7
वोराळाअ दाखलो
1 मांअ आर्याअ वीसवास्याहां, तुमां नीयोमाहांअ बाबोताम जांअतेंह तीयाअ लीदे तुमनेंह नोक्कीज खोबुर हाय का, मांहुंअ जीवेह तांहांअ तों नीयोमाहांअ बांदाणुम हाय। 2 दाखला तोरीके, सोताअ कोअवालो जीवतो वेअ तांवज कोअवाली तीयाअरी ईमानदार रीईन जोळाअली रांअ नीयोमा पोरमाणे बांदाअली हाय। पेन जांहांअ तीयुअ कोअवालो मोय जाय, तांहांअ ते तीयुअ कोअवालाअरी जोळाअली रांअ नीयोमामनेअ सुटी वीअ जाहे। 3 तीयाअ लीदे, कोअवालो जीवतो वेअ तेबी तीयाअ कोअवाली बीहरा आदमीअरी सोबोंद राखे ता ते सीनालों केअहे एंहकींअ आखाय। पेन कोअवालो मोय जाय तांहांअ ते तीया नीयोमाअ बांदाणुमनेअ सुटी वीअ जाहे, आने हातींअ ते बीहरो कोअवालो केअ तेबी ते सीनालों केअहे एंहकींअ नांय आखाय। 4 तेंहकींअज कीईन, मांअ आर्याअ वीसवास्याहां! ख्रीस्तुल कुरुसापेअ चोळवुअलो तांहांअ आपुंह बी तीयाअरी मोय गीयेंह आने मोसेंय देदला नीयोमाहांअ बांदाणुमनेअ सुटी गीयेंह। आने तीयाअ पोरीणामे, आपुंह ख्रीस्तुअरी जोळाय गीयेंह। तीयाल पोरमेहेरांय मोअलामेनेअ जीवतो केअयोह, ईयाअ खातुर का, आपुंह बी हारा कामाहांकींअ पोरमेहेराअ मोडाय केअजी। 5 आपुंह आपुअ पापी सोबावु पोरमाणे जीवत्लें तांहांअ, आपुंह पोरमेहेराअ वीरुद पाप केअत्लें, आने तीयाकींअ आपुंह पोरमेहेराअ से ओलोग पोळी गेहलें। 6 पेन आमी आपुंह मोसेंय देदला नीयोम पालांअ बांदाअलें नांह। काहाका, तीयाहांअ बाबोताम आपुंह मोय गीयेंह। तीयाअ लीदे, आमी आपुंह पोरमेहेराअ सेवा जुना रीवाजा पोरमाणे मोसेअ नीयोम पालीन नांय, पेन नोवा रीवाजा पोरमाणे पोवीतोर आत्माअ मोदोताकींअ केअतेंह। 7 मोसेंय देदला नीयोम खाराब मोर्जींहन खोटें कामें केरांअ उंह चोळवी देताह। तीयाअ लीदे, ते नीयोम खाराब हाय एंहकींअ आखाय का? नोक्की एंहकींअ ता नांहज! पेन उलटों, तीया नीयोमुंहकींअ आपनेंह आपुअ पापाहांअ भान वेअहे। दाखला तोरीके, “लोब राखोह मा!” एंहकींअ नीयोम मांन नांय आखतो ता, लोब राखुलोंअ पाप हाय एंहडों मांन भान नांय वेअतों। 8 काहाका, तो नीयोम जांयन मांअ मोनाम खुब जातीअ लोब पेदा वीया। पेन जो आंय तो नीयोमुज नांय जांअतो ता, तो पाप केरांअ मोर्जी बी मांअ मोनाम पेदा नांय वेअती। 9 आंय नीयोम जांअया वोगुर जीवत्लो तांहांअ, पापाअ मांन काय पोळलीज नांय आथी। आंय “लोब मा राखोह!” ओ हुकोम जेंहडो उनाअयो का तुरुतुज मांन पापाअ भान वीयों। 10 आने एंहकींअ कीईन मांन भान वीयों का, आंय पोरमेहेराअ से ओलोग पोळी गीयोह। एंहकींअ कीईन, जो नीयोम पालीन पोरमेहेराअरी रेवाय एंहडों आथों, तोज नीयोम आंय पाली नांय सेक्यो, आने एंहकींअ कीईन तो नीयोम मांन पोरमेहेराअ से ओलोग पाळनारो बोंण्यो। 11 पोरमेहेराअ नीयोम पालीन आंय आत्मीक रीते कायोमाअ खातुर रीअ सेकुं एंहडो वीचार मांअ मोनाम पेदा कीईन पापी मोर्जील मांन ठोगांअ मोको मीली गीयो आने तीयु मोर्जींह मांन पोरमेहेराअ से जुदो पाळी देदो। 12 पेन तेबी, पोरमेहेराअ नीयोम ता पुरी रीते पोवीतोर, हाचो, आने हारोज हाय।
13 पोरमेहेराअ नीयोम जो हारो हाय, तीयाकींअ आंय पोरमेहेराअ से जुदो पोळ्यो का? एंहकींअ ता हायज नांह। पेन उलटों, मांन पोरमेहेराअ से जुदो पाळनारो ता पापुज आथो। पोरमेहेराअ हारो नीयोम जांयन मांअ खाराब मोर्जींह तो तोळांअ मांन लालचाव्यो आने एंहकींअ कीईन मांयुं पाप केअयो। तीयाअ पोरीणामे, आंय पोरमेहेराअ से जुदो पोळ्यो। मांअ पापी मोर्जींह एंहडों ईयाअ खातुर केअयों का मांअ मोर्जींअ लुच्चाय जाहेर वेअ। आने एंहकींअ कीईन आंय जांय सेक्यो का, पाप होद वोगुर नोफरोत केरांअ लायोक हाय।
14 आपुंह जांअतेंह का, नीयोम ता पोरमेहेरांय देदला * हाय। तीयाअ लीदे ते हाराज हाय। पेन आंय ता पापी सोबावाअ गुलाम हाय। आने मांअ पापी मोरज्या जेंहकींअ मांन चालवुअत्याह तेंहकींअ आंय चालुंह। 15 खुब वोखत, आंय जों कीअहुं तों मांनुंज नांह होमजाअतों। जों केरांअ मांअ मोर्जी वेअहे तों आंय नांह केअतो, पेन आंय जों नोफरोत कीअहुं तोंज आंय कीअहुं।
16 एंहकींअ कीईन ईं देखाय आवेह का, आंय जो पाप कीअहुं तो केरांअ होकीकोतुम मांअ मोर्जी नांय आथी। आने आंय कोबुल कीअहुं का, पोरमेहेराअ नीयोम हारा हाय। 17 तीयाअ लीदे आंय जो पाप कीअहुं तो, आंय केरांअ मागुंह तीयाअ लीदे नांय। पेन मांअ माज रेनारी पापी मोर्जीज मांन एंहकींअ केरावेह। 18 मांन खोबुर हाय का, मांअ माज काय बी हारों नांह रेतों। मोंजे का, मांअ ओसोल सोबावाअ काय बी हारों नांह रेतों। काहाका, जों हारों हाय तों आंय केरांअ मागुंह तेबी तों आंय कीअ सेकतो नांह। 19 जें हारें कामें आंय केरांअ मागुंह तें आंय नांह केअतो। पेन उलटों, जें खोटें कामें आंय केरांअ नांह मागतो तेंज केअया कीअहुं। 20 जें खोटें कामें आंय केरांअ नांह मागतो तेंज केअया कीअहुं तीयाअ लीदे ईं चोख्खों देखाय आवेह का, तों केअनारो खोरेखोर आंय नांह, पेन मांअ माज रेनारी मांअ पापी मोर्जीज तों मांन केरावेह।
21 तांहांअ मांअ जीवोनाअ ए एक एंहडी होकीकोत हाय का, जांहांअ आंय जों हारों हाय तों केरांअ मागुंह तांहांअ मांअ माज एंहडी एक खोटी मोर्जी हाय का जे मांन हारों केअता रोकेह। 22 मांअ नोवा सोबावु पोरमाणे ता मांन पोरमेहेराअ नीयोम खुब गोंवताह। 23 पेन मांअ माज कायक एंहडों हाय का, जों मांअ मोनाकींअ जों केरांअ आंय मोर्जी राखुंह तीयाअ वीरुद लोळेह आने मांअ सोरीलाम रेनारी पापी मोर्जींअ काबाम मांन राखेह। 24 ईं बादों वीचारता मांन लागेह का, आंय एकदोम कींअवालों मांहुंअ हाय। मांन एंहडा एगाअ जोरुल हाय का, जो मांन मांअ सोरीलाअ पापी मोर्जींअ काबामनेअ सोळवे, ईयाअ खातुर का, आंय पोरमेहेराअ से जुदो नांय पोळुं। 25 आंय पोरमेहेराअ आभार मानुंह का, आपुअ मालीख ईसु ख्रीस्तुअ मारफोते मांन मांअ सोरीलाअ पापी मोर्जींअ काबामनेअ सुटकारो मीली सेकेह। तांहांअ मांअ हालोत ता एंहडी हाय: एक वेल आंय मांअ मोनाकींअ पोरमेहेराअ नीयोम पालांअ मागुंह। पेन बीहरी वेल ता, मांअ ओसोल पापी सोबावाअ लीदे आंय मांअ पापी मोर्जींअ दोरवोणी पोरमाणे चालुंह।