ बादी मेर केअयी, तीयांय सोताअ एका-एकुज पोयराल दीअ देदो। ईयाअ पोरीणामे, जेंबी तीयापेअ वीसवास केअ तें पोरमेहेरांअ से कायोमाअ खातुर सुटें नांय पोळे, * पेन उलटों, तें कायोमाअ खातुर जीवे। * 17 दुन्याअ लोकाहांन तीयाहांअ पापाहांअ खातुर सीक्सा केरांअ पोरमेहेरांय तीयाअ पोयराल दुन्याम नांह मोक्ल्यो। पेन उलटों, तीयाहांन तीयाहांअ पापाहांअ सीक्सामेनेअ वाचावांअ तीयांय तीयाल मोकल्यो।
18 जेंबी पोरमेहेराअ पोयरापेअ वीसवास राखतेंह तीयाहांन पोरमेहेर सीक्सा नांय केअ। पेन जेंबी तीयाअ पोयरापेअ वीसवास नांय केअ, तीयाहांन तो जोरुल सीक्सा कीअ। काहाका तीयाहां तीयाअ एका-एकुज पोयरापेअ वीसवास नांह राख्यो। 19 जो उजवोळाअ होच हाय तो दुन्याम आललो। पेन तो लोकाहांन नांह गोंव्यो। तीयाअ बोदले, आंदाराअ होच जो खाराब हाय तोज तीयाहांन गोंव्यो। काहाका, तीयाहांअ कामें खाराब आथें। तीयाअ लीदे, पोरमेहेर तीयाहांअ नीयाय कीअ आने एंहडो चुकादो दीअ का तीयाहांन सीक्सा केरांअ जोजे। 20 जेंबी खोटें कामें केअतेंह, तें उजवोळाअ होच जो हाय तीयाल नोफरोत केअतेंह आने तीयाअहीं नांह आवतें। काहाका, जो तें तीयाअहीं आवे ता तो तीयाहांअ कामें खोटें हाय एंहकींअ जाहेर कीअ आने तीयाहांन ठोपको दीअ। 21 पेन जें पोरमेहेराअ हाचायु पोरमाणे जीवतेंह, तें उजवोळाअ होच जो हाय तीयाअहीं आवतेंह, ईयाअ खातुर का, तीयाहां केअलें कामें तीयाहां पोरमेहेरापेअ आदार राखीनुंज केअयेंह तों, बीहरा लोक चोख्खी रीते हीअ सेके।
बापतीस्मा केअनारो योहान ईसुअ बाबोताम आखेह
22 थोळाक दीह हातींअ, ईसु आने आमां तीयाअ चेला येहुदीया जील्लाम गीया। तींहीं तो आमांअरी रीयो, आने आमां लोकाहांन बापतीस्मा देहला तांहांअ, तो आमनेंह दोरवोणी देहलो। *
23 बापतीस्मा केअनारो योहान बी लोकाहांअ बापतीस्मा केअत्लो। तो सामारीया जील्लामेर्याअ सालीम सेहेराअ पाहल्याअ एनोन नांवांअ जागे लोकाहांन बापतीस्मा केअत्लो। काहाका, तीया भागाम पांअयांअ खुब चोर फुटला। लोक योहानाअहीं आव्याज केअत्ला आने तो तीयाहांअ बापतीस्मा केअत्लो। 24 योहान जेलाम कोंडाअलो तीयाअ पेअलारीअ ए गोठ हाय। 25 एक दीह योहानाअ थोळाक चेला आने ओमुक येहुदी मांहुंअ वोस्ताहांन धार्मीक रीते चोखलावांअ वीदींअ बाबोताम चारचा केरांअ टेक्या। 26 हातींअ तीया चेलाहां योहानाअहीं जायन आख्यों, “गुरुजी, योरदान खाडीअ तीयु तोळी लोकाहांअ तुं बापतीस्मा केअत्लो तांहांअ एक जांअ तोअरी आथोक्ने? तीया बाबोताम तुंयुं बी साक्सी देदलीक्ने? आमी तो बी लोकाहांअ बापतीस्मा केअहे। आने खुब मांहेंअ तीयाहांअहीं जातेंह!” 27 तांहांअ योहानांय तीयाहांन जोवाब देदो, “पोरमेहेराअ राज्या वोगुर केडों बी नांवांअतों बोंणी नांह सेक्तों। * 28 ‘आंय ख्रीस्त नांह, पेन उलटों, पोरमेहेरांय मांन तीयाअ आगाळी मोकल्योह’ एंहकींअ मांयुं तुमनेंह जों आखलों, तीयाअ तुमां सोतेज खातरी दीअ सेकताह। 29 ख्रीस्त वोल्लाअ होच हाय आने आंय वोल्लाअ वोरुंअ होच हाय। वोरुंअ ता, वोल्लाअ पाहीं उबी रीहे आने तो जों आखेह तों उनाअहे। तों उनायन तो खुब खुस बी वेअहे। तेंहकींअज कीईन, ईसुअ बाबोताम तुमां मांन जों आख्योंह तों उनायन आंय बी खुब खुस हाय। 30 तो वादारे नांवांअतो बोंणतो जाय आने आंय ओसो नांवांअतो बोंणतो जांव तों जोरुल्योंअ हाय।” *
31 ईसु होरगामेनेअ आलोह। तीयाअ लीदे, तो बीहरा बादाहांअ केअता चोळीयातो हाय। जें ईंहीं तोरतीपेअ याहकी- बाहकाहांअ सोबोंदुकींअ जोन्मुअतेंह, तें ता खाली मांहेंअज हाय। आने तें ता तोरतीपेअ बोंणनारी वोस्ताहांअ बाबोतामुज गोठ्या केअतेंह। पेन तो होरगामेनेअ आलोह तीयाअ लीदे, तो बीहरा बादाहांअ केअता मोडो हाय। 32 होरगाम तीयांय जों देख्योंह आने तो जों उनाअयोह तोंज तो लोकाहांन आखेह। तेबी तीयाअ गोठ माननारा ता एकदोम थोळाकुज लोक हाय। * 33 आने तीयाअ गोठ माननारा लोक एंहडी खातरी देताह का, पोरमेहेरांय जों आख्योंह तों खेरोंज हाय। 34 पोरमेहेरांय मोकलुअलो ईसु, पोरमेहेराअ गोठ्या आखेह। आने पोरमेहेरांय तीयाअ माज सोताअ आत्मा वोसाव्योह। * 35 पोरमेहेर तीयाअ पोयरापेअ माया राखेह, आने तीयांय तीयाल बादाहां पेअ आदीकार देदोह।* 36 जें पोरमेहेराअ पोयरापेअ वीसवास राखतेंह, तें कायोमाअ जीवोनाअ ओनुभोव केअ। पेन जें तीयापेअ वीसवास नांह राखतें, तें कायोमाअ जीवोनाअ ओनुभोव कोय वोखत बी नांय केअ। उलटों, पोरमेहेराल तीयाहांपेअ रोग चोळीअ आने तो तीयाहांन नोक्कीज सीक्सा कीअ।