11
येहुदी लोकाहांअ खातुर पोरमेहेराअ गोठवोणी
1 तांहांअ “पोरमेहेरांय ईसरायेल लोकाहांन सोळी थोव्याह का?” एंहकींअ जो एगोंह फुचे ता, आंय तीयाल आखुं का, “एंहकींअ ता नांह! मांअ बाबोताम वीचार केअ! आंय बी ईसरायेल लोकाहांमेर्योअज हाय। आंय आबराहामाअ वोसुलामेर्योअ आने बीन्यामीनुअ कुळामेर्योअ हाय। तेबी पोरमेहेरांय मांन सोळी नांह देदो।” 2 नांह! पोरमेहेरांय खुब वोखत पेअलांअज पोसोंद केअला सोताअ लोकाहांन सोळी नांह देदा। ईसरायेल लोकाहांअ बाबोताम एलीया पोरमेहेराल फोरीयाद केअहे ते गोठ पोवीतोर लेखाणाहांम लेखली हाय ते ईत केरा! तींहीं एंहकींअ लेखली हाय का, 3 “ओ मालीख, तुंयुं जाणावल्या गोठ्या जाहेर केअनाराहांन बादाहांन तीयाहां माय टाक्याह। आने तुल भोग चोळवांअ खातुर आथ्या ते वेदया बी तीयाहां तोळी टाक्याह। आने आंय एखलोज जीवतो रीयोह। आने आमी तें मांन बी माय टाकांअ कोसीस केअतेंह।” 4 तांहांअ पोरमेहेरांय तीयाल काय जोवाब देदलो तों ईत केरा! तीयांय एंहडो जोवाब देदलो का,
“मांअपेअ वीसवास केअनारो तुं एखलोज हाय एंहकींअ मा धारतो! तोअ सीवाय ने बीहरें सांत हाजार मांहेंअ आजी बी मांयुं हाचवी राख्येंह। तीयाहां बाल नांवांअ खोटा देवुअ a भोकती नांह केअयी।”
5 तीयाअ लीदे, तांहांअ जेंहकींअ वेअलों तेंहकींअज कीईन आमी बी वीयोंह। आमी बी आमांअ येहुदींहमनेअ एंहडा थोळाक हाय का, जीयाहांन पोरमेहेरांय सोताअ मेरबानीकींअ सोताअ लोक वेरांअ पोसोंद केअयाह। 6 आने पोरमेहेरांय तीयाअ लोक बोंणांअ आपनेंह पोसोंद केअयाह। तीयाअ आदार आपुंह केअलें हारें कामें नांह, पेन तीयाअ मेरबानीज हाय। जो तीयाअ आदार आपुअ हारा कामुंहपेअ वीअ ता, तीयुल मेरबानीज नांय आखाय। 7 पोरमेहेरांय ईसरायेल लोकाहांमेनेअ थोळाकाहांनुंज पोसोंद केअयाह। तीयाअ लीदे, आपुअ ईं होमजांअ जोजे का, गुना वोगुराअ जाहेर वेरांअ ईसरायेल लोक जीयाअ हुची-हुचीम वाट जोवत्ला तों तीयाहांमेर्याअ घोणांहन नांह मील्यों। पोरमेहेरांय पोसोंद केअला ईसरायेल लोकाहांनुंज तों मील्यों, पेन बीहरा ईसरायेल लोक बेरजाय गीयाह। 8 ईं ता बादों पोवीतोर लेखाणाहांम लेख्या पोरमाणेज बोंण्योंह। तींहीं एंहकींअ लेखलों हाय का,
“पोरमेहेरांय तीयाहांअ बुददी काची बोंणावी देदीह।
आने तीयाहांअ डोंआं हाय पेन तें आत्मीक रीते हीअ नांह सेकतें आने होमजी नांह सेकतें।
आज लोगुंअ तें तीयुज हालोताम हाय।”
9 ईं ता, सोताअ दुसमोनाहांअ हालोत एंहडी बोंणावांअ पोरमेहेरापेअ मागणी केअता दावीद राजांय जों आखलों, तीयाअ पोरमाणेज हाय। दावीदांय आखलों,
“तीयाहांअ मांडोज तीयाहांअ खातुर फांदाअ होच बोंणे एंहकींअ तुं केअजे।
तो एंहडा फांदाअ होच बोंणे का, जो तीयाहांन एंहकींअ वीचारतें केअ का बादों हारोंज चालेह।
तीयाहांन मीलला आसीरवादुज तीयाहांन आत्मीक रीते पाळी टाके एंहडों बी तुं केअजे।
10 तुं तीयाहांअ आत्मीक होमजोण काची बोंणावी देजे,
ईयाअ खातुर का, तें आत्मीक रीते काय बी जांय ने होमजी नांय सेके;
आने तें सोताअ टोंगुंहपेअ खुब वोजो उसलुअतेंज रे एंहडों केअजे।”
11 कादास एगोंह ओ सावाल फुचीअ का, “ईसरायेल लोक कायोमाअ खातुर पोरमेहेराअ से ओलोग पोळी गीयाह का?” आंय तीयाल आखुं का, “एंहकींअ ता नांहज।” पेन तीयाहां पाप केअयो तीयाअ पोरीणामे पोरमेहेर, जें येहुदी नांह तीयाहांन वाचावेह, ईयाअ खातुर का, तीयाहांन देखीन तीया येहुदीहींन आदराय आवे आने तीयाहांन बी तीयु रीते वाचाय जांअ मोर्जी पेदा वेअ। 12 मोंजे, येहुदी लोकाहीं पाप केअयो तीयाअ पोरीणाम ईं आलों का, पोरमेहेरांय दुन्याअ बीहरा लोकाहांन सुटा आथे आसीरवाद देदो। आने येहुदीहीं पोरमेहेरांय देदला तारोणुअ भेटुअ धीककार केअयो। तांहांअ तीयांय येहुदी जातीअ नांह तेंहडा लोकाहांन सुटा आथे आसीरवाद देदो ता, येहुदी लोक ख्रीस्तुपेअ वीसवास राखता वीअ ता, तीयाअ पोरीणाम हारोंज आवीअ। 13 आमी आंय ता येहुदी नांह तेंहडा लोकाहांअ खातुर मालीखाअ खास चेलो हाय। तीयाअ लीदे आंय तीया कामुल खुब मानुवालों गोंअहुं। 14 पेन आंय आस्या राखुंह का, मांअ तीया कामुकींअ मांअ जातीअ लोकाहांम आदराय पेदा वेअ आने तीयाअ पोरीणामे तीयाहांमेर्याअ थोळा-घोणांहन पोरमेहेर वाचावे। 15 पोरमेहेरांय मांअ जातीअ लोकाहांन धीक्कार्या तीयाअ लीदे दुन्याअ बीहरा लोकाहांन तीयांय सोताअरी मेल-मीलाप केअयोह ता, जांहांअ तो तीयाहांन फाचो सोताअ लोकाहांअ तोरीके मानी लीअ तीयाअ पोरीणाम ता हारोंज आवीअ। तों आमांअ ते लोक मोअलामेनेअ फाचा जीवता वीया एंहडों वीअ। 16 जेंहकींअ मांहेंअ मोगलुअला नोटामनेअ पेअला उंडाअ बोंणावलो मांडो पोरमेहेराल चोळवे ता तो मोगलुअलो आखो उंडोज पोरमेहेराअ वेअहे तेंहकींअ, येहुदी लोक बी पोरमेहेराअ सोताअ बोंणीअ। काहाका, तीयाहांअ आगलेंअ डायें पोरमेहेराअ सोताअ आथें। आने जेंहकींअ चाळाअ मुलों हारों वेअ ता तीया चाळाअ डालख्या बी हार्याज रेनार्या, तेंहकींअज आपुअ आगलेंअ डायें पोरमेहेराअ सोताअ लोक आथा तीयाअ लीदे, तीयाहांअ वोसुलाअ लोक, मोंजे आमीर्याअ येहुदी लोक बी पोरमेहेराअ सोताअ लोक बोंणीअ।
17 होकीकोतुम ए गोठ एंहकींअ हाय। जेंहकींअ मांहेंअ फोलवावाला चाळापेनेअ ओमुक डालख्या होरी टाकतेंह आने तीयु डालखींअ जागे जोंगली फोलवावाली एक डालखील कोलोम केअतेंह तांहांअ ते जोंगली फोलवावाली डालखी ओसोल फोलवावाला चाळाअ रोहुकींअ मोडी वेअहे, तेंहकींअ पोरमेहेरांय आबराहामाअ वोसुलामेर्याअ ओमुक लोकाहांन सोळी देदला आने तुमां जे येहुदी नांह ते जोंगली फोलवावाली डालखींअ होच आथा तीयाहांन तीयांय आबराहामाअ वोसुलाम जोळी लेदला आने येहुदी आगलाअ डायाहांन जे आसीरवाद मीलला तीयाअ लाब तुमनेंह बी मील्योह। 18 पेन ओ येहुदी जातीअ नांह तेंहडा लोकाहीं! तीयु वाडी टाकली डालखींअ होच पोरमेहेरांय सोळी देदला येहुदी लोकाहांन तुमां धीक्कारता मा! आने पोरमेहेरांय तुमनेंह सोताअ लोकाहांअ तोरीके मानी लेदाह तीयाअ ओभीमान बी मा राखता! जो तुमां ओभीमान राखाह ता, ईत केरा का, जेंहकींअ डालखी मुलाल नांह पोहती पेन उलटों, मुलोंज डालखील पोहेह, तेंहकींअ तुमांअ मारफोते येहुदीहींन नांय पेन येहुदीहींअ मारफोते तुमनेंहज आसीरवाद मील्याह। 19 कादास तुमाहांमेनेअ केडों बी एंहकींअ आखे का, “कोलोम कीईन बीहरा चाळाअरी जोळली डालखींअ होच, पोरमेहेरांय आमनेंह येहुदी जातीअ नांह तेंहडा लोकाहांन सोताअ लोकाहांअ तोरीके मानी लांअ खातुरुज ओसोल चाळुमनेअ वाडी टाकली डालखींअ होच तीयांय येहुदी लोकाहांन सोळी देदाह।” 20 तीयाअ गोठ बोराबोर हाय! पेन तीया येहुदी लोकाहीं ईसुल ख्रीस्त तोरीके नांह मान्यो तीयाअज लीदे पोरमेहेरांय तीयाहांन सोळी देदला आने तुमां तीयाल तेंहकींअ मान्योह तीयाअज लीदे, तुमां मोजबुत बोंण्याह। तीयाअ लीदे, तुमां ओभीमान मा राखाह! पेन उलटों, पोरमेहेराअ बीख राखीन चाला! 21 चाळाअ ओसोल डालखींअ होच आथा तीया येहुदी लोकाहांन पोरमेहेरांय सीक्सा केअया वोगुर नांह सोळ्या ता, तुमां वीसवासामनेअ पोळी जा ता, तुमनेंह बी पोरमेहेर सीक्सा केअया वोगुर नांय सोळे। 22 ईत राखजा का, पोरमेहेर दायालो हाय, पेन आरी-आरी तो कोळोक बी हाय। ईसुल नांय माननारा येहुदीहींअरी तो कोळोक रीते वोरत्योह। पेन जो तुं तीयाअ दायाअ कींमोत होमजीन रीहो तांहांअज, तोअरी बी तो दायालु रीते वोरतीअ। पेन जो तुं ईसुपेअ वीसवास राखांअ सोळी दीहो ता, जेंहकींअ डालखील चाळापेनेअ मांहेंअ वाडी टाकतेंह, तेंहकींअ पोरमेहेर तुल बी तीयाअ सोंगोतुमनेअ काडी थोवीअ। 23 आने जेंहकींअ वाडी टाकली डालखींहन फाचें चाळाअरी जोळीन कोलोम केअतेंह, तेंहकींअ येहुदी बी ईसुल मानीअ ता, फाचें तें पोरमेहेराअरी जोळाय जाय। काहाका, तीयाहांन फाचें सोताअरी जोळी लांअ पोरमेहेरापेअ ताकोत हाय। 24 कुदरोती रीते जों जोंगली जेतुन चाळ हाय तीयामेनेअ डालख्या वाडीन जेंहकींअ कुदरोतुअ वीरुद हारा जेतुन चाळाअरी जोळीन कोलोम कीअ सेकतेंह, तेंहकींअ तुमां जे येहुदी जातीअ नांह पेअलांअ पोरमेहेराअ से सेटे आथा। पेन आमी तुमां ईसुल मान्योह तीयाअ लीदे, येहुदीहींन पोरमेहेरांय देदला आसीरवादुंअ लाब तुमनेंह बी मील्योह। ता येहुदी ता पेअलांअनेअ पोरमेहेराअरी जोळाअलाज आथा, पेन फाचलांअ नेअ ईसुल नांय मानीन ते सुटा पोळला ता, तीया फोलवावाला चाळाअ ओसोल डालखींहन जेंहकींअ फाचे तीयाज चाळाअरी जोळी सेकतेंह, तेंहकींअ पोरमेहेराअरी तीया येहुदी लोकाहांन फाचा जोळांअ एकदोम हेल्लों हाय।
ईसरायेल लोकाहांन पोरमेहेर तीयाहांअ पापाहांअ सीक्सामेनेअ वाचावीअ
25 मांअ मेराला पावु-बोंअयुहुं, ए हाचाय तुमनेंह आंय जाणावांअ मागुंह। ते हाचाय पोरमेहेरांय केडाल बी नांह जाणावी। तुमनेंह जाणावांअ ईयाअ खातुर आंय मोर्जी राखुंह का, “आमी येहुदीहींअ केअता पोरमेहेर आमाहांपेअ वादारे माया राखेह” एंहडों तुमां ओभीमान नांय राखा। ते हाचाय ए हाय का, खुब येहुदी लोक “आमां ईसुल नांयज मानजी!” एंहडी टीणी तीअ रीयाह। ते ता, येहुदी जातीअ नांह तेंहडा जोताअ बी लोकाहांन पोरमेहेरांय पोसोंद केअयाह ते बादा पोरमेहेराअहीं आवी जाय तांव लोगुंअज, टीणी तीअ रीअ। 26 आने हातींअ ता, बादा ईसरायेल लोकाहांन पोरमेहेर वाचावी लीअ। ईयु बाबोताम पोरमेहेराअ गोठ जाहेर केअनाराहां जों आख्योंह तों तुमनेंह ईत हाय का? तीयाहां एंहकींअ आख्योंह,
“झीयोनुमनेअ, मोंजे येरुसालेमामनेअ वाचावनारो एक पेदा वीअ।
तो याकोबाअ वोसुलामेर्याअ लोकाहांअ खोटाय दुर कीअ दीअ।
27 आने हातींअ आंय तीयाहांअरी ओ कारार केअहें का,
आंय तीयाहांअ पाप माफ केअहें।”
28 येहुदी लोकाहीं ख्रीस्तुअ बाबोताअ हारी गोठीअ नाकार केअयो तीयाअ लीदे पोरमेहेर तीयाहांअरी दुसमोनाअ होच वोरतेह आने तीयाअ फायदो तुमनेंह मील्योह। तेबी, पोरमेहेरांय तीयाहांअ आगलाअ डायाहांन जों वोचोन देदोंह तीयाअ लीदे आजी बी तो तीयाहांपेअ माया राखेहज। तो ता तीयाअ पोसोंदगीअ लीदे तीयाहांपेअ माया राखेह। 29 काहाका, येहुदीहींन सोताअ लोक बोंणावांअ खातुर पोसोंद केरांअ बाबोताम, आने तीयांय तीयाहांन जे खास होक देदाह तीयाहांअ बाबोताम, तीयांय सोताअ वीचार बोदल्याज नांह। 30 पेअलांअ तुमां पोरमेहेराअ आखलों नांय माननारा आथा। पेन येहुदीहीं पोरमेहेराअ आखलों नांय मान्यों तीया कारोणे, आमी तीयांय तुमाहांपेअ दाया केअयीह। 31 तीयुज रीते, तुमां पेअलांअ केअत्ला तेंहकींअज येहुदी बी आमी पोरमेहेराअ आखलों नांह मानता। आने तीयाअ पोरीणामे, तीयांय तुमाहांपेअ दाया केअयीह। तेंहकींअज तीयाहांपेअ बी तो दाया कीअ। 32 काहाका, पोरमेहेरांय येहुदीहींन आने जे येहुदी नांह तीयाहांन, आखलों नांय माननारा बोंणांअ देदाह, ईयाअ खातुर का, तो तीयाहांन बादाहांन दाया देखावे।
पोरमेहेराअ गीयान ने बुददीअ लीदे पावुल तीयाअ गुणगान केअहे
33 पोरमेहेरांय खुब मोडें आने गीयानुवालें कामें केअयेंह। तीयाल बादी बाबोतीहींअ जाणकारी हाय। तीयांय केडों बी होमजी नांय सेके एंहड्या बाबोत्या नोक्की केअयाह आने केडों बी होमजी नांय सेके एंहकींअ तो आपुअरी वोरतेह। ईं बादों वीचारीन आंय एकदोम बोगलाय जेअ गीयोह। 34 ईयु बाबोताम पोवीतोर लेखाणाहांम बी एंहकींअ लेखलों हाय का, “पोरमेहेराअ वीचार केडांय बी नांह जांअया। तीयाअ काय केरांअ जोजे तीया बाबोताम तीयाल केडांय बी सालाह नांह देदी। 35 केडाल काय बी फाचों वाली दांअ पोरमेहेर बांदाअलो नांह। काहाका, तीयाल केडांय बी काय बी नांह देदों।”
36 आपुंह जांअतेंह का, ईं खेरोंज हाय। काहाका, पोरमेहेरांय बादी वोस्ताहांन बोंणाव्याह आने तीयुहुंन टीकवी राख्याह। तीयाअ पोरमाणेज ते हायाताम हाय, ईयाअ खातुर का, ते तीयाअ गुणगान केअ। तीया पोरमेहेरालुज बादें मांहेंअ कायोम मान देतें रे! आमेन!