2
पोरमेहेर येहुदी लोकाहांअ बी नीयाय कीअ
1 येहुदी जातीअ नांह तेंहडा लोकाहांन गुनाला आखनारा ओ येहुदी, तुं गोंवें तो व्योव, तुल भान वेरांअ जोजे का, तुं बी तोअ पापाहांअ सीक्सामेनेअ वाचाअनारो नांहज। काहाका, बीहराहांन गुनाला आखोह तींहमें तुं सोताल बी गुनालो साबीत कीअहो; काहाका, बीहराहांन गुनाला आखनारो तुं सोते बी तेंहडेंज खोटें कामें कीअहो। 2 आपुंह जांअताहज का, एंहडें खोटें कामें केअनाराल पोरमेहेर सीक्सा केअहे तांहांअ, तो हाची रीतेज तीयाल तेंहडों केअहे। 3 तांहांअ एंहडें खोटें कामें केअनाराहांन गुनालें गोंअनारा ओ येहुदी, तुं सोतेज एंहडें खोटें कामें कीअहो तांहांअ, तुं एंहकींअ मा धारतो का, पोरमेहेर दीअ तीयु सीक्सामेनेअ तुं सोते वाचाय जाहो। 4 आने तुं पोरमेहेराअ खुब मोडी दायाल, तीयाअ वेठी लांअ सोबावुल, आने धीर खेमांअ सोबावुल ओलको मा गोंअतो। पोरमेहेर तोअपेअ ईयाअ लीदे दाया केअहे का, तुं सोताअ पापाहांअ खातुर दुखी वीईन ते सोळी दयोव। ईयु बाबोतीअ तुल खोबुर वेरांअ जोजे। 5 पेन तुं ता तेंहडों नांय केरांअ टीणी तीअ रीहो। आने एंहकींअ कीईन तुं पोरमेहेर तुल जे कोळोक सीक्सा दीअ ते जांय जोवीन होदी लीहो। जांहांअ पोरमेहेर हाची रीते लोकाहांअ नीयाय कीअ, तांहांअ तो तुल ते सीक्सा दीअ।
6 पोरमेहेर बादा लोकाहांन तीयाहां केअला कामाहांअ पोरमाणे बोदलो दीअ। 7 खास कीईन, जे लोक धीरोज राखीन हारें कामें केअताह आने एंहकींअ कीईन पोरमेहेरापेनेअ मोडाय, मान, आने ओमोर जीवोन मीलवांअ कोसीस केअताह, तीयाहांन पोरमेहेर कायोमाअ खातुर जीवावीअ। 8 पेन जे लोक ईगलायाअ रीते वोरतुअताह, आने पोरमेहेराअ बाबोताअ हाची गोठ मानांअ ना पाळताह, आने खोटें कामें केअताह, तीयाहांन पोरमेहेर एकदोम कोळोक रीते सीक्सा कीअ। 9 खोटें कामें केअया केअनारा दोरेक मांहांअल पोरमेहेर एकदोम कोळोक रीते सीक्सा कीअ। तीयाअ पोरीणामे, तों मांहुंअ खुब दुखी वीअ। एंहडो ओनुभोव येहुदीहींन बी नोक्कीज वीअ। काहाका, पोरमेहेरांय तीयाहांन तीयाअ लोक वेरांअ मोको देदलो। आने एंहडो ओनुभोव येहुदी जातीअ नांह तेंहडा लोकाहांन बी वीअ। 10 पेन, हारें कामें केअनारा बादा लोकाहांन पोरमेहेर मोडाय, मान, आने सांती दीअ। पेअलांअ येहुदी लोकाहांन, आने हातींअ येहुदी जातीअ नांह तेंहडी जातीअ लोकाहांन तो दीअ। 11 काहाका, पोरमेहेर लोकाहांअ आर्याअ सोताअ वेहवारुम भेदभाव नांह राखतो।
12 पोरमेहेराअ नीयोम जांअया वोगुर पाप केअनारा येहुदी जातीअ नांह तेंहडा लोकाहांन पोरमेहेर सीक्सा कीअ। आने पोरमेहेराअ नीयोम जांयन बी पाप केअनारा येहुदी लोकाहांन पोरमेहेर तीयाहां ते नीयोम नांह पाल्या तीयाअ लीदे सीक्साअ कीअ। 13 काहाका, पोरमेहेर तीयाअ नीयोम खाली जांअनारा लोकाहांन गुना वोगुराअ नांह गोंअतो। तो ता, तीयाअ नीयोम पालनारांहनुंज गुना वोगुराअ गोंईंअ। 14 येहुदी जातीअ नांह तेंहडा लोक का जींयांहपेअ पोरमेहेराअ नीयोम नांह, ते जांहांअ बी कुदरोती रीते तीया नीयोमाहांअ पोरमाणे चालताह तांहांअ ते ईं देखावताह का, तीयाहांपेअ ते नीयोम नांह तेबी तीयाहांअ मोनाहांम एगोह नीयोम हाय। 15 ते लोक सोताअ वोरतोनुंहम देखावताह का, तीयाहांअ मोनाहांम पोरमेहेराअ नीयोमाहांअ सार कोतराअलो हाय। काहाका, खेरों-खोटों जांअनारो तीयाहांअ जीव ते गुनाला हाय का हाचा तीयाअ साक्सी देहे। 16 जांहांअ ईसु ख्रीस्तुअ मारफोते पोरमेहेर लोकाहांअ खानगी वीचारुंअ नीयाय कीअ, तांहांअ तो ईं बादों कीअ। ईं ता जे हारी गोठ आंय जाहेर कीअहुं तीयाअ पोरमाणेज हाय।
17 तुमांअ येहुदींहमेर्याअ केडाल बी आमी मांअ कायक आखुलोंअ हाय: ‘आंय येहुदी हाय’ एंहकींअ तुं सोताअ बाबोताम आखोह। पोरमेहेराअ नीयोम तोअपेअ हाय तीयाअ लीदे तुं मानोह का तुं वाचाय जाहो। आने तुं पोरमेहेराअ सोताअज मांहुंअ हाय एंहडों ओभीमान बी राखोह। 18 आंह, पोरमेहेराअ मोर्जी तुं जांअहो। पोरमेहेराअ नीयोम तुंयुं हीक्याह तीयाअ लीदे तुं खेर्या बाबोत्या पोसोंद कीअ सेकोह। 19 तुल खातरी हाय का, तुं आंदलाहांन वाट देखावी सेकोह आने आंदाराम चालनारांहन उजवोळ दीअ सेकोह। 20 पोरमेहेराअ नीयोमुंहमनेअ तुल हाची ओकुल हुद-मुद मीलीह तीयाअ लीदे तुल खातरी हाय का, ओकली वोगुराअ लोकाहांन तुं हीकामोण दीअ सेकोह आने पोयराहांन बोद दीअ सेकोह। 21 तीयाअ लीदे, पोरमेहेराअ नीयोम पालांअ बीहराहांन हीकवुअनारा, तुं सोते ते नीयोम नांह पालतो। ‘चोरी मा कीअहा!’ एंहकींअ बीहराहांन बोद देनारा, तुं सोतेज चोरी कीअहो! 22 ‘सीनालों मा कीअहा!’ एंहकींअ बीहराहांन हुकोम केअनारा, तुं सोतेज सीनालों कीअहो! मुरतींअ नोफरोत केअनारा, तुं सोतेज मुरतींअ मोंदीरुंहन लुटोह! 23 ‘पोरमेहेराअ नीयोम मांअपेअ हाय’ एंहडों ओभीमान राखीन आखनारा, तुं सोतेज ते नीयोम तोळोह आने तीयाअ पोरीणामे तुं पोरमेहेराअ ओपमान कीअहो! 24 पोवीतोर लेखाणाहांम लेखल्या ए गोठ्या तुमनेंहज लागु पोळत्याह: “येहुदी जातीअ नांह तेंहडा लोक तुमांअ खोटा कामाहांअ लीदे पोरमेहेराअ बाबोताम खाराब गोगताह।”
25 जो तुं पोरमेहेराअ नीयोम पालो ता, तुंयुं केरावली सुन्नोतुकींअ तुल लाब हाय। पेन जो तुं तीया नीयोमाहांन तोळो ता जीयाहांअ सुन्नोतुज नांह वीयी एंहडा लोकाहांअ केअता तुं काय हारो नांह। 26 जीयाहांअ सुन्नोत नांह वीयी ते लोक पोरमेहेराअ हुकोम पाले ता, पोरमेहेर तीयाहांन नोक्कीज सोताअ लोक गोंईंअ। 27 तोअपेअ पोवीतोर लेखाण हाय आने तोअ सुन्नोत बी वीयीह तेबी, तुं पोरमेहेराअ नीयोम तोळो तांहांअ, जोन्मेदेखुंअ जीया लोकाहांअ सुन्नोतुज नांह वीयी तेबी, ते पोरमेहेराअ नीयोम पालता वीअ ता, ते लोक तुल आखीअ, ‘पोरमेहेर तोअ नीयाय कीईन तुल सीक्साअ चुकादो देहे तों बोराबोरुज हाय।’ 28 तुंयुं खाली येहुदी कुटुंबुम जोन्मो लेदोंह का खाली येहुदीहींअ सुन्नोतुअ वीदी केरावीह तीयाअ लीदे तुं पोरमेहेराअ नोजराम खेरो येहुदी नांह बोंणी जातो। 29 खेरो येहुदी ता ओज हाय का, जीयाअ मोन बोदलायन चोख्खों वीयोंह। आने खेरी सुन्नोत ता ए नांह का, जे वीदी पोरमाणे वेअहे। पेन खेरी सुन्नोत ए हाय का, जीयुकींअ पोवीतोर आत्माअ मारफोते मोन बोदलायन चोख्खों वेअहे। एंहडा मांहांअल बीहरा लोकाहीं पेनेअ साबासी नांय मीले तेबी, तीयाल पोरमेहेरापेनेअ साबासी जोरुल मीलीअ।