5
एक लोखवावाला मांहांअल ईसु हारों केअहे
1 थोळाक दीह हातींअ, येहुदीहींअ बीहरो एक तेहवार आथो तांहांअ ईसु येरुसालेम गीयो। 2 सेहेराम जांअ खातुर जे गेट हाय तीया गेटुंहमेर्योअ एक गेटुल “घेटाहांअ गेट” आखतेंह। तीया गेटाअहीं एक कुंड हाय। तीया कुंडुल हीबरु बोलीम “बेथझाथा” आखतेंह। तीयाअ पाही पांच पाडालें हाय। 3 तीया पाडालांहम खुब आजार्यें मांहेंअ पोळी रेहलें। तीयाहांम आंदलें, खोळ्यें आने लोखवावालें मांहेंअ आथें। [तें कुंडुमेर्योंअ पांय आले तीयाअ वाट जोवत्लें। 4 कोय-कोय दीह पोरमेहेर एक दुताल मोकलुअत्लो आने तो दुत कुंडुम उतीन पांय आलवुअत्लो। पांय आले हातींअ कुंडुम पेअलांअ उतनारों आजार्यें मांहुंअ सोताअ केल्ली बी आजारामेनेअ हारों वीअ जाहलों।] 5 तीया मांहांयम एंहडों एक मांहुंअ आथों का जीयाल आळोत्रीस वोरसेनेअ लोखवो वेअलो। 6 ईसुंय तीया मांहांअल तींहीं पोळी रेहलों देख्यों। ईसुल खोबुर पोळी का तों मांहुंअ खुब वोखतुर्योंअ एंहडोंज हाय। तांहांअ तीयांय तीया लोखवावाला मांहांअल फुच्यों, “तुं हारो वेरांअ मागोह का?” 7 तांहांअ तीया लोखवावाला मांहांय तीयाल जोवाब देदो, “आंह साहेब! पेन पांय आलवेह तांहांअ कुंडुम उतांअ मांन मोदोत केअनारों केडों बी नांह। आने आंय सोतेज कुंडुम उतांअ जाहुं तांव, मांअ पेअलांअ बीहरों केडों बी उती पोळेह।” 8 तांहांअ ईसुंय तीयाल आख्यों, “उठ! तोअ फातारी लीईन जातो रे!” 9 तुरुतुज तों मांहुंअ हारों वीअ गीयों आने सोताअ फातारी लीईन चालांअ टेक्यों!
तों हारों वीयों तो दीह येहुदीहींअ आरामाअ दीह आथो। 10 मोंजे वोळीलाहीं तीया मांहांअल आख्यों, “आज आरामाअ दीह हाय। आने ईया दीह फातारी उसली जांअ आपुअ नीयोमा पोरमाणे खोटों हाय!” 11 तांहांअ तीया मांहांय तीयाहांन जोवाब देदो, “जीया आदमींह मांन हारो केअयोह, तीयांयज मांन आख्यों, ‘तोअ फातारी लीईन चालेअ!’” 12 तांहांअ तीयाहां तीयाल फुच्यों, “ ‘तोअ फातारी लीईन चालेअ!’ एंहकींअ तुल आखनारो आदमी केडो हाय?” 13 पेन ईसु हारों वेअला मांहांअल सोताअ नांव आख्या वोगुर गोरदीम कोलाय गेहलो तीयाअ लीदे, तीया मांहांअल खोबुर नांय आथी का, तीयाल हारो केअनारो आदमी केडो आथो।
14 थोळीक वाअ हातींअ ईसु तीया मांहांअल मोंदीराअ चोवठाम मील्यो। तांहांअ ईसुंय तीयाल आख्यों, “उनाअ! तुं हारो वीयोह! तीयाअ लीदे, आमीनेअ पाप मां केअतो! नेता, पेअलांअ तोअ जो आजार आथो तीयाअ केअता बी वादारे खाराब काय तुल वीअ।” 15 तांहांअ तों मांहुंअ तींहींनेअ गीयों आने तीयाल हारों केअनारो ईसुज आथो एंहकींअ येहुदी आगेवानाहांन आख्यों। 16 मोंजे, ते आगेवान ईसुल हेरान केरांअ टेक्या। काहाका, ईं काम ईसुंय आरामाअ दीह केअलों। 17 तांहांअ ईसुंय तीयाहांन जोवाब देदो, “मांअ पोरमेहेर बाहको आरामाअ दीह बी काम केअतोज रेहे। मोंजे, आंय बी काम कीअहुं!” 18 तीया कारोणें, येहुदी आगेवान तीयाल माय टाकांअ वादारे मोको होदांअ टेक्या। ते तीयाल ईयाअ लीदे माय टाकांअ मागत्ला का, ईसु आरामाअ दीहाअ बाबोताअ तीयाहांअ नीयोम तोळत्लो एंहकींअ तीयाहांन लागत्लों आने पोरमेहेराल सोताअ बाहको आखीन तो सोताल पोरमेहेराअ हारको बी आखावत्लो।
पोरमेहेर तीयाअ पोयराल आदीकार देहे
19 ईसुंय तीयाहांन जोवाब देता एंहकींअ आख्यों, “आंय तुमनेंह नोक्कीज आखुंह: आंय मांअ सोताअ ताकोताकींअ काय बी नांह कीअ सेक्तो। मांअ पोरमेहेर बाहकाल जें कामें केअता आंय हीअहुं, तेंज कामें आंय कीअ सेकुं। मांअ पोरमेहेर बाहको जेंहडें कामें केअहे, तेंहडेंज कामें आंय बी कीअहुं। 20 मांअ पोरमेहेर बाहको मांअपेअ माया राखेह, आने तो जोंबी काय केअहे, तों बादों तो मांन देखावेह। जें कामें तो मांअपेअ केरावांअ मागेह तें तो मांन देखावीअ। तें कामें, तुमां मांन केअता पेअलांअ देखलो तीया कामाहांअ केअता, वादारे मोडें वीअ। आने तें देखीन तुमां बोगलाय बी जा। 21 जेंहकींअ मांअ पोरमेहेर बाहको मोअला मांहांहांन फाचें जीवतें उठवीन तीयाहांन जीवावेह, तेंहकींअज आंय बी मांअ मोर्जी वेअ तीयाहांन बादाहांन जीवावुंह। 22 लोकाहांन तीयाहांअ पापाहांअ खातुर तीयाहांअ नीयाय केअनारो ता मांअ पोरमेहेर बाहको नांह। उलटों, तीयाहांअ नीयाय केरांअ काम तीयांय मांनुंज होप्योंह, 23 ईयाअ खातुर का, जेंहकींअ बादें मांहेंअ मांअ पोरमेहेर बाहकाल मान देतेंह, तेंहकींअ तें मांन बी मान दे। मांन जोंबी मान नांह देतों, तों मांन मोकलुअनारा पोरमेहेर बाहकाल बी मान नांह देतों। 24 आंय तुमनेंह नोक्कीज आखुंह: जें मांअ गोठ उनाअतेंह आने पोरमेहेरांयज मांन मोकल्योह एंहकींअ मानतेंह, तें कायोम जीवीअ। पोरमेहेर तीयाहांअ पापाहांअ लीदे तीयाहांन सीक्साअ चुकादो नांय दे। आमीनेअ तें पोरमेहेराअ से सेटे नांह। उलटों, तें कायोमाअ जीवोनाअ ओनुभोव केरांअ टेक्येंह।
25 आंय तुमनेंह नोक्कीज आखुंह: एंहडो सोमोय आवीअ आने होकीकोतुम तो आवीज बी गीयोह का, जांहांअ जें पोरमेहेराअ से सेटे हाय, * तें पोरमेहेराअ पोयराअ मोंजे मांअ गोठ उनाय। जें मांअ गोठ उनायन तीयाअ पोरमाणे चालतेंह, तें कायोम जीवीअ। 26 मांअ पोरमेहेर बाहकापेअ बादाहांन जीवोन दांअ ताकोत हाय। तेंहकींअज कीईन तीयांय मांन बी लोकाहांन कायोम टीकनारों जीवोन दांअ ताकोत देदीह। 27 मांहांअ पोयरो आंयज हाय तीयाअ लीदे तीयांय मांन, लोकाहांन तीयाहांअ पापाहांअ लीदे नीयाय कीईन सीक्साअ चुकादो दांअ आदीकार बी देदोह। 28 मांयुं आमी जों आख्योंह तीयाअ लीदे तुमनेंह नोवाय नांय लागे! काहाका, मोय गेहलें मांहेंअ बादें मांअ गोठ उनाय आने उठीअ एंहडो सोमोय आवीअ। 29 जीयाहां हारें कामें केअयेंह तें जीवतें वीईन होरगाम कायोम जीवीअ। आने जीयाहां खोटें कामें केअयेंह तें जीवतें वीअ आने सोताअ पापाहांअ लीदे तीयाहांअ दुखें वेठांअ जोजे एंहडो चुकादो आंय देहें। 30 तेंहडों आंय मांअ सोताअज आदीकाराकींअ काय बी नांह केअतो। जेंहकींअ मांअ पोरमेहेर बाहकाल आखता उनाअहुं तीयाअ पोरमाणेज आंय लोकाहांअ नीयाय कीअहुं। आंय मांअ लोकाहांअ हाचोज नीयाय केअहें। काहाका, आंय एखली मांअ मोर्जी पुरी केरांअ नांह मागतो। पेन उलटों आंय ता, मांन मोकलुअनारा पोरमेहेर बाहकाअ मोर्जी पुरी केरांअ मागुंह।
31 जो मांअ बाबोताम आखनारो आंय एखलोज वेअतो ता, आंय जों आखुंह तों खेरों नांह एंहकींअ मांहेंअ आखी सेकतें। 32 पेन मांअ बाबोताम लोकाहांन आखनारो ता, बीहरो एक हाय। आने मांन खोबुर हाय का, मांअ बाबोताम तो लोकाहांन जों आखेह तों खेरों हाय। 33 जांहांअ तुमां बापतीस्मा केअनारा योहानाअहीं मांअ बाबोताम फुचांअ आदमी मोकलुअला, तांहांअ तीयांय मांअ बाबोताम जों खेरों हाय तोंज आखलों। 34 खोरेखोर ता, मांहेंअ मांअ बाबोताम बीहराहांन आखे तीयाअ मांन जोरुल नांह। तेबी, योहानांय मांअ बाबोताम लोकाहांन जों आखलों तों आंय तुमनेंह ईत केरावुंह, ईयाअ खातुर का, तुमां तों माना आने तीयाकींअ पोरमेहेर तुमनेंह तुमांअ पापाहांअ सीक्सामेनेअ वाचावे। 35 योहानांय मांअ बाबोताम जे गोठ आखली ते ता खुब मोडो उजवोळ देनारा दीवाअ होच आथी। थोळाक वोखत लोगुंअ तुमां ते गोठ उनायांअ राजी आथा आने ते गोठ उनायन तुमां खुस वेअत्ला।
36 पेन मांअ बाबोताम तुमनेंह आखनारों बीहरों बी कायक हाय। तों, योहानांय मांअ बाबोताम जों आखलों तीयाअ केअता बी, आंय केडो हाय तीया बाबोताम वादारे हारी साबीती देहे। मांअ पोरमेहेर बाहकांय जे चोमोत्कार केरांअ मांन आख्योंह, मोंजे का, जे चोमोत्कार आंय कीअहुं, ते लोकाहांन बोराबोर साबीती देताह का, मांअ पोरमेहेर बाहकांय ज मांन मोकल्योह। 37 मांन मोकलुअनारो मांअ पोरमेहेर बाहको सोतेज मांअ बाबोताम लोकाहांन आखेह। तुमां कीदीह बी तीयाअ आवाज नांह उनाअया का तीयाल देख्यो बी नांह। 38 तुमां तीयांय मोकलुअला मांअपेअ वीसवास नांह केअयो। तीयाअ लीदे, तुमां तीयाअ गोठ तुमांअ मोनाहांम नांह मानी। 39 तुमां कालजी राखीन पोवीतोर लेखाण वाचताह। काहाका, तुमां धारताह का, ते वाचीन तींहमेंनेअ तुमनेंह कायोमाअ जीवोनाअ वाट झुळीअ। तीयाज पोवीतोर लेखाणाहांम मांअ बाबोताम बी लेखलों हाय। 40 तेबी, तों कायोमाअ जीवोन मीलवांअ खातुर तुमां मांअहीं आवांअ नांह मागता।
41 मांहेंअ मांअ वाह-वाह केअ का नांय केअ तीयाअ मांन पोळली नांह। 42 पेन तुमांअ गोठुज जुदी हाय। मांन खोबुर हाय का, तुमांअ मोनाहांम पोरमेहेराअ खातुर मेर नांह। 43 आंय मांअ पोरमेहेर बाहकाअ आदीकार लीईन तोरतीपेअ आलोह तेबी तुमां मांन नांह मानता। पेन बीहरों एगोंह सोताअज आदीकाराकींअ आवेह ता, तीयाल तुमां मानी लेताह! 44 तुमां एक-बीहरापनेअ वाह-वाह मीलवुअताह। पेन तुमां एंहडें कामें केरांअ नांह कोसीस केअता का, जीयाअ पोरीणामे पोरमेहेर सोते तुमनेंह साबासी दे। मोंजे, तुमां मांअपेअ वीसवास केरा तों बोंणीज नांय सेके!
45 पेन ईयापनेअ तुमां एंहकींअ मां धारता का, मांअ पोरमेहेर बाहकाअ आगलांअ तुमाहांपेअ गुनो थोवनारो आंयज वेअहें। एंहकींअ नांह, पेन तुमाहांपेअ गुनो थोवनारो ता मोसेज वीअ। तुमां आस्या राखीह का मोसे तुमनेंह वाचावीअ। 46 मोसेंय मांअ बाबोताम लेख्योंह तीयाअ लीदे जो तुमां तीयांय जों लेख्योंह तों मानता ता, मांयुं जों आख्योंह तों बी तुमां मानता। 47 पेन तीयांय मांअ बाबोताम जों लेख्योंह तों तुमां नांह मानता तीयाअ लीदे, आंय जों आखुंह तों तुमां माना तों बी बोंणीज नांय सेके!”