12
ख्रीस्ती जीवोन
1 मांअ मेराला पावु-बोंअयुहुं, पोरमेहेरांय तुमाहांपेअ खुब रीते केअली दायाअ लीदे आंय तुमनेंह कालावाला कीअहुं का, तुमां सोताल पुरी रीते पोवीतोर भोगु तोरीके, मोंजे का, पोरमेहेराल गोंवें एंहडा आने जीवता भोगु तोरीके तीयाल होपी दा। एज तीयाअ सेवा केरांअ हाराम हारी रीत हाय। 2 तुमां खेरा पोरमेहेराल नांय माननारा ईया दुन्याअ लोकाहांअ धारांअ पोरमाणे मा चालतें! पेन उलटों, पोरमेहेराल तुमांअ मोनुंहन नोवें बोंणावांअ आने तीयाकींअ तुमांअ आखा जीवोना ल बोदलांअ दा! तांहांअज पोरमेहेराअ मोर्जी काय हाय, मोंजे, खेरों काय हाय आने तीयाल काय गोंवेंह, आने हाराम-हारों काय हाय तों तुमां जांय सेकाह।
3 पोरमेहेरांय तीयाअ मेरबानीकींअ मालीखाअ खास चेला तोरीके, तुमांअमेर्याअ दोरेकुल मांअ एंहकींअ आखुलोंअ हाय का, तुमाहांमेनेअ केडों बी सोताल होकीकोतुम तों जेंहडों हाय तीयाअ केअता सोताअ गोंणती वादारे नांय केअ। पेन उलटों, तुमांअमेर्याअ दोरेकुल तीयांय ख्रीस्तुपेअ राखला वीसवासाअ लीदे पोरमेहेरांय तीयाल देदला वोरदानाहांन ईत कीईन तीयाअ पोरमाणे होमजुण्या मांहांअ तोरीके तो सोताअ गोंणती केअ। 4 आपुअ एकुज सोरीलाम खुब भाग हाय। तेबी तीया दोरेक भागाअ कामें जुदें जुदें हाय। 5 तेंहकींअज कीईन, आपुंह खुब हाय तेबी ख्रीस्तुअ आर्याअ आपुअ जोळाणुअ लीदे आपुंह एकुज टोलामेर्येंअ हाय। आने एकुज सोरीलाअ जुदा-जुदा भागुंअ होच आपुंह एक बीहराअरी जोळाअलें हाय। तीयाअ लीदे, केडों बी तो बीहराहांअ केअता चोळ्यातो हाय एंहडों नांय वोरते! 6 उलटों, पोरमेहेरांय जें कामें केरांअ आपनेंह वोरदानें देदेंह, तें कामें आपुंह कालजी राखीन आने राजी वीईन केअजी! काहाका, आपुंहमेर्योंअ दोरेक पोरमेहेरांय तीयाल देदला वोरदानु पोरमाणे बीहराहांअ केअता जुदें-जुदें खुब जातीअ कामें कीअ सेकेह। पोरमेहेराअ गोठ आखांअ वोरदान जीयाहांन मील्योंह तें पोरमेहेरांय तीयाहांन आख्या पोरमाणे ते गोठ आखे! 7 बीहराहांअ सेवा केरांअ वोरदान जीयाहांन मील्योंह, तें तीयाअ पोरमाणे बीहराहांअ सेवा केअ! 8 बीहराहांन उफ दांअ वोरदान जीयाहांन मील्योंह, तें तेंहकींअ केअ! सोतापेअ जों हाय तों बीहराहांन वाटी देनारें, तों राजी वीईन वाटी दे! मोंडोळाअ कारभारो चालवुअनारें कालजी राखीन तो कारभारो चालवे! जोरुलीम रेनारांअ मोदोत केअनारें राजी वीईन तीयाहांअ मोदोत केअ!
ख्रीस्ती जीवोनाअ नीयोम
9 बीहराहांपेअ खेरा मोनाकींअ माया राखा! जों खोटों हाय तीयाअ से सेटे रा! आने पोरमेहेराअ नोजराम जों हारों हाय तों केअतें रा! 10 एक-बीहरापेअ पुरा मोनाकींअ माया राखा! बीहरें तुमनेंह मान दे तीयाअ पेअलांअ तुमां तीयाहांन मान दा! 11 तुमांअ सोताअ कामें केरांअ आलाह मा केअतें! हुची हुचीम मालीखाअ सेवा केअजा!
12 तुमांअ आस्याअ लीदे खुस वेअजा! दुखाहांअ वोखत धीरोज राखा! आने जीव पाळ्या वोगुर पोरमेहेराल ओरुज केरा! 13 पोरमेहेराअ लोकाहांअ जोरुल्या पुर्या पाळा! गोवाराहांअ चाकरी केरांअ कालजी राखा! 14 तुमनेंह दुखें देनाराहांन पोरमेहेर आसीरवाद दे एंहडी तीयाल ओरुज केरा! आंह, तीयाहांन आसीरवाद दे एंहडीज ओरुज केरा! पोरमेहेर तीयाहांन हाराप दे एंहडी ओरुज मा केअतें! 15 आनोंद केअनारांअरी तुमां बी आनोंद केरा! दुखी वेअ तीयाहांअरी तुमां बी दुखी वेरा!
16 एक-बीहराअरी ईली-मीलीन रा! ओलका कामाहांन बी राजी वीईन केरा! तुमां एखलेंज ओकलीवालें हाय एंहकींअ मा धारतें! 17 तुमांअ खोटों केअनारांअ तुमां बी खोटों कीईन तीयाअ बोदलो मा वालतें! बादाहांन गोंवें एंहडें कामें केरांअ कोसीस केरा! 18 बोंणे तांव बादाहांअरी सांतीम रा!
19 मांअ मेराला पावु-बोंअयुहुं, तुमांअ खोटों केअनारांअ तुमां सोतेज वेर मा वालतें! पेन उलटों, पोरमेहेराल तीयाअ वेर वालांअ दा! काहाका, पोवीतोर लेखाणाहांम मालीख एंहकींअ आखेह:
“वेर वालांअ ता मांअज जोवाबदारी हाय।
तुमांअ खोटों केअनारांअ बोदलो वालनारो ता आंयज हाय, तुमां नांह।”
20 पेन जेंहकींअ पोवीतोर लेखाणाहांम लेखलों हाय तेंहकींअ,
“तोअ दुसमोन पुखो वीअ ता, तीयाल खावावजे!
आने जो तो फांअप्यो वीअ ता, तीयाल पांय पीयावजे!
काहाका, एंहकींअ कीईन तीयाल तुं नाजवावोह आने तोअ बाबोताम तीयाअ वोलोण बोदली सेकोह।”
21 बीहरों केडों बी तोअ खोटों केअ ता, तुं बी तीयाअ खोटों कीईन हाराय मा जातो! पेन उलटों, तीयाअ भोलों कीईन तीयु खोटायुलुज हारवुअजे!