5
पोरमेहेर आपनेंह गुना वोगुराअ जाहेर केअहे तीयाअ लाब
1 ख्रीस्तुपेअ आपुंह राखला वीसवासाअ कारोणे, पोरमेहेरांय आपनेंह गुना वोगुराअ जाहेर केअयेंह। तीयाअ लीदे, आपुअ मालीख ईसु ख्रीस्तुअ मारफोते पोरमेहेराअरी आपुअ सांतीवालो सोबोंद हाय। 2 आपुंह पोरमेहेराअ मेरबानीअ जो ओनुभोव केअतेंह, तो बी आपनेंह ख्रीस्तुअ मारफोतेज मील्योह। आने पोरमेहेराअ मोडाय आपनेंह मीलीअ तीयाअ आस्याअ लीदे आपुंह खुब आनोंद केअतेंह। 3 आने आजी वादाराम आखजी ता, ख्रीस्तुपेअ आपुंह वीसवास केअतेंह तीयाअ पोरीणामे बीहरें मांहेंअ आपनेंह दुखें पाळतेंह तांहांअ बी आपुंह आनोंद केअतेंह। काहाका, आपुंह जांअतेंह का, आपुंह दुखें वेठतेंह तीयाअ पोरीणामे तोताअपुज आपुंह बादी बाबोतीहींन धीरोज राखीन वेठांअ हीकी लेतेंह। 4 आने धीरोजुअ पोरीणामे आपुंहम हाराम-हारो गुण पेदा वेअहे। आने हाराम-हारा गुणुअ पोरीणामे आपुंहम भोवीस्याअ बाबोताम पुरी खातरी पेदा वेअहे। 5 भोवीस्याअ बाबोताम आपुअ जे पुरी खातरी हाय ते नोककामी नांय जाय। काहाका, पोरमेहेरांय आपनेंह जो पोवीतोर आत्मा देदोह तीयाअ मारफोते तीयांय सोताअ मायाकींअ आपुअ मोनुंहन पोई देदेंह।
6 आपुंह सोताल नोरकाअ सीक्सामेनेअ वाचावीज नांय सेकजी एंहडी हालोताम आथें। तांहांअ खेरा सोमोयुपेअज ख्रीस्त आलो आने आपुअ जेंहडा नोककामा पापींअ खातुर मोअयो। 7 हाचा मांहांअ खातुर बी कादासुज केडों सोताअ जीव दे। आने हारा मांहांअ खातुर ता कादास केडों सोताअ जीव दांअ हींमोत बी केअ। 8 पेन आपुंह ता पाप कीईन आजी पोरमेहेराअ खुब वीरुद केअनारें आथें तेबी ख्रीस्त आपुअ खातुर मोअयो। पोरमेहेरांय आपुंहपेअ खुब माया राखीह तीयाअ एज साबीती हाय। 9 ख्रीस्त कुरुसापेअ सोताअ रोगुत पाळीन मोअयो तीयाकींअ पोरमेहेर आपनेंह गुना वोगुराअ जाहेर केअहे। तीयाअ लीदे, आपनेंह आजी वादारे खातरी हाय का, पोरमेहेरांय नोक्की केअली सीक्सामेनेअ * ख्रीस्त आपनेंह वाचावीअ। 10 जांहांअ आपुंह पोरमेहेराअ दुसमोन आथें तांहांअ बी, तीयाअ पोयराअ मोतुकींअ तीयाअरी आपुअ सामादान वीयोंह। तांहांअ आपुंह कायोमाअ खातुर वेठांअ पोळनारी सीक्सामेनेअ कायोम जीवता रेनारा तीया पोयराअ मारफोते * सुटकारो मीलवुंह तों नोक्कीज हायकने? 11 ए खातरी ता भोवीस्याअ बाबोताअ ओतीअज नांह, पेन आमुरी बाबोताअ बी हाय। आमी-आमीअज आपुअ मालीख ईसु ख्रीस्तुअ मारफोते पोरमेहेराअरी आपुअ सामादान वीअ गीयोंह। तीयाअ लीदे, खुस वीईन आपुंह तीयाअ मारफोते पोरमेहेराअ गुणगान केअतेंह।
आदामाअ मारफोते मोत आने ख्रीस्तुअ मारफोते जीवोन
12 एक मांहांय मोंजे आदामुंह पाप केअयो, आने एंहकींअ कीईन बादें मांहेंअ पापी वेरांअ वेजलाअयें। आने आदामुंह पाप केअयो तीयाअ लीदे तो मोअयो। तीयाअ पोरीणामे बादा लोकाहांअ मोत आवेह। काहाका, आदामुंह पाप केअयो तांहांअ बादा लोकाहीं पाप केअयो तेंहडों गोंणाअहे। 13 मोसेअ मारफोते पोरमेहेरांय जे नीयोम देदला, तीयाअ पेअलांअ बी मांहेंअ पाप ता केअत्लेंज। पेन तांहांअ ते नीयोम नांह देवाअया तीयाअ लीदे, पोरमेहेर तीया पापुंहन नीयोम तोळ्या बोराबोर नांय गोंअत्लो। 14 पेन आदामाअ वोखतनेअ मोसेअ वोखत लोगुंअ बादें मांहेंअ पाप कीईन मोय जाहलें। आदामुंह पाप केअलो तीयाअ केअता बीहरी रीते जीया मांहांहां पाप केअया, तें बी मोय जाहलें। आदामुंह केअला पापाअ जों पोरीणाम आललों तों, आने फाचलांअ नेअ आलला ख्रीस्तुंह केअला कामुअ जों पोरीणाम आलों तों, ओमुक बाबोताम हारकों हाय। 15 पेन आदाम आने ख्रीस्त बेनुं एक हारका नांह। काहाका, पोरमेहेर मांहांहांन मोफोतुम जे भेट देहे, ते आदामाअ पापाअ होच नांह। आदामाअ पापाअ पोरीणामे खुब मांहेंअ मोअयें। पेन पोरमेहेराअ मेरबानी ता तीयाअ केअता खुब मोडी हाय। आने तेंहकींअज कीईन, ईसु ख्रीस्तुअ मेरबानीकींअ पोरमेहेर ओताअ बादा मांहांहांन मोफोतुम जे भेट देहे ते बी तीयाअ केअता खुब मोडी हाय। 16 ईयु मोफोत भेटुअ पोरीणाम जुदों हाय। आने आदामुंह केअला पापाअ पोरीणाम जुदों हाय, मोंजे का, तीयांय केअला पापाअ पोरीणामे बादा मांहांहांन तीयाअ सीक्साज मीलली, पेन खुब मांहांहांअ पापाहांअ पोरीणामे जों मीललों तों ता, तीया पापाहांअ सीक्सामेनेअ मीललो सुटकारो हाय। 17 आदामुंह केअला पापाअ लीदे, मांहेंअ जो चोककोस ओनुभोव केअतेंह तो ता, बादा मांहांअल मोत आवेह तोंज हाय। तेबी ईं ता नोक्कीज हाय का, जें मांहेंअ ईसु ख्रीस्तुअ मारफोते पोरमेहेराअ एकदोम खुब मेरबानीअ ओनुभोव केअतेंह आने तो तीयाहांन मोफोतुम गुना वोगुराअ जाहेर केअहे तीयाअ ओनुभोव केअतेंह, तें मांहेंअ होरगाम ख्रीस्तुअरी रीईन तीयाअरी राज कीअ।
18 तीयाअ लीदे, आदामुंह केअला एक पापी कामुअ पोरीणामे जेंहकींअ बादें मांहेंअ सीक्सा मीलवांअ लायोक बोंण्येंह, तेंहकींअ ईसुंय केअला एक हाचा कामुअ पोरीणामे बादें मांहेंअ गुना वोगुराअ बोंणीन कायोमाअ खातुर जीवी सेकतेंह। 19 आदामुंह पोरमेहेराअ आखलों नांय मान्यों तीयाअ लीदे जेंहकींअ बादें मांहेंअ पापी बोंण्येंह, तेंहकींअ ईसुंय पोरमेहेराअ आखलों मान्यों तीयाअ लीदे खुब मांहेंअ गुना वोगुराअ बोंणीअ। 20 मांहेंअ सोते कोतेंअ बादें पापी हाय तों तें जांय सेके तीयाअ खातुर, पोरमेहेरांय नीयोम देदला। पेन जेंहकींअ-जेंहकींअ मांहांहां वादारे ने वादारे पाप केअया, तेंहकींअ-तेंहकींअ पोरमेहेर मांहांहांपेअ तीयाअ केअता वादारे ने वादारे मेरबानी केअतो रीयो। 21 एंहकींअ कीईन, जेंहकींअ पेअलांअ मांहेंअ पाप केअत्लें तीयाअ पोरीणामे मोय जाहलें, तेंहकींअ आमी पोरमेहेर मांहांहांपेअ मेरबानी कीईन तीयाहांन गुना वोगुराअ जाहेर केअहे। तीयाअ पोरीणामे, मांहेंअ आपुअ मालीख ईसु ख्रीस्तुअ मारफोते कायोमाअ खातुर जीवतेंह।