रोम सेहरुमेर्याअ ख्रीस्तींहन पावुलाअ कागलों
1
पावुलाअ सालाम
1 ख्रीस्त ईसुअ सेवा केअनारो आंय पावुल तुमनेंह ईं कागलों लेखुंह। पोरमेहेरांय मांन मालीखाअ खास चेला तोरीके पोसोंद केअयोह, आने तीयापेनेअ आवनारी हारी गोठ जाहेर केरांअ खातुर तीयांय मांन नीम्योह। 2 ईसु तोरतीपेअ आलो तीयाअ खुब वोरसांअ पेअलांअज पोरमेहेरांय, तीयाअ गोठ जाहेर केअनाराहां पोवीतोर लेखाणाहांम जों लेख्योंह तीयाकींअ, ए हारी गोठ लोकाहांन जाणावांअ वोचोन देदलों। 3 ए हारी गोठ तीयाअ पोयराअ बाबोताम हाय। सोरीलाअ रीते हेअजी ता तो पोयरो दावीदाअ वोसुलाम जोन्मुअलो। 4 आने आत्मीक रीते हेअजी ता तो पोरमेहेराअ सोताअज पोयरो * हाय। पोरमेहेरांय सोताअ मोडी ताकोताकींअ ईसुल मोअलामेनेअ फाचो जीवतो उठवीन ईयु होकीकोतुअ खातरी देदी। आने ओज आपुअ मालीख ईसु ख्रीस्त हाय। 5 येहुदी जातीअ नांह तेंहडा बीहरी जातीअ खुब लोक ख्रीस्तुअ बाबोताअ गोठीपेअ वीसवास राखे, आने तीयाअ पोरीणामे ते तीयाअ आखलों माने, आने तीयाल मान दे तीयाअ खातुरुज, पोरमेहेरांय मांअपेअ मेरबानी कीईन ख्रीस्तुअ मारफोते मांन मालीखाअ खास चेला तोरीके नीम्योह। 6-7 ईसु ख्रीस्तुअ लोक बोंणांअ खातुर पोरमेहेरांय जीयाहांन पोसोंद केअयाह तीयाहांम, रोम सेहेराम रेनारा तुमां बी हाय। तीयाअ लीदे, ईं कागलों आंय तुमांअ बादाहां पेअ लेखुंह। तुमां पोरमेहेराअ मेराला लोक हाय। तुमनेंह तीयांय सोताअ लोक बोंणांअ पोसोंद केअयाह।
पोरमेहेर आपुअ बाहको आने मालीख ईसु ख्रीस्त तुमाहांपेअ मेरबानी केअ आने तुमनेंह सांती दे!
रोम सेहेराम जांअ पावुलाअ मोर्जी
8 पेअलांम-पेअलाअ आंय ईं आखांअ मागुंह का, आंय तुमांअ बादाहांअ खातुर ईसु ख्रीस्ताअ मारफोते मांअ पोरमेहेराअ आभार मानुंह। आंय तीयाअ आभार मानुंह तीयाअ कारोण ईं हाय का, जीहीं-जीहीं रोमुअ बादसाअ राज चालेह तींहींर्याअ बादा लोक * ईसु ख्रीस्तुपेअ तुमां राखला वीसवासाअ बाबोताम गोठ्या कीअ रीयाह। 9-10 जांहांअ बी आंय पोरमेहेराल ओरुज कीअहुं, तांहांअ तुमांअ खातुर बी ओरुज केरांअ आंय कोय बी वोखत चुकतो नांह। पोरमेहेर सोतेज ईयाअ साक्सी हाय। तीयाअ पोयराअ बाबोताअ हारी गोठ लोकाहांन जाहेर कीईन आंय मांअ पुरा मोनाकींअ तीयाअ सेवा कीअहुं। आंय खास कीईन तीयाल एंहडी ओरुज कीअहुं का, तीयाअ मोर्जी वीअ ता केल्ली बी रीते तुमांअहीं आवांअ तो सेल-सेल्ली मांन तोक दे। 11 आंय तुमनेंह मीलांअ खुब मोर्जी राखुंह। काहाका, तुमनेंह मीलीन आंय आत्मीक रीते तुमांअ मोदोत केरांअ मागुंह, ईयाअ खातुर का, तुमां आत्मीक रीते वादारे गोतीवालें बोंणा। 12 मोंजे का, आंय तुमनेंह मीलांअ खुब मोर्जी राखुंह, ईयाअ खातुर का, आंय तुमांअरी र्युंव आने ख्रीस्तुपेअ आपुंह केंहडो वीसवास राखतेंह तीया बाबोताम एक-बीहराअरी गोठ्या कीईन आपुंह एक-बीहराल उफ देजी।
13 मांअ पावु-बोंअयुहुं, ईं तुमां जांणां एंहडी मांअ मोर्जी हाय का, खुब-खुब वोखत मांयुं तुमांअहीं आवांअ गोठवोणी केअयी पेन तुमांअहीं आंय आवी नांय सेक्यो। काहाका, आमी लोगुंअ मुस्कुल्या मांन कायोम ओटकावत्याज रीयाह। तुमांअहीं आवांअ आंय ईयाअ खातुर मागत्लो का, जेंहकींअ मांयुं बीहरा खुब बादा येहुदी जातीअ नांह तेंहडा लोकाहांन आत्मीक रीते मोदोत केअयीह, तेंहकींअ तुमनेंह बी आत्मीक रीते मोडें वेरांअ मोदोत क्युंव। 14 आंय येहुदी जातीअ नांह तेंहडा बादा लोकाहांन, खास कीईन, जीयाहांन गीरीक बोली आवळेह तीया लोकाहांन, आने जीयाहांन ते बोली नांह आवळुअती तीयाहांन, ने लेखनारांहन ने ओभोणुंहन हारी गोठ जाहेर केरांअ मांअ फोरोज होमजुंह। 15 तीयाअ लीदे, रोम सेहेराम रेनारा तुमनेंह बी ए हारी गोठ जाहेर केरांअ आंय खुब मोर्जी राखुंह।
हारी गोठीअ ताकोत
16 ख्रीस्तुअ बाबोताअ हारी गोठ जाहेर केरांअ आंय आचकाअतो नांह। काहाका, ए हारी गोठ एंहडों ताकोतावालो ं सादोन हाय का, जीयाल पोरमेहेर, ख्रीस्तुपेअ वीसवास राखनारा बादा लोकाहांन तीयाहांअ पापाअ सीक्सामेनेअ वाचावांअ खातुर वापरेह। खास कीईन, पोरमेहेर ते हारी गोठ माननारा येहुदीहींन पेअलांअ वाचावेह, आने हातींअ तो, ते गोठ माननारा येहुदी जातीअ नांह तेंहडा लोकाहांन वाचावेह। 17 पोरमेहेर पापी लोकाहांन केंहकींअ गुना वोगुराअ जाहेर केअहे तों, तो ईयु हारी गोठीअ मारफोते जाण केअहे। ते लोक ख्रीस्तुपेअ वीसवास राखताह तीयाअ लीदेज पोरमेहेर तीयाहांन गुना वोगुराअ जाहेर केअहे। ईयु होकीकोतुअ खातरी पोवीतोर लेखाणाहांम जों लेखलों हाय तीयाकींअ वेअहे। तींहमें एंहकींअ लेखलों हाय का, “पोरमेहेर, जीया मांहांहांन तीयाहां तीयापेअ राखला वीसवासाअ लीदे गुना वोगुराअ जाहेर केअहे, तें कायोम जीवीअ।”
दोरेक मांहुंअ नोक्कीज गुनालों हाय
18 पोरमेहेर होरगामेनेअ जाहेर केअहे का, तीयाल मान नांय देनारा आने खोटें कामें केअनारा येहुदी जातीअ नांह तेंहडा बादा लोकाहांपेअ * तीयाल खुब रोग चोळीह आने तीयाहांन सीक्सा केरांअ बी तो तीयार वीयोह। पोरमेहेराअ बाबोताअ जे हाचाय ते लोक जांअताह, तीयुल ते सोताअ खाराब वोरतोनुकींअ दाबावी राखताह।
19 पोरमेहेर केंहडो हाय तों बादें मांहेंअ चोख्खी रीते जांय सेकतेंह। काहाका, पोरमेहेरांय सोतेज तीयाहांन तों जाहेर केअयोंह। 20 पोरमेहेरांय दुन्या बोंणावली तेहेअनेअ तो सोताअ होरजुअली बादी वोस्ताहांअ मारफोते तीयाअ सोताअ नांय देखाअनारा गुण चोख्खी रीते मांहांहांन जाहेर केअतो रीयोह। खास कीईन, तीयांय तीयाहांन जाहेर केअयोंह का, तीयापेअ होद वोगुराअ ताकोत हाय। आने तीयांय तीयाहांन ईं बी जाहेर केअयोंह का, तो सोते पोरमेहेर हाय, आने तीयांय होरजुअली बादी वोस्ताहांअ से तो ओलोगुज हाय। तीयाअ लीदे, मांहेंअ एंहडों बानो काडी नांह सेकतें का, “पोरमेहेराअ बाबोताम आमां कोय बी वोखत जांअत्लें नांय।” 21 येहुदी जातीअ नांह तेंहडा लोक * पोरमेहेर केंहडो हाय तों जांअत्ला तेबी तीयाहां तीयाल पोरमेहेर तोरीके मान बी नांय देदों, आने तीयाअ आभार बी नांय मान्यो। पेन उलटों, ते पोरमेहेर केंहडो हाय तीया बाबोताम ओकली वोगुराअ वीचार केरांअ टेक्या। तीयाअ पोरीणामे, ते पोरमेहेराअ मोर्जी जांय नांय सेक्या। 22 सोताल गीयानुवाला आखावीन बी खोरेखोर ते ओकली वोगुराअज बोंण्याह। 23 कायोम रेनारा आने मोडायावाला पोरमेहेराअ तीयाहां पुंजा नांय केअयी। पेन उलटों, तीयाहां नास वेअनारा मांहांहांअ रुपाम मुरत्या बोंणावीन तीयुहुंअ पुंजा केअयी। आने हातींअ तीयाहां चीळाहांअ रुपाम , आने जोनावोराहांअ रुपाम , आने सेल्ले डेडी-डेडी होरकीन चालनारा जोनावोराहांअ रुपाम मुरत्या बोंणावीन तीयुहुंअ पुंजा केअयी।
24 तीयाअ लीदे, पोरमेहेरांय तीया येहुदी जातीअ नांह तेंहडा लोकाहांन, * तीयाहांअ मोनाहांअ खाराब मोर्जींअ पोरमाणे खोटें कामें केरांअ सोळी देदा। आने तीयाअ पोरीणामे, तीयाहां एक-बीहराअरी खाराब रीते सांवसार केअता-केअता एक बीहराअ सोरीलाहांअ ओपमान केअयों। 25 तीयाहां पोरमेहेराअ बाबोताअ हाचाय नांय मानी। पेन तीयाअ बोदलाम तीयाहां जांय जोवीन खोटा देवुंअ पुंजा केरांअ पोसोंद केअयों। आने तीयाहां बादों बोंणावनारा पोरमेहेराअ पुंजा आने सेवा नांय केअयी। पेन तीयाअ बोदले तीयाहां पोरमेहेरांय बोंणावली वोस्ताहांअ पुंजा केअयी। ओज पोरमेहेर कायोम गुणगान केरांअ लायोक हाय! आमेन! 26 तीयाअ लीदे, पोरमेहेरांय तीयाहांन तीयाहांअ एकदोम नीच मोर्जींअ पोरमाणे वोरतांअ सोळी देदा। तीयाअ पोरीणामे, येहुदी जातीअ नांह तेंहडी जातीअ बायुहुं, * सोत-सोताअ कोअवालाहांअरी कुदरोती रीते सांवसार केरांअ सोळी देदों, आने तीयाअ बोदले ते बीहरी बायाहांअरी सांवसार केरांअ टेक्या। 27 एंहकींअज कीईन, येहुदी जातीअ नांह तेंहडी जातीअ आदमीहीं * बी, सोत-सोताअ कोअवालींअरी कुदरोती रीते सांवसार केरांअ सोळी देदों, पेन तीयाअ बोदले, सांवसार केरांअ तीयाहांअ खुब मोर्जींअ लीदे ते बीहरा आदमींअरी सांवसार केरांअ टेक्या। आने तीयाहां बीहरा आदमींअरी नाज आवे एंहडें कामें केअयें। तीयाअ पोरीणामे, पोरमेहेरांय तीयाहांन जोतीअ सीक्सा केरांअ जोजे तोतीअ सीक्सा केअयी।
28 आजी वादाराम आखजी ता, ‘पोरमेहेराल ओअखीन काय बी फायदो नांह’ एंहकींअ तीयाहां नोक्की कीअ लेदों तीयाअ लीदे, पोरमेहेरांय तीयाहांन सोताअ नोककामा वीचारुंअ गुलाम बोंणांअ सुट दीअ देदी। आने तीयाअ पोरीणामे, ते लोक पोरमेहेराल नांय गोंवें एंहडें कामें केरांअ टेक्या। 29 ते लोक बादी जातीअ खाराब कामें केरांअ, आने बादी जातीअ खोटाय केरांअ, आने लोब राखांअ, आने खुब रीते बीहराहांअ नुकसान केरांअ मोर्जी राखताह। आने ते आदराय राखताह, खुन केअताह, भानगुळ्या पेदा केअताह, ठोगताह, नोफरोत कीईन बीहराहांअरी गोगताह, आने चुगल्या केअताह। 30 आने ते बीहराहांअ बाबोताम खोटों आखताह, आने पोरमेहेराअरी नोफरोत कीईन वोरतुअताह, बीहराहांअ ओपमान केअताह, नोफरोत कीईन बीहराहांअरी वोरतुअताह, सोताअ बाबोताम मोडया-मोडया गोठ्या केअताह, नोवें-नोवें खोटें कामें होदी काडताह, सोताअ याहकी-बाहकाअ आखलों नांह मानता, 31 ओकली वोगुर वोरतुअताह, देदलों वोचोन पुरों नांह केअता, सोताअ कोर्यांहपेअ माया नांह राखता, आने बीहरा लोकाहीं पेअ दाया नांह केअता। 32 एंहडें कामें केअनारा ता जांअताहज का ते मोरांअ लायोक हाय। तेबी, ईं बादी जातीअ खोटें कामें ते सोते ता केअताहज, पेन एंहडें कामें केरांअ बीहराहांन ते उफ बी देताह।