रोम सेहरुमेर्याअ ख्रीस्तींहन पावुलाअ कागलों
ईया कागलाअ बाबोताम बेन गोठ्या
रोम सेहरुमेर्याअ मोंडोळाअ मुलाकात लांअ पावुलुंह जे गोठवोणी केअली, तीयाअ तीयारीअ खातुर तीयांय ईं कागलों लेख्यो। तींहींर्याअ ख्रीस्तींहम थोळाक दीह काम कीईन हातींअ तीयाहांअ पोयसाअ टेको लीईन स्पेयन देस जांअ तीयाअ मोर्जी आथी। ख्रीस्ती वीसवासाअ बाबोताम तीयाअ होमुजुअ खुलासो दांअ आने तीया वीसवासाअ लीदे ख्रीस्तींअ जीवोनें केंहडें वेरांअ जोजे तों होमजावांअ तीयांय ईं कागलों लेख्यों। पावुलुंह सोते जाहेर केअली हारी गोठीअ बाबोताम जों काय बी आखुलोंअ आथों, तों बादों ईयु चोपळीम होमाअलों हाय।
रोम सेहेरामेर्याअ मोंडोळाअ लोकाहांन सालाम दीईन तीयाहांअ खातुर तो पोरमेहेराल ओरुज केअहे तीया बाबोताम तीयाहांन आखीन हातींअ, पावुल ईया कागलाअ मुददाअ गोठ आखेह: “पोरमेहेर पापी लोकाहांन केंहकींअ गुना वोगुराअ जाहेर केअहे तों, तो ईयु हारी गोठीअ मारफोते जाण केअहे। ते लोक ख्रीस्तुपेअ वीसवास राखताह तीयाअ लीदेज, पोरमेहेर तीयाहांन गुना वोगुराअ जाहेर केअहे” (१:१७)।
हातींअ पावुल ए मुददाअ गोठ होमजावेह। बादा लोकाहांन, मोंजे का, येहुदीहींन आने येहुदी जातीअ नांह तेंहडा लोकाहांन बेनुंहन, पोरमेहेर गुना वोगुराअ जाहेर केअ तीयाअ जोरुल हाय। काहाका, बादाज लोक पापी सोबावाअ बांदाणुम हाय। एंहडा पापी सोबावाअ बांदाणुम रेनारा लोकाहांन, ख्रीस्तुपेअ तीयाहां राखला वीसवासाअ आदारे, पोरमेहेर गुना वोगुराअ जाहेर केअहे। हातींअ पोरमेहेराअ आर्याअ तीयाहांअ ईया नोवा सोबोंदुअ पोरीणामे आने ख्रीस्तुअ आर्याअ तीयाहांअ जोळाणुअ लीदे जों नोवों जीवोन तीयाहांन मीलेह, तीया बाबोताम पावुल खुलासो देहे। तीया जोळाणुअ लीदे पोरमेहेराअरी तीया वीसवास्यांअ सामादान वीअ जाहे। आने तें पोरमेहेराअ आत्माअ मारफोते पापाअ आने मोताअ ताकोतुमनेअ सुटी जातेंह।
५-८ आदयायाहांम पावुल, नीयोम दांअ फाचलांअ पोरमेहेराअ काय ईरादो आथो तीया बाबोताम आने वीसवास्याअ जीवोनाम पोरमेहेराअ आत्माअ ताकोत जों काम केअहे तीया बाबोताम चारचा केअहे। हातींअ मालीखाअ खास चेलो पावुल, मांहांहांअ खातुर पोरमेहेरांय केअली योज्नाम येहुदी लोक आने येहुदी जातीअ नांह तेंहडा लोक केंहकींअ होमाय जाताह ईया सोवालुअ जोवाब मीलवांअ कोसीस केअहे। तो एंहकींअ मानेह का, “ईसुज ख्रीस्त हाय” एंहकींअ येहुदी लोकाहीं नांह मान्यो तो बी पोरमेहेराअ योज्नाअ एक भागुज हाय। ते योज्ना ए हाय का, बादी जातीअ लोक ईसुपेअ तीयाहां राखला वीसवासुकींअ पोरमेहेराअ मेरबानीअ ओनुभोव केअ। पावुल एंहकींअ बी मानेह का, ओमुक वोखत हातींअ येहुदी लोक मानी लीअ का, “ईसुज ख्रीस्त हाय”। सेल्ले, ख्रीस्ती जीवोन केंहकींअ जीवुलोंअ तीया बाबोताम, खास कीईन, माया राखीन एक-बीहराअरी केंहकींअ सोबोंद राखुलोंअ तीया बाबोताम पावुल लेखेह। आने, पोरमेहेराअ सेवा, आने राज केअनारांअ खातुर आने एक-बीहराअ खातुर ख्रीस्ती लोकाहांअ फोरोज्या, खेरों-खोटों जाणावनारो जीव, ईया बादा मुददांहपेअ बी पावुल लेखेह। कागलों पुरों केअता तो खानगी गोठ्या लेखेह आने पोरमेहेराअ गुणगान केअहे।
ईया कागलामेरीअ बाबोतीहींअ रुपरेखा
आगली गोठ आने कागलाअ मुददा १:१-१७
पोरमेहेर मांहांहांन तीयाहांअ पापाहांअ सीक्सामेनेअ वाचावेह तीयाअ जोरुल १:१८-३:२०
पोरमेहेर मांहांहांन तीयाहांअ पापाहांअ सीक्सामेनेअ केंहकींअ वाचावेह ३:२१-४:२५
मांहांहांन मीलनारों नोवों जीवोन ५:१-८:३९
पोरमेहेराअ योज्नाम ईसरायेल लोक ९:१-११:३६
ख्रीस्ती चाल-चोलगोत्या १२:१-१५:१३
सेल्या गोठ्या ने खानगी सालामी १५:१४-१६:२७