4
आबराहामाअ दाखलो
1 तांहांअ आपुअ आगलाअ डाया आबराहामाअ बाबोताम आपुंह काय आखजी? पोरमेहेर लोकाहांन गुना वोगुराअ जाहेर केअहे तीया बाबोताम आबराहामाअ काय ओनुभोव आथो? 2 जो तीयांय केअला हारा कामाहांअ लीदे पोरमेहेरांय तीयाल गुना वोगुराअ गोंअयो वेअतो ता, तीया बाबोताम ओभीमान केरांअ तीयापेअ काय बी आदार वेअतो। पेन पोरमेहेराअ नोजराम ता, आबराहामुपेअ एंहडों ओभीमान केरांअ काय बी आदार नांय आथो। 3 पोवीतोर लेखाणुंम आबराहामाअ बाबोताम एंहकींअ लेखलों हाय का, “आबराहामुंह पोरमेहेराअ वोचोनुपेअ * वीसवास राख्यो, आने तीयाअ पोरीणामे पोरमेहेरांय तीयाल गुना वोगुराअ गोंअयो।” 4 मांहुंअ काम केअहे तांहांअ तीयाल मीलनारी मोजरी ईनाम नांह गोंणाअती, पेन ते ता तीयाअ कामाणी गोंणाअहे। तेंहकींअज कीईन, जो मांहेंअ सोताअ हारा कामाहांकींअ गुना वोगुराअ बोंणी जातें वीअ ता, तें पोरमेहेराअ मेरबानीकींअ तेंहडें बोंण्यें एंहकींअ नांय आखाय। तें ता तीयाहां केअली मेहनोतुअ लीदे गुना वोगुराअ बोंण्यें एंहकींअ आखाय। 5 पेन जें मांहेंअ, पोरमेहेर तीयाहांन गुना वोगुराअ जाहेर केअ तीयाअ खातुर सोताअ कामुंहपेअ नांय, पेन पापी मांहांहांन गुना वोगुराअ जाहेर केअनारा पोरमेहेरापेअ वीसवास राखतेंह, तीयाहांअ वीसवासुलुज पोरमेहेर तीयाहांन गुना वोगुराअ जाहेर केरांअ खातुर गोंणतीम लेहे। 6 जीया मांहांहांन तीयाहांअ हारा कामुंहपेअ आदार राख्या वोगुर पोरमेहेर गुना वोगुराअ जाहेर केअहे, तें मांहेंअ कोतेंअ सुखी हाय तीया बाबोताम दावीद राजांय एंहकींअ कीईन लेख्योंह का,
7 “जीया मांहांहांअ गुना पोरमेहेरांय माफ केअयाह, जीया मांहांहांअ पाप पोरमेहेरांय तुवी टाक्याह,
तें मांहेंअ खुब सुखी हाय।
8 आंह, मालीख जीया मांहांहांअ पापाहांअ नोंद नांह राखतो,
तें मांहेंअ खुब सुखी हाय।”
9 जीया सुखुअ बाबोताम दावीद राजांय लेख्योंह, तों खाली येहुदी लोकाहांनुंज * मीलेह का? एंहडों नांह। तों सुख येहुदी जातीअ नांह तेंहडा लोकाहांन * बी मीलेह। आबराहामाअ बाबोताम आंय एंहकींअ आखी रीयोह का, तीयाअ वीसवासाअ लीदे पोरमेहेरांय तीयाल गुना वोगुराअ गोंअयो। 10 पोरमेहेरांय आबराहामाल गुना वोगुराअ गोंअयो ते बीना केंहडी वेल बोंणली? आबराहामुंह सुन्नोत केरावी तीयाअ फाचलांअ बोंणली का तीयाअ पेअलांअ? ते ता तीयाअ पेअलांअज बोंणली। 11 सुन्नोत केराव्या पेअलांअ पोरमेहेरापेअ आबराहामुंह राखला वीसवासाअ लीदे, पोरमेहेरांय तीयाल गुना वोगुराअ जाहेर केअलो। आने फाचलांअ नेअ तीयांय केरावली सुन्नोत तीयु होकीकोतुअ नीसाणी आथी। तीयाअ लीदे, आबराहाम एंहडा लोकाहांअ आत्मीक बाहको हाय का, जीयाहां सुन्नोत नांह केरावी तेबी ते पोरमेहेरापेअ राखला वीसवासाअ आदारे गुना वोगुराअ जाहेर वेअताह। 12 आने आबराहाम एंहडा लोकाहांअ बी आत्मीक बाहको हाय का जीयाहां सुन्नोत केरावीह। पेन एक बाबोत हाय। सुन्नोत केराव्या पेअलांअ आबराहामुंह पोरमेहेरापेअ जेंहडो वीसवास राखलो तेंहडो वीसवास ते बी राखे तांहांअज ते आबराहामाल सोताअ आत्मीक बाहको आखी सेकताह।
13 आबराहामुंह नीयोम पालला तीयाअ लीदे नांय, पेन तीयांय पोरमेहेरापेअ वीसवास राखलो तीयाअ पोरीणामे, पोरमेहेरांय तीयाल गुना वोगुराअ जाहेर केअयो। तीयाअ लीदे पोरमेहेरांय तीयाल आने तीयाअ वोसुलामेर्याहांन एंहडों वोचोन देदलों का ते आखी दुन्याअ वारोसदार बोंणीअ। 14 पोरमेहेराअ वोचोन जो खाली तीयाअ नीयोम पालनारा लोकाहांअ खातुरुज हाय ता, तीयापेअ वीसवास राखुलोंअ तों नोककामों हाय, आने तीयांय देदलों वोचोन बी ओरथा वोगुराअ हाय। 15 काहाका, जींहीं नीयोम हाय, तींहीं मांहेंअ तीयाहांन तोळनारेंज हाय, आने नीयोम तोळनारांहन पोरमेहेर नोक्कीज सीक्सा देहे। पेन जींहीं नीयोम नांह, तींहीं ते तोळांअ सावालुज पेदा नांह वेअतो। 16 पोरमेहेराअ वोचोन ता, पोरमेहेराअ मेरबानीअ लीदेज मील्योंह। आने तीयाअ फायदो आबराहामाअ वोसुलामेर्याअ बादाहांनुंज मीलेह, मोंजे का, नीयोम पालनारांहन ओतोअज नांय, पेन आबराहामाअ होच पोरमेहेरापेअ वीसवास राखनाराहांन बादाहांनुंज मीलेह। काहाका आबराहाम आत्मीक रीते आपुअ बादाहांअ बाहको हाय। 17 पोरमेहेरांय आबराहामाल देदला वोचोनाअ बाबोताम पोवीतोर लेखाणाहांम बी एंहडों लेखलों हाय का, “मांयुं तुल खुब जातीअ लोकाहांअ बाहको बोंणाव्योह।” आबराहामुंह ता एंहडो पोरमेहेरापेअ वीसवास राखलो, का जो मोअलाहांन जीवतें केअहे आने जे वोस्तु हायातामुज नांह तीयुहुंन जाणे का ते हायाताम वेअ तेंहकींअ हात केअहे।
18 पोरमेहेरांय आबराहामाल खुब वोसुला दांअ वोचोन देदलों। तीया वोचोनु पोरमाणे बोंणीअज एंहडी आस्या राखांअ आबराहामुपेअ काय बी आदार नांय आथो तेबी, तीयांय एंहडों बोंणीअज एंहडी आस्या राखली। तीयाअ लीदे, तीयांय एंहकींअ वीसवास केअयो का, पोरमेहेरांय तीयाल आखलों तेंहकींअ तो खुब जातीअ लोकाहांअ आगलोअ डायो बोंणीअज। 19 आबराहाम ता तांहांअ, मोअलो वीअ तेंहडो, पोयरें पेदा केरांअ गोती वोगुराअ आथो। काहाका, तीयाअ उंमोर लोगभोग एक होव वोरसें आथी, आने तीयाअ कोअवाली साराअ बी पोयरें पेदा केरांअ उंमोर वीती गेहली। ईयु बाबोताम आबराहामाल वीचार आलो तेबी, पोरमेहेरांय देदला वोचोनुपेअ तीयांय सोंका नांह राखी। 20-21 आंह, पोरमेहेरांय देदला वोचोनुपेअ आबराहामुंह जाराक बी सोंका नांह राखी। पेन उलटों, तीयांय पोरमेहेरापेअ खुब वीसवास राख्यो। आने जीया पोरमेहेरांय वोचोन देदोंह तीयापेअ तों वोचोन पुरों केरांअ बी ताकोत हाय एंहकींअ आबराहामुंह पुरा मोनाकींअ मानीन पोरमेहेराअ गुणगान केअया। 22 आबराहामाअ तीया वीसवासाअ लीदे, पोवीतोर लेखाणाहांम लेख्या पोरमाणे, “पोरमेहेरांय तीयाल गुना वोगुराअ जाहेर केअयो।” 23 “गुना वोगुराअ जाहेर केअयो” एंहकींअ आबराहामाअ बाबोताम ओतोंअज नांह लेखाअयों। 24 पेन ते गोठ्या आपुअ बाबोताम बी लेखाअल्या हाय। काहाका, आपुंह आपुअ मालीख ईसुल मोअलामेनेअ जीवतो उठवुअनारा पोरमेहेरापेअ वीसवास राखतेंह। तीयाअ लीदे पोरमेहेर आपनेंह बी गुना वोगुराअ जाहेर कीअ। 25 पोरमेहेरांय एंहडों केअयों का आपुअ गुनांअ लीदे ईसु मोए। आने आपनेंह गुना वोगुराअ जाहेर केरांअ खातुर पोरमेहेरांय ईसुल मोअलामेनेअ जीवतो बी उठव्यो।