3
1 तांहांअ एगोंह एंहडो वांदो उठावीन आखे का, ‘एंहकींअ वीअ ता, येहुदी वेरांम बी काय फायदो? ने सुन्नोतुकींअ बी काय फायदो?’ 2 तीयाल आंय एंहडो जोवाब द्युंव का, ‘येहुदी वेरांम ता खुब रीते फायदा हाय। पेअलांम-पेअलांअ ता ओ फायदो हाय का, पोरमेहेरांय सोताअ गोठ्या येहुदीहींनुंज होपल्या।’ 3 केडोंजी एंहकींअ आखे का, ‘पेन तीयाहांमेर्याअ थोळाक लोक ता, सोते पोरमेहेराल जों वोचोन देदलों तों पालांअ बाबोताम ईमानदारी वोगुराअ आथा।’ आंय तीयाल एंहकींअ आखुं: ‘तींहमें काय वीअ गीयों? ते ईमानदारी वोगुराअ आथा तीयाअ लीदे, पोरमेहेर बी सोते देदला वोचोनु पोरमाणे केरांअ बाबोताम तीयाहांअ होच ईमानदारी वोगुराअ बोंणी जाय का?’ 4 एंहडों बोंणेज नांय! मांहेंअ बादें झुटें वीअ सेके, पेन पोरमेहेर ता हाची रीते सोताअ वोचोनें पालीअज। ईयाअ आदार पोवीतोर लेखाणाहांम बी मीलेह। तींहीं लेखलों हाय का,
“मांहेंअ पोरमेहेराल जाहेर कीअ का, ‘तोअ गोठ्या हाच्या हाय, आने जांहांअ मांहेंअ तोअ भुल काडीअ तांहांअ तुं जीती जाहो।’”
5 पेन थोळाक लोक आखताह का, ‘पोरमेहेर हाचो हाय तों आपुअ खाराब वोरतोनुकींअ देखाय आवतों वीअ ता, ईयापनेअ आपुअ काय होमजुलोंअ? पोरमेहेर आपनेंह तीया खाराब वोरतोनुअ सीक्सा केअ तांहांअ, तो खाराब रीते वोरतेह एंहकींअ होमजुलोंअ।’ ओमुक लोक खोरेखोर एंहकींअज आखताह। 6 आंय तीयाहांन जोवाब द्युंव का, ‘एंहडों बोंणेज नांय! जो पोरमेहेर येहुदी लोकाहांअ नीयाय हाची रीते नांय केअ ता, दुन्याअ बीहरा लोकाहीं अ नीयाय केरांअ तो केंहकींअ लायोक हाय?’ 7 एगोंह वांदो उठावीन मांन एंहकींअ फुचे का, ‘पोरमेहेराअ हुकोमा पोरमाणे चालांअ आंय ईमानदार नांय र्युंव आने तीयाकींअ, पोरमेहेर कायोम हाची रीतेज वोरतेह तों जो चोख्खी रीते देखाय आवतों वीअ ता, पोरमेहेराअ मांन मांअ पापाअ सीक्सा नांयज केरांअ जोजेकने? मांअ खोटायुअ पोरीणामे मांहेंअ पोरमेहेराअ हारा सोबावाअ खातुर तीयाअ गुणगान केअ ता, आंय खोटों क्युंव ता काय वांदो?’ 8 तीयाल आंय एंहडो जोवाब द्युंव: “जो तोअ आखुलोंअ बोराबोर वीअ ता, ‘वादारे भोलों वेअ तीयाअ खातुर आपुंह वादारे पाप केअजी’ एंहकींअ आखाय का?” आने खोरेखोर थोळाक लोक ता, आंय मांहांहांन एंहडोंज आखुंह एंहडों मांअ माथे पाळीन मांअ ओपमान केअताह। मांअ बाबोताम एंहडों खोटों आखनारा ईया लोकाहांन पोरमेहेर सीक्सा कीअ।
बादें मांहेंअ पापी हाय
9 तांहांअ केडों एंहकींअ आखे का, ‘सेल्ले आपुंह काय आखजी? बीहरा लोकाहीं अ केअता पोरमेहेर आपुंह येहुदींहपेअ वादारे दाया राखीअ एंहकींअ का?’ तीयाल आंय एंहकींअ आखुं का, ‘नांह! आपुंह एंहकींअ आखी नांह सेकता।’ काहाका, मांयुं तुमनेंह पेअलांअज देखाव्योंह का, पोरमेहेरांय बादाहांन तीयाहां केअला पापाहांअ लीदे गुनालें गोंअयेंह। तें हातींअ येहुदी वेअ का येहुदी जातीअ नांह तेंहडें वेअ। 10 पोवीतोर लेखाणाहांम लेखलों हाय तेंहकींअ:
“केल्लों बी मांहुंअ गुना वोगुराअ नांह।
एक बी मांहुंअ गुना वोगुराअ नांह।
11 एंहडों केडों बी नांह का जों पोरमेहेराअ बाबोताअ हाचायुल होमजुअतों वीअ।
एंहडों केडों बी नांह का जों पोरमेहेराल ओअखांअ मोर्जी राखतों वीअ।
12 बादा मांहांहां पोरमेहेराअ आखलों मानांअ सोळी देदोंह।
दोरेक मांहुंअ पोरमेहेराअ नोजराम नोककामों बोंणी गीयोंह।
एंहडों केडों बी नांह का जों हाची रीते वोरतुअतों वीअ।”
13 “उगळी गेहली कोबीरामेनेअ खाराब गुंद आवेह तेंहकींअ,
मांहेंअ जों काय आखतेंह तों जाअखों खाराब हाय।
तें मांहेंअ सोताअ मुंयांमेनेअ जोबी सोब्दो काडतेंह,
तीयाकींअ तें बीहरा लोकाहांन ठोगतेंह।
जेंहकींअ हापळाअ झेर लोकाहांन नुकसान केअहे तेंहकींअ,
तें मांहेंअ सोताअ सोबळांहकींअ जों आखतेंह तों बीहरा लोकाहांन नुकसान केअहे।
14 तें मांहेंअ कायोम बीहरा लोकाहांन हाराप देतेंज रेतेंह।
आने तें एकदोम खाराब गोठ्या आखतेंह।
15 तें माहरी-माहरी खुन केरांअ जातेंह।
16 आने जींहीं बी तें जातेंह तींहीं, तें बीहरा लोकाहीं अ नास केअतेंह,
आने तीयाहांअ दोस्या बोहावी देतेंह।
17 बीहराहांअरी ईली-मीलीन रांअ तीया मांहांहांन आवळुअतोंज नांह।
18 तीयाहांअ मोनाहांम पोरमेहेराअ बीखुज नांह।”
19 आपुंह जांअतेंह का, पोवीतोर लेखाणाहांम लेखल्या गोठ्या ता, तीया नीयोमाअ बांदाणुम रेनारा लोकाहांअ खातुरुज लेखाअयाह। ईयापनेअ आपुंह धारी सेकतेंह का, एंहडों केडों बी नांह का, जों तीयाल गुनालों गोंअनारा पोरमेहेराल तीयाअ वाचावुम काय बी आखी सेके। आने दुन्याम रेनारा बादा मांहांहांन पोरमेहेरांय गुनालें गोंअयेंह। 20 एक मांहांय पोरमेहेराअ नीयोम खाली पाल्योह तीयाअ लीदे, पोरमेहेर तीयाल गुना वोगुराअ जाहेर केअहे एंहडों ता नांह। खोरेखोर ता, पोरमेहेराअ नीयोम आपनेंह खाली देखावेह का आपुंह पापी हाय। 21 पोरमेहेरांय देदला नीयोम आपुंह पालजी तीयाअ आदारे, तो आपनेंह गुना वोगुराअ नांह जाहेर केअतो। पेन तो बीहरी केल्ली रीते आपनेंह गुना वोगुराअ जाहेर कीअ सेके तों तीयांय आमी आपुअ आगलांअ जाहेर केअयोंह। ईयु बाबोताअ भोवीसवाणी मोसेअ लेखाणाहांम आने पोरमेहेराअ गोठ जाहेर केअनारांअ लेखाणाहांम हाय। 22 पोरमेहेर मांहांहांन गुना वोगुराअ जाहेर केअहे। काहाका, तें ईसु ख्रीस्तुंह तीयाहांअ खातुर जों केअयोंह तीयापेअ वीसवास राखतेंह। पोरमेहेर ख्रीस्तुपेअ वीसवास राखनारा दोरेक मांहांअल गुना वोगुराअ जाहेर केअहे। काहाका, पोरमेहेराअ नोजराम येहुदी जातीअ वेअ का बीहरी जातीअ वेअ तीयाअ काय फेर नांह। 23 काहाका, बादा लोकाहीं पाप केअयाह आने पोरमेहेरांय तीयाहांअ खातुर वीचारी राखला मोडायावाला ईरादा पुरा केरांअ ते चुकी गीयाह।
24 तेबी, लोकाहांन तीयाहांअ पापाहांअ सीक्सामेनेअ वाचावांअ खातुर ख्रीस्त ईसु मोअयो तीयाअ मारफोते पोरमेहेर सोताअ मेरबानीकींअ लोकाहांन मोफोतुमुज गुना वोगुराअ जाहेर केअहे। 25 पोरमेहेरांय ईसुल, सोताअ रोगुत पाळीन मांहांहांअ पापाहांअ खातुर सोताअ भोग देनारा तोरीके नीम्योह। ख्रीस्तुंह आपुअ खातुर केअला ईया कामुपेअ आपुंह राखला वीसवासाअ लीदे, पोरमेहेरांय आपनेंह सोळव्येंह। पोरमेहेर हाची रीते वोरतुअनारो हाय तों देखावांअ खातुर तीयांय एंहडों केअयों। काहाका, ख्रीस्त मोअयो तीयाअ पेअलार्याअ वोखताम पोरमेहेर धीरोज राखत्लो तीया कारोणे, लोकाहांअ पापुंहन तीयांय गोंणतीम नांह लेदा। 26 आने तो हाचो हाय आने ईसुपेअ वीसवास राखनारा दोरेक मांहांअल तो गुना वोगुराअ जाहेर केअहे तों देखावांअ खातुर, आमीर्याअ सोमोयाम तीयांय एंहडों केअयों।
27 तीयाअ लीदे, गुना वोगुराअ जाहेर वेरांअ बाबोताम आपुंह ओभीमान नांह कीअ सेकतें। काहाका, पोरमेहेराअ नीयोम पाल्या तीयाअ आदारे तो मांहांहांन गुना वोगुराअ नांह जाहेर केअतो। पेन उलटों, ख्रीस्तुपेअ तीयाहां राखला वीसवासाअ आदारेज तो तीयाहांन गुना वोगुराअ जाहेर केअहे। 28 आपुंह ओभीमान नांह कीअ सेकतें। काहाका, आपुंह मानतेंह का मांहेंअ पोरमेहेराअ नीयोम पालतेंह तीयाकींअ पोरमेहेर तीयाहांन गुना वोगुराअ नांह जाहेर केअतो, पेन ख्रीस्तुपेअ तें जो वीसवास राखतेंह तीयाकींअज तो तीयाहांन गुना वोगुराअ जाहेर केअहे। 29 तुमां जें येहुदी हाय तें एंहकींअ मा धारतें का, पोरमेहेर तुमनेंह एखलेंज सोताअ मांहेंअ तोरीके मानीअ। तुमां नोक्कीज जांय लेजा का, तो येहुदी जातीअ नांह तेंहडा मांहांहांन बी सोताअ मांहांहां तोरीके मानीअ। आंह, तो येहुदी जातीअ नांह तेंहडा मांहांहांन बी सोताअ मांहांहां तोरीके मानीअ। 30 काहाका, पोरमेहेर एकुज हाय आने ख्रीस्तुपेअ वीसवास राखनारा दोरेक मांहांअल तो गुना वोगुराअ जाहेर कीअ। हातींअ तों येहुदी वेअ का येहुदी जातीअ नांह तेंहडों वेअ। 31 तांहांअ गुना वोगुराअ जाहेर वेरांअ खातुर एखला ख्रीस्तुपेअ राखलो वीसवास ओतोअज जोरुल हाय एंहकींअ आखजी ता, तीयाअ ओर्थो, पोरमेहेराअ नीयोम आमां वीहराय सेकतेंह एंहडो वेअहे का? एंहडों हायज नांह। होकीकोतुम ता, ख्रीस्तुपेअ आमनेंह वीसवास वेअ तांहांअज आमां पोरमेहेराअ नीयोमा पोरमाणे चालतेंह एंहकींअ आखाय।