8
पोवीतोर आत्माअ दोरवोणी पोरमाणे आपुंह चालजी!
1 ख्रीस्तुपेअ आपुंह राखला वीसवासाअ लीदे पोरमेहेरांय आपनेंह गुना वोगुराअ जाहेर केअयेंह। तीयाअ लीदे, ख्रीस्त ईसुअरी जोळाअला आपनेंह पोरमेहेर सीक्सा नांय कीअ। 2 काहाका, ख्रीस्त ईसुअ आर्याअ आपुअ जोळाणुअ लीदे आपनेंह खेरों जीवोन देनारा पोवीतोर आत्मांय मांन मांअ ओसोल पापी सोबावाअ मोरज्या पुर्या केरांअ फोरोज पाळनारा नीयोमामनेअ आने पोरमेहेराअ से मांन जुदो पोळांअ हालोतामेनेअ सोळव्योह। 3 पोरमेहेरांय मोसेअ मारफोते देदला नीयोम पालीन आपुंह सोताल आपुअ पापी सोबावाअ काबामनेअ वाचाय नांह सेक्तें। तीयाअ लीदे, आपनेंह तींहमेंनेअ वाचावांअ पोरमेहेरांय जुदीज योज्ना बोंणावीह। मोंजे का, तीयांय तीयाअ सोताअ एकना-एक पोयरा ईसु ख्रीस्तुल मांहांअ सोरील लीईन मोकल्यो। ईसु सोरीलाम आथो तेबी तो पापु वोगुराअ आथो। तीयांय आपुअ पापाहांअ खातुर सोताअ सोरीलाअ भोग देदो आने आपुअ बोदलाम पोरमेहेरांय तीयाल सीक्सा केअयी। 4 आपुंह सोताअ पापी सोबावु पोरमाणे नांय पेन पोवीतोर आत्माअ मोर्जी पोरमाणे जीवीन पोरमेहेराअ नीयोमाम लेखलों बादों पुरों केअजी तीयाअ खातुर पोरमेहेरांय एंहकींअ केअयोंह। 5 सोताअ पापी मोर्जींअ पोरमाणे चालनारा मांहांहांअ मोने तीयाहांअ पापी सोबावुल गोंवनारों केरांअज चोटी रेतेंह। पेन जें पोवीतोर आत्माअ मोर्जी पोरमाणे चालनारा मांहांहांअ मोने ता, पोवीतोर आत्माल गोंवनारों केरांअज चोटी रेतेंह। 6 सोताअ पापी सोबावुल गोंवनारों केरांअ जीया मांहांहांअ मोने चोटी रेतेंह, तें मांहेंअ पोरमेहेराअ से जुदें पोळी जाय। * पेन पोवीतोर आत्माल गोंवनारों केरांअ जीया मांहांहांअ मोने चोटी रेतेंह, तें मांहेंअ पोरमेहेराअरी जीवीअ आने तीयाहांअ जीवोनाहांम सुख-सांती रीअ। * 7 जीया मांहांहांअ मोने तीयाहांअ पापी मोर्जींहन गोंवनारों केरांअ चोटी रेतेंह, तें मांहेंअ पोरमेहेराअ वीरुद केअतेंह। तें पोरमेहेराअ नीयोम नांह पालतें। खोरेखोर ता, ते नीयोम तें पाली बी नांह सेक्तें। 8 तीयाअ लीदे,सोताअ पापी सोबावाअ मोर्जींअ पोरमाणे चालनारें मांहेंअ पोरमेहेराल गोंवनारों कीअज नांह सेक्तें।
9 पेन तुमां ता, सोताअ पापी सोबावाअ मोर्जींअ पोरमाणे नांह चालतें; पेन उलटों, तुमां पोवीतोर आत्माअ दोरवोणी पोरमाणे चालतेंह। काहाका, पोरमेहेर तुमांअ माज रेहे। जीयाअ माज ख्रीस्तुअ आत्मा नांह, तों ख्रीस्तुअ मांहुंअ नांह। 10 पेन जो ख्रीस्त तुमांअ माज रेतो वीअ ता, तुमांअ सोरीलें पापाअ लीदे मोय जाय तेबी, पोरमेहेरांय तुमनेंह गुना वोगुराअ जाहेर केअयेंह तीयाअ लीदे तुमांअ आत्मा ता जीवतोज रीअ। 11 आने ईसुल मोअलामेनेअ जीवतो उठवुअनारो पोरमेहेराअ आत्मा तुमांअ माज वोहती केअहे। मोंजे, ख्रीस्तुल मोअलामेनेअ जीवतो उठवुअनारो तोज पोरमेहेर, तीयाअ आत्माअ मारफोते तुमांअ मोय जानारा सोरीलुंहन बी जोरुल उठवीअ।
12 तांहांअ मांअ आर्याअ वीसवास्याहां, आपुअ ए फोरोज हाय का, आपुंह आपुअ पापी सोबावाअ दोरवोणी पोरमाणे नांय, पेन पोवीतोर आत्माअ दोरवोणी पोरमाणे चालजी! 13 काहाका, जो तुमां तुमांअ पापी सोबावाअ दोरवोणी पोरमाणे चालाह ता, तुमां पोरमेहेराअ से नोक्कीज जुदें पोळी जाहा। पेन पोवीतोर आत्माअ ताकोताकींअ जो तुमां तुमांअ सोरीलुंहन गोंवनारें पापी कामें केरांअ सोळी दीहा ता, तुमां कायोमाअ खातुर पोरमेहेराअरी जीवाह। 14 जें पोरमेहेराअ आत्माअ दोरवोणी पोरमाणे चालतेंह, तेंज पोरमेहेराअ पोयरें हाय। 15 काहाका, पोरमेहेरांय तुमनेंह जो आत्मा देदोह, तो तुमनेंह, सोताअ सेटाल बीनारा गुलामुअ होच नांह बोंणावतो। उलटों, तो आत्मा तुमनेंह पोरमेहेराअ पोयरें बोंणावेह। आने तीया आत्माअ मोदोताकींअ आपुंह पोरमेहेराल “बा! मांअ बाहका!” एंहकींअ हात कीअ सेकतेंह। 16 आने तो आत्मा सोते आपुअ आत्माअरी मीलीन खातरी केरावेह का, आपुंह पोरमेहेराअ पोयरें हायज। 17 आपुंह पोरमेहेराअ पोयरें हाय तीयाअ लीदे, तीयापेअ जे कायोम टीकनारा आसीरवाद हाय ते आपनेंह वारसायु तोरीके मीलीअ। काहाका, ख्रीस्तुंह जों दुख वेठ्योंह तेंहकींअ जो आपुंह बी वेठजी ता, जेंहकींअ तीयाल मोडाय मीलीह, तेंहकींअ आपनेंह बी मोडाय मीलीअ।
भोवीस्यांम आपनेंह मीलनारी मोडाय
18 आंय एंहकींअ वीचारुंह का, आमीर्याअ सोमोयाम आपुंह जें दुखें वेठतेंह, तें भोवीस्यांम पोरमेहेर आपनेंह जे मोडाय दांअ हाय तीयाअ आगलांअ ता कायज नांह। 19 पोरमेहेरांय जों काय बोंणाव्योंह, तों बादों पोरमेहेर सोताअ खेरें पोयरें केडें हाय तों देखावे तीया दीहाअ हुची-हुचीम वाट जोवेह। 20 पोरमेहेरांय बोंणावली बादी वोस्ताहांपेअ एंहडो हाराप पोळ्योह का ते नोक्काम्या बोंणी जाय। ओ हाराप ता तीयु वोस्ताहांअ मोर्जी पोरमाणे नांय, पेन पोरमेहेराअ मोर्जी पोरमाणे पोळ्योह। 21 तेबी, तीयु वोस्ताहांन ए आस्या आथी का एक दीह पोरमेहेर तीयुहुंन नास वेरांअ हालोतामेनेअ सुटकारो दीअ, आने पोरमेहेराअ पोयराहांन जे मोडाय आने सुटकारो मीलीअ, तो तीयुहुंन बी मीलीअ। 22 आपुंह जांअतेंह का, सुटी वेरांअ सोमोये दुखावाअ लीदे कांह्या केअनारी बायाअ होच, पोरमेहेरांय बोंणावल्या बादया वोस्तु बी पोरमेहेराअ मोडाय मीलवांअ आस्या राखीन कांह्या केअत्याह। 23 ते वोस्तु ओत्याअज नांय, पेन आपुंह ख्रीस्ती बी, आपनेंह पोरमेहेराअ पेअली भेटु तोरीके पोवीतोर आत्मा मील्योह तेबी तीयु वोस्ताहांअ होच माजाअ-माज कांह्या केअतेंह। आने पोरमेहेर आपनेंह पुरो होक मीलवुअनारा तीयाअ पोयराहांअ होच बोंणावे तीयाअ आने आपुअ सोरीलुंहन सुटकारो दे तीयाअ आपुंह आस्या राखतेंह। 24 जेहेअनेअ पोरमेहेरांय आपनेंह वाचावलें तेहेअनेअ आपुंह, भोवीस्यांम आपनेंह मीलनारी तीयु मोडायाअ आस्या राखतेंज रेतेंह। एक मांहुंअ केल्ली बी वोस्ताअ आस्या राखे ने ते वोस्तु तीयाल मीली जाय ता, तीयु वोस्ताअ खातुर आजी फाची आस्या राखांअ जोरुल नांह रेती। काहाका, मीली गेहली वोस्ताअ केडों बी आस्या नांह राखतों। 25 पेन आपुंह ता, आजी आपनेंह जों नांह मील्यों तीयाअ आस्या राखतें रीयेंह आने तों मीलवांअ खातुर धीरोज राखीन हुची-हुची वाट जोव्या केअतेंह।
26 एंहकींअज, पोवीतोर आत्मा बी आपुअ नोबलायुम आपनेंह मोदोत केअहे। दाखला तोरीके, केल्ली बाबोताअ खातुर, आने केंहकींअ पोरमेहेराल ओरुज केरांअ जोजे, तीयाअ खातुर आपनेंह बोराबोर सोब्दा नांह झुळता। पेन आपुंह हुंअकाअ खातेंह तांहांअ, पोवीतोर आत्मा सोतेज आपुअ खातुर ओरुज केअहे। 27 आने बादा मोनुंहन पारखुअनारो पोरमेहेर जांअहे का, पोवीतोर आत्मा केल्ली बाबोताम आपुअ खातुर पोरमेहेराल ओरुज केअहे, काहाका पोवीतोर आत्मा पोरमेहेराअ मोर्जी पोरमाणेज पोरमेहेराअ लोकाहांअ खातुर ओरुज केअहे।
28 आने आपुंह जांअतेंह का, पोरमेहेरापेअ माया राखनारांअ जीवोनाम, मोंजे, पोरमेहेरांय जीयाहांन सोताअ ईरादा पोरमाणे हादयेंह तीयाहांअ जीवोनाम जोंबी बोंणे तीयाकींअ पोरमेहेर तीयाहांअ भोलों वेअ तेंहकींअ काम केअहे।
29 जीया लोकाहांन पोरमेहेरांय आगलांअनेअज पोसोंद केअला, तीयाहांन तीयांय तीयाअ पोयरा ईसुअ होच बोंणे एंहडी आगलांअनेअज गोठवोणी बी केअली, ईयाअ खातुर का, खुब पावुह-बोंअयुंहम तो पोयरो मोडांम-मोडो पोयरो वेअ। 30 आने जीया लोकाहांअ बाबोताम पोरमेहेरांय आगलांअनेअज गोठवोणी केअली, तीयाहांन तीयांय हादया बी। जीयाहांन तीयांय हादला, तीयाहांन तीयांय गुना वोगुराअ बी जाहेर केअया। आने जीयाहांन तीयांय गुना वोगुराअ जाहेर केअला, तीयाहांन तो नोक्कीज मोडाय बी दीअ।
ख्रीस्तुअ मारफोते जाहेर वेअनारी पोरमेहेराअ माया
31 ईया बादापनेअ आंय तुमनेंह ईंज आखांअ मागुंह का, पोरमेहेर आपुअ पोकसुम हाय तीयाअ लीदे, केडों बी आपुअ वीरुद नांय वीअ सेके। 32 पोरमेहेरांय सोताअ पोयरा ख्रीस्तुल सोताअ उंगुंम राखी नांय लेदो, पेन आपुअ बादाहांअ भोलायाअ खातुर दीअ देदो। मोंजे, आपनेंह जों जोजे, तों बादों पोरमेहेर आपनेंह नोक्कीज दीअ। 33 पोरमेहेरांय सोतेज पोसोंद केअला आपुंहपेअ पोरमेहेराअ आगलांअ गुनो लागवुअनारों केडों बी आपनेंह नांय जीती सेके। काहाका, तीयांय सोतेज आपनेंह गुना वोगुराअ जाहेर केअयेंह। 34 केडों बी आपनेंह गुनालें नांय आखी सेके। काहाका, ख्रीस्त ईसु सोतेज आपुअ खातुर मोअयो। ओतोंअज नांय, पोरमेहेरांय तीयाल जीवतो बी उठव्यो। आने तो पोरमेहेराअ हुदा आथाअ वेल बोठलो हाय। आने तोज आपुअ खातुर पोरमेहेराल ओरुज बी केअनारो हाय। 35 ख्रीस्तुल आपुंहपेअ माया राखता केडों बी का काय बी रोकीज नांह सेकतों। दुख का, सोतावोणी का, पुख का, ओसें पोतळें का, जोखोम का, तारवाअ। ख्रीस्तुल आपुंहपेअ माया राखता ईं बादों रोकीज नांह सेकतों। 36 पोवीतोर लेखाणाहांम दावीद राजांय जेंहकींअ लेखलों, तीयाअ पोरमाणेज आपुअ जीवोनाम बोंणेह। तीयांय पोरमेहेराल एंहकींअ आख्यों,
“आमां तोअ लोक हाय तीयाअ लीदे, बीहरें मांहेंअ रोददीह आमनेंह माय टाकांअ कोसीस केअतेंह। घेटें ता मारांअ खातुरुज हाय एंहकींअ गोंअनारा खाटकीअ होच, तें मांहेंअ बी आमनेंह गोंअतेंह।”
37 ईं बादों आपुंहपेअ आवी पोळे तेबी आपुंहपेअ माया राखनारा ख्रीस्तुअ मारफोते आपुंह तीया बादापेअ पुरी रीते जीत मीलवुअतेंह। 38 मांन पुरी खातरी हाय का, मोताअ साज्या का, जीवोनाम पोळनार्या मुस्कुल्या का, होरगाअ दुत का, राज केअनारा खाराब आत्मा का, आमीर्याअ सोमोयाम बोंणनारा बोनाव का, भोवीस्यांम बोंणनारा बोनाव का, 39 गोतीवाल्या वोस्तु का, जुगामेर्याअ गोतीवाल्या वोस्तु का, उंडा जागाअ गोतीवाल्या वोस्तु का, पोरमेहेरांय बोंणावलों तीयामेर्योंअ काय बी, पोरमेहेराल आपुंहपेअ माया राखता रोकी नांह सेकतों। आपुअ मालीख ईसु ख्रीस्तुअ मारफोते पोरमेहेरांय देखाव्यों का तो आपुंहपेअ माया राखेह।