9
पोरमेहेरांय पोसोंद केअला लोकाहांअ आत्मीक हालोत
1 तुमां माना का नांय माना, पेन ख्रीस्तुअ सेवोक तोरीके आंय आमी जों आखांअ हाय, तों खेरोंज हाय। आंय झुटों नांह आखतो तीयाअ मांअ सोताअ मोन खातरी देहे। काहाका, पोवीतोर आत्मा मांअ मोनुल दोरवोणी देहे। 2 मांअ जात-भाय येहुदींहमेर्याअ घोणाहां ख्रीस्तुल नांह मान्यो तीयाअ लीदे, आंय खुब दुखी हाय। आने तीया लोकाहांअ खातुर मांअ मोनाम कायोम दुख रेया केअहे। 3 मांअ जातीअ पावु-बोंअयुंहन सुटकारो मीलतो वीअ ता, तीयाअ खातुर आंय पोरमेहेराअ हाराप मीलवीन सोते ख्रीस्तुअ से जुदो वेरांअ बी राजी आथो। 4 ते ईसरायेल लोक पोरमेहेरांय पोसोंद केअला लोक हाय। पोरमेहेरांय तीयाहांन सोताअ पोयरें बोंणावलें। आने तीयाहांअ आगलांअज तीयांय सोताअ मोडाय देखावली। आने तीयाहांअरीज तीयांय कारार केअला। आने तीयाहांनुंज तीयांय नीयोम बी देदला। आने तीयाअ भोकती केरांअ रीत बी तीयांय तीयाहांनुंज देखावली। आने तीयाहांनुंज तीयांय वोचोनें बी देदलें। 5 आने ते लोक आबराहाम, ईसाक, याकोबाअ जेंहडा आगलाअ डायाहांअ वोसुलामेर्याअ हाय। खास कीईन, ख्रीस्त बी मांहुंअ तोरीके तीयाहांअ वोसुलामुज जोनम्यो। तो बादापेअ ओमोल चालवुअनारो पोरमेहेर हाय। कायोम तीयाअ गुणगान केराअता रे! आमेन! 6 मांअ जातीअ ईसरायेल लोकाहांमेर्याअ घोणाहां ख्रीस्तुअ नाकार केअयो। तेबी आंय एंहकींअ नांह धारतो का, आपुअ आगलाअ डायाहांन पोरमेहेरांय देदलों वोचोन नोककामों गीयों वीअ। काहाका, याकोबाअ वोसुलाम जोन्मो लीईन सोताल ईसरायेल लोक आखावनारा बादाहांनुंज काय पोरमेहेर सोताअ खास लोक नांह गोंअतो। 7 तेंहकींअज कीईन, ते आबराहामाअ वोसुलाम जोनम्याह तीयाअ लीदे पोरमेहेर तीयाहांन सोताअ लोक गोंईं लीअ एंहडों बी काय नांह। काहाका, पोरमेहेरांय आबराहामाल एंहकींअ आख्यों, “ईसाकाअहींनेअज तोअ वोसुलो गोंणाय।” 8 ईयाअ ओर्थो ओ हाय का, आबराहामाअ वोसुलाम कुदरोती रीते जोन्मुअला पोयराहांन नांय, पेन उलटों पोरमेहेरांय देदला वोचोनु पोरमाणे जोन्मुअलांहनुंज पोरमेहेर तीयाअ पोयरें आने आबराहामाअ वोसुलाअ मांहेंअ गोंअहें। 9 पोरमेहेरांय आबराहामाल देदलों वोचोन एंहकींअ हाय: “आवता वोरसे ईयाज टेमे, आंय फाचो तोअहीं आवेंह। तांहांअ तोअ कोअवाली सारा एक पोयराल जोन्मो दीअ।”
10 ईयाअ आजी बीहरी बी साबीती हाय। आपुअ आगलाअ डाया ईसाकाअ मारफोते तीयाअ कोअवाली रेबेकाअ एकुज डेडीअ बेन पोयरा जोन्मुअला। 11 बेनुं पोयरा जोन्मुअला तीयाअ पेअलांअ, मोंजे। तीयाहां हारों का खोटों काय बी नांह केअयों तांवज पोरमेहेरांय रेबेकाल आख्यों, “जाता दीहु मोडो पोयरो हानांअ पोयराअ चाकरी कीअ।” ईयापनेअ चोख्खोंज देखाय आवेह का, पोरमेहेर सोताअ गोठवोणी पोरमाणे मांहांहांन पोसोंद कीईन सोताअ ईरादो पार पाळेह। 12 पोरमेहेराअ पोसोंदगीअ आदार ता मांहांहां केअला कामुपेअ नांय, पेन तीयाहांन हादनारा पोरमेहेरापेअज रेहे। 13 तीयाअ लीदे, पोवीतोर लेखाणाहांम बी एंहकींअ लेखलों हाय का, a“मोडा पावुह एसावुअ केअता मांयुं हानोअ पावुह याकोबुपेअ वादारे माया राखी।”
14 ता ईयापनेअ आपुंह काय होमजुअजी? केडाल बी पोसोंद केरांअ बाबोताम पोरमेहेर ओन्याय केअहे एंहकींअ का? नांह, तो ओन्याय नांहज केअतो। 15 काहाका, तीयांय मोसेल आख्यों,
“मांअ पोसोंदगीअ केडापेअ बी आंय मेरबानी केअहें,
आने मांअ पोसोंदगीअ केडापेअ बी आंय दाया केअहें।”
16 तीयाअ लीदे, पोरमेहेर मांहांहांन पोसोंद केअ तीयाअ खातुर तीया मांहांहांअ मेहनोत का मोर्जी काम नांह लागती। पेन पोरमेहेराअ दायाकींअज तों बोंणी सेकेह। 17 काहाका, पोवीतोर लेखाणाहांम लेख्या पोरमाणे मालीख मीसोर देसाअ राजा फारुनुल एंहकींअ आखेह का, “आंय खुब ताकोतावालो हाय तों तुल देखावांअ आने दुन्याअ बादें मांहेंअ मांअ बाबोताम जांएं तीयाअ खातुरुज, मांयुं तुल मीसोरुअ राजा बोंणाव्योह।” 18 तीयाअ लीदे आपुंह आखी सेकतेंह का, पोरमेहेर तीयाअ मोर्जी वेअ तीयापेअ दाया केअहे, पेन तीयाअ मोर्जी वेअ तीयाल टीणीवालो बोंणावेह। दाखला तोरीके, मीसोर देसाअ राजा फारुनुल तीयांय टीणीवालो बोंणावलो।
पोरमेहेराल रोग चोळेह आने तो दाया बी केअहे
19 कादास तुमाहांमेनेअ केडों मांन एंहकींअ आखीअ, “पोरमेहेराअ मोर्जीअ वीरुद ता मांहुंअ काय बी कीअ नांह सेकतों। आने तों जो पाप केअहे तों बी पोरमेहेराअ मोर्जी पोरमाणेज वेअहे ता, तीयाअ लीदे आजी फाचो पोरमेहेर तीया मांहांअल गुनालों गोंएं तों बोराबोर नांय आखाय।” 20 पेन एंहकींअ आखनाराल आंय ईं आखेंह का, “पोरमेहेराल सावाल केअनारो तुं केडों हाय? तुं ता खाली मांहुंअज हाय।” कादुअ बासनों सोताल बोंणावनारा कुंबाराल एंहकींअ नांह फुची सेकतों का, ‘मांन तुंयुं एंहडों काहा बोंणाव्योंह?’ 21 कादुअ एकुज उंडामनेअ खास कामाम वापराअनारों कींमती बासनों आने सीदा-सादा कामाम वापराअनारों सादों बासनों बोंणावांअ कुंबाराल नोक्कीज होक हाय। एंहकींअज कीईन, पोरमेहेरांय आपनेंह बोंणाव्येंह तीयाअ लीदे, आपुअ खातुर तीयाअ जो ईरादो हाय तो पुरो केरांअ पोरमेहेराल बी पुरो होक हाय।
22 काहाका, पोरमेहेराल मांहांहांअ पापाअ लीदे तीयाहांपेअ रोग चोळीह, आने पाप केअनाराहांन सीक्सा केरांअ तो ताकोतावालो हाय तों देखावी दांअ तीयाअ मोर्जी आथी। तेबी, जीयाहां तीयाल रोग चोळवावी ने तेंहकींअ कीईन तें नास वेरांअ लायोक बोंण्येंह, तीयाहांअ तीयांय बादों धीरोज राखीन वेठी लेदों। 23 तीयांय ईयाअ खातुर धीरोज राखली का, जीया लोकाहांपेअ दाया राखांअ तीयाअ मोर्जी आथी, आने जीयाहांन होरगाम मोडाय मीलवीन जीवांअ खातुर पेअलांअनेअज तीयांय तीयार केअयेंह, तीया लोकाहांन तो सोताअ मोडाय चोख्खी रीते देखावे। 24 सोताअ मोडाय देखावांअ तीयार केअला आपुंहम येहुदी लोक बी हाय आने येहुदी जातीअ नांह तेंहडी बीहरी जातीअ लोक बी हाय। 25 होसेयांह देदली भोवीसवाणी अ चोपळीम, येहुदी जातीअ नांह तेंहडी बीहरी जातीअ लोकाहांअ बाबोताम पोरमेहेराल एंहकींअ आखता नोंदलो हाय का,
“जे मांअ लोक नांय आथा
तीयाहांन आंय ‘मांअ लोक’ एंहकींअ आखेंह।
आने जीया लोकाहांपेअ मांयुं पेअलांअ माया नांह राखी,
तीयाहांन आमी आंय ‘मांअ मेराला लोक’ एंहकींअ आखेंह।”
26 आने तींहीं एंहकींअ बी नोंदलो हाय का,
“पेअलांअ मांयुं तीयाहांन एंहकींअ आखलों,
‘तुमां मांअ लोक नांह,’
पेन आमी तो तीयाहांन आखीअ,
‘तुमां कायोम रेनारा खुब ताकोतावाला पोरमेहेराअ पोयरें हाय।’”
27 आने पोरमेहेराअ गोठ जाहेर केअनारा येसायांय ईसरायेल लोकाहांअ बाबोताम एंहकींअ लेख्योंह का,
“ईसरायेल लोक दोरीयाअ तोळीपेरीअ रेटीअ होच खुब वीअ तेबी,
तीयाहांमेर्याअ थोळाकाहांनुंज पोरमेहेर वाचावीअ।
28 काहाका, तीयाहांन मालीख माहरीज आने पुरी रीते सीक्सा दीअ।”
29 आने येसायांय सोताअ चोपळीम बीहरी जागे एंहडों लेख्योंह का,
“खुब ताकोतावालो मालीख,
आपुअ वोसुलो हाचवी नांय राखतो ता,
सोदोम आने गोमोरा सेहेराहांअ लोकाहांअ होच
आपुंह बी पुरी रीते नास वीअ जातें।”
ईसरायेल लोक आने ख्रीस्तुअ बाबोताअ हारी गोठ
30 तांहांअ ईयापनेअ आपुंह एंहकींअज आखी सेकतेंह का, येहुदी जातीअ नांह तेंहडा लोकाहीं गुना वोगुराअ बोंणांअ मेहनोत नांह केअयी तेबी तीयाहांअ वीसवासाअ लीदे पोरमेहेरांय तीयाहांन गुना वोगुराअ जाहेर केअयाह। 31 पेन ‘मोसेंय देदला नीयोम आपुंह पालजी ता पोरमेहेर आपनेंह गुना वोगुराअ जाहेर कीअ’ एंहकींअ वीचारीन येहुदी लोक ते नीयोम पालांअ कोसीस केअत्ला तेबी ते नीयोम ते पाली नांय सेक्या। 32 ईयाअ कारोण ईं हाय का, पोरमेहेर तीयाहांन गुना वोगुराअ जाहेर केअ तीयाअ खातुर ते लोक ख्रीस्तुपेर्याअ वीसवासुपेअ आदार नांह राखता, पेन तीयाअ खातुर ते सोताअ हारा कामुंहपेअ आदार राखत्ला। ख्रीस्त मोय सेके ते गोठ तीया लोकाहांअ गोले नांय उती। मोंजे, ढोगळाअरी ठोकायन फाचों पोळी जानारा एक मांहांअ होच ते तीयापेअ वीसवास राखांअ फाचा पोळी गीया। 33 ईयु बाबोताम पोरमेहेरांय पोवीतोर लेखाणाहांम तीयाहांन एंहडी चेतवोंणी देदली का,
“उनाया! जीयाअरी ठोकायन मांहेंअ पोळी जाय एंहडा ढोगळाअ होच,
आने मांहांहांन पाळी टाकनारा खोळकाअ होच,
येहुदीहींअ नीसमें आंय एक जांअहांल थोवुंह।
पेन जे लोक तीयापेअ वीसवास राखीअ,
तीयाहांन नाजवायांअ वोखत नांय आवे।”