10
1 मांअ आर्याअ वीसवास्याहां! मांअ सोताअ येहुदी जातीअ लोकाहांन पोरमेहेर वाचावे, एज मांअ मोनुअ मोर्जी हाय आने पोरमेहेराल मांअ ओरुज बी हाय। 2 तीयाहांअ बाबोताम आंय एंहडी साक्सी दीअ सेकुंह का, ते पुरा मोनाकींअ पोरमेहेराअ होदणी केअताह। पेन तीयाल केंहकींअ मीलवुलोंअ तीयाअ खेरी रीत ते नांह जांअता। 3 काहाका, मांहांअल पोरमेहेर केंहकींअ गुना वोगुराअ जाहेर केअहे, तों ते जांणांअ नांह मागता। तीयाअ लीदे, गुना वोगुराअ जाहेर वेरांअ ते पोता-सोताअज कोसीस केअत्ला। आने मांहांअल गुना वोगुराअ जाहेर केरांअ खातुर पोरमेहेरांय जो मारोग बोंणाव्योह, तो तीयाहां नांय मान्यो। 4 गुना वोगुराअ जाहेर वेरांअ खातुर मोसेअ देदला नीयोमाहांअ पोरमाणे चालांअ जोजे एंहडी जे रीत आथी, ते ख्रीस्तुंह बोंद पाळीह। तीयाअ पोरीणामे, आमी ख्रीस्तुपेअ वीसवास राखनारा बादाहांन पोरमेहेर गुना वोगुराअ जाहेर कीअ।
पापाहांअ सीक्सामेनेअ वाचायांअ पोरमेहेरांय तीयार केअलो मारोग बादाहांअ खातुर हाय
5 पोरमेहेराअ नीयोम पालीन मांहेंअ केंहकींअ गुना वोगुराअ जाहेर वेअतेंह तीया बाबोताम मोसेंय एंहकींअ लेख्योंह, “तीया नीयोमाहांअ पोरमाणे पुरी रीते चालनारा मांहांअल खेरों जीवोन मीलीअ।” 6 पेन वीसवासुकींअ गुना वोगुराअ जाहेर वेअनारे मांहेंअ एंहकींअ आखी सेकतेंह का, “ख्रीस्तुल होरगामेनेअ एठा लावांअ खातुर होरगाम जांअ तोअ जोरुल नांह” आने 7 “ख्रीस्तुल मोअलामेनेअ जीवतो उठवी लावांअ खातुर एठा पाताळाम उतांअ बी तोअ जोरुल नांह।” 8 पोवीतोर लेखाणाहांम ख्रीस्तुपेअ वीसवास राखांअ बाबोताम आजी बीहरे एंहकींअ लेखलों हाय का, “ए गोठ तुमांअ जागेज हाय। तुमांअ बोलीम हाय।” 9 ते गोठ ए हाय: “ईसुज मालीख हाय,” एंहकींअ जो तुं तोअ मुंयें जाहेर रीते कोबुल क्योव, आने “पोरमेहेरांय तीयाल मोअलामेनेअ जीवतो केअयोह” एंहकींअ तोअ पुरा मोने मानो ता, तो तुल वाचावीअ। 10 एंहडा पुरा मोनाकींअ केडों बी मानीअ ता, पोरमेहेर तीयाल गुना वोगुराअ जाहेर कीअ। आने केडों बी एंहकींअ कीईन कोबुल कीअ ता, पोरमेहेर तीयाल तीयाअ पापाहांअ सीक्सामेनेअ वाचावीअ। 11 पोवीतोर लेखाणाहांम बी ख्रीस्तुअ बाबोताम एंहकींअ लेखलों हाय का, “जोंबी तीयापेअ वीसवास राखेह, तीयाल पोरमेहेरांय जोंबी दांअ वोचोन देदोंह तों बादों मीलीअ!” 12 ईंहमें येहुदी वेअ का हातींअ येहुदी जातीअ नांह तेंहडा वेअ; पोरमेहेर ता बादाहांन हारकोज गोंअहे। तीयापेअ वीसवास राखनारा बादाहांअ मालीख एकुज हाय। तीयाअ लीदे, तीयापेअ मागनारा बादाहांन तो सुटा आथे आसीरवाद दीअ। 13 ईं बादों, पोवीतोर लेखाणाहांम जों लेख्योंह, तीयाअ पोरमाणेज हाय। तींहमें लेख्योंह का, “मालीखाअ नांव लीईन ओरुज केअनारा बादाहांन तो तीयाअ पापाहांअ सीक्सामेनेअ वाचावीअ।”
14 ख्रीस्तुपेअ तीयाहां वीसवास नांय केअयो वीअ ता, सोताल वाचावांअ ते तीयापेअ केंहकींअ मागणी कीअ सेके? ते ख्रीस्तुअ बाबोताम उनाअयाज नांय वीअ ता, ते तीयापेअ केंहकींअ वीसवास कीअ सेके? जो केडों बी तीयाहांन ख्रीस्तुअ बाबोताम जाहेर नांय केअ ता, ते तीया बाबोताम केंहकींअ उनाय सेके? 15 ख्रीस्ताअ बाबोताम जाहेर केअनाराहांन केडों नांय मोकले ता, ते केंहकींअ जाहेर कीअ सेके? तीयाअ लीदेज, पोवीतोर लेखाणाहांम एंहडों लेखलों हाय का, “हारी गोठ आखनारा आवताह तों खुब खुसी देनारों हाय।” a 16 ईसरायेल लोकाहीं बादाहां ज ते हारी गोठ मानीह एंहकींअ ता नांह। ईयु बाबोताम येसायांय बी मालीखाल आख्योंह, ‘ओ मालीख, जे गोठ आमां आखीह, ते केडांय बी नांह मानी।’ 17 एंहकींअ कीईन ख्रीस्तुअ बाबोताअ गोठ मांहेंअ उनाय तांहांअज, मांहेंअ ख्रीस्तुपेअ वीसवास कीअ सेके। आने तीयाअ बाबोताअ गोठ तीयाहांन केडों आखे तांहांअज, तें ते गोठ उनाय सेके।
18 पेन “ईसरायेल लोकाहीं ख्रीस्तुअ बाबोताम ते गोठ होकीकोतुमुज नांह उनाअयी का?” एंहकींअ एगोंह फुचे ता आंय तीयाल एंहकींअ आखुं का, “नोक्कीज तीयाहां ते गोठ उनाअयीज।” पोवीतोर गीतुंअ चोपळीम एंहकींअ लेखलों हाय का,
“पोरमेहेराअ बाबोताम तीयांय बोंणावल्या वोस्तु जे गोठ जाहेर केअत्याह,
ते आखी दुन्याम पोची गीयीह।
आने तीयुअ बाबोताम ते जे गोठ आखत्याह,
ते दुन्याअ खुणे-खुणे रेनारा बादा लोकाहांअहीं पोची गीयीह।”
19 पेन एगोंह एंहकींअ फुचे का, “ईसरायेल लोक ते गोठ होमज्या नांय वीअ का?” आंय तीयाल एंहडो जोवाब द्युंव का, “नोक्कीज ते गोठ ते होमज्याज वीअ, पेन तीयाअ पोरमाणे चालांअ तीयाहां मोर्जी नांह राखी। काहाका पोरमेहेराअ होदणी नांय केअनारा येहुदी जातीअ नांह तेंहडा लोक बी ते गोठ होमजी गेहला।” ईयु बाबोताम पेअलांम-पेअलोअ भोवीसवाणी केअनारो मोसे आथो। पोरमेहेरांय ईसरायेल लोकाहांअ बाबोताम जों आखलों तीया बाबोताम तीयांय एंहकींअ लेख्योंह,
“जे जातुज नांह गोंणाअती एंहडा येहुदी जातीअ नांह तेंहडा लोकाहांन आसीरवाद दीईन
आंय तुमनेंह तीयाहांपेअ आदराय आवे एंहडों केअहें।
जीयाहांन तुमां ओकली वोगुराअ गोंअतेंह एंहडा येहुदी जातीअ नांह तेंहडा लोकाहांन आसीरवाद दीईन
आंय तुमनेंह तीयाहांपेअ रोग चोळे एंहडों केअहें।”
20 आने पोरमेहेरांय जों आखलों तीया बाबोताम येसाया बी एकदोम हींमोत राखीन लेखेह का,
“जे मांन मीलवांअ नांह मागता,
तेंहडा येहुदी जातीअ नांह तेंहडा लोकाहांन आंय नोक्कीज मीलेंह;
जे मांन ओअखांअ नांह कोसीस केअता,
तेंहडा लोकाहांअ आगलांअ आंय सोताल जाहेर केअहें।”
21 पेन ईसरायेल लोकाहांअ बाबोताम पोरमेहेरांय जों आखलों तों, येसायांय एंहकींअ कीईन लेख्योंह,
“जे लोक मांअ आखलों नांय मानीन मांअ खुब वीरुद केअया केअत्ला,
तीयाहांन आवकारांअ खातुर आंय कायोम मांअ आथ लांबावी रीयोह।”