4
सामारीयाअ एक बायाअरी ईसु गोठ्या केअहे
1-2 तीया वोखताम, फोरीसी लोक उनाअया का ईसु योहानाअ केअता वादारे लोकाहांन चेला बोंणावेह आने तीयाहांअ बापतीस्मा केअहे। होकीकोतुम ता, ईसु लोकाहांअ बापतीस्मा नांय केअत्लो, पेन आमां तीयाअ चेलाज तीयाहांअ बापतीस्मा केअत्ला। 3 ईयु बाबोताम जांयन ईसु येहुदीया जील्लामेनेअ नींगीन आमांअरी गालील जील्लाम फाचो गीयो।
4 गालील जील्लाम जांअ खातुर तीयाअ सामारीया जील्लाम रीईन जांअ तों जोरुल्योंअ आथों। 5 मोंजे, आमां सामारीया जील्लामेर्याअ सुखार नांवांअ सेहेराम आवी पोच्या। तों सेहेर याकोबांय तीयाअ पोयरा योसेफाल जे जोमीन देदली तीयु जोमीनाअ पाहीज आथों।
6-8 याकोबाअ वेअ बी तीयाज गांवांम आथी। ईसु चाली-चालीन थाकी गेहलो। तीयाअ लीदे, आमां चेला मांडो वेचाअतो लांअ सेहेराम गीया तांव तो तीयु वेअयुअहीं बोठो। तो लोगभोग पारगाअ सोमोय आथो। तांहांअ सामारीया वीस्ताराअ एक बाय तीयु वेअयु पांय पोरांअ आली। ईसुंय तीयुल आख्यों, “वेअयुमनेअ जाराक पांय काडीन मांन पीयावोह का?” सामारीयाअ लोकाहांअरी वेहवार राखांअ येहुदी लोकाहांन नांह गोंवतों। 9 मोंजे, तीयु सामारीयाअ बायुंय तीयाल आख्यों, “मांन नोवाय लागेह का तुं येहुदी हाय, आने आंय ता सामारीयाअ एक बाय हाय, तेबी तुं मांअपेअ पांय मागोह!” 10 तांहांअ ईसुंय तीयुल जोवाब देदो, “पोरमेहेर तुल जों दांअ मागेह तीयाअ जो तुल जाण वेअती, आने तोअपेअ पांय मागनारो आंय केडो हाय तों जो तुं जांअती ता, तुंज मांअपेअ मागती आने आंय तोअ जीवोना ल टीकवी राखनारों पांय * तुल देतो।” 11 तांहांअ तीयुंय ईसुल आख्यों, “साहेब, तोअपेअ पोरो ने दोअळों ता हाय नांह, आने वेअ बी उंडी हाय। तांहांअ जीवोना ल टीकवी राखनारों पांय * तुल कांहींनेअ मीलीअ? 12 आमांअ आगलोअ डायो याकोब ए वेअ आमनेंह देतो गीयोह। ईयु वेअयुअ पांय तीयांय बी पीदलों, आने तीयाअ पोयराहां आने तीयाअ डोगराहां बी पीदलों। ता, तुं याकोबाअ केअता मोडो हाय का?” 13 तांहांअ ईसुंय तीयुल जोवाब देदो, “जोंबी ईयु वेअयुअ पांय पीये तीयाल ता फाची फांअपी लागीअ। 14 पेन आंय जों पांय देहें, तों पीनारांहन कीदीह बी फांअपी नांय लागे। पेन उलटों, आंय जों पांय तीयाहांन देहें तों तीयाहांअ मोनाहांम पांअयांअ चोरुअ होच बोंणीअ आने तीयाहांन कायोमाअ जीवोन दीअ।” 15 तांहांअ तीयुंय तीयाल आख्यों, “साहेब, तों पांय मांन दे! तांहांअ मांन फाची फांअपी नांय लागे ने पांय पोरांअ मांन ईंहीं आवांअ बी नांय पोळे!”
16 ईसुंय तीयुल आख्यों, “हारों, जायन तोअ कोअवालाल ईंहीं हादी लाव!” 17 तांहांअ तीयुंय जोवाब देदो, “मांअ कोअवालोज नांह!” तांहांअ ईसुंय तीयुल आख्यों, “ ‘मांअ कोअवालोज नांह!’ एंहकींअ तुंयुं खेरोंज आख्यों। 18 तोअ पांच कोअवाला वीयाह, आमी तुं जीयाअरी रीहो, तो बी तोअ कोअवालो नांह! मोंजे, जों तुंयुं आख्योंह तों खेरोंज हाय।”
19 तांहांअ तीयु बायुंय ईसुल आख्यों, “साहेब, मांन खोबुर पोळीह का तुं पोरमेहेराअ गोठ जाहेर केअनारो हाय। 20 आमांअ आगलेंअ डायें ईया गेराझीम डोगाअपेअ * पोरमेहेराअ भोकती केअत्लें। पेन तुमां येहुदी आखतेंह का येरुसालेमामुज तीयाअ भोकती केरांअ जोजे।” 21 तांहांअ ईसुंय तीयुल आख्यों, “बाय, मांअ गोठ मानजे! एंहडो बी वोखत आवीअ का जांहांअ तुमां पोरमेहेर तुमांअ बाहकाअ भोकती ईया डोगाअपेअ केरा का येरुसालेमाम केरा का बीहरी केल्ली बी जागे केरा, तींहमें काय बी फेर नांय पोळीअ। 22 तुमां सामारीयाअ मांहेंअ जीयाअ भोकती केअतेंह, तीयाल तुमां नांह ओअखुअतें। पेन आमां येहुदी मांहेंअ जीयाअ भोकती केअतेंह, तीयाल आमां ओअखुअतेंह। काहाका, बादा लोकाहांन तीयाहांअ पापाहांअ सीक्सामेनेअ जो वाचावीअ तीयाल येहुदींहमनेअज पोरमेहेरांय मोक्ल्योह। 23 एंहडों हाय तेबी, एंहडो सोमोय आवेह का जांहांअ हाची रीते पोरमेहेराअ भोकती केअनारें जेंहकींअ पोवीतोर आत्मा तीयाहांन दोरवोणी देहे तेंहकींअ आने पोरमेहेराअ बाबोताअ हाचायु पोरमाणे तीयाअ भोकती कीअ। होकीकोतुम ता, तो वोखत आज हाल आवीज गीयोह। एंहडी भोकती केअनारेंज मांअ पोरमेहेर बाहकाल गोंवतेंह। 24 पोरमेहेर ता रुपु वोगुराअ* हाय। मोंजे, तीयाअ भोकती केअनारांअ बी, तीयाअ बाबोताअ हाचायु पोरमाणे मोनाहांमुज * तीयाअ भोकती केरांअ जोजे।” 25 तांहांअ तीयु बायुंय ईसुल आख्यों, “मांन खोबुर हाय का, ख्रीस्त आखाअनारो मेसीया आवनारो हाय। (‘मेसीया’ आने ‘ख्रीस्त’ ईया बेनुं सोब्दांअ ओर्थो: ‘ख्रीस्त’ एंहकींअ हाय।) तो आवीअ तांहांअ, तो बादों आमनेंह आखीअ।” 26 तांहांअ ईसुंय तीयुल आख्यों, “तोअरी गोठ्या केअहे तोज, मोंजे आंयज तो मेसीया हाय।”
27 ईसु तीयु बायाअरी गोठ्या केअत्लो तेंहडामुज, आमां चेला सेहेरामेनेअ फाचा आला। तीयाल एक बायाअरी गोठ्या केअतो देखीन आमनेंह नोवाय लागी। तेबी, आमांहमनेअ केडांय बी तीयाल नांय फुच्यों, तो तीयुअरी काहाल गोठ्या केअहे का केंहडाअ बाबोताम तें बेनुं चारचा केअतेंह।
28 हातींअ ते बाय तीयुअ पांअयांअ वेंडों तींहीं रांअ दीईन सेहेराम फाची गीयी, आने तींहींर्याअ लोकाहांन आख्यों, 29 “आवा, आने जोंबी मांयुं केअयोंह तों बादों मांन आखी देखावनारा मांहांअल हेरा! तों मांहुंअ मेसीया वीअ का?” 30 मोंजे, खुब लोक सेहेरामेनेअ नींगीन ईसु आथो तींहीं गीया।
31 तोताअमुज, आमां चेला ईसुल कालावाला केअया केअत्ला का, “गुरुजी, आमां जो मांडो लालाह तींहमेंनेअ थोळों-घोणो खाय ले!” 32 पेन तीयांय आमनेंह आख्यों, “मांअपेअ एंहडो मांडो हाय का जीयाअ बाबोताम तुमां काय बी नांह जांअता।” 33 तांहांअ आमां एक-बीहराल आखांअ टेक्या का, “आपुंह ईंहीं नांय आथा तांहांअ, तीयाअ खातुर एगोंह मांडो लालों-मालों ता नांय वीअक्ने?” 34 तांहांअ ईसुंय आमनेंह आख्यों, “मांन मोकलुअनारो मांअ बाहको मांअपेअ जों केरावांअ मागेह तों केरुलोंअ आने तीयांय मांन होपलों काम पुरों केरुलोंअ तोंज मांअ मांडाहांअ होच हाय। 35 वोरसाअ ईया सोमोये तुमां आखताह का, ‘वाडणील आजी चार मोयना वाअ हाय।’ पेन आंय तुमनेंह आखुंह: ईंहीं चारु वेल रेनारा येहुदी जातीअ नांह तेंहडा लोकाहांन बोराबोर हेरा! पोरमेहेर आखेह का, ‘जेंहकींअ खेतें पाकीन वाडणीअ खातुर तीयार वीअ रेतेंह, तेंहकींअ ते लोक मांअ गोठ्या मानांअ तीयार वीअ रीयाह। 36 जो तुमां तीयाहांन मांअ गोठीपेअ वीसवास केरांअ मोदोत कीअहा ता, जेंहकींअ खेताअ मालीख पाक वाडीन टीगावनारांहन मोजरी देहे तेंहकींअ आंय तुमनेंह तीयाअ ईनाम देहें। तुमांअ ईया कामुअ लीदे, लोक कायोमाअ खातुर जीवीअ।’ आंय लोकाहांन पोरमेहेराअ गोठ आखतो रीहुं तों, एक मांहुंअ बीयारो पोअहे तीयाअ होच हाय। आने तुमां ते गोठ मानांअ लोकाहांन मोदोत कीअहा तों, पाक वाडतेंह तीयाअ होच वीअ। एंहडों बोंणीअ तांहांअ, तुमां आने आंय बादा खुस वीअहुं। 37 आने एंहकींअ कीईन ए आखाअती गोठ हाची पोळीअ का, ‘मेहनोत कीईन पोअहे एक आने वाडीन तीयाअ पाक खातेंह बीहरें।’ 38 बीहराहां खुब मेहनोत कीईन लोकाहांन तुमांअ पेअलांअ पोरमेहेराअ गोठ आखी, आने आमी तुमनेंह तीयाहांअ कामुअ फोलवों मीलेह।”
सामारीयाअ लोक वीसवास केअताह का ईसुज मेसीया हाय
39 तीया सेहेराम रेनारा सामारीया जील्लाअ खुब लोकाहीं वीसवास केअयो का ईसुज मेसीया हाय। काहाका, ‘मांयुं केअलों बादों तीया मांहांय मांन आखी देखाव्योंह’ एंहकींअ तीयु बायुंय जों तीयाहांन आखलों तों ते उनाअला। 40 तीयाअ लीदे, ते सामारीयाअ लोक ईसुअहीं आला तांहांअ तीयाहां तीयाल तीयाहांअरी रांअ कालावाला केअया। तांहांअ आमां तींहीं बेन दीह रीया। 41 आने ईसुअ गोठीअ लीदे, तीया सेहेराअ आजी वादारे लोकाहीं वीसवास केअयो का तोज मेसीया हाय। 42 तीयाहां तीयु बायुल आख्यों, “आमां ईसुपेअ आमी वीसवास केअताह, पेन तुंयुं आमनेंह जों आख्योंह तीयाअ लीदे ओतोंअज नांह। पेन आमां सोतेज तीयाअ गोठ्या उनाअयाह आने तीयाकींअ बी आमां जांय गीयाह का खोरेखोर ईंज मांहुंअ दुन्याअ बादा लोकाहांन तीयाहांअ पापाहांअ सीक्सामेनेअ वाचावनारों हाय।”
एक ओमोलदाराअ पोयराल ईसु हारो केअहे
43-44 ईसुंय पेअलांअज आखलों, पोरमेहेराअ गोठ जाहेर केअनाराहांन तीयाहांअ सेहरुंअ मांहेंअ मान नांह देतें। तेबी तीया सामारीयाअ लोकाहांअरी बेन दीह रीईन हातींअ ईसु आने आमां तीयाअ चेला तीया वीस्तारामेनेअ नींगीन गालील जील्लाम गीया। 45 आमां गालील जील्लाम आला तांहांअ, तींहींर्याअ खुब लोकाहीं तीयाअ आवकार केअयो। काहाका, पास्का तेहवार वालांअ ते लोक बी येरुसालेम गेहला, आने तींहीं ईसुंय जेंबी कामें केअलें तें बादें तीयाहां देखलें। 46 ईसु काना गांवांम फाचो गीयो। तीयाज गांवांम तीयांय पांअयांमेनेअ दाराख्साअ रोह बोंणावलो। कापेरनाहुम सेहेराम राजाअ एक ओमोलदाराअ पोयरो खुब आजार्यें आथो। 47 ईसु येहुदीया जील्लामेनेअ गालील जील्लाम फाचो आलोह एंहकींअ तो ओमोलदार उनाअयो तांहांअ तो काना गांवांम ईसुअहीं गीयो आने तीयाल कालावाला केअया, “मेरबानी कीईन कापेरनाहुम आव आने मांअ पोयराल हारो केअ! तो मोय जाय एंहडो आजार्यें हाय!” 48 तांहांअ ईसुंय तीया ओमोलदाराल आख्यों, “जांव लोगुंअ तुमां मांन खुब जातीअ चोमोत्कार केअता नांय हेरा तांव लोगुंअ तुमां मांअ गोठीपेअ वीसवास केअनाराज नांह!” 49 पेन तीया ओमोलदारांय ईसुल आख्यों, “साहेब, आंय मानुंह का तुं पोरमेहेराअहींनेअज आलोह। मोंजे, मांअ पोयरो मोय जाय तीयाअ पेअलांअ मेरबानी कीईन मांअ कोअ आव!” 50 ईसुंय तीयाल आख्यों, “हारों तुं जो! तोअ पोयरो जीवतो रीअ!” ईसुअ ईयु गोठीपेअ तीया ओमोलदारांय वीसवास केअयो आने सोताअ कोअ जांअ नींग्यो। 51 बीहरे दीह, तो तीयाअ कोअ वाटे जाहलो तांहांअ तीयाअ कोअनेअ आवत्ला ते तीयाअ चाकोर तीयाल मील्या। तीयाहां तीयाल आख्यों, “तोअ पोयरो हारो वीअ गीयोह!” 52 तीयांय तीयाहांन फुच्यों, “मांअ पोयरो केंहडीवेल हारो वेरांअ टेकलो?” तांहांअ तीयाहां आख्यों का, “हाकाल पारगाप एक वाजे तीयाअ बोरो उती गेहलो।” 53 तांहांअ पोयराअ बाहकाल फोम आलों का, तीयाज टेमे ईसुंय तीयाल आखलों, “तोअ पोयरो जीवतो रीअ!” ईसुंय तीया ओमोलदाराअ पोयराल हारो केअलो तीयाअ लीदे, तीयांय आने तीयाअ बादा कोर्याहां वीसवास केअयो का ईसुज मेसीया हाय।
54 येहुदीया जील्लामेनेअ फाचो आवीन हातींअ ईसुंय गालील जील्लाम केअलो तो बीहरो चोमोत्कार आथो।