6
ख्रीस्तुअ मारफोते आपनेंह मीलनारों नोवों जीवोन
1 मांयुं आमी जों लेख्योंह ईयापनेअ आपुंह काय होमजुअजी? पोरमेहेर आपुपेअ वादारे ने वादारे मेरबानी केअतो रे तीयाअ खातुर आपुंह वादारे ने वादारे पाप केअतें रेजी का? 2 एंहकींअ ता नांयज बोंणांअ जोजे! जेंहकींअ मोअलों मांहुंअ पापी मोरजीहींकींअ लालचाय नांह जातों, तेंहकींअ आपुंह बी पापी मोरजीहींकींअ लालचायन पाप नांय केअजी! * 3 तुमां नोक्कीज जांअतेंह का, ईसु ख्रीस्तुअरी जोळायांअ खातुर * आपुंह बापतीस्मा लेदों तांहांअ, तीया बापतीस्माअ मारफोते आपुंह बी तीयाअरी मोय गीयें। 4 तीयाअ लीदे, जेंहकींअ होरगामेर्याअ पोरमेहेर बाहकांय सोताअ मोडायुवाली ताकोताकींअ ख्रीस्तुल मोअलामेनेअ जीवतो उठव्यो, तेंहकींअ आपुंह बी नोवी रीते जीवांअ खातुर, तीया बापतीस्माअ मारफोते तीयाअरी मोयन डाटाअयें। 5 जेंहकींअ तो मोअयो, तेंहकींअ आपुंह बी तीयाअरी जोळायन आपुअ जुना जीवोनाअ बाबोताम मोय गीयेंह। तीयाअ लीदे, जेंहकींअ तो जीवतो वीयो, तेंहकींअ आपुंह बी तीयाअरी जोळायन नोवी रीते जीवुंह।
6 आपुंह जांअतेंह का, ख्रीस्त कुरुसापेअ जोळाअयो तांहांअ तीयांय आपुअ जुना पापी सोबावुल ताकोतु वोगुराअ बोंणावी देदो। तीयाअ लीदे, आपुंह पाप केरांअ मोर्जी राखनारा आपुअ सोरीलुंहन पाप केरांअ हुकोम केअनारा पापी सोबावाअ आखलों नांय मानजी। काहाका, आपु आमीनेअ तीया पापी सोबावाअ गुलाम नांह। 7 मोअलों मांहुंअ पापी मोर्जींअ बांदाणुमनेअ जेंहकींअ सुटों वीअ जाहे, तेंहकींअ आपुंह बी पापी मोर्जींअ बांदाणुमनेअ सुटें वीअ गीयेंह। 8 आपुंह ख्रीस्तुअरी मोय गीयेंह। तीयाअ लीदे, आपनेंह वीसवास हाय का तीयाअरी आपुंह नोक्कीज जीवुंह बी।
9 ईयु होकीकोतुअ आपनेंह खातरी हाय। काहाका, पोरमेहेरांय ख्रीस्तुल मोअलामेनेअ जीवतो उठव्यो, आने तो कीदीह बी फाचो मोअनारो नांह। तो मोरांअ बांदाअलो नांह। * 10 तो मोअयो, मोंजे, लोकाहांअ पापाहांअ खातुर तो एकुज वोखत मोअयो। पेन पोरमेहेराअ मोडाय केरांअ खातुरुज * आमी तो जीवतो हाय। 11 तेंहकींअज कीईन तुमां सोते बी एंहकींअ होमजा का, जेंहकींअ मोअलों मांहुंअ पापी मोरजीहींकींअ लालचाअतों नांह, तेंहकींअ तुमां बी पापी मोरजीहींकींअ लालचायन पाप नांय केअनारें बोंण्येंह आने ख्रीस्त ईसुअरी जोळायन पोरमेहेराअ मोडाय केरांअ खातुर नोवी रीते जीवतेंह।
12 तीयाअ लीदे, खाराब मोर्जींअ पोरमाणे चालांअ तुमनेंह दोरवोणी देनारा पापी सोबावुल नास वीअ जानारा तुमांअ सोरीलुंहन तीयाअ काबाम राखांअ मा देतें। 13 तुमांअ सोरीलाहांअ भागुंहन खोटें कामें केरांअ खातुर सादोनें बोंणांअ मा देतें। उलटों, तुमां सोताल मोयन बी जीवनारांअ तोरीके पोरमेहेराल होपा, आने हाचें कामें केरांअ सादोनुंअ तोरीके तुमांअ सोरीलाहांअ भागुंहन तीयालुज होपा। 14 पाप केरांअ मोर्जी तुमनेंह सोताअ काबाम नांय राखांअ जोजे। काहाका, मोसेंय देदला नीयोम * पालांअ आमी तुमां बांदाअलें नांह। पेन उलटों, तुमां तुमाहांपेअ मेरबानी केअनारा पोरमेहेराअ काबाम रेतेंह।
पापाअ गुलामीमेनेअ सुटकारो
15 एंहकींअ वीअ ता, आपुंह काय होमजुअजी? आमी आपुंह मोसेंय देदला नीयोम पालांअ बांदाअलें नांह पेन आपुंहपेअ मेरबानी केअनारा पोरमेहेराअ काबाम हाय तीयाअ लीदे आपुंह पाप केअयाज केअजी का? एंहकींअ बोंणांअज नांय जोजे। 16 तुमां नांह जांअतें का, जेंहकींअ गुलाम सोताअ सेटाहांअ आखलों मानताह, तेंहकींअ तुमां जीयाअ आखलों मानतेंह तीयाअज तुमां गुलाम हाय। तांहांअ जो तुमां सोताल खोटें कामें केरांअ खातुर तुमांअ पापी सोबावुल होपा ता, तीयाअ पोरीणामे तुमां पोरमेहेराअहींनेअ कायोमाअ खातुर जुदें पोळी जाहा। पेन जो तुमां सोताल पोरमेहेराअ आखलों माननारा सेवोकुंअ तोरीके तीयाल होपा ता, तीयाअ पोरीणामे तुमां हाची रीते जीवाह।
17 पेअलांअ तुमां, पापी मोर्जींअ दोरवोणी पोरमाणे पापी कामें केअनारा गुलामुंअ होच आथें। आमी तुमां पोरमेहेराअ सेवोकुहुं तुमनेंह हीकव्योह तीया बोदाअ पोरमाणे पुरा मोनाकींअ चालतेंह। 18 आने आमी आपुंह पापी मोर्जींअ गुलामीमेनेअ सुटकारो मीलवीन हाची रीते जीवनारें पोरमेहेराअ गुलाम बोंण्येंह। तीयाअ लीदे, आंय पोरमेहेराअ आभार मानुंह। 19 तुमांअ जेंहडा सादा-सीदा लोकाहांन बी हेल्ली रीते होमजाय तीयाअ खातुर आंय गुलामुअ दाखलो दीहुं। पेअलांअ तुमां तुमांअ सोताअ सोरीलाहांअ भागुंहन खोटें आने खाराब कामें केरांअ गुलाम बोंणावी देदला। आने तीयाअ पोरीणामे, तुमां वादारे खाराब कामें केअत्लें। पेन आमी पोरमेहेराल होपाअला मांहांहांअ होच तुमांअ जीवांअ जोजे। 20 तुमां पापी कामें केरांअ बांदाअलें आथें तांहांअ तुमनेंह हाची रीते जीवांअ पोळली नांय आथी। 21 पेन जीया कामाहांअ लीदे आमी तुमां नाजवाअतेंह, तें कामें कीईन तांहांअ तुमनेंह काय बी लाब नांह मील्यो। तांहांअ तीयाअ पोरीणाम ता ईं आललों का, तुमां पोरमेहेराअ से कायोमाअ खातुर जुदें वीअ गेहलें। 22 पेन आमी ता पापी मोर्जींअ बांदाणुमनेअ पोरमेहेरांय तुमनेंह सोळव्येंह। आने तुमां पोरमेहेराअ गुलाम बोंण्येंह। तीयाअ पोरीणाम ईं हाय का, पोरमेहेरांय तुमनेंह पोवीतोर बोंणाव्येंह। आने तीयाअ पोरीणामे तुमां कायोमाअ खातुर जीवाह। 23 पाप केअनारें मोजरी तोरीके मोत कामावतेंह। पेन पोरमेहेर भेटी तोरीके मोफोताम जों देहे तों ता आपुअ मालीख ईसु ख्रीस्ताअ मारफोते कायोमाअ जीवोन हाय।